info@energjia.al

Makina e parë elektrike e Porsche do të dalë në shitje në fund të vitit 2019, bëri të ditur prodhuesi i makinave në Frankfurt në “Motor Show”. E quajtur Mission E, makina do të ketë një çmim të ngjashme me Porsche Panamera, dhe do të ketë çmim rreth 80,000 dollarë ose më shumë në SHBA.

Mission E u zbulua fillimisht në vitin 2015, por tani është duke hyrë në fazat përfundimtare të zhvillimit përpara se të transportohet në të vërtetë, sipas Revistës së Makinave.

Mission E ka një motor krejtësisht elektrik, dhe është vendosur të zërë një vend midis Panamera dhe 911 në llojin e automjeteve Porsche. Është një makinë sportive me katër dyer, dhe po përgatitet për testet e para të prototipit publik.

Në konceptin origjinal makina elektrike kishte një motor prej 600 bhp dhe mund të ndihmojë Porsche-n që të shkojë ‘kokë më kokë’ me modelin e Tesla-s.

Scan Tv,  20.09.2017

Royal Dutch Shell, që është operatori më i madh në botë për shpërndarjen e karburanteve, ka njoftuar dy lëvizje të reja, që hedhin dritë mbi planet e kompanisë për të ardhmen, por edhe për vetë të ardhmen e sektorit.

Së pari, kompania ka njoftuar se do të instalojë pika të karikimit të shpejtë të makinave elektrike. Së dyti, pas plot 100 vitesh, gjigandi anglo-holandez, njofton se është tërhequr nga nxjerrja e naftës nga Iraku.

Plani i parë, ai i instalimit të pikave të karikimit të makinave elektrike do të fillojë nga Europa dhe Kalifornia, dhe këto pika do të instalohen pranë pompave tradicionale të furnizimit me benzinë dhe naftë. Objektivi i kompanisë është që, brenda vitit 2025 të mbledhë 20% të të ardhurave nga pikat e furnizimit alternativ, jo vetëm elektrike, por edhe gaz, hidrogjen dhe biokarburant.

Shell i ka të gjitha mundësitë ta realizojë këtë, pasi ka më shumë pika karburanti seç ka pika McDonalds lokale nëpër botë, 43 mijë të tillë në 80 shtete të ndryshme. Shell bëhet kështu gjigandi i parë në sektor që vë bast te elektrikja.

Ndryshimi i planeve vjen edhe për shkak të bindjes së kompanisë se, çmimi i karburanteve do të mbetet i dobët përgjithmonë. Duke qenë se makinat elektrike janë kërcënimi më i madh për kompanitë e naftës, ky vendim i Shell përkthehet në një revolucion të mirëfilltë. Kompania ka dhënë një sinjal të qartë, dhe pritet që të tjerë ta ndjekin.

Scan Tv,  15.09.2017

Bashkia e Tiranës kërkon të japë shembullin në ekologjizimin e flotës së automjeteve në kryeqytet, duke blerë 6 automjete elektrike.

Në procedurën e hapur ditën e premte për blerjen e disa mjeteve të transportit për nevojat e Bashkisë, krahas 1 mikrobuzi, 2 karotrecash dhe 2 kamionçinash Pick-Up, preventivi përfshin edhe 5 autovetura elektrike dhe 1 autoveturë elektrike hibride, e cila funksion edhe me benzinë.

Krahas 6 autoveturave elektrike, tenderi përfshin edhe blerjen e një karikuesi fast-charger për këto lloje automjetesh, për një fond limit prej mbi 48 milionë lekësh.

Pjesa më e madhe e këtij fondi duket se do të shkojë pikërisht për blerjen e automjeteve elektrike të prodhuara 2 vitet e fundit me kilometrazh zero. Sipas specifikimeve për automjetet elektrike, kërkohet që bateria të ketë një kapacitet minimal prej 55 KWh dhe modelet më të lira me këto parametra nisin nga 37 mijë dollarë, deri në mbi 100 mijë dollarë për modelet më të kushtueshme Tesla.

Por pavarësisht avantazheve ekologjike, problemi më i madh me autoveturat elektrike mbetet distanca që mund të përshkojnë. Nëse këto automjete do të jenë të karikuara plotësisht, distanca maksimale do të jetë 300 kilometra, e cila është e mjaftueshme për të shkuar nga Tirana në skajet e Shqipërisë.

Nuk dihet nëse stacioni i karikimit të Bashkisë do të mund të përdoret edhe nga automjetet e tjera elektrike në kryeqytet, duke iu shtuar atyre të Sheshit Skënderbej dhe Bulevardit të ri, por diçka e tillë do t’i jepte një shtysë më shumë qytetarëve për të kaluar në makina elektrike me bateri.

Fituesi i këtij tenderi do të ketë 90 ditë kohë për të dorëzuar mjetet, çka nënkupton se me shumë gjasa do t’i shohim veturat elektrike në qarkullim në fillim të vitit të ardhshëm.

Scan Tv,  15.09.2017

Mbi 700 vjet pasi Marco Polo bëri rrugën drejt Kinës për arsye tregtare, rrjetin e vjetër të karavanëve të quajtur ‘Rruga e Mëndafshit’, një çift nga Gjermania vendosi se mund të bënte të njëjtën gjë me makinën e tyre elektrike Tesla.

Problemi kryesor do të ishte mungesa e stacioneve të karikimit, por Benedikt Ummen dhe e dashura e tij Magdalena Witty ishin të vendosur të bënin diçka që nuk e kishte bërë askush tjetër më parë.

“Motoja ishte që në fillim: ‘Dil jashtë Europës’. Ne donim të përjetonim sfida”, thonë ata.

Rruga do të kalonte nga Zvicra në Austri, Sloveni, Kroaci, Bosnje dhe Hercegovinë, e më pas Mali i Zi, Shqipëri, Kosovë, e Bullgari.

“Fillimi ishte shumë lodhës. Ne udhëtonim shumë gjatë çdo ditë dhe ishim gjithashtu të keqorganizuar”, thotë Ummen, i cili ka mbaruar për inxhinieri mekanike.

Nga mbulimi i rrugëtimit në Instagram, çifti duket se ka ndaluar edhe në Shkodër, në një servis.

Scan Tv,  14.09.2017

Teksa shumë prej nesh mendojnë të bëhen më konservativë me përdorimin e energjisë, për të kursyer në faturat e tyre, ka nga ata që nuk dinë se nga t’ia nisin për këtë qëllim.

Një eksperte buxheti australiane, Michelle Thompson-Laing thotë se ka kursyer gjithë vitin 5400 dollarë nga fatura e energjisë. Nëna e tre fëmijëve thotë se gjithçka duhet nisur që nga llampat që përdorni për ndriçim.

Dritat halogjene përdorin 75-80 për qind më shumë energji se ato LED. Pasi shtëpia e saj kishte mjaft drita, gjëja e parë që bëri kur hyri në shtëpi ishte ndryshimi i llampave, që ndoshta i kushtoi shumë kur i bleu por ia vlejti duke parë faturën e energjisë.

Ajo këshillon gjithashtu që njerëzit gjithmonë të fikin dritat, kompjuterët, televizorët dhe ngrohëset kur largohen nga dhoma. Madje duhet të shkurtojnë koston e ngrohjes apo ftohjes dhe të rregullojnë kondicionerin me timer. Temperatura optimale në verë është 23 gradë Celcius dhe në dimër 18 gradë Celcius.

Thompson-Laing thotë më tej se 20 % e energjisë mund të kursehet vetëm duke siguruar ndryshimin e pajisjeve të kuzhinës, duke u fokusuar tek ato me harxxhim më të pakët energjie.

Përsa i përket frigoriferit dhe ngrirjes, ajo thotë se njerëzit duhet të sigurohen ti kenë plot që të mos përdorin më shumë energji se sa është e nevojshme dhe të shmangin hapjen dhe mbylljen e shpeshtë të tyre. Këtë gjë duhet tua mësojnë edhe fëmijëve, që të vendosin se çfarë duan të marrin e të mos shtangen para derës së hapur të frigoriferit.

Top Channel,  11.09.2017

Mbretëria e Bashkuar, ashtu si Franca, premtuan se do të ndalojnë shitjen e automjeteve me naftë dhe benzinë deri në vitin 2040, me synim rritjen e cilësisë së ajrit dhe uljen e çlirimit të gazrave, si pasojë e ngrohjes së planetit.
Kur dy industritë më të mëdha të Europës vendosën “shfuqizimin” e teknologjisë, e cila ka mbështetur industrinë e makinave për më gjatë se një shekull, vjen natyrshëm që investitorët t’i frikësohen këtij pozicioni sfidues ekzistencial për industrinë.

Por, edhe pse kalimi nga automjetet me djegie motorike të brendshme me karburant në automjete me motor elektrik, do të sjellë në terma afatshkurtër pak “dhimbje financiare” për prodhuesit e makinave (dhe disa prej suppliers-ave të tyre), në terma afatgjatë ai mund të jetë i favorshëm për përfitime. Dhe prodhuesit e Europës janë më të fortë sesa mund të mendojmë.

Sot, automjetet tërësisht elektrike shënojnë më pak se 1% të shitjeve të makinave të reja në Bashkimin Europian. Për të pasur këtë shifër pothuajse 100% brenda dy dekadave, sigurisht do të duhen miliarda euro investime (sidomos në vendosjen e kullave të karikimit të mjeteve). Drita jeshile është ndezur për makinat elektrike. Shifrat e publikuara javën e kaluar, treguan se shpenzimet e kërkimit dhe zhvillimit të Daimler AG u rritën në 19% në gjysmën e parë të 2017-s krahasuar me ato të një viti më parë.

Ligjvënësit e kanë vënë industrinë në një dilemë sepse po shtyjnë investimet, në mënyrë që t’i bëjnë motorët e veturave ekzistuese me djegie, më efikas.

Megjithatë kjo teknologji mund të bëhet e vjetër shumë shpejt, – veçanërisht nëse prodhuesit e makinave humbin një betejë të marrëdhënieve publike për të shpëtuar reputacionin e naftës. Rreziku që, një ditë atyre do t’ju duhet të ulin vlerën e motorit me djegie nuk është i papërfillshëm, – siç e shpjegova këtu.

Një ndryshim në kurbën e grafikut mund të shihet rreth vitit 2025, atëherë kur Bloomberg New Energy Finance, mendon se automjetet elektrike do të fillojnë të kenë çmime konkurruese me ato të makinave me djegie motorike me karburant (pa subvencione). Me qëllim uljen e kostove operacionale, shitjet e automjeteve elektrike duhet të nisin të rriten me shpejtësi. Kjo gjë mund të fillojë të ketë ndikim në vlerën e shitjes së mjeteve me naftë dhe benzinë, më përpara sesa qeveria të ndalojë me ligj çdo shitje të këtyre makinave.

Analistët e Berenberg thonë se një rënie prej 20% e “vlerës së mbetur të mjeteve me djegie motorike me karburant është e pritshme”, gjë që mund të kërcënojë biznesin e mbetur të prodhuesve të makinave, aktualisht një burim i mirë i të ardhurave. Daimler financon vetë gjysmën e shitjeve të makinave të saj dhe departamenti i saj i financës gjeneroi një 19 përqindësh mbresëlënës të kthyeshmërisë nga kapitali në tremujorin e fundit.

Ku është drita në fund të tunelit për të cilën po flisnim? Së pari, prodhuesit e makinave nuk janë aq të dobët sa çmimet e tyre të aksioneve mund t’ju kenë lënë të besoni. Kërkesa në rritje e ndihmoi Daimler të gjenerojë një fluks të rrjedhjes së parasë suplementar prej 3 miliardë eurosh në 6-mujorin e parë të vitit, ndërsa rivali PSA Group Ltd. u mburr me më shumë se 13 miliardë euro cash dhe ekuivalentë në fund të qershorit. Ai arriti një marzh operativ prej 7.3%, një sukses mjaft i jashtëzakonshëm për një prodhues të tregut për masat.

këta janë mbrojtës shumë të mirë, duke pasur parasysh shpenzimet e mëdha që do të duhen në vitet e ardhshme.
Me të kaluar pengesën e investimit fillestar, automjetet elektrike duhet të fillojnë të kushtojnë më pak për t’u prodhuar sesa automjetet me motor me djegie: kostot e baterisë po ulen shpejt, ka shumë më pak përmbajtje mekanike për një makinë elektrike dhe ndoshta do të nevojiten më pak punëtorë për ta bërë atë.
Analisti i Exane BNP Paribas, Stuart Pearson, thotë se makinat elektrike mund të arrijnë një kthim të shitjeve operacionale prej me shumë se 10% jo më vonë se 2025 – më mirë se rentabiliteti i një makine tipike me motor me djegie me karburant.

Pra, kemi arsye të besojmë se prodhuesit e makinave kanë mundësi t’i mbijetojnë vdekjes së automjeteve me karburante. Po me punëtorët, çfarë do të ndodhë? Megjithëse, të martën, qeveria angleze u lehtësua kur BMW AG premtoi prodhimin e një Mini në version elektrik në Oksford, pjesët elektrike të së cilës do të përgatiten në Gjermani. Ndalimi i shitjes së automjeteve me naftë apo benzinë është diçka, ndërsa sigurimi i vendeve të punës të krijuara nga revolucioni i industrisë së automjeteve elektrike për Britaninë, është tërësisht diçka tjetër.

Revista Monitor,  12.08.2017

Qeveria britanike pritet të lajmërojë ndalimin e prodhimit dhe rrjedhimisht përdorimit të makinave me naftë që prej vitit 2040.

Pjesë e paketës për të mbrojtur ambientin është edhe një fond prej 255 milion stërlinash për të ndihmuar këshillat lokalë të përballen me ndotjen aktuale të makinave me naftë, në kuadër të fondit të përgjithshëm prej 3 miliard stërlinash për të përmirësuar cilësinë e ajrit.

Para se të skadojë afati final i vendosur nga gjykata e lartë, qeveria do të publikojë strategjinë e saj për ajrin dhe në favor të makinave elektrike. Gjykata ndërhyri pas një beteje të gjatë ligjore dhe detyroi qeverinë që të hartonte plane të reja për tu përballur me nivelet e lartë të dioksidit të azotit.

Lëvizja britanike vjen ndërsa masa të tilla janë marrë edhe nga vende të tjera, më e fundit Franca që gjithashtu lajmëroi ndalimin e makinave me naftë pas vitit 2040. Por si në rastin e Francës, edhe në atë të Britanisë, nuk kanë munguar kritikat. Ekspertët e ambientin thonë se ambienti i ndotur ku jetojnë 40 milion njerëz në Britani ka nevojë për ndërhyrje tani dhe jo pas 23 vjetësh. Ndërsa ekspertë të teknologjisë thonë se ndalimi i makinave naftë në vitin 2040 është i pavlerë, pasi deri atëherë ato do të jenë zhdukur automatikisht si pasojë e përparimit të teknologjisë.

Telegrafi,  27.07.2017

BMW do të ndërtoje një versionin elektrik të makinave Mini në fabrikën e saj të automjeteve në Oxford, Angli.

Kompania zgjodhi pikën e prodhimit në Mbretërinë e Bashkuar ndaj alternativave të tjera në Gjermani e Belgjikë, pavarësisht rreziqeve që lidhen me Brexit.

“Prodhimi i Mini-ve me bateri do të nisë në vitin 2019”, shkruhej në njoftimin e kompanisë.

Fabrika do të bëjë automjete elektrike për llogari të Mini deri në vitin 2023, thanë burime pranë BMW.

Me këtë lëvizje, prodhuesi i bashkohet kompanive teknologjike të cilat po investojnë në Britani para largimit të vendit nga Bashkimi Europian, edhe pse disa banka po zhvendosin operacionet e tyre brenda kontinentit.

Edhe Amazon ka zgjedhur të vendosë bast për Britaninë, duke lajmëruar se do të zgjerojë veprimtarinë e saj. Për këtë kompania ka marrë me qera 15 kate të një godine të sapondërtuar në Londër.

Zgjedhja e vendit për prodhimin e e-Mini ka qenë shumë komplekse dhe e ndikuar shumë nga zhvillimet e presionet politike, që lidhen me procesin e negociatave për largimin nga BE.

Në mungesë të një marrëveshjeje, pjesët për makinën që vijnë nga Gjermania do të përballen me tarifa, duke e bërë projektin më pak të leverdisshëm.

Automjeti i ri do te bazohet mbi modelin e suksesshëm me tre dyer, me pjesë që do të vijnë nga fabrikat e BMW në Dingolfing dhe Landshut në Gjermani.

Mini me bateri do të jetë modeli i dytë elektrik i BMW, pas modelit të shpallur në 2013-ën “i3”.

BMW punëson rreth 18 mijë njerëz në të gjithë Britaninë dhe eksporton 2.4 miliardë paundë në automjete dhe pjesë makinash çdo vit.

Scan Tv,  26.07.2017

Prodhuesit globalë të makinave i kanë bërë thirrje Kinës që të vonojë dhe zbusë kuotat për shitjet e makinave elektrike atje, duke thënë se propozimet e vendit do të jenë të pamundura për tu arritur dhe do të ndërpresin ashpër bizneset e tyre.

Në përpjekje për të luftuar ndotjen e mjedisit, Kina po planifikon të caktojë objektiva për makinat elektrike, në mënyrë që të zënë rreth 20% të shitjeve deri në vitin 2025, me një sistem të ashpër të kuotave që nis që në 2018-ën.

Pekini e sheh këtë politikë si një mjet për të ndihmuar industrinë vendase të automjeteve që të konkurrojë me rivalët e huaj, që kanë eksperiencë më të madhe në motorët me djegie. Rregullat e reja strikte, shtuar planet e ashpra për gjoba ndaj moszbatimit të tyre, si anulimi i licencave për të shitur makina jo-elektrike në Kinë, ka mundësi të shkaktojë një goditje të fortë ndaj prodhuesve në këtë treg.

Pavarësisht se Kryeministri Li Keqiang dhe kancelarja gjermane Angela Merkel ranë dakord muajin e kaluar se do të ketë lehtësime, Ministria e Industrisë dhe Teknologjisë së informacionit në Kinë, publikoi më vonë regulloret që mbështesin kuotat e ashpra të shitjeve.

Scan TV,  18.07.2017

Prodhuesi i makinave heq dorë nga motorët tradicionalë me djegie të brendshme.

Kompania e makinave Volvo njoftoi se duke filluar nga viti 2019 e tutje çdo model do të jetë krejtësisht elektrik apo hibrid, duke e shndërruar atë ne prodhuesin e parë të makinave që po heq dorë nga motorët tradicionalë me djegie të brendshme. Ajo tha se do të vendoste elektrifizimin në thelb të biznesit të saj.

Nga viti 2019 Volvo do të prodhojë vetëm tri lloje makinash: krejtësisht elektrike, hibride plug-in dhe të ashtuquajturat hibride “të buta” që kombinojnë një motor të vogël me benzinë ​​ me një bateri të madhe.

“Ky njoftim shënon fundin e makinave me motor me djegie të brendshme”, tha Hakan Samuelsson, CEO-ja i Volvo-s. Sipas njoftimit të kësaj kompanie janë shitur rreth 1 milion makina elektrike deri në 2025. Prodhuesi suedez i makinave u ble në 2010 nga prodhuesi kinez Geely.

Pronarët e rinj po tregojnë se janë një katalizator i vërtetë në garën për të elektrizuar modelet e tyre, duke qenë se Kina është tashmë lider botëror në shitjet e makinave elektrike dhe Geely është i vetmi prodhues kinez i cili prodhon makina për SHBA-në.

Volvo tha se do të hedhë në treg pesë makina krejtësisht elektrike midis 2019 dhe 2021. Tre do të prodhohen prej saj ndërsa dy nga Polestar. Kjo, sipas kompanisë, do të thotë se në të ardhmen nuk do të ketë asnjë makinë Volvo që nuk do të ketë motor elektrik.

Revista Monitor,  06.07.2017