OSHEE reagon për protestën e banorëve në Vlorë

Anëtarët e 30 familjeve që jetojnë në lagjen ’24 maji’ në qytetin e Vlorës kanë protestuar sot dhe shkak për këtë është bërë mungesa e energjisë elektrike. Por OSHEE ka deklaruar se kabina është në pronë private, megjithatë do të ndërhyjë në një transformator të ri.

Sipas banorëve ata kanë dy javë që nuk janë furnizuar fare me drita çka ka sjellë një vështirësim të kushteve të jetesës.

Mungesa e energjisë ka ardhur për shkak të vjedhjes së transformatorit që furnizon me drita zonën, por që deri tani nuk është zëvendësuar.

Ata kanë deklaruar se nëse problemi i tyre nuk merr rrugën e zgjidhjes, ata do të vijojnë protestat deri në bllokimin e rrugës.

Nga ana tjetër, ata kanë deklaruar se janë pagues të rregullt të faturave të energjisë elektrike dhe kjo që po i u bëhet është padrejtësi.

‘Ne kemi dy javë pa drita, jemi të rregullt me pagesat. Kemi njoftuar edhe autoritetet” tha një banor. Ndërsa një tjetër u shpreh se ‘Unë kam nënshkruar një kontratë me OSHEE. Kam djalin e vogël e nuk e nxjerr dot’. Një tjetër u shpreh se, “Na kanë mbyllur dyqanin sepse nuk kam drita. Si të punojmë ne”. Një grua tha se, ‘Po na qelben shtëpitë. Ne jemi të rregullt, pse të rrimë në errësirë? Do të bllokojmë rrugën, nuk kemi tjetër zgjidhje”

Në një reagim për këtë çështje, Operatori i Shpërndarjes së Energjisë Elektrike ka bërë të ditur se kabina për të cilën banorët ankohen është në pronësi private dhe nuk është aset i OSHEE-së ku ajo mund të ndërhyjë.

Megjithatë, ky institucion do të rikthejë energjinë elektrike për të gjithë konsumatorët duke ndërhyjë përkohësisht përmes vendosjes së një transformatori të ri.

Ndërhyrja në kabinën e aktuale nuk mund të bëhet, pasi nuk ka bazë ligjore që OSHEE të ndërhyjë në një pronë private.

Lagjia në të cilën banorët nuk janë furnizuar me energji gjatë kësaj kohe pritet që të përfshihet në një projekt ku do të shtihet sistemi i ri shpërndarje.

Shqiptarja.com  12.10.2016