Komisioni parlamentar te organizoje degjesa mbi problemet mjedisore

Me kërshëri lexova një lajm të fundit se komisioni parlamentar mbi energjinë i kongresit amerikan planifikon të thërrasë në dëgjesë agjensi shtetërore dhe departamente të administratës publike për tu informuar mbi masat ndaj ndryshimeve klimatike (NK). Ndryshimet klimatike janë problemi më madhor mjedisor i dekadës aktuale, por problemi më pak i debatuar në rrethet politike.

Kongresi amerikan planifikon të sqarohet në shtator nga administrata mbi programet, aktivitetet, kërkimet shkencore të lidhura meNK; mbi aktivitetet e lidhura posaçërisht me adaptimin ndaj NK; mbi fondet, grantet dhe kreditë e lidhura NK dhe energjitë e pastra; mbi marrëveshjet ndërkombëtare, mbi zyrat dhe numrin e personelit të përfshirë në çështjet e NK.

Jo vetëm kongresi amerikan, por dhe parlamente të tjera si ai i Anglisë kanë në praktikën e tyre organizimin e dëgjesave me autoritete shtetërore, përfaqësues OJF-sh mbi probleme të ndryshme mjedisore, përfshirë ndryshimet klimatike. Në këto dëgjesa deputetët informohen direkte nga specialistët e fushës për çështjen në fjalë dhe mund të bëjnë pyetje personalisht. Këta deputetë të informuar më vonë mund të bëhen pjesë aktive e aprovimit të ligjeve që prekin fushën në fjalë.

Komisionet parlamentare të Kuvendit të Shqipërisë kanë gjithë mundësitë ligjore të organizojnë dëgjesa të tilla. Në proçesverbalet e mbledhjeve të komisionit mbi çështjet mjedisore dhe në proçesverbalet e seancave plenare vëmë re se ka shumë pak debat të mirëfilltë mes deputetëve. Është e qartë se shumica dërrmuese e deputetëve nuk e kanë idenë e problematikës së ligjit të cilin aprovojnë. Kjo mungesë debati u vu re dhe në aprovimin e ligjit të ri për energjitë e rinovueshme, i cili është thelbësor në fushën e energjitikës.

Futja e një praktike të tillë të re në komisionet parlamentare do të lehtësohej dhe nga fakti që nga shtatori fillon punën një parlament i ri, të shpresojmë i rilindjes mjedisore.

Rita Strakosha – EKO Levizja, 22.08.2013