info@energjia.al

Çarshia e Gjakovës, që njihet një ndër më të mëdhatë në Evropën Juglindore, me një arkitekturë të  ndërtimit të stilit tradicional, ka qenë cak i një investimi kapital të KEDSit me një kosto jashtëzakonisht të lartë, që kap shifrën prej mbi 320 mijë euro.

Punët e kryera këtu i janë përshtaur edhe arkitekturës së ndërtimit të këtij kompleksi kulturoro-historik. Projekti ka marrë fund në tetor të këtij viti.

Në këtë projekt, që ka qenë edhe kërkësë e vet komunës së Gjakovës, janë vendosur ormanet e tensionit të ulët që kanë zëvendësuar shtyllat e drurit rreth 50 vjet të vjetra, që kanë qenë në gjendje shumë të keqe dhe të kalbura. I gjithë rrjeti elektrik ajror është zevendësuar me atë nëntokësor.

Të gjithë ata zejtarë e tregtarë të cilët zhvillojnë veprimtaritë e tyre në Çarshi, janë mjaft të kënaqur me me ndryshimet në rrjetin energjetik që ua ka bërë KEDS-i.

Për Gëzin Golën, zdrukthtar me profesion, heqja e shtyllave të vjetra, jo vetëm që ka larguar rrerzikun, por edhe ka zbukuruar Çarshinë.

“E kanë kënaq, kanë hequr të gjithë telat dhe shtyllat e vjetra dhe kanë largu edhe rrezikun dhe na kanë zbukuru Çarshinë”, ka thënë Gola.

Ormanat e ri të tensionit të ulët që janë vendosur në Çarshi, janë punar enkas në fabrikë vetëm për këtë projekt, duke iu përshtatur mjedisit dhe arkitekturës së vjetër të vet Çarshisë të qytetit të Gjakovës.

Gjatë punimeve në këtë projekt janë hapur 6,494 m gjatësi kanal kabllovik, janë shtrrirë 1968 m kabllo nëntokësore të tensionit të mesëm, dhe 22,710 m kabllo nëntokësore të të tensionit të ulët, gjithashtu janë hapur edhe 53 puseta si dhe  49 ormana të tensionit të ulët.

Edhe pronari i kafiterisë “Amichi” në Çarshi, Jahja Kërleshi, më nuk do të ketë pengesë në punë nga shtylla që kish mu para lokalit të tij.

“ Ky investim nga KEDS-i ka qenë më se i domosdoshëm. Një shtyllë e vjetër para lokalit më pengonte në punë. Telat e vjetra dukeshin si merimanga dhe paraqisnin rrezik të madh. Me investimin e KEDS-it është hequr edhe rreziku dhe punën e kemi më të lehtë,” ka thënë Kërleshi.

Edhe zyrtarët komunalë të Gjakovës kanë fjalë të mira për punët e zhvilluara këtu nga KEDS-i.

“Ky investim, më i qëlluari I KEDS-it, i ka shtuar hijen qytetit dhe në të njëjtën kohë ka larguar rrezikun përgjithmonë”, kështu thotë Bekim Kurshumlia, me profesion stomatolog.

Bekimi është ndeshur me dy shtylla të ngjitura njëra me tjetrën para ordinancës së tij dhe rrejti i vjetër i vinte nga fqinji përmbi kulmin e tij, dhe kjo i paraqiste atij problem mjaft serioz. Me largimin e shtyllave  dhe instalimin kabllor nëntokësor u zgjodh edhe problemi për Bekimin.

“U lirua hapësira, u largua edhe rreziku, dhe nga ana estetike është shumë më mirë”, përfundon Kurshumlia.

Me investime në Gjakovë është ndarë shumë e kënaqur edhe kryetarja në shkuarje e Komunës, Mimoza Kusari- Lila. Ajo gjatë dy vjetëve të fundit i ka ndarë dy mirënjohje KEDS-it për ivestime në komunë.

Agjensia e lajmeve ekonomia,  21.11.2017

Drejtori i Këshillit për Mbrojtjen e të Drejtave dhe Lirive të Njeriut (KMDLNj), Behxhet Shala, bëri me dije se për problemin e shfaqur për pagesën e energjisë elektrike që qytetarët kanë paguar edhe për veriun e Kosovës, kanë reaguar edhe vite më parë, por kanë hasur në vesh të shurdhër.

“Llogaritet prej 22 deri në 30 për qind shkon në faturë të qytetarëve të Kosovës dhe ne kemi kërkuar që qytetarët të paguajnë vetëm 70% të shumës së faturuar, kurse pjesën tjetër ta paguajnë shpenzuesit serbë”, tha ai për Radio Televizionin e Kosovës (RTK).

Sipas tij nuk ka asnjë vend të botë që shpenzohet energjia dhe të mos paguhet, kurse për të paguajë pjesa tjetër e qytetarëve.

Ai bëri me dije se për këtë ka diskutuar edhe me kryeministrin Haradinaj. “Kryeministri Ramush Haradinaj na ka premtuar që të zgjidhet ky problem”, deklaroi ai.

Shala vlerësoi se kjo është një plaçkitje flagrante. “Llogaritet që shuma e faturave për konsumatorët joserbë është ngarkuar me 25-30% të shpenzimeve të serbëve që nënkupton se nëse shuma e faturës ka qenë 100 E ,25-30 euro janë para për shpenzimet e serbëve hiç këtu edhe faturat e fryra, manipulimi me njehsorë sikur edhe keqpërdorimi i skajshëm i tarifave , gjë që edhe është dëshmuar me fakte”, tha ai.

“Ka një senzibilizim qytetarë për këtë problem, ne do të presim deri sa të krijohet Bordi i ZRrE-së. Është vështirë të u kthehen paratë qytetarëve të Kosovës, por mund të u hiqet në fatura”, deklaroi ai.

Drejtori i Këshillit për Mbrojtjen e të Drejtave dhe Lirive të Njeriut (KMDLNj), Behxhet Shala, vlerësoi se ka një heshtje nga institucionet e Kosovës. “Vetëm presioni qytetarë mund të i detyroj ato që të marrin vendime. Nuk ka logjikë të paguhet shërbim, kur nuk merret ai shërbim”, tha ai.

Shala tha se është duke paguar vetëm 70 për qind të faturës. “Nëse me vjen 100 euro fatura, unë paguaj vetëm 70 euro. Është vendim i Gjykatës dhe e respektoj atë. Unë veproj si qytetar i Kosovës”, tha ai.

Agjensia e lajmeve ekonomia,  21.11.2017

Kosova do të negociojë normën e interesit për mjetet që do të investojë Contour Global në Termocentralin “Kosova e Re”.

Qeveria e Kosovës do të kërkojë nga kompania amerikane Contour Global që të ulë nivelin e kthimit në ekuitet të kërkuar për jetësimin e projektit të termocentralit Kosova e Re.

Ky njoftim është dhënë nga ministri i Zhvillimit Ekonomik, Valdrin Lluka.

“Me 10 nëntor kemi mbajtë takim dhe kemi diskutuar me komitetin drejtues të projektit në lidhje me strukturën e financimit të projektit dhe kemi diskutuar në lidhje me çështjet e mbetura për t’u diskutuar me investitorin ‘Contour Global’ dhe theksuar se çështja kryesore mbetet ‘kthimi në ekuitet’(IRR) ku do të diskutohet në takimin e ardhshëm me investitorin”, ka thënë Luka.

Takimi i kërkuar nga Contour Global për datën 27 nëntor nuk mund të mbahet për shkak të mbledhjes së përbashkët të qeverive të Kosovës dhe Shqipërisë.

“Ne kemi filluar bisedimet për një takim të radhës dhe investitori është përgjigjur pozitivisht dhe ka propozuar datën 27 nëntor për takimin këtu në Kosovë ku do të vijnë si delegacion, mirëpo ne për shkak se kemi takimin e 27 nëntorit në Korçë nuk kemi mundur ta konfirmojmë një gjë të tillë dhe jemi duke u dakorduar për një datë tjetër, diku në fund të muajit nëntor, eventualisht javën e parë e muajit dhjetor”, tha ministri Lluka.

Ndërsa kreu i qeverisë Ramush Haradinaj kërkoi nga ministri Lluka që të ketë dakordim dhe konsultim me qeverinë në mënyrë që të ketë dakordim të plotë.

“Tani krejt çka është me interes për Qeverinë e Kosovës dhe për Kosovën është të përcillet në dinamikën e paraparë, çdo gjë të jetë e konsultuar dhe e dakorduar nga ana e qeverisë, sepse ju përfaqësoni në emër të qeverisë dhe në emër të vendit”, tha Haradinaj.

Kompania amerikane “Contour Global” ishte ofertuesi i vetëm për projektin e ndërtimit të termocentralit Kosova e Re.

Revista Monitor,  16.11.2017

Oferta e pranuar nga Contour Global ishte bërë me kushte, duke kërkuar që Norma e Brendshme e Kthimit (IRR) të jetë në nivel prej 23 apo 27 për qind.

Pas qartësimeve dhe negociatave të bëra nga qeveria e kaluar, Contour Global ishte dakorduar që IRR-në ta ulë në 21.5%.

Norma e brendshme e kthimit është interesi që kërkon investitori për mjetet e investuara në këtë projekt

Revista Monitor,  16.11.2017

Ministri i Zhvillimit Ekonomik, Valdrin Lluka, ka pritur në një takim një delegacion të investitorëve nga Gjermania, kryesuar nga Hans Jurgen Muller, Kryetar i Shoqatës Ekonomike Gjermano-Shqiptare, i shoqëruar nga Ambasadori i Kosovës në Berlin, Skënder Xhakaliu.

Me këtë rast Ministri Lluka, ka njoftuar të pranishmit për sektorët që mbulon MZHE, respektivisht edhe projektet që do të realizohen.

Ministri Lluka, po ashtu ka prezantuar para investitorëve mundësitë e investimeve në Kosovë, duke u fokusuar në katër fusha; Energjinë, Energjinë e Ripërtëritshme dhe Efiçiencën e Energjisë, Minierat me fokus të veçantë Trepçën, sektorin e TIK-ut me fokus infratrukturën si dhe proceset e Ndërmarrjeve Publike në vend.

Gjithashtu, Ministri Lluka, prezantoi planet e tij për rritje të transparencës në proceset e marrjeve të licencave për energji të ripërtëritshme, duke prezantuar konceptin në formë të ankandeve të hapura, ku investitorët marrin pjesë në formë transparente.

Nga ana tjetër Kreu i Odës Gjermano-Shqiptare Hans Jurgen Muller, ka përgëzuar Ministrin Luka për angazhimet e tij në zhvillimin ekonomik të Kosovës, duke vlerësuar transparencën që ministri Lluka po promovon.

Ndryshe, dyja palët janë dakorduar që pas krijimit të Qeverisë së re Gjermane të organizohet një Konferencë për investitorë për energji dhe miniera në mes të dyja shteteve.

Agjensia e lajmeve ekonomia,  13.11.2017

Ministri i Zhvillimit Ekonomik Valdrin Lluka, ka pritur në një takim Ambasadorin e Kanadasë  për Kosovë, rezident në Kroaci, Daniel Maksymiuk, me të cilin ka bashkëbiseduar për zhvillimet ekonomike në vend, përfshirë prioritetet e Qeverisë në planin ekonomik.

Fokusi kryesor i takimit ishin potenciali minerar që ofron Kosova pasi që Kanadaja njihet si lider botëror në këtë industri. Me këtë rast Ambasadori Maksymiuk, ka njoftuar Ministrin Lluka për disa kompani Kanadeze të interesuara në këtë fushë që pritet të vizitojnë Kosovën së shpejti.

Për më tepër, Ambasadori ka ftuar Ministrin Lluka në konferencën më të madhe në botë për miniera dhe minerale që mbahet në muajin mars në Toronto, më qëllim të prezantimit të potencialeve që ofron Kosova në këtë industri.

Ministri Lluka, gjithashtu i paraqiti planet e tij për rritje të transparencës në të gjitha projektet minerare, mënyrë kjo e cila do t’i nxisë investitorët serioz të shteteve si Kanada drejt një zhvillimi të qëndrueshëm ekonomik.

Nga ana e tij Ambasadori Maksymiuk, ka përgëzuar Ministrin Lluka për praktikat  transparente në fushën e ekonomisë, duke shtuar se kjo do të ndikoj në bashkëpunimin e më tejmë mes dyja vendeve.

Ambasadori Maksymiuk tha se minierat janë fushë, në të cilat investitorët e huaj kanë interesim të investojnë, duke shtuar se kjo do të ndikonte që Kosova të ketë një zhvillim të qëndrueshëm ekonomik.

Agjensia e lajmeve ekonomia,  11.10.2017

Nga vitit 2012 e deri më tani konsumatorët në pjesë të tjera të vendit kanë paguar nga mbi 8 milionë euro për humbjet komerciale në veri të vendit.

Sipas statistikave, vetëm në veri, humbjet komerciale shkojnë deri në 4.5 për qind, ndërkaq shuma totale e kësaj pagese shkon në mbi 40 milionë euro, që nga viti 2012.

Por, përveç veriut, me humbjet komerciale konsumatorët janë edhe më keq. Në total sipas ZRRE-së, humbjet komerciale të energjisë elektrike shkojnë në 16.65 për qind.

Nëse bëhet një llogaritje e thjeshtë matematikore, del se humbjet në pjesën tjetër të vendit, pa veriun janë 12 për qind, e nga viti 2012 për këto humbje komerciale konsumatorët janë ngarkuar me 24 milionë euro në vit.

Pra në total, vetëm për humbje komerciale, konsumatorët janë ngarkuar me energji të pa shpenzuar për një periudhë rreth 10 vjeçare me 240 milionë euro.

Ndërkaq, nëse i llogarisim bashkë, si humbjet komerciale edhe ato të paguara për rrymën e shpenzuar në veri, i bie që konsumatorët e rregullt të kenë paguar 280 milionë euro fatura të energjisë, të pa shpenzuar nga ata.

Humbjet komerciale janë treguar problem shqetësues edhe për Zyrën e Rregullatorit për Energji (ZRRE).

Këto humbje, sipas një draft-raporti të këtij institucioni për vitin 2016, të cilin e ka siguruar Telegrafi, shkojnë në 16.65 për qind në tërë vendin.

“Shqetësuese mbeten humbjet komerciale, që janë mjaft të larta, të cilat përbëjnë 16.65% të konsumit total në shpërndarje. Nga kjo, energjia e pa faturuar në pjesën veriore të Kosovës (252 GWh) përbën rreth 5.24% të kërkesës së shpërndarjes, pjesë kjo ku dominon minoriteti serb, ndërsa krahasuar ndaj humbjeve komerciale në shpërndarje përbënë 31.5%”, thekson Draft raporti i ZRRE-së për vitin 2016.

E, Avokati i Popullit, Hilmi Jashari, në një intervistë për Telegrafin ka thënë se është e padrejtë që qytetarët të ngarkohen me diçka që nuk e kanë shpenzuar.

Sipas tij, çdo ngarkesë që i është bërë qytetarëve me fatura të energjisë elektrike duhet kompensuar.

“Do të duhej që ky kompensim për pagesën e bërë tu kthehej qytetarëve. Kam tentuar që të kursej qytetarët dhe këtë e kam marr (si obligim) si avokat i popullit për të bërë padi, në kompensimin e dëmit që është shpenzuar. Kjo barrë që i është bërë qytetarit t’i kompensohet në faturat e ardhshme”, ka thënë Jashari.

Deri në shqyrtimin përfundimtar, sipas tij, vendimi gjyqësor për pezullim do të duhej të gjente zbatim të menjëhershëm nga ZRRE-ja.

“Vendimi i pezullimit nga Gjykata do duhej të merrte zbatim të menjëhershëm sepse ka marr formën e prerë, kuptohet në ankimim dhe procedurë të jashtëzakonshme”, ka deklaruar Avokati i Popullit, Hilmi Jashari.

Se konsumatorët ngarkohen në mënyrë të paligjshme e pranojnë edhe zyrtarët e Qeverisë së Kosovës.

Ministri i Zhvillimit Ekonomik, Valdrin Lluka, në profilin tij në Facebook, ka thënë se nuk pajtohet që konsumatorët të ngarkohen paligjshëm me faturimin e energjisë eklektike nga mos pagesa në veri.

Por mos pagesa sipas tij, nuk duhet tu faturohet konsumatorëve të cilët paguajnë faturat.

“Mos pagesa e energjisë i shkakton humbje operatorëve të energjisë, mirëpo kjo nuk e arsyeton assesi faturimin e kësaj humbje qytetarëve tjerë”, tha ai.

Sipas tij, shpenzimet dhe ngarkesat e tilla do të hiqen nga tarifimi për vitin 2018.

“ZRRE nuk ka bord funksional që nga muaji maj dhe tashmë jemi në proces të përzgjedhjes së dy anëtarëve të rinj në këtë institucion, që edhe e mundëson marrjen e vendimeve të ndryshme. Rekrutimi i dy anëtarëve shtesë do të realizohet brenda muajit dhjetor të këtij viti”, ka premtuar ministri i MZHE-së, Valdrin Lluka.

Sipas tij, çështja e veriut të vendit, është politike për të cilën duhet gjetur një zgjidhje e shpejtë dhe e ligjshme.

Ndërkaq, zëdhënësja e ZRRE-së, Adelina Murtezaj – Bajrami nuk ka sqaruar për humbjet komerciale në veri por edhe në pjesë të tjera të vendit.

Sipas saj, vendimet e ZRRE-së janë të bllokuara nga mos plotësimi i bordit.

“Humbjet e energjisë elektrike janë një nga komponentët përbërës të të Hyrave të Lejuara Maksimale të ndërmarrjeve të cilat i nënshtrohen rregullimit të çmimeve. Nga të Hyrat e Lejuara Maksimale kalkulohet tarifa e energjisë. Çdo vlerësim i të Hyrave të Lejuara Maksimale i nënshtrohet proceseve të rregulluara me ligjet e energjisë dhe rregullat e tjera për përcaktimin e çmimeve. Vendimet, sipas këtyre ligjeve dhe rregullave, merren nga Bordi i ZRRE, i cili aktualisht ka vetëm dy anëtar dhe nuk mund të marr asnjë vendim për shkak të mungesës së kuorumit”, ka qenë përgjigja e Murtezaj – Bajramit.

Ajo thotë se sipas Ligjit për Rregullatorin e Energjisë, seancat e Bordit mund të mbahen nëse ekziston kuorumi, pavarësisht nëse ka një apo dy pozita të lira në Bord.

Kurse në KEDS kanë thënë se do ta aplikojnë çdo politikë e cila vendoset nga ZRRE-ja.

“KEDS, kur mori përsipër operimet e distribuimit dhe furnizimit me energji elektrike vazhdoi aplikimin e politikave të themeluara nga ZRRE-ja si trupë politikbërëse në sektorin e energjisë. Ne do të vazhdojmë të aplikojmë çdo politikë të vendosur nga ZRRE siç edhe e kemi në përgjegjësi”, ka thënë për Telegrafin zëdhënësi i KEDS-it, Viktor Buzhala.

Gazeta Zëri,  07.11.2017

Përfundimisht është pezulluar vendimi i Zyrës së Rregullatorit të Energjisë, i cili i detyronte qytetarët  që nëpërmjet faturave të energjisë të paguajnë për rrymën që nuk e shpenzojnë vetë, por që shpenzohet në veri të vendit.

Këtë vendim e ka marrë edhe Gjykata e Apelit pas asaj të themelores, pas ankesës së bërë nga Avokati i Popullit. Ky i fundit thotë se më vendim gjyqësor i jepet fund diskriminimit dhe dëmeve që u janë shkaktuar qytetarëve nga ZRRE-ja.

“Shkalla e parë ka vendos pro kërkesës sonë, edhe ndërkohë është dhënë mundësi palës tjetër që të bën ankesë në gjykatën e apelit. Para disa ditësh përfundimisht edhe gjykata e Apelit e ka miratuar kërkesën tonë prapë edhe me fjalë tjera është pezulluar ekzekutimi i këtij vendimi”, deklaroi Ilmi Jashari, Avokat i Popullit.

Por, zëdhënësja e zyrës së Rregullatorit, Adelina Murtezaj, nëpërmjet telefonit tha se në mungesë të bordit funksional, nuk mund të ketë zbatim të vendimit gjyqësor, që pezullon vendimi e ZRRE-së.

Për avokatin e popullit, ky qëndrim i Zyrës së Rregullatorit është absurd, dhe prokuroria e shtetit duhet të merret me këtë çështje nëse nuk zbatohet vendimi i Gjykatave

“Ajo çka na brengos ka qenë vlerësimi që gjoja se ZRRE së në mungesë të bordit nuk mund të marrin një vendim, për mua kjo ka qenë absurde se sistemi gjyqësor i merr vendimet dhe janë të plotfuqishme dhe nuk varen nga bordi apo jo, sepse bordi nuk është i autorizuar për të vlerësoj vendimin gjyqësor. Ata duhet ta zbatojnë si të tillë. Duhet ta zbatoj zyra ligjore, duhet ta vë menjëherë në zbatim…Mendoj që Prokuroria do të ketë shumë punë nëse ky vendim nuk zbatohet, presim tash të shohim se cilët janë hapat që kjo zyre do të merr edhe do të ketë një njoftim zyrtar nga vet gjykata”, deklaroi Jashari.

Sipas Avokatit të Popullit, qytetarët kanë paguar rreth 8 milionë euro në vit për rrymën e shpenzuar në veri, që i bie se nga viti 2012 kur është marrë vendimi nga ZRRE, qytetarët kanë paguar rreth 40 milionë euro për rrymën të cilën fare nuk e kanë shpenzuar.

Scan TV,  06.11.2017

Kosova përgjatë viteve është duke u ballafaquar me furnizim jo stabil me energji energjike. Ndërprerjet e kohëpaskohshme të energjisë elektrike, përmes njoftimeve zyrtare, i paralajmëron Distribucioni i Furnizimit me Energji Elektrike (KEDS).

Aty tregohet për kohën dhe regjionet se kur do të ndërpritet energjia elektrike. Si arsye kryesore e mungesës se këtij produkti në Kosovë vazhdimisht theksohet vjetërsia e termocentraleve në Kosovës, të cilat datojnë që nga vitet e 60-ta.

Derisa, që nga viti 2013 shpërndarja e energjisë elektrike realizohet nga konsorciumi turko –amerikan ‘Çalik – Limak” i cili e ka blerë këtë distribucion.

Arben Gjukaj, drejtor i Korporatës Energjetike të Kosovës, thotë për Radion Evropa e Lirë se termocentralet janë të vjetruara dhe se kapaciteti i tyre është i pamjaftueshëm për të mbuluar qind për qind kërkesat për energji elektrike. “Termocentralet Kosova A dhe Kosova B, ku në total kanë një kapacitet të disponushëm për prodhim afër 900 megavatë dhe nevojat vjetore të konsumit Korporata Energjetike i mbulon për afër 89 për qind”, thotë Gjukaj.

Për një furnizim stabil me energji elektrik, drejtori i KEK-ut Arben Gjukaj thotë duhet të bëhet ndërtimi i kapaciteteve të reja, siç është termocentrali i ri. “Zgjidhja përfundimtare edhe e planit operacional të KEK-ut është ndërtimi i kapaciteteve të reja gjeneruese si dhe rivatilizimi i Kosovës B i cili do të zgjidhte problemin në terme afatgjate”, thotë Gjukaj.

Pasiguri me furnizim me energji elektrike vazhdon të jetë një nga kufizimet kyçe edhe për zhvillimin e ekonomisë në Kosovë.

Në hulumtimet e bëra nga përfaqësues të bizneseve në Kosovë ishte theksuar se Kosova duhet të investojë në sistemin energjetik, pasi që bizneset po përballen me problem të energjisë.

Visar Azemi, nga Konsorciumi Kosovar i Shoqërisë për Energji, për Radion Evropa e Lirë, thonë se në sektorin energjetik në Kosovë është bërë menaxhimi jo i mirë dhe se politikat e hartuara janë bërë në mënyrë të gabuar.

“Problemi i furnizimit me energji elektrike ka filluar qysh nga përfundimi i luftës deri disa vite më parë kur Kosova ka vendos të privatizojë rrjetin e distribucionit dhe shpërndarjes me qëllim që të kemi një përmirësim me energji elektrike, por prapë një gjë e tillë nuk ka ndodhur dhe kemi pasur raste të shumta ku problemet janë shtuar në disa pjesë dhe kjo si pasojë e keq menaxhimit të dikasterit të energjisë elektrike në Kosovë”, thotë Azemi.

Përgjatë 10 viteve të fundit, shton ai, autoritetet e Kosovës nuk kanë bërë asgjë konkrete për të përmirësuar gjendjen e energjisë elektrike. “Ne si KOSID i kemi bërë thirrje Qeverisë që po humbin kohë dhe mjete financiare, ku për shumë probleme janë investuar mbi 1 miliard euro në sektorin energjetik dhe gjendja prapë është e mjerueshme dhe nuk është bërë asnjë hap për të parë mundësinë që të largohemi nga gjenerimi i energjisë elektrike me thëngjill. Kemi kërkuar që ky 98 për qind me thëngjill të zvogëlohet duke shtuar kapacitete të reja të prodhimit nga burimet e ripërtritëshme”, thotë Azemi.

Përgatitjet për ndërtimin e një termocentrali të ri të quajtur Kosova e re kanë filluar më shumë se një dekadë, por se ende nuk kanë filluar.

Telegrafi,  03.11.2017

Pas debatit me qytetarë, përfaqësuesit e KDI-së, zv.Ministri i Mjedisit dhe Planifikimit Hapësinor, Fatmir Matoshi si dhe deputetët e Kuvendit të Kosovës Ahmet Isufi dhe Xhelal Svçla, major Nebih Aliu nga Policia Kufitare, vizituan pikën e re kufitare në Kapi të Sfircës.

Megjithëse punimet në këtë pikë kufitare kanë filluar në tetor të vitit të kaluar, ajo ende nuk është funksionale për shkak të mungesës së furnizimit të energjisë elektrike nga ana e KEDS-it, pavarësisht kërkesës së parashtruar ndaj këtij autoriteti.

Deputetët e Kuvendit u zotuan që do ta adresojnë këtë çështje në Kuvend dhe Qeveri.

Debati publik dhe vizita në terren u organizua në kuadër të memorandumit të bashkëpunimit të nënshkruar në mes të KDI-së dhe Kuvendit që synon rritjen e pjesëmarrjes së qytetarëve në kuadër të dialogut Kosovë-Serbi si dhe fuqizimin e rolit mbikëqyrës të Kuvendit ndaj Qeverisë, me financimin e Ambasadës së Zvicrës.

Agjensia e lajmeve ekonomia,  03.11.2017

Miratimi i rishikimit të projektligjit për buxhetin e 2017-së, në një ndër pikat kryesore të tij ka paraparë edhe mbulimin e shpenzimeve të cilat rrjedhin nga kontrata për planin e riorganizimit të Trepçës në shumën prej 598 mijë e 920 euro direkt nga buxheti i shtetit, shkruan Indeksonline.

Sipas ekspertëve të ekonomisë gjiganti i Trepçës tash e 17 vite po vazhdon të marrë para nga buxheti i taksapaguesve në vend që të kontribuoj në shtimin e buxhetit.

Analisti i çështjeve ekonomike Naim Gashi, ka thënë për Indeksonline se Trepça që nga paslufta e këtej ka qenë në absorbues i mjeteve të buxhetit të Kosovës dhe një kontribuues siç do të duhej të ishte një kompani mineralesh dhe metalurgjike siç ka qenë në të kaluarën.

“Aktualisht kostoja e investimeve në Trepçë në vitet e pasluftës i tejkalon të gjitha kapacitetet prodhuese që i ka ajo, ku janë investuar qindra miliona euro, pjesa dërrmuese nga Qeveria e Kosovës dhe një pjesë nga donatorët. Trepça po vazhdon të absorboj për çdo vit mjete nga buxheti i Kosovës, sepse ajo në vitet e fundit ka pasur një keq menaxhim  të jashtëzakonshëm sepse një kompani minerare kur nuk mundet ti përballoj kostot e prodhimit në fakt vihet në pyetje se çfarë është ajo”, ka thënë ai.

Gashi ka theksuar se strategjia për zhvillimin në bazë të ligjit për Trepçën që është miratuar vitin e kaluar ka mbetur aty ku ka qenë sepse, ende nuk është themeluar bordi mbikëqyrës.

“Qeveria e Kosovës duhet që urgjentisht ta themeloj bordin e Trepçës, ta zgjedh një menaxher profesionist i cili ka ta shtyje që të miratohet strategjia për Trepçën e cila parashihet me ligjin i cili është miratuar vitin e kaluar dhe në këtë mënyre Trepça të jetë në funksion të zhvillimit ekonomik të Kosovës e jo në funksion të frenimit të këtij zhvillimi sepse për çdo vite taksat e qytetarëve të Kosovës po shpenzohet miliona për ta mbajtur në ‘këmbë’  këtë kompani”, ka thënë Gashi.

Revista Monitir,  02.11.2017