Interesi iranian për minierat dhe hidrocentralet në Shqipëri
Interesi iranian për minierat dhe hidrocentralet në Shqipëri
Zbulohen planet pas takimit mes kreun e Dhomës së Tregtisë, Jaka me ambasadorin
Irani po shikon mundësinë e bashkëpunimit me biznesin shqiptar, duke u njohur më parë me fushat se ku mund të investohet dhe cilat janë prioritetet. Kryetari i Dhomës së Tregtisë dhe Industrisë Tiranë, Nikolin Jaka, zhvilloi dje një takim me ambasadorin e Republikës Islamike të Iranit, Ali Amouie, ku gjatë bisedës u fol për disa fusha të mundshme bashkëpunimi. Pasi të dyja palët bënë një ekspoze të sektorit ekonomik në tërësi, kaluan më pas në detajet e bashkëpunimit. “Në fushën e ekonomisë Irani ka potencialet e tij të veçanta, është vendi më i fuqishëm në rajon dhe gjithashtu një pikë lidhëse me tregjet e Azisë, por edhe të Europës. Fushat dominante janë nafta dhe gazi, rol që e bën të veçantë në Europë, por edhe në botë”, tha Amouie. Sipas tij, tregjet e dy vendeve nuk kanë njohje dhe fare pak bashkëpunim.
“Mendoj se në Shqipëri duhet të jetë prezenca e investitorëve iranianë. Gjithashtu Ministria jonë e Bujqësisë është shprehur e gatshme për një bashkëpunim me Ministrinë tuaj të Bujqësisë. Më tej do të doja të propozoja fushën e minierave, ndërtimin e anijeve, hidrocentraleve, fusha në të cilat ne kemi eksperiencë”, tha ambasadori. Nga ana e tij, Jaka propozoi krijimin e një platforme bashkëpunimi mes ambasadës dhe Dhomës së Tregtisë, të ndarë në tri faza. “Është e vërtetë që Shqipëria ka një nivel të pakonsiderueshëm për sa u përket marrëdhënieve tregtare me Iranin, por, nga ana tjetër, në tregun shqiptar hyjnë produkte iraniane përmes vendeve të treta, si gazi, nafta, frutat e thata e të tjerë”, tha Jaka.
Gjatë takimit, kryetari Jaka vuri theksin në disa nga fushat që paraqesin interes për investitorët si: gazi, nafta, prodhimet bujqësore, sektori i qilimave e tapeteve, por gjithashtu edhe turizmi (kulturor, ranor e malor), apo edhe shfrytëzimi i nëntokës dhe mbitokës, energjetika etj. Irani eksporton në tregjet europiane mallra me vlerë prej afro 45 miliardë dollarësh në vit.
Gazeta Shqip, 15.10.2010