Bosnje, tender për eksplorimin e naftës dhe gazit

Qeveria e Federatës së Bosnjës do të hapë një tender për dhënien e një kontrate koncesioni për zbulimin dhe prodhimin e naftës dhe gazit në pellgun e Panonias dhe të Alpeve Dinarike, deklaroi ministri i Energjisë, Nermin Dzindic.

Qeveria ka vendosur të nisë aktivitetet përgatitore për dhënien e koncesionit, që krijon mundësinë për hapjen e tenderit, tha z. Dzindic në një deklaratë për shtyp.

Pasi të jetë hapur tenderi, të gjitha palët e interesuara do të kenë gjashtë muaj kohë për të paraqitur ofertat e tyre. Z. Dzindic tha se Federata do t’u ofrojë investitorëve të kërkojnë për depozita hidrokarbure në tre blloqe në pellgun Panonian (BiHPo1, BiHPo2 dhe BiHTz) dhe në një bllok në zonën e Alpeve Dinarike (BiHD1), që përfshin një sipërfaqe prej 5,115 kilometrash katrorë.

Në shkurt, qeveria e Federatës punësoi kompaninë IHS Global me qendër në Londër për t’i mundësuar asaj shërbime konsulence mbi këtë projekt.

Muajin e kaluar, IHS Global organizoi disa evente për të promovuar tenderin e planifikuar për investitorët e interesuar në Londër, në Sarajevë të Bosnjës, si dhe në Takimin e 7 të Ballkanit mbi Çështjet e Naftës që u mbajt në Budva të Malit të Zi. Qeveria e Federatës tha se një total prej 22 përfaqësuesish të kompanive të interesuara morën pjesë në eventin e organizuar në Londër.

Në shtator të 2015, u tha se kompania Shell do të kryente kërkime gjeologjike dhe gjeofizike për të përcaktuar perspektivat e naftës dhe gazit të Federatës. Sipas raporteve të mëparshme të mediave, pas tërheqjes së Shell-it, disa kompani ndërkombëtare, duke përfshirë Total-in e Francës, Key Petroleum të Australisë dhe Spectrum të Britanisë së Madhe treguan interes për projektin. Federata është një nga dy entitetet autonome që përbëjnë Bosnjën dhe Hercegovinën. Tjetra është Republika Serbe.

Monitor,  07.12.2019