TPD, operatori më i ri i përpunimit të naftës

Trading Petrol & Drilling sh.a., është kompania që pak kohë më parë fitoi tenderin për të blerë 100 mijë tonë naftë bruto nga Albpetrol në një ankand të hapur.

TPD-Trading Petrol & Drilling është shoqëri aksionere dhe është regjistruar në QKR në qershor të vitit 2012. Kompania ka objekt kryesor të aktivitetit import-eksport, transport, tregtim me shumicë të naftës bruto, gazit natyror, gazit të lëngshëm, nënprodukteve të përpunuara të naftës si benzinë etj., por edhe të kërkimit të naftës.

Sipas të dhënave në website e kompanisë, TPD dhe ARMO tashmë kanë një marrëveshje të nënshkruar, sipas së cilës TPD ka marrë rafinerinë e Fierit me anë të një marrëveshje leasing-u dhe furnizon rafinerinë e Ballshit me naftë bruto. Ky është viti i dytë që TPD operon rafinerinë e Fierit. Përveç sh.a. Fier, TPD furnizon rafinerinë e Ballshit me naftë bruto dhe ka një marrëveshje ekskluzive për të shitur 10ppm Diesel ULSD të prodhuar në rafinerinë e Ballshit. Sasia e kontraktuar për vitin 2014 është 45.000 MT e ULSD.

Një ambient magazinimi është i vendosur në Lushnjë dhe ka gjashtë tanke me një kapacitet prej 530 tonë secila. Centrali i dytë është e vendosur në Fier dhe ka një kapacitet ruajtje prej 10,000 MT në total.

ARMO sh.a. ishte rafineria shtetërore, e cila u privatizua në gusht 2008 nga konsorciumi AMRA i naftës, e cila mban 85% të aksioneve.

Në planet e saj, TPD ka për qëllim futjen e Diesel-it 10 ppm dhe Gasoil në tregun e Shqipërisë dhe Kosovës. Gjithashtu kompania ka ambicie të zgjerojë aktivitetin edhe në sektorin e kërkimit të naftës. Të pakën kjo është kompania e parë shqiptare me këtë ambicie.

TPD është pjesë dhe në pronësi tërësisht SPG (Sulaj Progres GROUP SA). Grupi është i orientuar kryesisht në pronat e pasurive të patundshme dhe të zhvillimit, si dhe shërbim dhe reklamim, zotëron disa nga kompanitë më të njohura tregtare të shërbimit në kryeqytetin e Shqipërisë. Tajvan Center është qendra më e njohur argëtuese në Tiranë. Qeveria sapo ka miratuar një vendim për të vënë nën kontroll impiantet e përpunimit të naftës në vend. Ekspertët në Ministrinë e Energjetikës thanë se, janë rreth 15 impiante të tilla në të gjithë vendin, por që përpunojnë disa nënprodukte të naftës.

Nuk përjashtohen rastet që kur këto impiante janë përdorur për të përpunuar naftë të kundërligjshme dhe duke e hedhur në treg kundrejt të gjitha rregullave për parametrat e cilësisë. Shumica e këtyre impianteve janë në zonën e Fierit. Por sipas VKM-së së fundit të qeverisë, këto impiante do të përfshihen në rilicencim dhe do të futen në një kontroll ligjor për të frenuar përdorimin e kundërligjshëm të tyre.

“Ka qenë një shqetësim shumë i madh dhe po ta vini re, në zonën e Fierit ka pasur një bum si kërpudha nga gjithë këto impiante ilegale. E gjithë kjo situatë erdhi edhe për shkak të ndryshimeve që u bënë më parë, gjoja me synimin mbase të mirë për liberalizimin”, ka pohuar ministri Gjiknuri. Por, liberalizimi, kur vjen çështja te produktet e rregulluara dhe që kanë certifikime të caktuara e që cenojnë jetën dhe interesat e konsumatorit, patjetër kërkon një lloj disiplinimi më të mirë, ka shtuar ai.

Me ndryshimet ligjore, parashikohet licencimi i këtyre impianteve për kategori të caktuara të prodhimeve që bëjnë kartën teknologjike që do kenë. Në bazë të licencës dhe kategorisë ku licencohen, do të mund të kontrollohen e do të merren masat e duhura nëse shkelin detyrimet që u caktohen.

Revista Monitor,  15.06.2015