CEZ, verifikim në terren për ankesat

Një nga problemet më të shpeshta të shfaqura mes marrëdhënieve konsumator – kompani e furnizimit me energji elektrike, është leximi i matësit dhe faturimi i energjisë. Qendrat e shërbimit ndaj klientit të kompanisë CEZ Shpërndarje, përveç arkave ku paguhet konsumi mujor i energjisë, ofrojnë edhe shërbimin e mbledhjes së anketimeve të qytetarëve. Për çdo informacion, paqartësi, lidhje dhe prishje kontrate, apo çdo problem tjetër, qytetarët mund të plotësojnë formularët pranë këtyre njësive.
Anketimet mblidhen nga stafi i kompanisë CEZ, dërgohen në zyrat qendrore dhe brenda ditës bëhet klasifikimi i ankesave në departamentet e veçanta të ngritura nga kompania. Brenda 24 orëve fillon shqyrtimi dhe analizimi i problemit, apo kërkesës së konsumatorit. Drejtoresha e Drejtorisë së Kujdesit ndaj Klientit, Dorina Cinari, ka sqaruar për RTV SCAN se, për çdo ankesë të konsumatorëve për faturime jo të sakta, shkëputje lidhjesh, dëmtim sahati etj bëhen verifikime në terren. Sipas saj, në muaj vijnë afërsisht 2 mijë anketime për faturim jo të saktë, nga një total prej 10 mijë anketimesh dhe kompania pas verifikimeve, në rastet kur është konstatuar shkelje nga ana e punonjësve të saj ka marrë masa ndëshkimore dhe penale, si edhe ka zbritur diferencën në faturën e konsumatorit.
Në çdo rast, konsumatori njoftohet për veprimin e ndërmarrë nga ana e kompanisë. Zonja Cinari ka thënë gjithashtu se, të gjitha ankesat e konsumatorëve arkivohen në bazën e të dhënave, nga ku më pas stafi drejtues i kompanisë ndërmerr politikat e reja për përmirësimin e mëtejshëm të shërbimit ndaj klientit. Qendrat e shërbimit ndaj klientit kanë një vit që janë funksionale dhe Cez Shpërndarje është kompania e parë private që ofron këtë shërbim për një marrëdhënie më të drejtë me konsumatorin shqiptar.

TV Scan, 14.02.2012