Publisher is the useful and powerful WordPress Newspaper , Magazine and Blog theme with great attention to details, incredible features...

Arabia Saudite në përpjekje që çmimet e naftës të rriten

Aktualisht çmimet e ulëta botërore të naftës janë një ndër objektivat e ambicieve madhështore të Arabisë Saudite. Vendi dominues i OPEC dëshiron të balancojë buxhetin e tij masiv dhe njëkohësisht të tërheqë një vlerësim prej dy trilionë dollarësh për Saudi Aramco, kompania lider që i siguron vendit fitime kolosale nga nxjerrja dhe përpunimi i naftës. Të dyja këto përpjekje sfiduese do e bënin çmimin e arit të zi të kapte nivele shumë herë më të larta se sa ato aktualet.

Vendimi i befasishëm i Arabisë Saudite gjatë fundjavës për të emëruar një ministër të ri për naftën, i treti në pak më shumë se tre vjet, reflekton një ndjenjë urgjence në lidhje me rritjen e çmimeve përpara IPO-s së planifikuar Aramco. Në fakt vendi ka vërtet nevojë që çmimet të rriten dhe të gjenerojë prej tyre më shumë të ardhura, në një kohë kur është planifikuar të fillohet puna për planin gjithëpërfshirës Vision 2030, me qëllim diversifikimin e ekonomisë së Arabisë Saudite, duke hequr naftën si peshën kryesore në ekonomi.

“Sauditët janë irrituar në mënyrë të pashmangshme. Ata kanë shkuar larg për të rritur çmimet”, tha Ryan Fitzmaurice, strateg i energjisë në Rabobank, përcjell Telegrafi.

Arabia Saudite është eksportuesi më i madh në botë i naftës dhe emërimi i princit Abdulaziz bin Salman bin Abdulaziz al-Saud shënon herën e parë që ministria e naftës do të drejtohet nga një anëtar i familjes mbretërore. Abdulaziz është njëkohësisht djali i mbretit saudit Salman dhe vëllai i gjysmë i Princit të Kurorës Mohamed bin Salman, sundimtari de fakto i kombit.

Si ministër i ri i Energjisë, ai minimizoi rëndësinë e ndërhyrjes së personelit në proces.

“Ne të gjithë jemi nëpunës civilë, që punojmë për qeverinë dhe përmbushim detyrat tona. Një person vjen dhe një tjetër shkon”, tha Abdulaziz në Kongresin Botëror të Energjisë në Abu Dhabi.

Abdulaziz, zëvendësoi Khalid al-Falih, arkitektin kryesor të përpjekjeve të Arabisë Saudite për ribalancimin e tregut të naftës. Al-Falih organizoi një marrëveshje midis OPEC dhe prodhuesve të tjerë të mëdhenj të naftës, si Rusia, për të ndaluar prodhimin. Madje Arabia Saudite ishte e para që mori përsipër këto ulje të prodhimit.

Aktualisht, me gjithë përpjekjet për të rritur të ardhurat dhe balancuar buxhetin, Arabisë Saudite i duhet që ta tregtojë naftës me një çmim rreth 80 dollarë për fuçi. Megjithatë, pavarësisht se bashkëpunimi midis shteteve prodhuese të naftës vendosi me sukses një çmim dysheme, ai duket se nuk do të kthehet në nivelet e larta që Arabisë Saudite kishte shpresuar.

Pasi ranë në 26 dollarë për fuçi në fillim të vitit 2016, çmimet e naftës në SHBA arritën 75 dollarë tetorin e kaluar. Sidoqoftë, çmimi bruto aktualisht është ulur nën 60 dollarë. Brent, standardi botëror e tregton naftën me 62 dollarë për fuçi, shumë më poshtë se 80 dollarë deri 85 dollarë që Arabia Saudite kërkon për të balancuar buxhetin e saj.

Telegrafi,  11.09.2019