OJF-të mjedisore ofrojnë mbështetjen e tyre kundër humbjeve në rrjet

Last updated Jan 16, 2014

Në një letër drejtuar Ministrisë së Energjisë dhe Industrisë, 19 OJF mjedisore i kanë ofruar ministrisë bashkëpunimin e tyre në një fushatë kombëtare informim-ndërgjegjësimi kundër humbjeve në rrjet. Ky problem po merr vëmendjen gjithmonë e më të madhe të qeverisë, sikurse tregon krijimi i task-forcës dhe konferenca e fundit e shtypit e kryeministrit Rama.

OJF-të mjedisore janë veçanërisht të interesuara në zgjidhjen e këtij problemi kombëtar, sepse niveli i lartë i humbjeve po pengon investimin në energjitë e rinovueshme të diellit dhe erës, si dhe po shton dëmet mjedisore nga konsumi i energjive të pista të importit. Gjithashtu, po ndërtohen pa kriter HEC-e dhe po shkatërrohet rrjeti hidrik, për të plotësuar nevojat për energji, të fryra artificialisht nga çmimi që (s)paguajnë përvetësuesit. Prandaj OJF-të mjedisore ju drejtuan ministrit Gjiknuri me ofertën për bashkëpunim. Më poshtë mund të lexoni letrën e plotë:

Drejtuar: MINISTRIA E ENERGJISË DHE INDUSTRISË, Z. Damian Gjiknuri, Ministër

Për dijeni: MINISTRIA E MJEDISIT, Z. Lefter Koka, Ministër

Subjekti: Humbjet e energjisë ne rrjet, problem kombëtar

I nderuar Z. Ministër,

Më 26 Nëntor u organizua një takim i disa shoqatave mjedisore dhe ekspertëve të energjisë në lidhje me humbjet e energjisë në rrjet, si nje problem me shume rëndësi për ekonomine dhe mjedisin. U vleresua si i rëndë fakti që Shqiperia humbet mbi 40% të energjise, niveli më i lartë i humbjeve në rajon, që përkthehet ne vlerën e rreth 150 milionë eurove humbje në vit. Ulja e humbjeve dhe rritja e efiçencës së energjise (deri në vitin 2018 efiçenca duhet të rritet me 9%) është gjithashtu dhe një nga detyrimet e vëndit tonë ndaj BE-së.

Prandaj ne këtë takim u theksua me forcë nevoja e nje fushate informim-ndërgjegjësimi të publikut dhe tërë shoqërisë në lidhje me uljen e humbjeve në rrjet.

Disa nga shoqatat tona në kuadrin e projekteve po punojnë në këtë drejtim duke ofruar mbështetjen e tyre në përmirësimin e këtij problemi, por situata kërkon një fushatë informim-ndërgjegjësimi shumë më të gjërë dhe më të fuqishme. Kjo detyrë do kërkonte bashkëpunimin dhe me forcat tuaja për të ndërtuar një fushatë kombëtare informim- ndergjegjësimi në fushën e uljes së humbjeve të energjisë elektrike.

Me nderime,

Xhemal Mato

Në emër të shoqatave:

AJMMI, Sarandë
Clean and Green Prespë, Korçë
Egnatia, Librazhd
Ekomjedisi, Durrës
Forumi Ndërkufitar i Liqenit të Shkodrës, Shkodër
Instituti për Ruajtjen e Natyrës në Shqipëri (INCA), Tiranë
Klubi Ekologjik, Elbasan,
Mbrojtja e Natyrës dhe Administrimi i Mjedisit, Adriatik, Vlorë
Mbrojtja e Mjedisit Kukës
Mbrojtja e Mjedisit Natyror, Berat,
Milieukontakt Albania, Tiranë
PSEDA-Iliria, Tiranë
Qendra “Aarhus”, Shkodër,
Qendra “Grupimi Ekolevizja”, Tiranë
Qendra Mjedisore per Zhvillim, Edukim dhe Rrjetezim (EDEN), Tiranë
Qendra për Kërkim, Bashkëpunim dhe Zhvillim (CRDC), Vlorë,
Shoqata Miqësia Ulëz, Mat
Shoqata në Mbrojtje të Jetës dhe Ekosistemit, Borizanë, Krujë, Genc Laçi
Together for Life, Tiranë

Ekolëvizja, 14.01.2014