Amerikanët të interesuar për aksionet e INA

Klesch Group, në pronësi të miliarderit amerikan, Gary Klesch, është i interesuar në blerjen e aksioneve në kompaninë energjetike kroate INA në pronësi të gjigantit hungarez të energjisë MOL.

MOL zotëron 49.1% të aksioneve të INA-s dhe deri tani mendohej se kishte gjasa t’ia shiste ato rusëve, të cilët shkaktuan disa trazira në SHBA.

Pronari i dytë më i madh i INA, shteti kroat, me 44.8% të aksioneve, është në mosmarrëveshje me MOL mbi të drejtat e menaxhimit dhe kontratave të prodhimit të gazit.

Një raport i Bloomberg thotë se Klesch Group tashmë po tregon kujdesin e duhur ndaj INA-s për të kuptuar më mirë aktivitetin dhe punën e kompanisë.

Klesch e themeloi kompaninë në 1990, e cila ka aksione në metalurgjik, miniera, naftë, gaz dhe të tjera “industri të vështira”. Ai fokusohet në blerjen e kompanive që kanë probleme financiare dhe nuk shfrytëzojnë potencialin e tyre.

Grupi po përpiqet të hyjë në biznesin e rafinerisë. Shumë rafineri europiane po përballen me probleme serioze, për shkak të teknologjisë së vjetruar të tyre. Vetë Klesch konfirmoi interesin e tij në blerjen e pesë apo gjashtë rafinerive në Europë, gjatë një interviste në shtator.

Disa rafineri të INA, veçanërisht një në Sisak në Kroacinë Qendrore, janë vetëm një hap nga mbyllja, për shkak të joefikasitetit të tyre dhe për shkak të mungesës së dëshirës për të vazhduar prodhimin.

Drejtor i financave të MOL, Jozsef Simola, konfirmoi se ekziston interesi në aksionet e INA, por nuk dëshironte të specifikonte nëse ai buronte nga Klesch Group.

“Tani për tani, prioriteti i MOL është të arrijë një marrëveshje me qeverinë kroate”, – tha Simola, duke shtuar se ata do të vënë aksionet e tyre në shitje në qoftë se ata nuk do të arrijnë fillimisht marrëveshje me qeverinë.

MOL bleu 25% të aksioneve në INA në korrik të 2003, dhe 22.15% të tjera në tetor të 2008.

Marrëveshja e diskutueshme e aksionerëve u nënshkrua në janar të 2009.

Ndërkohë, gjykatat në Kroaci burgosën ish-kryeministrin e Kroacisë, Ivo Sanader, me 8 vjet e gjysmë, pasi e shpallën fajtor për marrje ryshfeti nga kryetari i MOL Zoltan Hernadi. Ai kërkohet nga Zyra e Prokurorit të Shtetit Kroat, DORH.

Midis shtatorit të 2013-s, deri në korrik të 2014, Kroacia dhe MOL u përpoqën të arrinin marrëveshje në pesë faza negocimi, por pa sukses.

MOL dhe Kroacia aktualisht gjenden mes dy proceseve të arbitrimit në Paris dhe Uashington, ndërsa Amerika ka ofruar shërbimet e saj si ndërmjetës.

Revista Monitor, 09.12.2014