info@energjia.al

I ndërtuar rreth 30 viteve më parë për të internuarit gjatë diktaturës, fshati Adriatik në njësinë administrative Remas të Bashkisë Divjakë, zor se mund të konsiderohet një vendbanim normal edhe në ditët e sotme.

Provë e kësaj është dhe kabina elektrike pa mure që ndodhet në mes të fshatit.

“Është korrenti i hapur këtu. Të paktën ta kishin rrethuar me rrjetë. Fijet bëjnë masë herë pas here”, thonë banorët.

Problemi është i dukshëm, ditë e natë aty kalojnë njerëz apo luajnë fëmijë dhe rreziku shtohet në mot me shi, por ende nuk ka zgjidhje.

Administratori Engjëll Guri thotë: “Ne kemi folur me drejtorin e OSHEE-së dhe kemi rënë dakord për një projekt që do i japë zgjidhje shumë shpejt këtij problemi. Brenda 2-3 muajve do të zgjidhet”.

Banorët shpresojnë se problemi i tyre 10-vjeçar dhe shumë shqetësime të tjera të trashëguara nga pushtetet që janë ndërruar në vite do të zgjidhen në këtë fushatë elektorale.

Top Channel,  30.03.2017

Shqipëria prodhoi 7.1 miliardë kWh energji elektrike gjatë vitit 2016 si pasojë e prurjeve të mëdha të ujit dhe rritjes së prodhimit nga hidrocentralet private, prodhimi i dytë më i lartë i shënuar në histori.

Prodhimi i Energjisë elektrike gjatë vitit 2016 arriti 7.1 miliardë kWh, si pasojë e shirave të bollshëm dhe hyrjes në rrjet të hidrocentraleve të reja private, bëri të ditur Instituti i Statistikave në raportin mbi bilancin e energjisë elektrike të vendit.

Prodhimi prej 7.1 miliardë kËh është i dyti më i lartë i shënuar në historinë elektroenergjetike të vendit pas prodhimit prej 7.6 miliardësh të realizuar në vitin 2010, vit kur reshjet qenë gjithashtu të larta dhe shkaktuan përmbytje në një pjesë të konsiderueshme të ultësirës Perëndimore, më së shumti në Shkodër.

Prodhimi i energjisë elektrike në Shqipëri është i varur në masën 100 për qind nga hidrocentralet, ku sasia e reshjeve dhe menaxhimi i prurjeve janë përcaktuesit kryesorë të sasisë së prodhimit. Gjatë vitit 2016, niveli i Fierzës qe pranë maksimumit historik maksimum që është regjistruar gjithashtu në vitin 2010.

Por gjatë vitit të kaluar, përveç reshjeve qe edhe prodhimi privat i cili u rrit me 44 për qind duke arritur në 2 miliardë kWh, ose 28 për qind të të gjithë prodhimit.

Për shkak të varësisë nga reshjet, prodhimi i energjisë elektrike në Shqipëri luhatet në shkallë të konsiderueshme. Në vitin 2007 u shënua prodhimi më i ulët në dy dekada në masën 2.9 miliardë kWh.

Shtimi i hidrocentraleve të reja, veçanërisht kaskadës së Devollit, pritet të rrisë prodhimin e energjisë gjatë viteve të ardhshme. Pavarësisht shtimit të prodhimit privat gjatë viteve të fundit, Shqipëria mbetet vend deficitar dhe ka nevojë të mbulojë një pjesë të konsumit me importe. Vitet 2010 dhe 2016 bëjnë përjashtim nga ky rregull kur prodhimi mbuloi të gjithë konsumin.

Gjatë vitit 2016, konsumi i energjisë elektrike qe 7.1 miliardë kWh. Nga këto, afro 2 miliardë qenë humbje teknike dhe vjedhje apo konsum vetjak i në prodhim dhe transmetim. Konsumi i faturuar i energjisë elektrike qe 5.1 miliardë kWh i ndarë përgjysmë në konsum familjar dhe konsum të biznesit e të institucioneve publike. Konsumi i faturuar i familjeve u rrit me 2.5 për qind ndërsa konsumi i sektorit jofamiljar ra me 1 për qind. Rënia e konsumit jofamiljar u shkaktua në masë të gjerë nga mbyllja e përkohëshme e prodhimit të çelikut në Elbasan nga kompania Kurum, e cila është një nga konsumatorët më të mëdhenj të energjisë në vend.

Reshjet e shumta të shiut gjatë fillimit të vitit 2016 shkaktuan përmbytje dhe viktima në janar dhe nëntor2016.

Revista Monitor,  26.03.2017

Gjatë vitit 2016, prodhimi neto vendas i energjisë elektrike është 7.136 Gwh nga 5.866 Gwh, duke u rritur me 21,7%, krahasuar me vitin 2015, teksa konsumi ka pësuar rënie me 0.8%.

INSTAT njoftoi sot se rritja e prodhimit të energjisë elektrike në vitin 2016 ka ndikuar në rënien e importeve bruto me 22,4% dhe rritjen e eksporteve bruto të energjisë elektrike me 95,5%, krahasuar me 2015. Gjatë këtij viti, vendi rezulton të jetë eksportues neto i energjisë elektrike, për herë të parë në këto pesë vitet e fundit.

Energjia elektrike e prodhuar në vitin 2016 është 7.136 Gwh, ku 71,4% e prodhimit është realizuar nga hidrocentralet publike dhe 28,6% nga prodhues të pavarur privatë dhe koncesionarë.

Në vitin 2016, humbjet në rrjet janë 1.986 Gwh nga 2.196 Gwh që ishin në 2015, duke pësuar një rënie me 9,6%. Humbjet në shpërndarje në 2016 kanë rënë 11,8%, krahasuar me vitin e kaluar. Humbjet në transmetim janë rritur me 19,8% dhe përbëjnë 9,6% të humbjeve gjithsej në rrjet.

Përdorimi i energjisë elektrike nga konsumatorët në 2016 është 5.108 Gwh nga 5.069 Gwh që ishte në 2015. Gjatë kësaj periudhe, ky tregues ka shënuar rritje 0,8%, krahasuar me vitin e kaluar. Në 2016, konsumi i energjisë elektrike nga familjarët u rrit me 2,6%. Situata paraqitet ndryshe për konsumatorët jofamiljarë, konsumi i të cilëve u ul me 1,0%, krahasuar me vitin 2015.

Gjatë gjashtëmujorit të dytë të vitit 2016, prodhimi neto vendas i energjisë elektrike është rritur me 45,7%, krahasuar me gjashtëmujorin e dytë të vitit 2015, duke përbërë 43,0% të prodhimit vjetor 2016 nga 35,9% që përbënte në 2015. Importi bruto i energjisë elektrike (energji në marrje), në gjashtëmujorin e dytë të vitit 2016, rezultoi me rënie 31,8%, krahasuar me gjashtëmujorin e dytë të vitit 2015.

Eksporti bruto i energjisë elektrike (energji në dhënie) është rritur rreth katër herë, krahasuar me gjashtëmujorin e dytë të vitit 2015, duke arritur vlerën e 579 Gwh. Gjatë gjashtëmujorit të dytë të vitit 2016, janë realizuar 57,5% të importeve bruto të vitit 2016 dhe 31,0%, të eksporteve bruto të kryera gjatë vitit 2016.

Revista Monitor,  24.03.2017

Ministria e Financave ka nxjerrë një udhëzim ndaj institucioneve buxhetore që të prioritizojnë pagesat për energjisë. Lajmërimi vjen pasi institucionet publike dhe ndërmarrjet në pronësi të shtetit akumuluan rishtas borxhe të reja në vlerën 58 milionë euro ndaj OSHEE deri në dhjetor 2016.

“Njësitë shpenzuese  gjatë përdorimit të fondeve buxhetore të planifikuara për “mallra dhe shërbime” me prioritet te urdhërojnë pagesat për shërbimet e furnizimit me energji elektrike në kushtet e mungesës së likuiditetit ose planit të arkës, respektohet renditja e përcaktuar ne udhëzimin e posaçëm” lajmëron Ministria Financave .

Me tej financat kërkojnë qe strukturat përgjegjëse për thesarin në degë te verifikojnë listën e debitorëve të dërguar nga OSHEE çdo muaj dhe autorizojnë pagesën e faturave të tjera, vetëm nëse njësia shpenzuese nuk rezulton me detyrime të papaguara në  këtë listë.

“Në rast të kundërshtimeve njësia shpenzuese rakordon me OSHEE dhe vetëm pas sqarimit zyrtar të detyrimit vijojnë pagesat e tjera. Në rast së detyrimi është objekt i një çështjeje gjyqësorë, njësia shpenzuese duhet të paraqesë dokument që vërteton se çështja është në proces gjyqësor. Këto përcaktime janë të vlefshme edhe në rastin kur institucionet përfitojnë fonde buxhetore në formën e subvencioneve” sqaron e Ministria e Financave.

Borxhi i enteve publike ku përfshihen institucionet buxhetore dhe jo buxhetore ( ato me vetëfinancimin me pronësi shtetërorë) arriti deri në fund të fund të vitit 2016 në mbi 8 miliardë lekë ose 58 milionë euro.

Teksa OSHEE për katër vite rresht është përfshirë në një aksion të ashpër për vlejnë  faturave të energjisë në sektorin privat nuk ka arritur të njëjtin sukses me institucionet shtetërorë.

Ndonëse borxhet e akumuluara që institucionet shtetërore kishin ndaj CEZ shpërndarje u shlyen tërësisht nëpërmjet programit për shlyerjen e borxheve të prapambetura që qeveria trashëgoi ndër vite, sërish entet e saj dhe ndërmarrjet publike janë konsumatorë të këqij të energjisë.

Institucionet shtetërore kanë vijuar të mospaguajnë faturat mujore të energjisë edhe pse udhëzimet  e ministrisë së Financave i prioritizojnë këto pagesa.

Revista Monitor,  23.03.2017

Për shkak të punimeve që po kryhen në disa nënstacione, OSHEE ka njoftuar se do të ketë ndërprerje të energjisë elektrike në Tiranë.

Përmes një njoftimi Operatori i Shpërndarjes së Energjisë Elektrike, OSHEE, njofton se për shkak të punimeve të planifikuara më datën 24 mars, në nënstacionin “Traktora”, do të ketë ndërprerje të energjisë elektrike nga ora 00:00 deri në orën 05:00. Për pasojë do të mbeten pa energji elektrike këto zona:

“Rruga “Ali Demi”, rruga “Hasan Sufa”, zona pranë ish Ndërtim Miniera, rruga “Gani Domi” , pallatet pranë Maternitetit të Ri, zona pranë spitalit Iranian, rruga “Qemal Stafa”, rruga “Sadik Petrela”, rruga “Telendini”, rruga “Ali Baushi”, rruga “Ramiz Treni”, rruga “Alibal Basha”, rruga “Ali Demi”, rruga “Shemsi Haka”, rruga “Mihal Grameno”, rruga “Petro Nini Luarasi”, rruga “Mustafa Lleshi”, rruga “Qamil Guranjaku”, zona pranë ish Artistikes, zona pranë Xhamisë Xhura, rruga “Aleksandër Moisiu”, rruga “Bajram Curri”, rruga “Vangjel Capo”, Fresku, zona e Teleferikut, rruga “Idriz Dollaku”, rruga “Sali Nivica”, rruga “Zonja Curre”, rruga “Shyqyri Ishmi”, rruga “Fatmir Haxhiu”, rruga “Mustafa Matohiti”, rruga “Lek Dukagjini”, rruga “Ismail Qemali”, pallatet përballe Fushës së Sportit “Ali Demi”, rruga “Hodo Beg”, zona pranë ATSH, rruga “Xhorxh Bush”, rruga “Xhorxh Martin”, rruga “Murat Toptani”, Privat/ Albace Shoes, Privat / Chatolinza.”,thuhet në njoftim

Ndërkohë po sot për shkak të punimeve që po kryhen në linjën 35kv L30-32 Shkozet – Durrës, janë pa energji elektrike disa zona në Durrës si: Fshatit Rinia, Bishti i Pallës, zona e Spitallës, zona e ish-Kënetës, zona e Nish Kimikes (Durrës), zona e Burgut, Peshkimi, Pastrimi Detar, Reparti 30-20, Fabrika e Kartonit, Hidrovoret.

Scan Tv,  21.03.2017

Zona përreth Stadiumit Qemal Stafa mbeti për orë të tëra pa furnizim me energji elektrike gjatë pasdites së djeshme.

Ndërprerja nisi rreth orës 14. Burime zyrtare pranë OSHEE thanë se shkak i ndërprerjes u bë një defekt tek fakulteti i Gjeologji Minierave, i shkaktuar nga Ndërmarrja e Bashkisë që kryente punime në zonë.

OSHEE tha gjithashtu se riparimi i defektit do të zgjaste rreth tre orë, duke bërë që furnizimi i zonës me energji të bëhet i mundur vetëm rreth orës 20:00 të mbrëmjes.

Shqiptarja.com  17.03.2017

Të paktën deri në fund të këtij viti nuk do të ketë ndryshim të tarifave të energjisë elektrike që përdoret nga konsutatorët familjarë.

Kjo ende nuk është bërë zyrtare, por një document i paraqitur në Entin Rregullator të Energjisë nga ana e Operatorit të Shpërndarjes së Energjisë Elektrike ve në dukje se OSHEE nuk kërkon rishikim të çmimit për këtë kategori konsumatorësh. Ndërkohë, kërkohet një rishikim i tarifave sipas niveleve të tensionit.

ERE ka marrë rreth dy javë më parë një vendim, me anë të të cilit shprehet për fillimin e procedurave për përcaktimin e çmimeve të shitjes me pakicë të energjisë elektrike për klientët fundorë, që shërbehen nga furnizuesi i shërbimit universal për periudhën 1 prill 2017 deri më 31 dhjetor 2017.

Në document vihet në dukje, ndër të tjera, se “Shoqëria OSHEE sh.a., në aplikimin e saj për tarifë për vitin 2017, ka kërkuar mosndryshim të çmimeve për klientët fundorë, por rialokim të kostove për nivele tensioni. OSHEE sh.a. ka paraqitur në ERE disa vlerësime/llogaritje lidhur me të ardhurat e kërkuara për aktivitetet e shpërndarjes dhe furnizimit me pakicë për vitin 2017 si argumente për mosndryshimin e çmimeve të shitjes me pakicë te klientët tariforë”.

Pra, vetë operatori ka kërkuar nga ERE që të mos ndryshojë çmimin për konsumatorin e tensionit më të ulët, që është ai familjar. Por do të ketë ndryshim në pagesat për ata konsumatorë që përdorin nivele më të larta të tensioneve, që normalisht janë biznese.

Me një kërkesë të tillë nga ana e operatorit, mund të quhet se ERE e ka dhënë tashmë vendimin për mosndryshim të çmimit. Megjithatë, Enti do të marrë në shqyërim procesin edhe në bazë të situatës aktuale të vështirë financiare në sektorin e energjisë elektrike, ku operatorët shtetërorë ndodhen në një vorbull detyrimesh të ndërsjellta, borxhesh të mëdha në vite.

ERE kujton se më 31 janar të këtij viti, ministria e linjës i ka kërkuar që “për të përmbyllur me sukses procesin e reformimit të sektorit elektroenergjetik, është e nevojshme kryerja nga ana e ERE-s e një analize të drejtë të të ardhurave të kërkuara dhe kostove reale të operimit për secilën prej shoqërive publike, KESH, OST dhe OSHEE, me qëllim miratimin e tarifave përkatëse për vitin 2017, të cilat duhet të jenë transparente dhe të sigurojnë zhvillimin normal të aktivitetit në përputhje me kriteret që përcakton ligji dhe objektivat për qëndrueshmërinë e sistemit dhe stabilitetin financiar të sektorit”.

Shqiptarja.com  09.03.2017

Një aksident është regjistruar mëngjesin e sotëm në aksin rrugor Milot-Laç, tek mbikalimi i Laçit, ku vdiq 19-vjeçari SH.H dhe mbetën të plagosur 5 persona.

Nga aksidenti kanë mbetur të plagosur B.K. 19 vjeç banues, D.S. 18 vjeç dhe B.H. 19 vjeç, të tre banues në Kosovë që udhëtonin në Golfin 07-473-CB ku 1 prej tyre ndodhet në Qendrën e Traumave në Tiranë kurse 2 të tjerë ndodhen në spitalin e Lezhës nën kujdesin e mjekëve.

Sh. H. 19 vjeç u dërgua në Spitalin e Traumës ku fatkeqësisht ndërroi jetë.

Gjithashtu i dëmtuar ka mbetur edhe drejtuesi i zetorit H.Z. 35 vjeç, banues në Krujë, i cili ndodhet në Qendrën e Traumave në Tiranë nën kujdesin e mjekëve.

Zetori doli nga një rrugë dytësore dhe i ndërpreu rrugën automjetit ku ndodheshin 4 shtetasit kosovarë.

Grupi hetimor në vendngjarje vazhdon hetimet për zbardhjen e plotë të shkaqeve të aksidentit.

Shqiptarja.com  09.03.2017

Operatori i Shpërndarjes së Energjisë Eklektike ka kërkuar që të pajisje më sistemin GPS të gjithë mjetet në dispozicion në drejtoritë rajonale të saj, ato që janë të Task Force apo pajisje rezervë. Në një njoftim të bërë nga kompania kërkohet pajisja me sistem monitorimi për 345 mjete në total nga të cilat 55 janë mjete për sensor karburanti.

Kjo nismë duket se vjen në kuadër të disiplinimit të mënyrës së përdorimit të mjeteve nga ana e stafit në drejtoritë rajonale si dhe optimizmit të kostove për karburant. Këtë e tregon më mirë edhe pjesa e specifikimeve teknike që bëhet në kërkesën e operatorit.

Kështu sistemi duhet të përcaktojë vendndodhjen e automjetit në kohë reale e me frekuence gjurmimi çdo pesë sekonda. Nga ana tjetër duhet të ofrohet informacion i detajuar  mbi identifikimin e mjetit, shpejtësinë e lëvizjes, gjendja e motorit ndezur ose fikur, adresën e vendndodhjes e saktë dhe e përditësuar, gjendja e baterisë, gjenerimi i rrymës në mjet, përshpejtimi i menjëhershëm, frenimi i menjëhershëm.

Një tjetër kërkesë ka të bëjë me raportet e karburantit të konsumuar gjatë lëvizjes, furnizimi përkatës sipas vendit dhe litrave.

Scan Tv,  08.03.2017

Operatori i Shpërndarjes së Energjisë (OSHEE) ka realizuar tenderin për importin e energjisë elektrike për muajin mars, në të cilin u blenë 96,590 MWh kundrejt një vlere 4.6 milionë euro pa TVSH.

Sipas njoftimit zyrtar të OSHEE fituese u shpallen 6 kompani të cilat ofruan një çmim mesatar 47.4 euro për megavatorë.  Energjia është blerë me të njëjtin çmim që parashikohet të shitet për muajin mars ne Bursën e Hungarisë, e cila është referenca në tenderët e import -eksportit nga kompanitë publike të energjisë.

Në mes të gjashtë kompanive fituese çmimin më të lartë e ka ofruar  NOA me 48.8 euro për megavat, ndërsa çmimin me të ulet e ka ofruar AXPO me 42.9 MW/h.

Që vitin e kaluar ka nisur të ofertojë për mbulimin e humbjeve të OSHEE edhe kompania vendase e prodhimit të energjisë Devoll Hydropower. Njësia e tregtimit të Devoll ia shiti energjinë  OSHEE me një çmim 47.2 euro për MW/h, vlerë kjo rreth një euro për Mwh më e ulët se, e kompanive të tjera pjesëmarrëse në garë.

HEC-i i ri i Banjës në lumin Devoll që u vu në punë për herë të parë më 2016 prodhoi 69,848 MW/h.

Sipas të dhënave nga Enti Rregullator i Energjisë, prodhimi vendas shënoi vitin e kaluar 7,136,351MW/h, nga të cilat 5,091,616 MW/h u prodhuan nga HEC në pronësi të KESH dhe 2,044,735 MW/h u prodhuan nga HEC private dhe ato me koncesion.

Pavarësisht kontestimeve për ndikimin në ambient Ministria e Energjetikes ka vërshuar me dhënien e lejeve për ndërtimin e HEC-ve të vogla. Qeveria Rama e ka liberalizuar edhe me tej këtë proces. Për çdo HEC me kapacitet deri në 2M vendos ministri i industrisë dhe Energjetikes, më parë vendimi për ndërtimin e tyre jepej nga qeveria. Nisur nga kjo lehtësi Ministria e Energjetikes vijoi dhënien e lejeve me intensitet të lartë gjatë 2016 dhe po vijon me të njëjtin ritëm edhe këtë vit.

Për herë të parë pas shumë vitesh Shqipëria ishte eksportues neto i energjisë, për shkak të reshjeve të bollshme dhe rritjes së prodhimit të energjisë nga shtimi i operatorëve të rinj në treg.

Revista Monitor,  01.03.2017