KESCO fitoi 22 milionë euro nga shitja e energjisë

Kompania për Furnizim me Energji Elektrike (KESCO) gjatë vitit 2017 ka dyfishuar fitimin, duke e krahasuar me një vit më herët. Në bazë të raportit të Auditorit shihet se gjatë vitit që lamë pas KESCO ka realizuar një fitim të pastër prej 22 milionë e 624 mijë eurosh, duke i dyfishuar fitimet nga viti paraprak.

Vetëm gjatë vitit 2017 Kompania për Furnizim me Energji Elektrike (KESCO), që është pronë e kompanisë turke “Çalik & Limak”, ka siguruar profit të pastër prej 22 milionë e 624 mijë eurosh, ndonëse zyrtarët e kësaj kompanie në vazhdimësi janë ankuar për probleme të vazhdueshme financiare.

Në raport shihet qartë se në vitin paraprak profiti i pastër i kësaj kompanie është dyfishuar në raport me vitin paraprak (2016). Gjatë vitit 2016 KESCO kishte siguruar një profit neto prej 12.8 milionësh, derisa gjatë vitit 2015 profiti neto i kësaj kompanie ishte 16.5 milionë euro. Po ashtu gjatë vitit që lamë pas Kompania Kosovare për Furnizim me Energji Elektrike ka rritur dukshëm shpenzimet tjera në raport me vitin 2016, siç është dyfishimi i shpenzimeve për mbështetje të menaxhmentit, por edhe shpenzime tjera të luksit.

Gazeta Zëri,  15.12.2018