3Power Energy Group, do ndërtojë HEC 127 MGW në Shalë
Kompania “3Power Energy Group” ka njoftuar dje se ka fituar një koncesion në Shqipëri për ndërtimin e një hidrocentrali prej 127 Megavat në lumin e Shalës në Malësi të Madhe. Lajmin e ka bërë të ditur vetë kompania. Koncesioni është i tipit BOT dhe 3Power Energy Group ka njoftuar se ka 75 për qind të aksioneve dhe se do të investojë për ndërtimin e këtij HEC-i rreth 180 milionë dollarë, duke e cilësuar Shqipërinë si një ndër vendet më të pasura në botë me burime ujore. Kompania ka njoftuar nëpërmjet një komunikate për shtyp se marrëveshja koncesionare është miratuar nga Ministria e Ekonomisë në Shqipëri dhe nga Këshilli i Ministrave. Gjithashtu, kompania ka njoftuar se vlera e koncesionit të projektit është 20 milionë euro, ndërkohë që parashikohet që hidrocentrali të ketë përfunduar së ndërtuari në vitin 2015. Ky është investimi i parë në Ballkan, ndërkohë që kompania ka investime të ngjashme në vende të tjera të zhvilluara të Europës, në Amerikë dhe Azi.
Gazeta Mapo, 07.01.2012