info@energjia.al

Një tjetar lajm i rëndë është mësuar me kalimin e minutave nga atentati i përgjakshëm që mori dy jetë njerëzish pasditen e sotme në Vlorë pranë Sheshit të Flamurit.

Raportohet se me shumë mundësi drejtori i OSHEE-së ne Vlorë, Roland Saliu, është vrarë gabimisht dhe se shënjestra e krimit ka qenë pronari i televizionit “Vlora Channel”, Erven Hyseni.

Mësohet se të dy viktimat ishin të njohur dhe ishin ulur bashkë në të njëjtën tavolinë.

energjia.al  25.05.2017

Një krim i rëndë ndodhi  mbrëmjen e së mërkurës në qendër të qytetit të Vlorës, ku mbetën të vdekur dy persona. Viktimat janë drejtori i OSHEE rajonale të Vlorës, Roland Saliu dhe Erven Hyseni, pronar i një televizioni lokal dhe i barit ku ndodhi atentati.

Viktimat kanë qenë ulur në mjediset e jashtëme të lokalit të Erven Hysenit, duke konsumuar një kafe me njëri-tjetrin.

Dëshmitarë në vendngjarje, konfirmuan se pranë lokalit ka ndaluar një automjet, nga i cili është qëlluar me breshëri automatiku, nga dritarja e pasagjerit në drejtim të tavolinës, ku ishin të ulur dy viktimat. Drejtori rajonal i OSHEE ka vdekur në vend, ndërsa Erven Hyseni, mbeti i plagosur rëndë dhe ndërroi jetë pak minuta pasi mbërriti në spitalin e Vlorës.

Sipas informacioneve të policisë, mësohet se kanë qenë dy persona me automjet, që kanë kryer atentatin. Njëri prej tyre ka qëlluar duke rrezikuar edhe jetën e qytetarëve të tjerë, të cilët ndodheshin në ato momente në lokal, por edhe jashtë tij.

Atentatorët janë larguar me shpejtësi nga vendi i ngjarjes në drejtim të daljes së Vlorës, ndërsa rreth 30 minuta më pas, në afërsi të fshatit Panaja, në mbikalimin e autostradës Levan-Vlorë, është gjetur edhe automjeti tip BMË, i cili ishte gjysëm i djegur nga brenda.
Policia ka konfirmuar se dyshohet të bëhet fjalë për një automjet të vjedhur, i cili është braktisur nga atentatorët.

Policia e Vlorës ka bërë kontrollin e plotë të automjetit të braktisur dhe ende vijon punën për gjetjen e ndonjë gjurme të mundëshme. Uniformat blu kanë shoqëruar 10 persona në komisariat, por ende nuk kemi asnjë të dyshuar kryesor për këtë ngjarje. Shënjestër e atentatit mendohet të ketë qenë pronari i televizionit lokal, por zyrtarisht policia nuk dhënë një version zyrtar.

Top Channel,  25.05.2017

Ligji për sektorin e energjisë përveçse e dimensionoi tregun në bazë të një modeli të ri përcaktoi edhe marrëdhënien e re kontraktuale që do të kenë operatorët mes njëri-tjetrit.

Korporata Elektroenergjetike Shqiptare do të vazhdojë të ketë rolin kryesor në prodhimin e energjisë duke siguruar një sasi të paracaktuar për furnizuesin universal që në këtë rast është Operatori i Shpërndarjes së Energjisë Elektrike.

Pikërisht sasia e energjisë që do të sigurohej prej kohësh është objekt debati duke mos gjetur një dakordësi por Enti Rregullator i Energjisë përcaktoi se fundmi edhe kontratën që do të jetë në fuqi deri në fund të këtij viti mes dy operatorëve, gjenerimit dhe shpërndarjes.

Në pikën dy të kësaj kontrate përcaktohet pikërisht kjo sasi.

“Sasia e programuar/kontraktuar e prodhimit të energjisë elektrike që Shitësi do ti livrojë Blerësit, përcaktohet sipas Vendimit nr.244, datë 30.03.2016, të Këshillit te Ministrave dhe sipas kësaj kontrate është 3 950 GWh, e cila specifikohet sipas muajve të livrimit”.

Kjo sasi duhet të sigurohet me çmimin që ERE ka vendosur për KESH dhe Furnizuesin e Shërbimit Universal që aktualisht është 1.45 lekë/kwh. Çdo sasi energjie ekstra që prodhohet në kohëra të favorshme do të llogaritet me çmim tjetër.

Scan tv,  19.05.2017

Prokuroria e Përgjithshme ka hapur dosjen ‘CEZ’, referuar nga juristi i OSHEE, Romeo Kara, mbi prapaskenat e privatizimit abuziv të OSSH, tërësinë e shkeljeve të legjislacionit në fuqi, favorizimet, dëmin ekonomik, mbi sekserët, zyrtarët e implikuar, e-mailet komprometuese, letrat, raportet etj.

Teksa e gjithë vëmendja është zhvendosur tek ngërçi politik, organi qendror i akuzës ka marrë në shqyrtim kallëzimin e ‘nxehtë’ penal, i cili ngarkon me përgjegjësi ish-kryeministrin Sali Berisha, disa ish-ministra, ish-zëvendësministra, ish-drejtorë dhe sekserin Nuel Kalaj.

Në kuadër të verifikimit të dokumenteve dhe provave të dosjes, Shqiptarja.com ka mësuar se Prokuroria e Përgjithshme ka thirrur dëshmitarin kyç Romeo Kara, për të dhënë një dëshmi më të plotë, të detajuar dhe të thelluar.

Dy seancat e para kanë zgjatur disa orë, ndërsa priten edhe disa seanca të tjera, në ditët në vijim. Sipas burimeve, gjatë dy seancave maratonë, juristi i OSHEE, Romeo Kara, ka dhënë shpjegime të shtuara mbi provat e paraqitura rreth privatizimit abuziv të OSSH, i cili u ka shkaktuar taksapaguesve shqiptar një dëm ekonomik prej 450 milionë euro.

Kara, gjatë pyetjeve në prokurori, i është përmbajtur dëshmisë së dhënë para komisionit hetimor parlamentar për investigimin e privatizimit të OSSH-së nga qeveria ‘Berisha’ dhe kompania çeke ‘CEZ’. Juristi i OSHEE u është përmbajtur gjithashtu të gjitha deklarimeve rreth rolit të ish-kryeministrit dhe të 15 ish-zyrtarëve në procesin e privativit. Nëse prokuroria do të thellojë hetimet dhe të çojë dosjen në gjykatë, dëshmia e Karajt pritet të jetë një nga pikat më të forta për ndëshkimin e të akuzuarave.

Ndërkaq, për fatin e dosjes në fjalë ka edhe një interesim nga faktori ndërkombëtar. “Unë kam pasur takime me disa përfaqësues të ambasadave të ndryshme në Tiranë. I kam informuar ato në detaje për këtë çështje dhe jam më se i bindur se ato i kanë vlerësuar drejt ato çfarë unë paraqita dhe thashë. Fakti që janë realizuar këto takime me këto ambasada, shpreh interesimin e tyre për këtë çështje. Megjithatë ata vlerësojnë shumë rolin e vetë shqiptarëve në këto momente”, ka theksuar Kara.

Akuzat
Referuar dosjes së dorëzuar në prokurori, protagonistët e privatizimit të OSSH akuzon për konsumimin e pesë veprave penale. “Mbi bazën e këtyre të dhënave që pasqyrohen edhe në dokumentacionin e sipërpërmendur, rezulton se ndodhemi përpara fakteve dhe provave të pakundërshtueshme se personat e lartpërmendur kanë konsumuar elementët e veprave penale “Shpërdorimi i detyrës”, “Shkelja e barazisë së pjesëmarrësve në tendera apo ankande publike”, “Mashtrimit”, “Ushtrimi i ndikimit të paligjshëm ndaj personave që ushtrojnë funksione publike”, “Pastrim i produkteve të veprës penale ose veprimtarisë kriminale”, vepra penale këto të parashikuara nga nenet 143, 245/1, 248, 258 dhe 287 të Kodit Penal”, thuhet në kallëzimin penal.

Lista e të kallëzuarave

1. Z. Sali Berisha (Ish Kryeministër)
2. Z. Nuel (Nue) Kalaj, sekser
3. Z. Genc Ruli (Ish Ministër i Ekonomisë, Tregtisë dhe Energjetikës/Kryetar i Komitetit të Konsulencës dhe Transparencës).
4. Znj. Mimoza Vokshi (Anëtare e Grupit të Negocimit/Ish Drejtor i METE)
5. Znj. Suzana Guxholli, Ish-Këshilltare e Kryeministrit Berisha
6. Z. Neritan Alibali, (Ish Zv. Ministër i METE/Kryetari i Grupit të Negocimit me CEZ dhe Kryetar i Komisionit të Vlerësimit të Ofertave)
7. Z. Alfred Rushaj (Ish Zv. Ministër i Financave/ Anëtar i Grupit të Negocimit me CEZ).
8. Z. Fatjon Tugu (Anëtar i Grupit të Negocimit me CEZ/ Anëtar i Komisionit të Vlerësimit të Ofertave)
9. Z. Sherefedin Shehu (Anëtar i Grupit të Negocimit me CEZ)
10. Z. Asllan Sherra (Anëtar i Grupit të Negocimit me CEZ)
11. Z. Viktor Gumi (Anëtar i Grupit të Negocimit me CEZ)
12. Z. Miran Kopani (Anëtar i Grupit të Negocimit me CEZ)
13. Z. Bujar Nepravishta (Ish Kryetar i ERE)
14.  Z. Durim Kraja (Ish Sekretar i Përgjithshëm i METE/Anëtar i Komisionit të Vlerësimit të Ofertave).
15. Z. Engjell Qorlaze (Anëtar i Komisionit të Vlerësimit të Ofertave)
16 . Z. Vasil Pano (Anëtar i Komisionit të Vlerësimit të Ofertave)

Shqiptarja.com  18.05.2017

Enti Rregullator i Energjisë trajtoi gjatë vitit 2016 një numër të konsiderueshëm ankesash veçse dukshëm më të ulët sesa viti paraardhës. Në raportin vjetor të këtij institucioni bëhet me dije se numri i ankesave nga klientët ishte 957 ndërkohë që në 2015 ky numër ishte 3519. Të ndara në kategori numrin më të madh e zënë ankesat për energji të pamatur.

“Vihet re se këto ankesa janë të mbartura dhe përfshijnë faturime të energjisë elektrike, të cilat kanë ardhur si pasojë e kontrolleve të ushtruara nga shoqëria “CEZ Shpërndarje“ sh.a, përgjatë periudhës 2011-2013, ku vihet re se në shumicën e rasteve të paraqitura, procesverbalet e mbajtura për konstatimin e ndërhyrjeve të paautorizuara në sistemin e matjes janë kryer jo në prezencën e klientit, në bokse kolektive të matësave të energjisë elektrike” thuhet në raportin e ERE.

Referuar shifrave zyrtare ankesat për energji të pamatur janë 308, për faturim aforfe 105, për mbifaturim 243, për faturim fiktiv 43, për kontratë fiktive 32, me vlerë referuese 60, të ndryshme 102.

Një tendencë e vërejtur të paktën tek kategoria e kontratave fiktive dhe faturimeve fiktive është zbatimi i tyre në ndërtime informale ose në banesa të përfshira në proces legalizimi. Gjithsesi sipas ERE ka një përmirësim të dukshëm të treguesve në lidhje me shërbimin ndaj klientit nga ana e OSHEE.

Ankesat 2016

Energji e pamatur           308,

Faturim aforfe                 105

Mbifaturim                       243

Faturim fiktiv                    43

Kontratë fiktive                 32

Vlerë referuese                 60

Të ndryshme                    102

Scan TV,  13.05.2017

Kompanitë publike të energjisë (OST dhe OSHEE) kishin kërkuar rritje të çmimit për vitin 2017, duke përfshirë edhe shitjen me pakicë për konsumatorët e mëdhenj, por Enti Rregullator Energjisë ka arsyetuar se kërkesa e kompanive nuk është pranuar për faktin se kompanitë kishin realizuar fitime të kënaqshme gjatë vitit 2016.

“Nga analiza dhe vlerësimet e përgjithshme, rezultoi se shoqëritë KESH sh.a. OST sh.a. dhe OSHEE sh.a., kanë performancë të kënaqshme, që përgjithësisht ka mbuluar kostot e veprimtarive të këtyre aktiviteteve përgjatë periudhës 2015-2016 si dhe kanë krijuar një rezervë për zhvillimin normal të aktiviteteve për periudhën pasardhëse” u shpreh ERE në një relacion të posaçëm, ku shpjegoi se arsyet e mosndryshimit të çmimeve për 2017-n.

Fitimi i KESH, OST dhe OSHEE për 2016 ishte 104 milionë euro. ERE argumenton se situata e mirë hidrike ka sjellë një rritje të gjenerimit të kaskadës së Drinit për vitet 2015-2016 me rreth 2,675 GWh energji elektrike, më shumë se ai i parashikuar për KESH sh.a.

Performancë pozitive ka pasur edhe shoqëria OSHEE për periudhën 2015-2016 në drejtim të uljes së humbjeve në rrjetin e shpërndarjes së energjisë elektrike, si dhe të arkëtimit të detyrimeve të prapambetura.

Vlen të përmendet se shoqëritë, megjithëse kanë arritur rezultatet financiare pozitive gjatë kësaj periudhe, njëkohësisht trashëgojnë detyrime të ndërsjella. Gjithashtu, edhe për shoqërinë OSHEE sh.a. arsyetohet se ndër të tjera, një faktor pozitiv në lidhje me sigurinë e të ardhurave të saj për vitin 2017 do të jetë arritja e objektivave të vendosur nga Qeveria, sidomos reduktimi i mëtejshëm i humbjeve të energjisë elektrike në rrjetin e shpërndarjes, si dhe arkëtimi i të ardhurave nga shitja e energjisë elektrike.

“Për sa më sipër, gjykojmë se korrigjimi në ulje i të ardhurave për këto shoqëri nuk do të ishte i arsyeshëm, pasi kjo nuk do të ndihmonte përmirësimin financiar të të gjithë sektorit dhe veçanërisht atë të OSHEE sh.a, e cila vazhdon të ketë një kapital të vetin negativ prej (rreth -48 miliardë lekësh). Nga ana tjetër, këto të ardhura mund të përdoren për shlyerjen e detyrimeve ndaj KESH sh.a. dhe OST sh.a.

Për këtë qëllim, OSHEE sh.a. ka ndërtuar një plan të uljes së detyrimeve ndaj KESH dhe OST në përputhje edhe me ristrukturimin e borxheve të KESH nga EBRD. Sipas kësaj skeme, OSHEE do t’i paguajë KESH dhe OST në 5 vitet e ardhshme rreth 10.7 miliardë lekë më tepër se sa fatura korente duke bërë që borxhi total ndaj KESH dhe OST të ulet në mënyrë progresive.

Revista Monitor,  03.05.2017

Maji, edhe pse një ditë pushimi dedikuar Ditës Ndërkombëtare të Punëtorëve, nuk është e tillë për ekipin teknik të OSHEE-së në Tiranë. 30 punonjësit e Brigadës së Tensionit të Lartë vazhdojnë edhe sot remontin e linjës Lanabregas–nënstacioni i Pallatit te Kongreseve, e ndërtuar në vitin ’84-r.

Kjo linjë prej 8.5 kilometra, ku 90% është ajrore, është një prej nyjeve të rëndësishme në sistemin e shpërndarjes së energjisë elektrike për Tiranën. Amortizimi e bën mirëmbajtjen të nevojshme për parandalimin e defekteve të mundshme.

Kryeministri Edi Rama ishte mes tyre për t’i falënderuar për punën e përkushtuar në shërbim të qytetit, i shoqëruar nga ministrja e Mirëqenies Sociale dhe Rinisë, Olta Xhaxhçka dhe Administratori i Përgjithshëm  OSHEE, Ardian Çela.

Nga mungesa ndër vite e investimeve, rrjeti elektrik i vendit në pjesën më të madhe të tij është pothuaj i njëjti që prej ndërtimit në vitin 1974. OSHEE, falë performancës pozitive të sektorit në dy vitet e fundit, ka rritur investimet në rrjet, por edhe për mirëmbajtjen e rrjetit ekzistues për të shmangur defektet dhe ndërprerjen e energjisë. Aktualisht, 830 punonjës janë duke operuar në të gjithë territorin e vendit për kryerjen e remonteve dhe vënien në punë të investimeve. Investimet në remontin janë kryer në të gjithë zonën bregdetare, nga Velipoja në Sarandë.

“Kjo është një nga linjat kryesore për qytetin e Tiranës. Është linja e ‘84-s. Po e bëjmë me fuqinë punëtore të OSHEE. Bën pjesë në programin e remonteve, që kap vlerën e 2 miliardë lekë të të ardhurave të kompanisë për të gjithë vendin. Në gjithë territorin e Shqipërisë janë 830 punonjës që po bëjnë remonte. Aktualisht jemi duke bërë remontet e zonës bregdetare, në mënyrë që me fillimin e sezonit turistik të jemi të gatshëm. Për pjesën tjetër të vendit brenda tetorit t’i kemi përfunduar këto remonte. Në sajë të këtyre remonteve, ne kemi ulur me 50% numrin e defekteve dhe me 80% është ulur numri i ndërprerjeve” – informoi mbi rezultatet e deritanishme Ardian Çela.

OSHEE, theksoi Çela, ka ndjekur edhe një strategji të re për rekrutimin, trajtimin financiar dhe kujdesin ndaj punonjësve. Në viti 2017-n për të dytin vit aplikohet sigurimi në punë i punonjësve, falë kontratave të lidhura me kompani sigurimi.

“Është vitit i dytë që të gjithë punonjësit e terrenit, mbi 3 mijë e 500 punonjës sigurohen ndaj  aksidenteve që ndodhin në punë. Kompania i mbulon të gjitha shërbimet mjekësore brenda dhe jashtë vendit, për  rastet kur punonjësit janë aksidentuar në punë. Bëmë sistemimin dhe rritjen e pagave të të gjithë punonjësve në terren, ku paga minimale nga 250 mijë lekë [të vjetra] për punonjësit e pakualifikuar kaloi në 350 mijë lekë dhe për gjithë stafin teknik të mesëm shkoi në 550 mijë lekë. Kemi trajnuar mbi 5500 punonjës. Kemi rekrutuar vetëm gjatë vitit 2016, mbi 82 inxhinierë elektrikë”.

Ministrja e Mirëqenies Sociale dhe Rinisë, Olta Xhaçka falenderoi punonjësit e OSHEE, por edhe për të gjithë ata që sot janë në krye të detyrës, duke siguruar se akoma më shumë do të bëhen në mbështetje e mbrojtje të punës së tyre, si dhe të kategorive të tjera vulnerabël.

Dua të falënderoj të gjithë këta punonjës që bëjnë një punë të jashtëzakonshme, edhe sot që është ditë pushimi për gjithë të tjerët. Edhe ne në Ministrinë e Mirëqenies Sociale dhe Rinisë kemi bërë shumë, kemi ofruar kompensimin e energjisë elektrike për 90 mijë pensionistë, Ka shumë punë për të bërë edhe për kategori të tjera në nevojë. Edhe me Inspektoratin e Punës kemi arritur që aksidentet në punë të ulen në masën 50%. Ne jemi shumë të angazhuar që në mandatin tjetër të arrijmë t’i shtrijmë këto arritje edhe shumë më tepër, edhe në kategori të tjera”.

Ndryshimi i modelit të administrimit, investimet në rrjet, qasja e re në trajtimin e burimeve njerëzore, sipas Kryeministrit Rama, po e shndërrojnë OSHEE në një kompani moderne. Po ashtu, Kryeministri garantoi vazhdimin e masave të qeverisë në mbështetje të kategorive të ndryshme sociale.

“Për familjet që janë në ndihmë ekonomike, ne bëjmë një kompensim të plotë të të gjithë diferencës pas heqjes së fashës mbrojtëse. Është 19 milionë dollarë në vit nga buxheti i shtetit që shkon për këto familje dhe për gjithë kategoritë e tjera, të cilat prezumohet të mbroheshin nga fasha 300 k/W. Sot, askush nga ata nuk ndjen rritje të çmimit të energjisë, ndërkohë për fasha të tjera, çmimi i energjisë është ulur. Janë bërë zerime kamat vonesash masivisht, duke kontribuar të gjithë sëbashku që të bëhen të gjithë investime të mëdha dhe të fillojë ripërtëritja e një rrjeti shumë të vjetër. Për ne është shumë e rëndësishme që kompania të vazhdojë të përmirësojë standardet dhe të gjitha nivelet e trajtimit të punonjësve në funksion të përmirësimit të cilësisë dhe të vazhdojë të transformohet nga një ushtri militantësh që thjesht ushqeheshin, duke mos ofruar dot kompania asnjë lloj shërbimi prej kompanie, në një kompani moderne që duhet të jetë akoma më shumë një nga krenaritë e vendit tonë”.

Shqiptarja.com  01.05.2017

Operatori i Shpërndarjes së Energjisë (OSHEE) finalizoi procedurat e tenderimit për importin e energjisë që i duhet vendit për të plotësuar konsumin e brendshëm gjatë muajit maj, duke shpallur fituese 7 kompani.

Totali i energjisë elektrike i kërkuar për t’u blerë nga OSHEE sh.a. për muajin maj është 186,000 Mwh dhe e konvertuar në vlerë monetare 8,561,170 euro (vlera pa TVSH), me çmim mesatar prej 46 E/Mwh. Kontratat me kompanitë fituese janë nënshkruar përpara datës 30 Prill 2017 sipas kushteve të përcaktuara në ftesat për pjesëmarrje. Në vijim të kontratave të lidhura, shoqëritë Danske Commodities, NoaEnergyTrade, EFT AG, Grid Energy, GSA shpk, GEN-I Tirana sh.p.k dhe AXPO doo Beograd do të fillojnë lëvrimin e energjisë elektrike në OSHEE sh.a., sipas kontratave përkatëse dhe kushteve të përcaktuara.

Para se të zhvillonte garën e importit të energjisë, OSHEE realizoi komunikimin me shoqërinë KESH sh.a. Nga parashikimi i ngarkesës totale në rrjetin e shpërndarjes, duke zbritur parashikimin e prodhimit të energjisë së prodhuar nga Prodhuesit me Përparësi të Energjisë Elektrike dhe parashikimin e prodhimit e KESH sh.a, u pa një hendek 186,000 Mwh për të përmbushur kërkesën.

Pas dërgimit të ofertave nga shoqëritë tregtare dhe/ose prodhuese, komisioni i blerjes administroi dhe vlerësoi ofertat e paraqitura prej tyre. Shoqëritë që shprehën interes në datën 25.04.2017, ishin shoqëria GEN-I Tirana sh.p.k, Shoqëria AXPO d.o.o, Shoqëria GSA sh.p.k., Shoqëria EFT AG, Devolli Hydropower – Statkraf, NOA EnergyTrade, DanskeCommodities dhe GRID Energy.

Duke qenë se nga ofertat e ardhura në fazën e parë, nuk ishte arritur sigurimi i sasisë së kërkuar për të optimizuar portofolin ekonomik të OSHEE sh.a., Komisioni i Blerjes vendosi të negociojë me të gjitha kompanitë për të rritur sasitë dhe për të ulur çmimin për njësi, bënë me dije burimet zyrtare të OSHEE-së.

Duke qenë që sasia e kërkuar në fazën e dytë u plotësua subjekti “Devolli Hydropower – Statkraf” u skualifikua që në fazën e dytë të negocimit.

Revista Monitor,  02.05.2017

1 Maji, edhe pse ditë pushimi dedikuar Ditës Ndërkombëtare të Punëtorëve, nuk është e tillë për ekipin teknik të OSHEE-së në Tiranë. 30 punonjësit e Brigadës së Tensionit të Lartë vazhdojnë edhe sot, remontin e linjës Lanabregas–nënstacioni i Pallatit te Kongreseve, e ndërtuar në vitin ’84. Kjo linjë prej 8.5 kilometra, ku 90% është ajrore, është një prej nyjeve të rëndësishme në sistemin e shpërndarjes së energjisë elektrike për Tiranën. Amortizimi e bën mirëmbajtjen të nevojshme për parandalimin e defekteve të mundshme. Kryeministri Edi Rama ishte mes tyre, për t’i falënderuar për punën e përkushtuar në shërbim të qytetit, i shoqëruar nga ministrja e Mirëqenies Sociale dhe Rinisë, Olta Xhaxhçka dhe Administratori i Përgjithshëm i OSHEE, Ardian Çela.
Nga mungesa ndër vite e investimeve, rrjeti elektrik i vendit në pjesën më të madhe të tij është pothuaj i njëjti që prej ndërtimit në vitin 1974. OSHEE, falë performancës pozitive të sektorit në dy vitet e fundit, ka rritur investimet në rrjet, por edhe për mirëmbajtjen e rrjetit ekzistues për të shmangur defektet dhe ndërprerjen e energjisë. Aktualisht, 830 punonjës janë duke operuar në të gjithë territorin e vendit për kryerjen e remonteve. Investimet në remont kanë përfshirë gjithë zonën bregdetare, nga Velipoja në Sarandë.
“Kjo është një nga linjat kryesore për qytetin e Tiranës. Është linja e vitit ‘84. Po e bëjmë me fuqinë punëtore të OSHEE. Bën pjesë në programin e remonteve, që kap vlerën e 2 miliardë lekë, të ardhura të kompanisë, për të gjithë vendin. Në gjithë territorin e Shqipërisë janë 830 punonjës që po bëjnë remonte. Aktualisht jemi duke bërë remontet e zonës bregdetare, në mënyrë që me fillimin e sezonit turistik të jemi të gatshëm. Për pjesën tjetër të vendit brenda tetorit t’i kemi përfunduar këto remonte. Në sajë të këtyre remonteve, ne kemi ulur me 50% numrin e defekteve dhe me 80% është ulur numri i ndërprerjeve,” – informoi mbi rezultatet e deritanishme, administratori Çela.

OSHEE, theksoi Çela, ka ndjekur po ashtu një strategji të re për rekrutimin, trajtimin financiar dhe kujdesin ndaj punonjësve. Në viti 2017, për të dytin vit aplikohet sigurimi në punë i punonjësve, falë kontratave të lidhura me kompani sigurimi.

“Është vitit i dytë që të gjithë punonjësit e terrenit, mbi 3500 punonjës sigurohen ndaj aksidenteve që ndodhin në punë. Kompania i mbulon të gjitha shërbimet mjekësore, brenda dhe jashtë vendit, për rastet kur punonjësit janë aksidentuar në punë. Bëmë sistemimin dhe rritjen e pagave të të gjithë punonjësve në terren, ku paga minimale nga 250 mijë lekë [të vjetra] për punonjësit e pakualifikuar kaloi në 350 mijë lekë dhe për gjithë stafin teknik të mesëm shkoi në 550 mijë lekë. Kemi trajnuar mbi 5500 punonjës. Kemi rekrutuar vetëm gjatë vitit 2016, mbi 82 inxhinierë elektrikë.”
Ndryshimi i modelit të administrimit, investimet në rrjet, qasja e re në trajtimin e burimeve njerëzore, sipas Kryeministrit Rama, po e shndërrojnë OSHEE në një kompani moderne. Po ashtu, Kryeministri garantoi vazhdimin e masave të qeverisë në mbështetje të kategorive të ndryshme sociale.
“Për familjet që janë në ndihmë ekonomike, ne bëjmë një kompensim të plotë të të gjithë diferencës pas heqjes së fashës mbrojtëse. Është 19 milionë dollarë në vit nga buxheti i shtetit që shkon për këto familje dhe për gjithë kategoritë e tjera, të cilat prezumohet të mbroheshin nga fasha 300 k/W. Sot, askush nga ata nuk ndjen rritje të çmimit të energjisë, ndërkohë për fasha të tjera, çmimi i energjisë është ulur. Janë bërë zerime kamat vonesash masivisht, duke kontribuar të gjithë sëbashku që të bëhen të gjithë investime të mëdha dhe të fillojë ripërtëritja e një rrjeti shumë të vjetër. Për ne është shumë e rëndësishme që kompania të vazhdojë të përmirësojë standardet dhe të gjitha nivelet e trajtimit të punonjësve në funksion të përmirësimit të cilësisë dhe të vazhdojë të transformohet nga një ushtri militantësh që thjesht ushqeheshin, duke mos ofruar dot kompania asnjë lloj shërbimi, në një kompani moderne që duhet të jetë akoma më shumë, një nga krenaritë e vendit tonë.”
Ministrja e Mirëqenies Sociale dhe Rinisë, Olta Xhaçka falenderoi punonjësit e OSHEE, por edhe të gjithë ata që sot janë në krye të detyrës, duke siguruar se akoma më shumë do të bëhen në mbështetje e mbrojtje të punës së tyre, si dhe të kategorive të tjera vulnerabël.
“Dua të falënderoj të gjithë këta punonjës që bëjnë një punë të jashtëzakonshme, edhe sot që është ditë pushimi për gjithë të tjerët. Edhe ne në Ministrinë e Mirëqenies Sociale dhe Rinisë kemi bërë shumë. Kemi ofruar kompensimin e energjisë elektrike për 90 mijë pensionistë. Ka shumë punë për të bërë edhe për kategori të tjera në nevojë. Edhe me Inspektoratin e Punës kemi arritur që aksidentet në punë të ulen në masën 50%. Ne jemi shumë të angazhuar që në mandatin tjetër të arrijmë t’i shtrijmë këto arritje edhe shumë më tepër, edhe në kategori të tjera.”

energjia.al  02.05.2017

Enti Rregullator i Energjisë bëri me dije se kompanitë e sektorit energjetik do të vazhdojnë të shlyejnë në mënyrë të vazhdueshme borxhet e akumuluara mes njëra-tjetrës.

Për të garantuar likuiditet ky Ent vendosi që të mos ndryshonte çmimet për operatorët duke vlerësuar se aktualisht performanca e të trejave si OSHEE, OST dhe KESH ka qenë e kënaqshme. Por për të mos ngarkuar llogaritë vjetore duket se Shpërndarja dhe gjenerimi kanë arritur në një marrëveshje që shtrihet në 5 vite.

“OSHEE sh.a. ka ndërtuar një plan të uljes së detyrimeve ndaj KESH dhe OST në përputhje edhe me ristrukturimin e borxheve të KESH nga BERZH. Sipas kësaj skeme OSHEE do t’i paguaje KESH dhe OST në 5 vitet e ardhshme rreth 10.7 miliard lekë më tepër se sa fatura korente duke bërë që borxhi total ndaj KESH dhe OST të ulet në mënyrë progresive”, thuhet në dokumentin e Entit.

Zinxhiri i borxheve në sektorin energjetik ka qenë problematik ndër vite ku kompanitë kishin detyrime të akumuluara vit pas viti duke rrezikuar situatën financiare të tyre dhe kolapsin e sektorit.

Mbledhja e detyrimeve të vjetra nga ana e OSHEE përmes disa skemave lehtësuese por edhe fushata antiinfomalitet rriti në mënyrë të dukshme të ardhurat për shpërndarjen ndërkohë që KESH është favorizuar edhe nga situata e mirë hidrike që ka sjellë eksport në vlera të konsiderueshme.

Scan Tv,  28.04.2017