Varësia e Gjermanisë ndaj gazit rus
Kryeministri polak Donald Tusk deklaroi dje se varësia e Gjermanisë ndaj gazit rus, përbënte një problem për sovranitetin e Evropës. “Varësia e Gjermanisë ndaj gazit rus mund të zvogëlojë realisht pavarësinë e Evropës dhe jam i bindur për këtë”, deklaroi Tusk përpara medias, vetëm dy ditë para vizitës së kancelares gjermane Angela Merkel në Varshavë.
“Për mua, çështja e Ukrainës është çështja e së ardhmes dhe sigurisë në Bashkimin Evropian”, deklaroi kryeministri polak gjatë një vizite në një bazë të ushtrisë polake në veri të vendit.
Ai u shpreh se duhet kryer një farë rishikimi i politikave energjetike të BE-së.“Do të bisedoj hapur me kancelaren Merkel duke i shprehur se konceptimi aktual përsa i përket politikës klimatike dhe të gazit përbën një rrezik për sigurinë dhe sovranitetin e krejt Evropës”, theksoi ai.
Koha Jonë, 11.03.2014