KEDS shpërndau dhurata dhe libra për fëmijë

KEDS ka shpërndarë të martën 420 dhurata dhe po aq libra për fëmijët e organizatës “The Ideas Partnership”, në qendrat e saj në Fushë -Kosovë dhe Janjevë.

Shpërndarjen e dhuratave për fëmijët e këtyre dy qendrave e ka bërë personalisht drejtori i përgjithshëm i KEDS-it, George Karagutoff.

“Ne vendosëm t’i shpërndajmë këto libra dhe dhurata për fëmijët në mënyrë që t’i bëjmë të buzëqeshin këtë fundvit. Me të vërtetë e vlerësojmë lart punën e organizatës “The Ideas Partnership” dhe kontributin e tyre që e japin për këta fëmijë. Kjo është arsyeja pse kemi vendosur të vijmë këtu t’i shpërndajmë këto dhurata”, tha Karagutoff.

“Jemi edhe vet të lumtur që e bëmë këtë, sepse ndryshe këta fëmijë nuk do të kishin pasur mundësi të merrnin dhurata të tilla. Buzëqeshja e tyre tregon se qëllimi ynë u arrit”, shtoi Karagutoff.

“The Ideas Partnership”, organizatë e themeluar nga humanistja Elizabeth Gowing, merret me rikthimin në mësim të fëmijëve që braktisin shkollën, por edhe aktivitete shtesë të shtunave, ku përfshihet aftësimi i tyre dhe ushqimi i shëndetshëm.

Koordinatori i qendrës së “The Ideas Partnership” në Fushë- Kosovë, Hysni Hasani, ka falënderuar KEDS-in që për herë të dytë me radhë ndau dhurata për fëmijë.

“Ky është një veprim shumë i mirë për fëmijët. Kanë ardhur mbi 300 dhurata. Shpresoj që edhe në të ardhmen të jenë të gatshëm të na ndihmojnë. Jemi shumë të kënaqur me dhuratat e KEDS-it”, tha ai.

Ndërsa, Arben Sejdaj, menaxher i “The Ideas Partnership”, në Janjevë, tha se këto dhurata të KEDS-it i kanë sjellë buzëqeshjen fëmijëve të kësaj qendre.

“Jemi shumë falënderues për KEDS-in që na ka dhuruar dhurata për fundvit, për Krishtlindje dhe Vitin e Ri dhe iu ka pru buzëqeshje fëmijëve që frekuentojnë qendrat në Fushë -Kosovë dhe në Janjevë”, tha ai.

Kjo është dhurata e dytë që KEDS bëri së fundmi për fëmijët e Kosovës, pasi që ditëve të fundit dhuroi kabinete të informatikës për gjashtë shkolla anekënd territorit të vendit. Kompania është e zotuar të vazhdojë tutje të jetë ndër aktorët kryesorë në vend në aspektin e përgjegjësisë shoqërore, me theks të veçantë në avancimin e fëmijëve dhe të rinjve.

Agjensia e lajmeve ekonomia,  22.12.2016