S’ka strukturë emergjence, rrezik në Porto Romano

Analiza dhe hetimet që po kryhen pas mbytjes së anijes cisternë “Edirne” kanë nxjerrë në pah nevojën e ngritjes së strukturave të emergjencës që të monitorojnë këtë pjesë të bregdetit. Edhe pse fare pranë “Romano Port” ndodhet baza detare e Bishtit të Pallës, ende nuk është menduar për pajisjen e saj me mjete që kategorizohen për ndihmë dhe shpëtim. Shpërthimi i anijes turke “Edirne” tregoi se ngritja e strukturave të emergjencës në zonën e Porto Romanos është e domosdoshme. Mjetet që u nisën nga Porti Detar i Durrësit mbërritën në vendngjarje pas 1 ore dhe fati e deshi që një motoskaf i vogël i sigurisë së “Romano Port”, të ishte në gatishmëri dhe deti nuk ishte i egërsuar.
HETIMI
Sipas burimeve zyrtare, një grup pune i ngritur nga Kapiteneria e Portit të Durrësit po vazhdon punën për hetimin e ngjarjes detare të datës 15 janar kur anija turke “Edirne” e cila ndodhej në radën e “Romano Port” shpërtheu dhe u mbyt pasi njëri nga tankerët u përfshi nga flakët. Hysni Aruci, kapiteni i Portit të Durrësit thotë se “ende grupi i ekspertëve nuk e ka përfunduar hetimin e ngjarjes. Në fund ai do të paraqesë një raport të hollësishëm të shkaqeve që sollën ngjarjen si dhe për shkallën e gatishmërisë të sektorit të emergjencës”. Bilanci i tragjedisë tashmë dihet, kapiteni dhe 2 marinarë të anijes humbën jetën ndërsa anija përfundoi në fund të detit. Mësohet se, në Durrës në fundjavë erdhi edhe pronari i anijes si dhe përfaqësuesit e kompanisë së sigurimit ku ishte regjistruar anija. Këta të fundit do të kenë në duar një kopje të raportit të grupit hetimor përpara se të vendosin për caktimin e shumës që do të paguajë kompania në formë dëmshpërblimi.
NEVOJAT
Por, ngjarja aksidentale e anijes turke nxori në pah edhe nevojën për ngritjen e strukturave të emergjencës në zonën e Porto Romanos. Atje, veç portit të karburanteve, janë ngritur edhe depozitat gjigante të naftës dhe të gazit. Në këtë zonë mungon shërbimi ambulator mjekësor. Nuk bëhet fjalë për ekzistencën e autoambulancave. Marinarët e mbijetuar atë ditë u dërguan me furgonët e policisë në spitalin rajonal. Pronarët e rimorkiatorëve në portin e Durrësit mezi vendosën të nxirrnin njërin prej mjeteve jashtë këtij porti. Fare pranë Porto Romanos ndodhet edhe Baza Ushtarake e Bishtit të Pallës. Atje, fare mirë mund të strehohen jo vetëm mjetet lundruese të emergjencës por edhe autoambulancat nëse do të vendoset ngritja e një strukture të tillë që funksionon në të gjitha portet e huaja. Sipas specialistëve, “ka ardhur koha që Qendra Ndër-operacionale në Plepa të Durrësit të ketë në dispozicionin e saj edhe një helikopter për ta përdorur në raste të fatkeqësive detare. Tirana ndodhet larg bregdetit kur bëhet fjalë për raste emergjencash e kur ekuipazhet e anijeve në rrezik ndodhen në det”.
Në portin e karburanteve e të gazit në Porto Romano për çdo muaj përpunohen 8 deri 10 anije të cilat.

Gazeta Shqiptare, 22.01.2012