Mustafa: Së shpejti marrëveshjet në energjitikë
Marrëveshja për energjinë mes Kosovës dhe Serbisë dhe për kodin telefonik, pritet të arrihet në fund të këtij muaji. Kështu ka thënë kryeministri i Kosovës, Isa Mustafa, gjatë një konference për media, ku prezantoi të arriturat e Qeverisë në fushën e ekonomisë, minierave dhe energjetikës.
Në këtë konferencë të përbashkët me ministrin për Zhvillim Ekonomik, Blerand Stavilecin, kanë folur për perspektivën që institucionet e Kosovës kanë në raport me zhvillimin energjetikës në vend.
Kryeministri Mustafa ka premtuar se së shpejti do të zhvillohet procesi për përzgjedhjen e kompanisë për ndërtimin e termocentralit “Kosova e Re”. “Për ndërtimin e Termocentralit Kosova e Re së shpejti do të zhvillohet procesi i tenderimit për kompaninë e vetme që ka mbetur në garë. Ndërsa në plane është edhe revitalizimi i TC Kosova A”, ka thënë Mustafa.
Ai ka folur edhe për punën që është duke u bërë në krijimin e një tregu të përbashkët energjetik me Shqipërinë.
“Jemi duke punuar që të sigurojmë edhe tregun e përbashkët të energjisë. Aktualisht jemi duke bashkëpunuar me autoritetet e Shqipërisë lidhur me këtë aspekt dhe, presim që në vitin 2016 të kemi një linje të përbashkët”, është shprehur Musatafa.
Sot News, 13.08.2015