Venezuelë, hetime për zjarrin në rafineri (bilanci i viktimave është rritur në 39)

Presidenti i Venezuelës, Hugo Chavez, urdhëroi nisjen e një hetimi urgjent, për të zbaluar arsyet e shpërthimit që përfshiu rafinerinë më të madhe të naftës në vend, duke ndezur një zjarr përgjegjës për humbjen e dhjetërave jetëve.
24 orë pas shpërthimit të ndodhur në rafinerinë e Amuait, bilanci i viktimave është rritur në 39, ndërsa mbi 80 të tjerë janë të plagosur.
Si rrjedhojë e kësaj tragjedie, Chavez shpalli tre ditë zie kombëtare.
Më përpara, Ministri i Energjisë, Rafael Ramirez, spekuloi se një rrjedhje gazi ishte ajo që kishte shkaktuar incidentin, por mediat vendase spekulojnë edhe mundësinë e sabotazhit.
”Dua të dërgoj ngushëllimet e mi në familjet e të gjithë viktimave, civilë apo ushtarakë, duke shprehur dhembjen më të madhe personale, qeveritare dhe të të gjithë popullit venezuelian. Kam vendosur të shpall tre ditë zi kombëtare, në nderim të viktimave dhe për të vajtuar të gjithë bashkë si një familje e madhe të gjithë ata që humbën jetën në këtë aksident tragjik”, deklaroi presidenti Chavez.
Ndërkohë, zëvendëspresidenti Elias Jaua, konfirmoi se 18 prej viktimave janë anëtarë të Gardës Kombëtare, ushtarakë të stacionuar në rafineri për mbrojtjen e saj.

TOP Channel, 26.08.2012

Venezuelë, rafineria në flakë, dhjetëra viktima
Një shpërthim gazi në rafinerinë më të madhe të naftës në Venezuelë ka shkaktuar të paktën 24 viktima, ndërsa një zjarr intensiv ka dalë jashtë kontrollit të forcave zjarrëfikëse.
Të paktën 53 janë të lënduarit, nga shpërthimi dhe flakët që tronditën rafinerinë në Amuai, mëngjesin e së shtunës.
Sipas guvernatores shtetërore, disa dhjetëra banesa të ndodhura pranë janë dëmtuar, ndërsa banorët e zonës janë shpërngulur si masë paraprake sigurie.
Ushtria venezueliane është duke asistuar forcat zjarrëfikëse dhe ndonëse flakët janë të fuqishme, mediat vendase shprehen të inkurajuara nga fakti që nuk pritet të ketë më shpërthime të tjera.
Sipas analistëve, rafineritë e Venezuelës, prodhuesit më të madh të naftës në Amerikën e Jugut, kanë vuajtur prej kohësh nga një sërë problemesh, midis të cilave renditen mungesa e dritave apo aksidentet në punë.
Është ende e paqartë nëse aksidenti në fjalë do të ketë ndikim në kuotat e eksportit të Venezuelës, që mund të ndikojnë edhe në çmimin botëror të karburanteve.

TOP Channel, 25.08.2012