info@energjia.al

Fokus i investimeve nga KEDS kësaj radhe ka qenë edhe fshati Stanoc i Drenasit. Pas përfundimit të projektit, janë plotësuar të gjitha nevojat energjetike dhe është rritur siguria për banorët.

Banorët shihen të gëzuar teksa flasin për investimet që ka bërë KEDS-i këtu.
Bajram Lika, banor i fshatit, thotë se me gjendjen e tanishme energjetike janë tejet të lumtur.
“Jo të kënaqur, po të shashtrisur jemi me gjendjen energjetike që kemi tani. Veç kush s’po don me pranu këtë realitet, se tash gjithçka është më së miri”, ka  thënë ai. Bajrami e ka edhe një këshillë për të gjithë konsumatorët.
“Është mirë edhe me u mundu me kursy nga pak, sidomos ne në katund që po nxehemi me dru”, ka thënë ai.

Për këtë projekt, në fshat është implementuar nga ana e KEDS-it një trafo e re me fuqi prej 160 kVA, dhe janë riparuar dy trafot ekzistuese. Gjithashtu janë vendosur edhe 82 shtylla të reja tensionit të ulët edhe 49 shtylla të tensionit të mesëm.  Është investuar në rrjetin e tensionit të ulët 9,7 km dhe 3,5 km të tensionit të mesëm.

Gjatë punës janë hequr të gjitha shtyllat e vjetra dhe janë zëvendësuar me të reja dhe përçuesit e vjetër janë zëvendësuar me përçues të ri, me kabllo të izoluar, ku edhe seksioni i përçuesve është vendosur më i madh dhe që i plotëson nevojat e banorëve për një kohë relativisht më të gjatë.

Edhe për Xhavit Ramën, po ashtu banor i këtij fshati, stabilizimi i energjisë elektrike është i mirëseardhur.
“Rryma është tepër e mirë tash, rreziku nuk ekziston. Kabllo të vjetra më nuk të sheh syri kërkund. Gjithçka është mirë”, ka përfunduar Rama.

KEDS po vazhdon me investime, dhe tashmë ka rregulluar tensionin dhe infrastrukturën energjetike për shumë vendbanime anekënd Kosovës.

Agjensia e lajmeve ekonomia,  19.09.2017

Policia e Kosovës ka njoftuar se ka arrestuar dy persona të dyshuar, të enjten në Fushë Kosovë pasi që kanë sulmuar fizikisht zyrtarët e KEDS-it.

Nuk raportohet për të lënduar. Me vendim të prokurorit të dyshuarit lirohen në procedurë të rregullt.

Telegrafi,  12.09.2017

KEDS-it duket se nuk po i mjaftojnë nga 8 milionë euro që paguajnë çdo vit shqiptarët dhe komunitetet tjera për komunat serbe në veri.

Gazeta Fjala ka mësuar se kompania me kapital turk, po kërkon nga Administrata Tatimore e Kosovës të lirohet edhe nga tatimi.

Sipas të dhënave që disponon Gazeta, janë mbi 3.5 milionë euro të cilat KEDS kërkon t’i kthehen nga buxheti i shtetit me arsyetimin se janë ngarkuar me tatim për energjinë të cilën e kanë faturuar por nuk është paguar nga konsumatorët në veri të Kosovës.

“Janë duke kërkuar një marrëveshje që të mos paguajnë tatim derisa t’i inkasojnë mjetet nga konsumatorët në veri”, ka treguar një zyrtar i ATK-së.

Në KEDS nuk kanë pranuar të japin informacione lidhur me këtë kërkesë, ndërsa mësohet se marrëveshja po kërkohet pasi kompania e distribucionit të energjisë elektrike ka refuzuar ti paguaj ti paguaj mjetet në emër të tatimit dhe rasti ka përfunduar në gjykatë.

Ndërkaq, merret vesh se gjykata e shkallës së parë i ka dhënë të drejtë ATK-së që të bllokoj llogaritë e KEDS-it për të tërhequr borxhin e pa paguar.

Jashari: Rryma në veri është paguar

Në anën tjetër Avokati I Popullit, Hilmi Jashari pati konfirmuar se shuma totale që kanë shpenzuar komunat serbe në veri është paguar tërësisht nga konsumatorët e komunave tjera dhe se KEDS-it sipas tij nuk i kanë borxh konsumatorët në këtë pjesë.

Nga hetimet e nisura në fillim të muajit prill të këtij viti fillimisht mbi dyshimet për shkelje të të drejtave të njeriut, ka nxjerrë ndoshta skandalin më të madh, mbi atë se shqiptarët dhe komunitetet tjera janë duke paguar faturat e energjisë elektrike edhe për komunat serbe në veri.

Jashari, ka thënë se shuma që qytetarët e Kosovës paguajnë për serbet e komunave veriore, është tetë milion euro për çdo vit, ku sipas tij kjo ka ndodhur me vetëdijen e institucioneve përgjegjëse të Kosovës.

“Kemi marrë një përgjigje prej Zyrës së Rregullatorit të Energjisë dhe më pas kemi realizuar një takim me zyrtarë e ZRRE-s ku kemi kërkuar shpjegime shtesë për situatën e krijuar. Ndërkohë kemi përcjell tri letra menjëherë në Ministrinë e Zhvillimit Ekonomik dhe është pranuar nga ZRRE-ja se kosovarëve u janë shtuar në faturën e tyre, 4.5 për qind e shumës, e cila është paguar për pjesën veriore të Kosovës. Është bërë një interpretim se gjoja se ky 4.5 për qind njihet si humbje komerciale sipas interpretimit që jep zyra komerciale e ZRRE-së”, pati thënë ai.

Kjo sipas tij bie ndesh sa i përket ligjit për të drejtat e konsumatorit dhe ligjit të marrëdhënieve dhe detyrimeve dhe me një varg ligjesh tjera që definitiv kanë kërcënuar në formën çfarë është bërë sipas vlerësimit tonë preliminar.

KEDS mashtroi qytetarët

KEDS ishte gjetur duke mashtruar qytetarët edhe me reduktimet e energjisë elektrike.

Në fillim të vitit mashtrimet me ndërprerjen e energjisë elektrike i kanë kushtuar 45 mijë euro KEDS-it. Zyra e rregullatorit të Energjisë e ka gjobitur të premten këtë kompani pasi nën arsyetimin e mirëmbajtjes së rrjetit kishte aplikuar reduktime të energjisë elektrike tek konsumatorët.

KEDS mbanë licencën e Operatorit të Sistemit të Shpërndarjes (OSSH), i cili është gjetur nga ZRRE se ka bërë një mashtrim për një periudhë kohore duke lënë në terr qytetarët për orë të tëra, pati raportuar Gazeta Fjala.

“Në këtë mbledhje Bordi ka shqyrtuar komentet e OSSH në lidhje me njoftimin për shkelje, të datës 6 mars 2017, përmes të cilit OSSH është njoftuar me shkeljet e konstatuara nga monitorimi i ndërprerjeve të planifikuara me qëllim të mirëmbajtjes së rrjetit”, thuhet në njoftimin e ZRRE.

Bordi ka konstatuar se OSSH nuk ka arritur të dëshmojë se të gjeturat nga monitorimi i ZRRE nuk janë të sakta dhe ka vendosur që duke u bazuar në Rregullën për Masat Administrative dhe Gjobat të shqiptojë dënim me gjobë në vlerë prej dyzet e pesë mijë euro.

Me kërkesë të kryetarit të Komisionit për Zhvillim Ekonomik, Infrastrukturë, Tregti dhe Industri, Muhamet Mustafa ZRRE-ja pati detyruar KEDS-in t’i ndal reduktimet me arsyetimin e mirëmbajtjes së rrjetit, për të hetuar se çfarë kishte ndodhur.

ZRRE-ja në hetimin preliminar ka vërtetuar se procesi i ndërprerjeve është përcjell me parregullsi. Ka pasur mirëmbajtje të rrjetit që nuk janë realizuar kurrë, ndërsa është ndërprerë energjia elektrike dhe qytetarët kanë mbetur në terr.

Ka pasur ndërprerje të shpeshta të daljeve të njëjta brenda muajit, përkundër që rrjeti ishte krejt në rregull.

Gazeta Fjala,  08.09.2017

Investimi i radhës nga KEDS në rajonin e Podujevës është shtrirë në fshatrat Bradash e Letanc të kësaj komune.

Në lokalitetin e Bradashit gjatë këtij projekti KEDS ka vënë 40 shtylla të tensionit të ulët, 53 shtylla të tensionit të mesëm, 3275m rrjet të tensionit të ulët dhe 2160m të tensionit të mesëm.

Pas këtij investimi për banorët e kësaj ane, sidomos për konsumatorët e amvisërisë, është rritur siguria dhe është stabilizuar energjia elektrike. Ata tashmë nuk kanë probleme për përdorimin e pajisjeve elektrike shtëpiake.

Për Dorontina Gashin nga ky fshat, tash gjithçka është më mirë.

“Boll të dobët e kemi pas rrymën, për me bë drekën është dashur prej mëngjesit me nxe shporetin. Nji frymë me fry, na u prishnin telat. Tash e dhe bojleri edhe shporeti po nxehen menihere. Korrektorat ma nuk na hyn në punë, i kena hek krejt”, ka thënë Dorontina Gashi, nga fshati Bradash i Podujevës.

Në përfundim e sipër janë demontimi i shumicës së rrjetit të vjetër që kanë kaluar nëpër prona private dhe tani kanë përreth rrugëve të lagjeve.

Me vendosjen e kabllove bistekë është ngritur siguria e konsumatorëve, me këtë janë zvogëluar edhe humbjet teknike.

Edhe banori tjetër, Behram Jashari, falënderon punëtorët e KEDS-it për ndryshimet energjetike që ua kanë sjellë.

“Kompania KEDS është duke punu tepër mirë. Punëtorët që kanë punu këtu janë sjellë shumë mirë. Gjithmonë kemi qenë të informum për punën që bënin dhe asgjë nuk bënin pa lejen tonë”, ka thënë Jashari.

Numri i familjeve të cilët kanë përfituar nga realizimi i këtij projekti është 63.

Po në këtë komunë, në fshatin Letanc, KEDS është kthyer përsëri për të investuar në ndërrimin e rrjetit elektrik. Kohë më parë KEDS këtu ka vendosur trafon duke rritur kështu kapacitetet energjetike në këto anë.

Sipas projektit kësaj radhe në “LP 20 kV, Drejtimi i Letancit” KEDS ka vendosur 202 shtylla të tensionit të mesëm, 10935m rrjet të tensionit të mesëm ajror dhe 5200m rrjet të tensionit të mesëm nëntokësor.

Edhe në Letanc banorët kanë ndjerë investimet e KEDS-it, dhe me këtë është rritur siguria e konsumatorëve dhe janë zvogëluar humbjet teknike dhe rëniet e tensionit.

Projekti është në përfundim e sipër dhe janë duke u demontuar rrjetin e vjetër dhe zhvendosur ato nga pronat private.

Ky investim është edhe një zotim i KEDS-it për të përmbushur obligimet për nevojat energjetike të konsumatorëve në këto anë.

Agjensia e lajmeve ekonomia,  04.09.2017

hefi Ekzekutiv, Naser Canolli me menaxhmentin e ndërmarrjes, ka pritur sot përfaqësuesit e Korporatës amerikane Sfidat e Mijëvjeçarit – MCC (Millenium Challenge Corporation), Thomas P.Schehl dhe David F. McGill si dhe përfaqësuesit e Zyrës kombëtare të MCC-së, Alban Zogaj, Edona Kurtolli, Burim Hashani dhe Kastriot Orana.

Në këtë takim u bisedua lidhur me ecurinë e përgatitjeve për fillimin e zbatimit të projektit për instalimin e matësve të energjisë termike, projekt ky i financuar nga MCC.

Palët në këtë takim u dakorduan, që ekipet e ekspertëve nga të dyja palët të vazhdojnë angazhimet e përbashkëta për dizajnimin e përgatitjeve për fillimin e realizimit të këtij projekti.

Përfaqësuesit e MCC-së janë ndarë të kënaqur me bashkëpunimin e deritanishëm me menaxhmentin e “Termokos”-it sa i përket koordinimit për realizimin e këtij projekti.

Në kuadër të këtij projekti do të vendosen matësit e energjisë termike tek të gjithë konsumatorët e NP “Termokos” SH.A, gjë që do të ndikojë në efiçencën  energjisë termike si dhe në përmirësimin e mirëqenies ekonomike të konsumatorëve tanë.

Projekti për instalimin e matësve të energjisë termike në vlerën e afro 10.9 milion dollarëve, është një nga projektet, ku do të orientohet fondi 49 milionë dollarësh, që MCC-ja e ka miratuar për të financuar projekte në fusha të ndryshme në Kosovë.

Agjensia e lajmeve ekonomia,  30.08.2017

Vetëm gjatë vitit 2014 kompania KEDS ka siguruar profit të pastër prej rreth 30 milionë eurosh, derisa një vit më parë kompania turke “Calik-Limak” kishte privatizuar distribucionin e energjisë elektrike për 26.3 milionë euro.

Shitja e distribucionit të energjisë elektrike me një çmim të tillë vite më pare ishte përcjellë me akuza të shumta, pasi vlerësohet se vlera e aseteve të kompanisë publike ishte shumëfish më e lartë dhe njëkohësisht kompania turke kishte investuar në një biznes të sigurt dhe me të  drejtë ekskluzive të shitjes me pakicë të energjisë elektrike të konsumatorët.

Gazeta “Zëri” ka arritur ta sigurojë dokumentacionin e fitimeve marramendëse që i kanë siguruar kompanitë KEDS dhe KESCO, kjo e fundit është themeluar në vitin 2015 dhe merret me furnizim me energji elektrike.

Sipas këtij dokumentacioni të “Zërit”, në vitin 2015 këto kompani kanë fituar 31 milionë euro, pavarësisht investimeve të bëra, ndërsa në vitin 2016 fitimet e këtyre dy kompanive kanë arritur në rreth 25 milionë euro.

Gazeta Zëri,  08.08.2017

KEDS njofton se në disa vende të Kosovës do të ketë ndërprerje të energjisë elektrike.

Ja cilat janë ato:

Më 24.07.2017 në NS 110/10 kV Prishtina 5 do të ndërprehet:

Dalja 10kV J14 Zona Industriale  (Kodi: 13000018)  prej orës 13:00 deri në orën 15:00

Gjatë kohës sa do të zgjasin punimet, pa furnizim me energji elektrike do të mbesin: MTI-Instituti i produkteve dhe laboratori i lëndëve kimike, Objekti qeveritar Qendra e panaireve.

Arsyeja e ndërprerjes: Energjizimi i objektit.

Ndërprerje e domosdoshme për punimet për sigurinë e sistemit.

Telegrafi,  24.07.2017

Operatori KOSTT njofton se për shkak të punimeve në kuadër të projektit të revitalizimit të nënstacioneve, në zonën Ferizaj 1 dje ka pasur reduktime të zgjatura në këtë zonë.

“Njoftohen qytetarët e komunës së Ferizajt se me datë 10 korrik, temperaturat e larta atmosferike kanë shkaktuar nxemjen e transformatorit energjetik TR2 në NS 110/35/10 kV Ferizaj 1, i cili ka qenë në punë gjatë periudhës sa janë realizuar punimet në transformatorin TR 1 në këtë nënstacion, në kuadër të projektit të KOSTT për rehabilitimin e stabilimenteve 35 kV”, thuhet në një komunikatë të Operatorit.

Si pasojë e kësaj, reduktimet në furnizimin me energji elektrike të parapara në NS Ferizaj 1 në kuadër të këtij projekti, kanë zgjatur më shumë se sa që është paraparë, deri në ora 19:00.

Punimet e parapara të KOSTT për dje bëhet e ditur se kanë përfunduar dhe transformatori energjetik TR 1 është energjizuar me sukses në ora 21:56.

KOSTT sh.a kërkon mirëkuptim nga qytetarët e rajonit të Ferizajit për reduktimet e shkaktuara, pasi që implementimi i këtij projekti është i nevojshëm për të rritur besueshmërinë dhe sigurinë e furnizimit me energji elektrike nga aspekti i transmisionit për rajonin e Ferizajit.

Agjensia e lajmeve ekonomia,  12.07.2017

Rreth njëmijë familje dhe biznese të shtrira në zonën qëndrore të qytetit të Pejës, që nga ‘Dulia’ tek ‘Ura e Gurit’ e gjer tek Hoteli ‘Gold’, kanë pëfituar tension stabil, energji kualitative dhe kanë shmangur rrezikun e avarive të ndryshme energjetike ndër vite.

Kjo është bërë e mundur pas projektit investiv nga KEDS-i, i cili tashmë ka përfunduar dhe është mirëpritur nga të gjithë banorët e komunitetit.

“Ne kemi kuptuar rëndësinë dhe nevojën e këtij investimi në kohë. Janë vënë rreth
40 shtylla betoni për tension të ulët dhe 1 mijë e 600 metra kabllo. Trafo poashtu ka qenë investim i mëhershëm. Ky është një investim nga i cili kanë pëfituar mëse njëmijë ekonomi familjare e biznesore”, deklaron zëdhënës i KEDS-it, Viktor Buzhala.

Në këtë zonë të qytetit të Pejës ka biznese të shumta dhe po ashtu institucione publike por edhe banesore, ndaj edhe ndikimi pozitiv i këtij projekti vërehet dukshëm tek të gjithë pëfituesit. Njëri nga të cilët është edhe Fidan Dauti, me një biznes të vogël në këtë anë. Dauti shprehet i kënaqur me investimin e KEDS-it për të cilin thotë se ka qenë koha e fundit për tu bërë diçka para se rreziqet nga rrjeti i vjetëruar të bëheshin mëse serioze.

“Ka qenë koha e fundit për të ardhë ky investim. Puna është kryer mirë dhe ka ndiku që të na vije një furnizim stabil me rrymë. Për bizneset rryma është sikur ajri, andaj kjo që ka bërë KEDS-i është projekt që na ka ndihmuar shumë”, deklaron Dauti.

Projekti në fjalë i KEDS-it, përfshinë disa bashkësi territoriale të qytetit të Pejës. Investime të tilla, gjithnjë sipas planit dinamik të paraparë në komunën dhe rajonin e Pejës po vazhdojnë nga Kompania Kosovare për Distribuim dhe Furnizim me Energji Elektrike KEDS.

Agjensia e lajmeve ekonomia,  10.07.2017

Mbi 200 biznese në fshatin Greme të Ferizajt tani do të zhvillojnë më lehtë biznesin e tyre. Këtë ua ka mundësuar KEDS-i pas investimit të radhës që bëri në fshatin më të industrializuar të Kosovës.

Energjia elektrike është shumë e rëndësishme për zhvillimin ekonomik. Duke e pasur parasysh këtë, KEDS u jep prioritet zonave ku aktivitetet ekonomike janë më të theksuara dhe ndikojnë direkt në mirëqenien e qytetarëve. Në këtë aspekt, investimi i radhës është bërë në fshatin Greme të Ferizajt, i njohur me fabrikat e shumta të mobilieve.

Në fshat KEDS ka vendosur dy trafo të reja me një kapacitet prej10(20)/0.4kV të tipit blind. Njëra me fuqi S=630kVA, kurse tjetra  S=400kVA , që kanë rritur dukshëm kapacitetet energjetike në këtë anë.

Gjatë këtyre punimeve është bërë edhe implementimi i 135 shtyllave të tensionit të ulët, 28 shtylla të tensionit të mesëm, 5900m rrjet të tensionit të ulët, 1000 m rrjet të tension-it të mesëm.

Përveç bizneseve nga këto investime kanë përfituar edhe 275 familje të këtij fshati.

Banorët thonë që pajisjet elektrike nuk kanë pasur shanse t’i përdorin ditën, ato i përdornin vetëm natën, kur tensioni ishte pak më mirë. Tani gjithçka është ndryshe.

Në fshat edhe përfaqësuesit e bizneseve thonë që gjendja ka qenë shumë e rëndë dhe e kanë pasur të vështirë për të zhvilluar biznesin. Tensioni sidomos gjatë ditës ka qenë shumë i dobët.

“Gjendja energjetike më parë ka qenë katastrofale. Tensioni gjatë ditës kurrë nuk kalonte 150 volt. Punën e bënim me rregullatorë të tensionit, por nuk kemi mundur të punojmë me kapacitet të plotë.

Me investimin e ri që ka bërë KEDS-i është rregulluar gjithçka, ka thënë Arben Rexhepi, pronar i fabrikës për përpunimin e qelqit “Loni Gglass”, dhe njëkohësisht sekretar i Shoqatës së Bizneseve në Greme.

Rexhepi gjithashtu shton se kanë bashkëpunim të ngushtë me KEDS-in dhe se janë pagues të rregullt të energjisë elektrike, prandaj edhe furnizimin e duan të jetë i rregullt.

“Kemi pasur takime edhe me stafin menaxherial të KEDS-it dhe bashkëpunimin e kemi në nivel”, shton Rexhepi.

KEDS po shtrin investimet në të gjithë territorin e Kosovës dhe me këtë synon që të përmirësojë furnizimin me energji elektrike dhe të jetë sa më afër konsumatorëve

Agjensia e lajmeve ekonomia,  06.07.2017