Shqipëria me nivelin më të ulët të përdorimit të energjisë
Shqipëria është një vend që ka burime të panumërta të energjisë, por renditet e fundit në rajon për përdormini e elektricitetit për frymë. Në raportin, që u prezantua dje, varfëria në sektorin e energjisë është një problem në rritje në vendet e Evropës Juglindore dhe rezulton me borxhe (pamundësi për të paguar faturat e energjisë elektrike), shtëpi të ftohta dhe probleme shëndetësore.
Pas transportit, sektori i ndërtimit në Shqipëri ka konsumin e energjisë më të lartë. Për familjet shqiptare, studimi tregon se burimi kryesor i energjisë është elektriciteti (45%) dhe pasohet nga biomasa me 38%. Në raport cilësohet se Shqipëria ka një normë të lartë papunësie 19%. Në Shqipëri vetëm 40% e familjeve kanë pajisje elektrike për gatim, ngrohje të ujit apo të tjera pajisje që përdorin energjinë. 11.2% e familjeve nuk kanë paguar faturat e energjisë elektrike dhe 20.7% kanë ngrohje të papërshtatshme. Gjithashtu në raport theksohet se 12.5% e shtëpive në Shqipëri kanë mure, dysheme apo bodrume me lagështirë dhe 7.7% e tyre kanë një çati që rrjedh.
Raporti vë në dukje se në vend nuk ka asnjë politikë për të zhdukur varfërinë energjetike.
Hartuesit e raportit vizituan dhjetë familje në kryeqytet, ku të gjithë jetonin në shtëpi pa izolim dhe dritare me një xham. Të ardhurat mesatare për familje ishin 150 euro dhe kishin mesatarisht katër pjesëtare. Ata kishin probleme me shëndetit, vuanin nga sëmundje kronike apo paaftësi të ndryshme dhe treguan se problemet e shëndetit i privonin nga aktivitete të ndryshme. Njerëzit të cilët janë më të rrezikuar nga varfëria energjetike janë zakonisht ata me të ardhura të ulëta, të cilët i përkasin grupeve të marxhinalizuara (me aftësi të kufizuara, të moshuarit, të sëmurët) dhe kanë më shumë mundësi për t’u prekur nga pasojat e varfërisë energjetike.
Mesatarisht, fatura mujore e Energjisë Elektrike ishte 39 euro në dimër dhe 22 euro në verë. Energjinë Elektrike më së shumti e përdornin për të ngrohur ambientin dhe ujin, ndërsa për të gatuar përdornin gazin, të cilin e kishin të vështirë që ta matnin se sa harxhonin në një muaj.
Në studimin e fundit për sa i përket varfërisë në sektorin e energjisë, jepet një paraqitje e shkurtër e jetës së përditshme të familjeve në EJL, të cilat jetojnë në kushte të varfërisë së energjisë, si rezultat i të ardhura të ulëta dhe kostove të larta të energjisë në mënyrë disproporcionale, si dhe të shtëpive jo efiçente në energji. Varfëria e energjisë, në terma të përgjithshme, paraqet pamundësinë e një familje për të siguruar sasi të mjaftueshme të energjisë në shtëpi, për të mbajtur ngrohtë dhe për të ndriçuar mirë hapësirat e banesës në mënyrë të përshtatshme, të kenë përdorim të lehtësuar në një gamë të nevojshme të shërbimeve të energjisë, dhe të jenë në gjendje për të përballuar një sasi të mjaftueshme të energjisë për kërkesat e përditshme.
Revista Monitor, 15.10.2016