info@energjia.al

Marrëdhëniet mes Turqisë dhe Qipros janë tensionuar sërish duke rrezikuar një destabilizim të rajonit. Kësaj radhe, shkak është bërë nafta.

Dy javë më parë, Turqia dërgoi dy anije dhe një nëndetëse për të monitoruar procesin e shpimit në det nga francezët e Total dhe italianët e Enit për llogari të qeverisë qipriote në lindje të Mesdheut.

Duket se Turqia nuk do ta kapërdijë një fakt të tillë, duke i konsideruar ujërat në të cilat po eksplorohet për naftë si ujëra territoriale të Turqisë.

Që prej vitit 1974, kur Turqia pushtoi pjesën veriore të ishullit marrëdhëniet mes dy vendeve kanë qenë tejet të tensionuara. Së fundmi, ka qenë kryeministri turk, Binali Yildirim, ai i cili paralajmëroi Qipron për lëvizjet e saj për eksplorim nafte në lindje të Mesdheut.

Sipas Yildirim, këto lëvizje janë të rrezikshme dhe të parakohshme. Kryeministri turk i bëri këto deklarata gjatë një ceremonie në kryeqytetin e Qipros, Nicosia në përvjetorin e 43-të të pushtimit turk të pjesës veriore të ishullit.

Turqia pretendon se burimet natyrore përreth ishullit i takojnë të dyja palëve. Tensionet për gazin dhe naftën u shfaqën menjëherë pas dështimit të negociatave për bashkimin e ishullit më 7 korrik.

Scan Tv,  21.07.2017

Kompania ndërkombëtare e kërkimit të naftës Petromanas Energy ka mbyllur përfundimisht degën e saj në Shqipëri. Më 12 qershor, Petromanas Albania ka depozituar në Qendrën Kombëtare të Biznesit kërkesën zyrtare për likuidimin e zyrës në Shqipëri.

Përmes dokumentit, kompania njofton kreditorët për likuidimin e kompanisë dhe i fton për depozitimin e pretendimeve të mundshme. Në marsin e vitit të shkuar Petromanas Albania i shiti asetet e saj për 45 milionë dollarë tek gjigantja e hidrokarbureve SHELL, pas rezultateve pozitive të testit të pusit Shpiragu-2.

Deri në atë kohë, Petromanas zotëronte 75% të aksioneve të kërkimit, ndërsa SHELL 25%.  Ky zbulim, i ardhur pas katër viteve shpime, ngjalli interesin e shumë kompanive për të eksploruar për naftë në Shqipëri, gjë që solli edhe blerjen e të gjithë aksioneve të kërkimit nga ana e SHELL. Likuidimi i degës shqiptare të shoqërisë Petromanas vjen pasi ajo i shiti marsin e shkuar asetet tek gjigantja SHELL për 45 milionë dollarë.

Scan Tv,  04.07.2017

Qeveria greke ka miratuar propozimin për të eksploruar për burime hidrokarburesh nënujorë në detin Jon, pranë kufirit me Shqipërinë, si dhe në Kretë, siç duket edhe nga kjo hartë.

Ishte ministri grek i mjedisit, George Stathakis ai që miratoi propozimin e dytë për eksplorim në Greqinë Perëndimore, me kërkesë të Energean Oil and Gas. Kërkesën për të eksploruar në Kretë e kanë bërë Total, Exxon Mobil dhe Hellenic Petroleum consortium.

Energean oil and gas, është e interesuar për eksplorim nënujor  dhe gëzon të drejtat për ta bërë këtë në blloqet 3 dhe 7 të detit jon.

Këto blloqe, janë njëri në pjesën ujore që rrethon ishullin e Korfuzit nga ana perëndimore dhe tjetri në jug të ishullit, në bllokun që përfundon në Gjirin e Artës.

Bëhet fjalë për një sipërfaqe totale prej 6700 kilometrash katrorë.

Nëpërmjet një njoftimi për shtyp, Energean, kompania që do të kryejë eksplorimin deklaroi se një epokë e re po vjen. Në pjesën veriperëndimore të Greqisë, pranë kufirit me vendin tonë, mendohet se ekziston një rezervë nënujore gjigande nafte.

Scan Tv,  27.06.2017

Kompania SHELL, e cila po realizon operacionet e nxjerrjes së naftës në zonën e Beratit në tre puse, tani është në përfundim të negociatave me Agjencinë Kombëtare të Burimeve Natyrore për të arritur një marrëveshje hidrokarbure për Bllokun 4, që shtrihet në zonën mes Sarandës dhe Gjirokastrës.

Dje u zhvillua raundi i radhës së negociatave ndërmjet AKBN dhe SHELL. Burimet zyrtare në AKBN bënë me dije se ky ishte takimi i radhës së grupit negociator të të dyja palëve, mbas negocimit mbi Marrëveshjen Hidrokarbure të Bllokut 4 të kërkimit, e cila tashmë po shkon drejt finalizimit.

Drejtor Ekzekutiv i AKBN-së, Viktor Tushaj, u shpreh se “mbas disa negociatash, po shkojmë drejt finalizimit të Marrëveshjes Hidrokarbure, e cila vjen në një moment të rëndësishëm për SHELL në lidhje me kërkimin e naftës dhe të gazit në pusin e Shpiragut për Bllokun 2-3”.

Ai tha se “ne jemi munduar të krijojmë një kontratë model edhe për kontrata hidrokarbure që do vijjnë më pas, duke pasur parasysh interesat e shtetit shqiptar, si dhe nga ana tjetër t’i lejojë SHELL për të punuar në kushte të qeta dhe të sigurta. Ne urojmë që kjo kontratë të finalizohet sa më shpejt”.

Rohan D‘Souza, përfaqësuesi i SHELL Upstream Albania, shpreson që shumë shpejt të ketë një marrëveshje hidorkarbure të finalizuar për Bllokun 4 të kërkimit.

Sipas Agjencisë Kombëtare të Burimeve Natyrore, investimet e kryera deri tani në kuadër të kësaj marrëveshje hidrokarbure nga SHELL arrijnë në rreth 270 milionë USD.

AKBN, në mes të vitit 2015, ftoi të gjitha kompanitë hidrokarbure të aplikonin për blloqet e lira (tokësore) të naftës, përkatësisht Blloku 4 dhe Blloku i Dumresë.

Revista Monitor,  18.05.2017

Konsorciumi Kosovar i Organizatave të Shoqërisë Civile për Zhvillim të Qëndrueshëm (KOSID) organizon tryezë diskutimi me temë “Interesi publik mbi eksplorimin e linjitit në Kosovë,” sot në sallën e konferencave “Orion”.

Tryeza do të ketë temë diskutimi investimet potenciale në sektorin e linjitit në Kosovë, duke shtjelluar parimet ligjore dhe ekonomike, si dhe realizueshmërinë e projekteve me interes publik në vend.

Tutje, tryeza ka për qëllim të bashkoj përfaqësues të institucioneve dhe akterëve relevant të Kosovës, për të diskutuar projektet të cilat kanë si fokus eksplorimin e rezervave të linjitit në Kosovë.

Agjensia e lajmeve ekonomia,  26.09.2016

Ulja e çmimeve të naftës ka ulur edhe eksplorimin dhe zhvillimin e hidrokarbureve në mbarë botën. Kompanitë e naftës dhe industria e shërbimeve që mbështet eksplorimin kanë shkurtuar dhjetëra mijëra punëtorë gjatë muajve të fundit. Nuk është surprizë që edhe pjesëmarrja në konferencën vjetore të teknologjisë për nxjerrjen e naftës nga deti ishte e ulët.

Realiteti virtual vjen në fushat e naftës nëpërmjet kësaj paisjeje të krijuar nga një kompani kineze. Por, ndoshta nuk do të ketë treg të madh në këtë periudhë. Milo Lu thotë se çmimet e ulëta të naftës kanë ulur aktivitetin eksplorues pothuajse kudo.

“E vetmja zonë ku vazhdon puna është Lindja e Mesme. Gjithkund tjetër ka ndaluar.”

Megjithatë një ekran i madh është vendosur tek konferenca e këtij viti.

“Duhet të tregojmë se vazhdojmë të ekzistojmë.”

Megjithëse ka rënë pjesëmarrja këtë vit, kompanitë e shërbimeve ofrojnë këtu gjithçka, që nga anijet e mëdha dhe platformat e eksplorimit dhe deri tek paisjet e vogla që monitorojnë rrjedhën e tubave.

Richard Nott, i një firme londineze, thotë se kompanitë që po mbyllin projektet do të kenë nevojë rrjedhimisht për shërbime.

“Shumë nga këto projekte që janë pezulluar nuk janë zhdukur. Po mendojnë se si mund të operojnë më shpejt, me çmim më të ulët dhe me më shumë efikasitet.”

Brady Austin, i degës së kompanisë në Houston, thotë se zhvillimi i një projekti për kërkimin e naftës në det është një investim i kushtueshëm afatgjatë.

“Duhen vite të tëra pasi duhen marrë shumë vendime, dhe në një treg të tillë duhet parë çdo hap me sy kritik.”

Steve Koch, i kompanisë “3M”, demonstron një parzmore mbrojtëse dhe një sistem shpëtimi për punëtorët që punojnë në platfoma në det.

“Ka ende punëtorë në platforma, të cilët duhen mbrojtur. Ne mundohemi t’u ofrojmë punëdhënësve zgjidhjet me koston më të ulët.”

Megjithëse ka një rritje të vogël rishtazi në çmimet e naftës, shumica e pjesëmarrësve në konferencë thonë se janë përgatitur për një rënie që mund të zgjasë për të paktën një vit dhe më tej.

Zëri i Amerikës,  06.05.2016

Ulja e çmimeve të naftës ka ulur edhe eksplorimin dhe zhvillimin e hidrokarbureve në mbarë botën.

Kompanitë e naftës dhe industria e shërbimeve që mbështet eksplorimin kanë shkurtuar dhjetëra mijëra punëtorë gjatë muajve të fundit. Nuk është surprizë që edhe pjesëmarrja në konferencën vjetore të teknologjisë për nxjerrjen e naftës nga deti ishte e ulët.

Realiteti virtual vjen në fushat e naftës nëpërmjet kësaj paisjeje të krijuar nga një kompani kineze.

Por, ndoshta nuk do të ketë treg të madh në këtë periudhë. Milo Lu thotë se çmimet e ulëta të naftës kanë ulur aktivitetin eksplorues pothuajse kudo.

“E vetmja zonë ku vazhdon puna është Lindja e Mesme. Gjithkund tjetër ka ndaluar.”

Megjithatë një ekran i madh është vendosur tek konferenca e këtij viti. “Duhet të tregojmë se vazhdojmë të ekzistojmë.”

Megjithëse ka rënë pjesëmarrja këtë vit, kompanitë e shërbimeve ofrojnë këtu gjithçka, që nga anijet e mëdha dhe platformat e eksplorimit dhe deri tek paisjet e vogla që monitorojnë rrjedhën e tubave.

Richard Nott, i një firme londineze, thotë se kompanitë që po mbyllin projektet do të kenë nevojë rrjedhimisht për shërbime.

“Shumë nga këto projekte që janë pezulluar nuk janë zhdukur. Po mendojnë se si mund të operojnë më shpejt, me çmim më të ulët dhe me më shumë efikasitet.”

Brady Austin, i degës së kompanisë në Houston, thotë se zhvillimi i një projekti për kërkimin e naftës në det është një investim i kushtueshëm afatgjatë.

“Duhen vite të tëra pasi duhen marrë shumë vendime, dhe në një treg të tillë duhet parë çdo hap me sy kritik.”

Steve Koch, i kompanisë “3M”, demonstron një parzmore mbrojtëse dhe një sistem shpëtimi për punëtorët që punojnë në platfoma në det.

“Ka ende punëtorë në platforma, të cilët duhen mbrojtur. Ne mundohemi t’u ofrojmë punëdhënësve zgjidhjet me koston më të ulët.”

Megjithëse ka një rritje të vogël rishtazi në çmimet e naftës, shumica e pjesëmarrësve në konferencë thonë se janë përgatitur për një rënie që mund të zgjasë për të paktën një vit dhe më tej.

Agjensia e lajmeve ekonomia,  06.05.2016

Teksa Kroacia përgatitet për eksplorimin e naftës dhe gazit në detin Adriatik, grupet ambientaliste kanë ngritur shqetësime në lidhje me mjedisin dhe ekonominë e ishujve të vendit të varur nga turizmi dhe bregdeti i virgjër.

Qeveria ka vendosur që në shtator të nënshkruajë kontrata me dy grupe të energjisë, të cilave i ka dhënë të drejtën të eksplorojnë dhe shpojnë për naftë dhe gaz në detin Adriatik për një periudhë 30- vjeçare. ‘Ky është një projekt shumë i rëndësishëm për Kroacinë’, – tha Barbara Dorik, kreu i Agjencisë së Hidrokarbureve.

Shfrytëzimi i burimeve shtesë ‘të cilat ne supozojmë se i kemi në Adriatik, do të mundësojë që vendi të bëhet i pavarur energjetikisht, kur bëhet fjalë për gaz, madje të kthehet në një eksportues’, – tha ajo.

Dy licencat i janë dhënë grupit të naftës INA – në pronësi të përbashkët me shtetin kroat dhe MOL të Hungarisë – dhe një e dytë ENI dhe MEDOILGAS të Italisë.

Qeveria synon që me këtë projekt t’i japë ekonomisë së Kroacisë, e cila është zhytur në recesion që nga viti 2008, shtysën për të cilën ajo ka aq shumë nevojë.

Zyrtarët vlerësojnë se përfitimet direkte për buxhetin e shtetit do të mund të arrijnë eventualisht rreth 1 miliard paund fitim neto në vit. Nga eksplorimi pritet të rezultojnë edhe efekte indirekte pozitive, të tilla si zhvillimi i industrive mbështetëse ose krijimi i vendeve të reja të punës në një vend ku papunësia qëndron në 20%. ‘Efekti domino mund të rezultojë me të vërtetë i fortë’,- tha Dorik. ‘Llogaritjet e ndikimit potencial në Produktin e Brendshëm Bruto të vendit (PBB) tregojnë se ai mund të variojë nga 3 deri në 4%, një shifër e lartë kjo’.

Por që kur projekti u prezantua, ka ngjallur kritika të forta nga grupet vendase dhe ndërkombëtare të interesuara për mjedisin, si dhe ekonominë. Shumë kroatë frikësohen se mund të dëmtohet seriozisht industria e paçmuar e turizmit të vendit ballkanik.

Turizmi, i cili është rimëkëmbur gradualisht që nga lufta për pavarësi e ish-Republikës Jugosllave në vitin 1996, llogaritet për rreth 20% të PBB-së së Kroacisë.

Ata që kundërshtojnë shpimin pretendojnë se rreziqet janë shumë më të mëdha se përfitimet e mundshme. ‘Është e pamundur të zbatosh një projekt të tillë pa dëme shumë të rënda si për mjedisin ashtu dhe ekonominë vendase (që është) e bazuar në turizëm dhe industrinë e peshkimit’, – referoi Vjeran Pirshiç, kreu i grupit mjedisor Eko Kvarner.

Pirshiç gjithashtu pretendoi se shpimet e naftës në det të hapur nuk do të përputhen me përfitimet nga turizmi, të cilat vitin e kaluar arritën 7.4 miliardë euro. ‘Kjo do të thotë se ne po luajmë në ruletën ruse’, tha ai. Grupet ambientaliste paralajmërojnë se në detin relativisht të vogël dhe të cekët të Adriatikut, faza e eksplorimit, që pritet të zgjasë deri në pesë vjet, përfshirë kërkimet sizmike dhe shpërthimin nënujor, do të ndikojë seriozisht jetën detare.

Ndikimi vizual i platformave të naftës në horizont, pretendojnë ata, do të dekurajojë turistët, sidomos ata që lundrojnë përgjatë mijëra ishujve piktoreskë të Kroacisë. ‘Në rastin më të keq do të ishte një katastrofë totale, ne nuk do të jemi në gjendje të mbijetojmë, fëmijët dhe nipërit tanë do të vdesin për bukë’, – paralajmëroi Pirshiç.

Kroacia, çdo vit, mirëpret si turistë pothuajse trefishin e numrit të popullsisë së saj prej 4.2 milionë banorësh, ku shumica viziton bregdetin e saj mahnitës të Adriatikut.

Grupet ambientaliste kanë pretenduar se projektit i mungon një studim i duhur mjedisor dhe akuzojnë autoritetet se nuk janë konsultuar me komunitetet lokale në lidhje me të.

Muajin e kaluar, këshilli i qytetit të Dubrovnikut – perla e bregdetit të Adriatikut – miratoi një rezolutë kundër shpimit.

Por autoritetet kroate i refuzojnë me vendosmëri akuzat dhe thonë se qytetarët janë informuar në mënyrë të qartë në lidhje me çdo hap të këtij projekti. ‘Nuk ka vend për asnjë lloj paniku, pasi ky është një proces shumë i kontrolluar’, – tha Dorik, duke siguruar se Kroacia do të zbatojë standardet më të larta të sigurisë.

Qeveria vuri në dukje se eksplorimi për naftë dhe gaz ka vijuar për dekada të tëra në anën italiane të Adriatikut. Eksplorimet e para në Kroaci filluan në vitin 1970 dhe aktualisht ekzistojnë 20 platforma që shfrytëzojnë gaz përgjatë pjesës veriore të gadishullit Istria të vendit. ‘Ata që janë kundër (projektit) … janë kundër zhvillimit industrial të Kroacisë’, – tha ministri i Ekonomisë, Ivan Vrdoljak. Kroacia prodhon rreth 60% të gazit të vet natyror dhe importon 80% të nevojave të saj vjetore për naftë.

Ndërkohë, kroatët janë të përçarë rreth çështjes

Sondazhet tregojnë se deri në 52% e kroatëve e kundërshtojnë projektin, duke cituar si shqetësimin kryesor të tyre turizmin, teksa ata e mendojnë si më të rëndësishëm për vendin se nafta dhe gazi. Ata që mbështesin shfrytëzimin e një projekti të tillë thonë se përfitimi kryesor do të jetë se Kroacia do të bëhet e pavarur për energji.

‘Rreziqet nuk do të jenë shumë më të mëdha se sot, duke pasur parasysh se të gjitha platformat aktualisht gjenden atje, dhe vendi me siguri mund të përdorë të ardhura shtesë’, tha Nenad, një 53-vjeçar pronar i një anije me vela nga Zagrebi.

Nedjeljko Lesica, një peshkatar dhe ish-pronar restoranti nga Njivice ndan një mendim të ndryshëm.

‘Vini re këtë bukuri’, – tha ai me krenari duke treguar ujin kristal të pastër në një gji të një fshati të vogël në ishullin Krk.

‘Ky projekt është i keq për të gjithë. Çdo gjë do të jetë në rrezik –peshkimi, kryesisht turizmi, dhe ne do të jetojmë nga kjo’, tha 67-vjeçari. ‘Kur do të rimëkëmbemi në rast të fatkeqësie? Kurrë!

AFP,  06.09.2015

Kompania e madhe franceze e naftës, Total nënshkroi një marrëveshje të hënën për të eksploruar naftë në det të hapur me kompaninë shterërore të naftës së Kubës CubaPetroleo (Cupet) në një marrëveshje të arritur gjatë një vizite në vendin komunist të drejtuar nga presidenti francez Francois Hollande.

Televizioni shtetëror kuban njoftoi marrëveshjen e eksplorimit, pa dhënë detaje të mëtejshme.

Një duzinë firmash të huaja kanë hulumtuar në ujërat e thella të Kubës gjatë viteve, duke investuar në katër puse, por duke mos gjetur naftë.

Total ka hulumtuar në afërsi të bregut, duke shpuar dy puse në fillim të viteve 1990. Ata nuk gjetën gjë dhe Total u largua në vitin 1995.

Për më shumë se një dekadë, Kuba ka afirmuar se Zona e saj Ekskluzive Ekonomike përtej bregdetit veriperëndimor zotëron më shumë se 20 miliardë fuçi bruto të pazbuluara.

Javën e kaluar Kuba zbuloi të dhëna të reja duke konfirmuar se në thellësi të ujërave të saj në Gjirin e Meksikës gjendeshin miliarda fuci nafte.

Studimi Gjeologjik i SHBA ka vlerësuar se rajoni zotëron 5-7 miliard fuçi.

Firma shtetërore venezuelane e naftës PDVSA dhe firma shtetërore ruse Zarubezhneft ende ruajnë të drejtat e eksplorimit, sipas Roberto Suarez Sotolongo, bashkë-drejtor i Cupet.

Kuba shpreson se zbulimi i naftës në det të hapur do ta clirojë atë nga varësia ndaj vendeve të tjera, të tilla si aleati socialist, Venezuela.

Revista Monitor, 12.05.2015

Shpimi i naftës dhe i gazit në Adriatik duket i pashmangshëm, por a po ndryshon situata, teksa kryeministri kroat, Zoran Milanoviç, po shpall synimin e tij për të mbajtur një referendum mbi këtë çështje?

Historia e diskutueshme e shpimit të naftës dhe gazit në Adriatik mori një tjetër kthesë, teksa Kryeministri Zoran Milanoviç njoftoi se ai do të organizojë një referendum mbi këtë temë, kur u pyet nga gazetarët në një vizitë në ishullin Rab, sipas “Croatia Week”.

Turizmi kroat, i cili bazohet kryesisht me fuqinë e ujërave të pacenuara, plazhet e saj të praruara dhe diellit që shkëlqen pa fund në Adriatik, është një kontribuues i madh për arkat e vendit. Megjithatë, Kroacia po përballet me një krizë ekonomike, plus kriza e Rusisë nënkupton se Europa po kërkon për zgjidhje alternative të naftës dhe gazit, kështu që pritet që presioni për shpim do të vazhdojë.

Edhe pse çështjet janë shumë më komplekse, siç është referuar më parë në Digital Journal, për disa shpime në Adriatik do të ishte vetëvrasje e turizmit, ndërsa për të tjerët përfitimet ekonomike tejkalojnë konsideratat e tjera.

Në një tjetër zhvillim potencialisht të rëndësishëm kohët e fundit, fqinji verior Adriatik i Kroacisë, Sllovenia, shprehu dëshirën për t’u përfshirë në vlerësimin e planifikuar të ndikimit në mjedis për shfrytëzimin e hidrokarbureve në detin Adriatik.

Duke folur për gazetarët në Rab, Kryeministri Milanovic deklaroi se kjo ishte diçka që ai nuk mund ta vendosë i vetëm:

‘Deri tani në Kroaci, ne kemi përdorur referendumet në lidhje me çështje të cilat nuk janë kritike për kombin, dhe tani unë sugjeroj le t’i drejtohemi sërish referendumit për të parë nëse ne duam të shfrytëzohen mineralet dhe materialet e papërpunuara, për të cilat është luftuar nëpër botë, dhe ne mund t’i kemi ato nëntokë, ose do t’i injorojmë për shkak të zërit të pakicës që është më i lartë, dhe që ka të drejtë të jetë i lartë’.

“Ne kemi oferta nga hulumtuesit më të njohur në botë, të cilët mund të gjejnë diçka me vlerë prej miliardash. A do ta humbasim atë shans? Ky është një vendim të cilin unë nuk mund ta marr i vetëm”.

Digital Journal kontaktoi lojtarët kryesorë në të dy anët e argumentit për shpimin e naftës dhe gazit në Adriatik. Një kërkesë me email, për koment mbi referendumin e propozuar, ndaj Barbara Dorik, president i Agjencisë Kroate të Hidrokarbureve, mori këtë përgjigje:

“Unë nuk jam në pozitë për të vendosur nëse duhet apo nuk duhet të mbajmë një referendum për këtë çështje. Kjo është një çështje e qeverisë dhe Parlamentit, dhe në rastin e një referendumi, i të gjithë qytetarëve kroatë.

Si president i Agjencisë për Hidrokarburet, ndaj një pikëpamje të qartë mbi përfitimet e projektit. Agjencia e Hidrokarbureve është institucion i pavarur profesional, i cili, në mënyrë transparente, menaxhon procesin e eksplorimit dhe shfrytëzimit të naftës dhe gazit në interesin më të mirë të qytetarëve dhe të ekonomisë kroate. Ne jemi të angazhuar për një diskutim të arsyetuar dhe profesional, por ne jetojmë në një shoqëri demokratike, dhe ku është e mundur të merren vendime strategjike edhe nën ndikimin e emocioneve”.

Znj. Doric ka rënë dakord edhe për një intervistë më të plotë me Digital Journal mbi çështje të ndryshme dhe shqetësimet për këtë projekt, që pritet të publikohet së shpejti.

Ekzistojnë nisma të ndryshme që kundërshtojnë shpimin në xhevahirin e turizmit të Kroacisë, Adriatikun e pacenuar, më e organizuara e të cilave është Clean Adriatic Sea Alliance, që iu përgjigj edhe kërkesës për koment nga Digital Journal:

“Shumica e kroatëve po përballen me realitete ekonomike që pengojnë të fokusohesh përtej sigurimit të mbijetesës, nëse ata janë të vetëdijshëm për debatin mbi shpimin në Adriatik, ata ka më shumë të ngjarë të besojnë se problemet e Kroacisë me shlyerjen e pagesave do të përmbushen si rezultat i kësaj. Të gjitha dëshmitë (mbi një bazë globale) dëshmojnë për të kundërtën – të vetmet palë që do të fitojnë financiarisht nga këtë përpjekje janë kompanitë e naftës, burokratët, si ata në Agjencinë kroate të Hidrokarbureve, dhe firmat e punësuara nga qeveria sikundër janë ekspertët servilë veçanërisht për të siguruar keqinformim të publikut.

“Nëse do të mbahet një referendum i vërtetë, atëherë kroatët duhet të shkëputen nga futbolli, telenovelat dhe argëtimet e tjera të tyre dhe të kuptojnë në mënyrë universale rreziqet për ‘Mesdheun siç ishte dikur’- dhe çfarë do të thotë e gjithë kjo për turizmin, të ardhurat nga peshkimi dhe trashëgimia jonë natyrore. Referendumi mbi shpimin e propozuar në Adriatik siç sugjerohet nga kryeministri Zoran Milanoviç, duket i pasinqertë duke pasur parasysh kohën se kur ai e propozoi.

I gjithë qëllimi i demokracisë është që të kemi pjesëmarrjen e qytetarëve të saj në prag të aktiviteteve të qeverisë që do të ndryshojnë në mënyrë dramatike cilësinë e tyre të jetës dhe atë të gjeneratave që do të vijnë”.

Çfarë do ndodhë tani mbetet ende për t’u parë. Ky është vit i zgjedhjeve në Kroaci, dhe licencat tashmë janë dhënë, por zhvillimet e fundit do të ofrojnë shpresë për aktivistët e prirë të mbrojnë jo vetëm një thesar natyror, por burimin kryesor të të ardhurave të turizmit, i cili është përgjegjës për më shumë se 20% të PBB-së së Kroacisë.

Revista Monitor,  28.03.2015