Beccheti la Kalivaçin pa ujë, ankohen banorët
Hidrocentrali që duhet të ishte ndërtuar para 12 vjetësh po shkatërron infrastrukturën.
Banorët e fshatit të Kalivaçit në Tepelenë vazhdojnë protestën për atë çka e cilësojnë cenim të interesave të komunitetit nga projekti për ndërtimin e hidrocentralit mbi lumin Vjosë.
Një përfaqësi e banorëve të këtij fshati kanë mbërritur dje në dyert e Ministrisë së Energjisë dhe Industrisë, për të ngritur shqetësimet e tyre. Banorët janë pritur në takim nga zëvendësministri i Energjisë dhe Industrisë, Ilir Bejtja. Nga pjesëmarrësit në këtë takim mësohet se ata paraqitën pretendimet e tyre për atë çka po ndodh në fshatin Kalivaç. Banorët e fshatit që ndodhet në kufirin administrativ mes Tepelenës dhe Mallakastrës, këmbëngulin se gjendja është e rënduar, pompat e ujitjes janë dëmtuar, duke e bërë rrjetin e ujitjes të dalë krejtësisht jashtë funksionit. Gjithashtu, banorët e Kalivaçit ankohen se prej një muaji nuk kanë as ujë të pijshëm në fshat, çka ua ka vështirësuar edhe më shumë jetesën.
Ndërkaq, banorët e akuzojnë sipërmarrësin Beccheti që duhet të ndërtojë Hidrocentralin e Kalivaçit, se ka abuzuar edhe me dëmtimin e rrjetit të energjisë elektrike në fshat, ashtu sikurse janë shkatërruar rrugët ndërlidhëse. Gjatë takimit me zyrtarin e lartë të Ministrisë së Energjisë dhe Industrisë, banorët e Kalivaçit vunë në dukje se gjithashtu ka probleme me shpronësimet dhe me moslikuidimin e pagesave të prapambetura nga firma koncesionare. Kjo firmë, sipas banorëve, nuk ka bërë transparente asgjë dhe ka pasur mungesë komunikimi me komunitetin e Kalivaçit. Përfaqësia e banorëve kërkoi ndërhyrjen e shtetit për të bërë të mundur zgjidhjen e kësaj situate dhe marrjen parasysh të interesave të komunitetit. Hidrocentrali i Kalivaçit ka nisur të ndërtohet në vitin në vitin 1997. Sipas kontratës, vepra me fuqi 93 mega duhet të përfundonte në vitin 2002. HEC-i duhet të prodhonte 350 milionë kilovat orë energji në vit. Projekti ka shkelur tri herë afatet ligjore. Agjencia Kombëtare e Burimeve Natyrore në një raport mbi ecurinë e punimeve deklaron se firma nuk ka realizuar shumicën e punimeve, në një kohë kur hidrocentrali duhet të ishte në fazën e prodhimit.
Koncesioni
Historia e hidrocentralit të Kalivaçit nisi me Vendimin e Këshillit të Ministrave nr. 222, datë 24.05.1997 “Për miratimin e marrëveshjes së koncesionit të formës BOT për hidrocentralin e Kalivaçit”, që jepte dritën jeshile për një projekt shumë ambicioz për kohën, që duhej të ndërtohej në harkun kohor të 5 viteve. Koncesionari, BEG S.p.A., ishte një kompani e themeluar më 1995 dhe kishte kapital themeltar të deklaruar 1 milion euro.
Gazeta Shqip, 30.04.2014