Kabinë elektrike afër shkollës, nxënësit në rrezik

Një kabinë elektrike jashtë të gjitha kushteve të sigurisë kërcënon çdo ditë nxënë-sit e shkollës “Ismail Qemali” në Shkodër. Ajo ndodhet ngjitur me derën e shkollës, ndërsa telat e tensionit të lartë janë thuajse në rrugë. Ndërkohë që, edhe një derë e improvizuar, e cila njoftonte fëmijët se nuk duhej të hynin aty, është vjedhur para disa ditësh. Duke marrë në konsideratë rrezikun, drejtoria e shkollës ka depozituar disa herë ankesa pranë zyrave përkatëse, por asnjëherë nuk është marrë asnjë masë. “Shkolla jonë ka mbi 1 mijë nxënës, të cilët kalojnë çdo ditë ngjitur me këtë kabinë. Është e pafalshme nga CEZ-i që të mos marrë masat e duhura”, – është shprehur për “Gazeta Shqiptare” drejtori i shkollës, Ymer Vila. Kabina elektrike jashtë kushteve të sigurisë ndodhet prej një viti para shkollës, ndërsa nuk ka pasur asnjë reagim për sistemimin e saj.

Gazeta Shqiptare, 07.10.2013