Akuzat për CEZ, reagon Balla
Partia Socialiste, përmes deputetit Taulant Balla ka reaguar pas deklaratës së kreut të PD, Lulzim Basha lidhur me marrëveshjen e qeverisë me kompaninë çeke CEZ.
Në një deklaratë për mediat nga selia rozë, Balla tha se Basha duhet të japë llogari një herë për çështjet e hapura që ka me drejtësinë shqiptarë, që nga falja e detit, 230 mln eurot e vjedhura në rrugën Durrës-Kukës, 21 janarin e deri në lejet abuzive të ndërtimit të dhëna në bashkinë e Tiranës përpara se të akuzojë qeverinë për një marrëveshje që sipas tij, zgjidhi një çështje të lënë nga qeveria e tij dhe që i kurseu shqiptarëve 802 mln euro.
“Luli kërkon llogari pse qeveria e zgjidhi këtë çështje dhe i kurse shqiptarëve plot 802 mln euro. Luli duhet të japë llogari, të shkojë para drejtësisë për zullumet e tij; për faljen e detit, 230 mln eurot e vjedhura në Durrës-Kukës, 21 janarin dhe zullumet e tij në bashkinë e Tiranës. E kuptojmë që duke qenë se është i zhytur vetë tenton të hedhë baltë mbi të tjerët. por askush nuk e merr seriozisht atë, të paktën deri sa të japë llogari për zullumet e tij”, – tha Balla.
Gazeta Shqip, 21.10.2015