Institucionet po i shërbejnë Kelkos-it, nuk po zbatohet kontrata për ndërtim të hidrocentraleve

Aktivistë të shoqërisë civile dhe banorë të Deçanit sot kanë raportuar në Komisionin për Hetimin e hidrocentraleve, të cilët kanë shprehur shqetësimin për ndërtimin e tri hidrocentraleve nga kompania “Kelkos” në këtë komunë dhe neglizhencën e institucioneve. Ata akuzuan institucionet përgjegjëse se ato po i shërbejnë kompanisë “Kelkos” e jo qytetarëve të asaj ane.

Shpresa Loshaj aktiviste nga organizata jo-qeveritare “Pishtarët”, tha se qëllimi i kësaj organizate është me sjell ligjshmërinë e këtyre projekteve dhe rehabilitimin e grykës së Deçanit.

Ajo shprehu dyshimet e saj se për këtë projekt, komuna e Deçanit nuk ka mbajtur as dëgjim publik pasi banorët janë njoftuar për ndërtimin e këtyre hidrocentraleve pas fillimit të punimeve.

Loshaj tha se asnjë nga premtimet që janë të përfshira në kontratën e “Kelkos” deri tani nuk janë përmbushur dhe kjo është e papranueshme për ta.

“Kryetari kishte organizuar dy koncerte sepse po vjen një investim 55 milionësh që ka me sjell punë edhe ka qenë lista se Deçani ka me pas rrymë më lirë gjithmonë rrymë kur nuk kanë vendet tjera në Kosovë kemi me pas investime në sport, kulturë dhe kjo listë nuk është parë nga askush deri në korrik të këtij viti e kemi siguruar përmes ministrisë së Mjedisit që kjo kontratë kishte qenë në disa dokumente… Kontrata ekziston por në asnjë pikë që është aty nuk është përmbushur për të mirën tonë. Një ndër kërkesat tona përpos ligjmërisë është me u përmbushur edhe ajo kontratë se ne nëse është dikush që i ka pranuar edhe kryetari në atë kohë i ka pranuar në bazë të asaj kontrate se ata kanë premtuar gjëra, dhe tash me u fsheh ajo kontratë nuk është e pranueshme”, tha ajo.

Ajo ka akuzuar institucionet se po heshtin para kësaj fatkeqësie dhe po i shërbejnë “Kelkos”-it dhe jo atyre.

“Ka qenë komplet heshtje institucionale, ka qenë shumë e vështirë jo vetëm për punën tonë por edhe për e vështirë me kuptua se sa poshtë kanë rënë institucionet tona, në vend se me qenë në shërbim të publikut dhe tonin. Natyrisht me të gjitha këto që i kanë bërë janë duke i shërbyer ‘Kelkos’-it edhe nëse thonë se nuk jemi duke i shërbyer, fakti se na i refuzojnë kërkesat ata janë duke i shërbyer ‘Kelkos’-it sepse ‘Kelkos’-it i shkon nëse ne nuk dimë asgjë për ta. Ky fakt ka qenë se nuk ka pasur asnjë dokument jashtë dhe ndoshta ‘Kelkos’ ka menduar se do dalin kurrë këto dokumente në dritë …Deri në 10 herë kemi kërkuar prej zyrës së ndërtimit projektin ta shohim projektin nuk ka përgjigje, kam shkuar tek person i kanë thënë se nuk e kemi marr prapë ua kam dërguar. Vetëm Komisioni për Shqyrtim janë të vetmit që na janë përgjigjur dhe na kanë sjell dokumentet që i kanë pasur. Për kushtet e ndërtimit dhe ujit ne nuk kemi qasje”, u shpreh Loshaj.

Ndërsa Muharrem Lulaj banorë i fshatit, Bella të Deçanit ka treguar se ai disa herë ua ka ndërprerë punimet Kelkos-it i cili po ndërton në pronën e tij. Ai thotë se në komunë I thonë se në tokën që Lulaj thotë se është e tij është tokë shoqërore.

Lulaj thotë se me pronën e tij ka ndodhur krim.

“Më 21 shkurt po më duket edhe unë kur kanë prekur në pronë ua kam ndërprerë punën njëherë e kam thirr një prej austriakëve aty dhe i kam thënë se mos tento me hy se nuk është duke u përfillur ligji assesi hiq si mos të ketë shtesë, i kam thënë se kjo është një pronë e imja dhe ia kam treguar disa dokumente dhe i kam thënë se ti vjen nga një shtet ligjore dhe se drejtësia do vjen edhe tek ne. Nuk e ka marr për bazë atë punë asnjë pikë, por e ka marr si një njeri kriminel dhe i pandërgjegjshëm…Ka qenë jashtëzakonisht një krim dhe ka qenë një tmerr dhe të vjen dhe të merret prona privat ku unë ndahem me pronë shoqërore me lumë, ku ka pasur pjesë me u ndërtua në pjesë shoqërore pa e pengua askënd hidrocentrali edhe aty kanë hyrë në mënyrë më të dhunshme që ekziston”, theksoi Lulaj.

Para këtij komisioni deklaratën e tij e ka dhënë edhe banori tjetër nga Deçani, Bajram Gjocaj i cili kërkoi që hapësira e dëmtua të rregullohet.

“Vetëm kisha kërkuar me rregullua atë vend mos me lënë vetëm sikur nuk po e di ku, e as mos me u përgjigjur askush veç me hy e me dal merr zall , është gjynah për natyrë“, theksoi Gjocaj.