Shqipëria “humbet” me energjinë
Këshilli Energjetik Botëror ka publikuar së fundmi raportin e quajtur: “World Energy Trilemma Index”.
Ky indeks ka për qëllim të masë qëndrueshmërinë energjike të një shteti duke u bazuar në tre shtylla kryesore: siguria energjetike, barazia dhe qëndrueshmëria ambientale. Në renditjen e këtij viti, Shqipëria pozicionohet e 72-ta në Botë ndër 125 vende të ekzaminuara, duke humbur kështu 1 pozicion në krahasim me vitin e kaluar.
Në raportin e një viti më parë, shqipëria renditej në vendin e 71-ta në Botë, ndër 130 vende të ekzaminuara. Në rast se shohim raportin e plotë të një viti më parë, Shqipëria rezulton se mbante vendin e 46-të dhe jo atë të 71-të siç nënvizohet në renditjen e re.
Gjithsesi, të kontaktuar nga Televizioni SCAN, Këshilli Botëror i Energjisë, sqaron se bëhet fjalë për një ndryshim të përllogaritjeve, çka reflektohet edhe në njehësimin e renditjes së një viti më parë me metodologjinë e re. Raporti vlerëson se vendi ynë ka fituar dukshëm pozicione në drejtim të sigurisë energjetike.
Sa i përket qëndrueshmërisë ambientale ndërkohë, Shqipëria ka rëshqitur nga vendi i 8-të, në vendin e 22-të, çka ka gjeneruar edhe rënien me 1 pozicion në renditjen globale. Sa i përket rajonit, vendi ynë lë pas në renditje vetëm Serbinë, që renditet një pozicion më poshtë.
Scan Tv, 14.10.2016