Shkodër, OSHEE kontrolle gjatë natës
Shkodra është një nga qytetet me nivelin më të ulët të arkëtimeve të energjisë elektrike. Debitorëve iu është ndërprerë energjia, por ata e rilidhin atë gjatë natës.
Kjo është arsyeja që prej një jave OSHEE, me mbështetjen e policisë bën kontrolle gjatë natës pranë abonentëve që tentojnë të rilidhin energjinë.
Dhjetëra persona janë arrestuar ndërkohë me akuzën e vjedhjes së energjisë, ndërsa më të shumta janë rastet e lidhjeve të dyta me rrjetin që bëjnë pronarët e dyqaneve apo banesave.
Elektricistët e OSHEE kontrollojnë çdo lidhje nëse është e ligjshme dhe në rastet kur konstatojnë shkelje është policia ajo që shoqëron autorët e vjedhjes. Këto lloj kontrollesh po bëhen prej një jave në këtë qytet.
Drejtori i OSHEE në Shkodër, Gledis Çeliku shprehet se vetëm gjatë këtyre ditëve janë konstatuar 29 raste rilidhjeje të energjisë, ndërsa që nga fillimi i aksionit janë proçeduar penalisht 130 persona dhe arkëtimet janë rritur me 30 për qind.
Në gjithë qytetin e Shkodrës janë duke vepruar në terren katër grupe të OSHEE-së, katër grupe të shërbimeve të policisë së rendit dhe dy grupe hetimore.
Top Channel, 27.01.2015