Ahmeti, matësit inteligjent, hap pozitiv

OK matësve inteligjentë, por vendosuni edhe matës të zakonshëm qytetarëve që nuk janë të pajisur. Ky qëndrim i Entit Rregullator të Energjisë, me synim eliminimin e faturimit aforfe, u deklarua nga kryetari i ERE-s, Petrit Ahmeti, dje në diskutimin e ligjit për energjinë, në Komisionin për Veprimtaritë Prodhuese. Ahmeti deklaroi se pavarësisht uljes së humbjeve në rrjetin e energjisë në 37% dhe rritjes së arkëtimeve, problemi më i madh me të cilin përballet sistemi është mungesa e pajisjes së konsumatorëve me matës. “Jemi duke dialoguar me kompaninë për të filluar marrjen e masave që lidhen me pajisjen e konsumatorëve që nuk kanë matës. Është një plagë e keqe dhe e dëmshme për sektorin, sepse nuk ka kontroll lidhur me konsumin e energjisë”, tha Ahmeti. “ERE do të mbështesë çdo projekt që modernizon rrjetin, si ai për pajisjen e konsumatorëve me matës inteligjentë”, deklaroi Ahmeti. Për demokratët, vendosja e matësve të tillë nuk e zgjidh problemin në sistem, ndërsa drejtuesi i ERE tha se projekti do të japë rezultate pozitive. Sipas deputetëve të opozitës, kjo nuk do të sjellë zgjidhjen e problemit pa zhdukur më parë informalitetin përmes plotësimit të çdo konsumatori me matës apo rasteve të matësve të dëmtuar, për të cilët konsumatorët faturohen aforfe. “Matësi inteligjent nuk është çelësi i artë, që do të na zgjidhë gjithçka. Problemi është mbushja e gropës që nuk po mbushet prej 24 vjetësh. Të pajisim të gjithë konsumatorët shqiptarë me matësit sipas standardeve që janë”, u shpreh deputeti i PD-së, Kozma Dashi. Sipas OSHEE, numri i konsumatorëve që faturohen aforfe është 50 mijë nga 1.2 milionë konsumatorë në total të energjisë. Duke dhënë mendimet e tij për projektligjin e ri “Për sektorin e energjisë elektrike”, Ahmeti tha se draftimi i projektligjit ka trajtuar një sërë problematikash që ERE ka hasur në sektorin e energjisë. “E vlerësoj momentin që rishikohet ligji për sektorin e energjisë elektrike dhe të gazit, sepse i gjej të trajtuara shumë problematika që ne kemi pasur dhe kemi hasur në sektorin e energjisë, si në sektorin e energjisë elektrike, ashtu edhe në atë të gazit, pavarësisht se ky është një sektor i krijuar rishtas dhe mjaft i ri”, tha Ahmeti. Deputetët e mazhorancës dhe opozitës në komision kërkuan që parashikimet ligjore të përcaktojnë qartë rolin që ka ERE në blerjen e energjisë në raport me operatorët e shpërndarjes dhe të transmetimit të energjisë. Ndërsa, kryetari i komisionit, Eduart Shalsi theksoi se komentet e deputetëve do të merren në konsideratë pasi konsultimi mbi këtë ligj do të vijojë.

Gazeta Shqip, 17.02.2015