EVN, kompani të reja në tregun energjetik
Rreth 85 mijë kompani të mesme dhe të vogla, këtë vjeshtë do të hyjnë në tregun e lirë të energjisë elektrike ku do të zgjedhin furnizuesin e tyre. Kjo qasje në treg, sipas grupit ekspertësh të EVN-së do të ndikojë në uljen e përgjithshme të çmimit të rrymës, si dhe do ta stimulojë konkurrencën që të ofrojë shërbime më cilësore. Po këto ekipe ekspertësh të EVN tanimë janë duke përpiluar ofertat për kompanitë e vogla dhe të mesme në mënyrë që t’ua zvogëlojnë çmimet kompanive. Jo zyrtarisht flitet për ulje të çmimit për 30 për qind për kompanitë e vogla. Procesi i liberalizimit të tregut të energjisë elektrike ka filluar prej vitit 2007. Faza përfundimtare e liberalizimit të tregut pritet të ndodhë vitin e ardhshëm me inkuadrimin edhe të amvisërive.
“Në fazën e ardhshme të procesit të liberalizimit, “EVN furnizim” do të ofrojë produkte për kompanitë e vogla dhe të mesme të cilave do të ju mundësohet furnizim me energji elektrike me çmim më të ulët. Hapja e tregut do të thotë çmim më i ulët në treg vetëm për energjinë, ndërsa tarifa për rrjetin distributiv edhe më tutje do të jetë i rregulluar nga Komisioni Rregullator i Energjetikës” , deklaroi Niko Berberu, menaxher i “EVN Furnizim”.
Alsat-M, 12.05.2014