Rryma, sa do të shtrenjtohet ajo
Qytetarëve të Kosovës do t’u shtohet një barrë e madhe nëse energjia elektrike do të rritet aq shumë siç thonë organizata të shoqërisë civile. Nga Zyra e rregullatorit të energjisë elektrike nuk është dhënë përgjigje nëse realisht planifikohet që të ketë ngritje të çmimit, por qytetarët u shprehën të shqetësuar lidhur me këto deklarata, transmeton KTV. Alarmante pritet të jetë ngritja e çmimit të energjisë elektrike në Kosovë deri në 300%. Me këtë çmim dhe me nivelin e ulët ekonomik në vend do të vështirësohet në masë të madhe mënyra e jetesës në vend.
Kështu vlerësojnë organizata të ndryshme të shoqërisë civile në Kosovë. Krahasuar me ekonominë e vendit, ndonëse ka pësuar pak rritje, çmimi i energjisë është shumë i lartë.
Qytetarët u shprehën të shqetësuar lidhur me këto hulumtime të shoqërisë civile. Ata u shprehën që në rast se do të ketë ngritje të mëtutjeshme të çmimit të energjisë, të rriten edhe pagat mujore për secilin, e kështu do të ishte krejt ndryshe.
KTV-ja ka kontaktuar për dy ditë radhazi me zyrtarët e rregullatorit të Kosovës për të marrë përgjigje nëse vërtet do të ketë ngritje të çmimit për shfrytëzimin e energjisë elektrike, por këto përgjigje nuk u kthyen.
Ndërsa në raportin konsultativ të Zyrës së Rregullatorit të Energjisë, ndonëse nuk precizohet saktësisht, lë të kuptohet se rritje do të ketë edhe vitet në vazhdim.
Gazeta Koha Ditore, 06.08.2013