info@energjia.al

Kreu i grupit parlamentar të Partisë Socialiste, Taulant Balla, tha se për çështjen “CEZ” prokuroria “duhet të kishte marrë deklarimet e personave”, siç ishte vendimi i Kuvendit me 74 vota pro.

“Si ka mundësi që ka prokurorë që mendojnë se në vitin 2017 mund të mbyllet afera korruptive pa bërë asnjë hetim. Kush ua ka dhënë këtyre prokurorëve pushtetin që të sillen me drejtësinë si në pazar”, tha Balla.

“Kush janë këta që kanë tagrin të falin pa e hetuar aspak Sali Berishën për shpërdorim të detyrës, mashtrim, refuzim për të dëshmuar, të gjitha këto vepra penale”, shtoi Balla.

Top Channel,  09.11.2017

Komisioni Hetimor “Për të kontrolluar zbatimin e legjislacionit në fuqi dhe mbrojtjes e interesit të shtetit shqiptar nga realizimi i marrëveshjes për zgjidhjen me mirëkuptim ndërmjet Republikës së Shqipërisë dhe shoqërisë “CEZ, A. S.”, u ngrit me kërkesë të PD pas pretendimeve të demokratëve se “marrëveshja, sipas të cilës qeveria do i kthejë CEZ 95 milionë euro në këmbim të rimarrjes së pronësisë në katër vjet është e paligjshme dhe jo transparente”.

Por, duket se ky komision vecse nuk ka qënë funksional në hetime, ka degraduar edhe në shkelje të panumërta ligjore e etike.

Një raport 77 faqësh, i publikuar nga “Albanian Platform For Policy Advocacy”  zbulon një numër të lartë shkeljesh nga deputetët, anëtarë të këtij komisioni, të cilët përmes fyerjeve, sherreve, presioneve ndaj dëshmitarëve, kanë shkelur një sërë nenesh të rregullores së brendshme të komisionit, ligjin e komisioneve hetimore, kodin e procedurës penale dhe rregulloren e parlamentit.

Kryetari i këtij komisioni Edmond Spaho, shënon rekorde shkeljesh, nga ku më flagrantet mbeten:

– zhvillimi i mbledhjeve pa kuorumin e nevojshëm duke deklaruar se “mbledhjen mund ta zhvilloj edhe i vetëm”.

-mohimin i të drejtës së fjalës së anëtarëve për procedurë, fyerjet ndaj kolegëve e dëshmitarëve si “karagjoz’, “arrogante”, apo ajo ndaj kryeministrit Rama: “Nuk do të zhveshim…”.

-Nuk mungojnë as rastet kur Spaho kërcënon dëshmitarët me shprehjet: “Provo të largohesh!”

Shqiptarja.com  21.04.2017

Kuvendi i Kosovës miratoi, pas mesnatës së të premtes, Ligjin për Trepçën me të cilin, siç thanë deputetët, gjigandi ekonomik do të rimëkëmbet dhe do të rikthehet në treg.

Me 79 vota për. asnjë kundër dhe 14 abstenime, deputetët e kaluan Ligjin e plotësuar, i cili ngjalli kundërshtimet e deputetëve të Listës Serbe, që nuk qëndruan deri në fund të seancës së dytë, në sallë.

Ligji e përcakton qeverinë e Kosovës si pronare të 80 për qind të aksioneve të kombinatit, me synimin, siç thotë, të rikthimit të kontrollit në gjithë gjigandin,

Kuvendi u mblodh, të premten pasdite në një seancë për të shqyrtuar projektligjin për Trepçën, të cilin Qeveria e Kosovës ia paraqiti ligjvënësve nga mesi i javës.

Me procedurë të përshpejtuar, Kuvendi vendosi që të kryej të dyja leximet brenda ditëssë premte, për ta kaluar Ligjin për Kombinatin Trepça, që ndodhej ndërmjet rimëkëmbjes dhe likuidimit.

Qeveria e Kosovës dhe administratori i Trepçës, Agjencia Kosovare e Privatizimit, thanë se kombinati “është pasuri e Kosovës”, duke vlerësuar se Beogradi “është i vetëdijshëm se nuk ka asnjë hise në të”.

Por, të njëjtin pohim për pasurinë e shprehu edhe Beogradi zyrtar, që kërkoi “përfshirje të kësaj çështjeje, dhe siç thotë, të pasurisë së një numri ndërmarrjesh që i takojnë”, në bisedimet e Brukselit.

Opozita në Kosovë, ndërkaq, e cilësoi projektligjin si “të mangët”, sepse e përjashton “Kuvendin nga çdo rol në rastin e Trepçës”.

Ligji në Kuvend u miratua përmes kundërshtimeve të deputetëve serbë dhe protestave të punëtorëve serbë të Trepçës në veri të Kosovës që për tri ditë rresht bllokuan për pak kohë magjistralen Prishtinë-Leposaviq.

Agjensia e lajmeve ekonomia,  08.10.2016

Anëtarë të Komisionit për zhvillim ekonomik, Infrastrukturë, Tregti dhe Industri të prirë nga kryetari Muhamet Mustafa,  vizituan  sot ndërmarrjen publike “Operatorin e Sistemit të Transmisionit dhe Tregut” ( KOSTT).

Me këtë rast, ata u pritën nga nga znj. Drita Kongjeli, kryesuese  e Bordit, si dhe  Mustafë Hasani, kryesues i Bordit ekzekutiv me  bashkëpunëtorët e tij.

Kongjeli i  falënderoi anëtarët e Komisionit për vizitën dhe i njoftoi ata  se  kjo ndërmarrje është ndër më të suksesshmet në vend.

Më pas, kryesuesi i Bordit ekzekutiv Hasani, prezantoi aktivitet dhe gjendjes në të cilën gjendet kjo ndërmarrje.

“Funksioni kryesor i ndërmarrjes është operimi, mirëmbajtja dhe zhvillimi i sistemit të transmisionit” tha Hasani.

Ndër zhvillimet dhe aktivitetet me rëndësi ai përmendi ndërtimin e linjës interkonektive me Shqipërinë, ngritjen e vazhdueshme të kapaciteteve transmetuese dhe investimet në rrjetin e transmisionit, bashkëpunimin e ngushtë rajonal edhe me vendet  e tjera eurokontinentale.

Ai i njoftoi anëtarët e Komisionit edhe me  Planin e investimeve për pesë vitet e ardhshme.  Lidhur me këtë, Hasani vuri në dukje se nga janari i këtij viti kanë  filluar të inkasojmë të hyra edhe nga transiti i energjisë elektrike.

Si sfidë, ndërkaq,  ai përmendi anëtarësimin në mekanizmat ndërkombëtar të operatorëve të sistemit të transmisionit  dhe funksionimin si transmetues i pavarur.

Nga ana, tjetër kryetari i Komisionit Muhamet Mustafa, falënderoi përfaqësuesit e KOSTT-it për pritjen,  duke shtuar se kjo ndërmarrje është mjaft e rëndësishme, duke nënvizuar se nga efikasiteti i saj varet edhe stabiliteti energjetik në vend dhe kostoja e energjisë elektrike.

Ai po ashtu i inkurajoi ata për  fuqizimin e qeverisjes korporatave të ndërmarrjes, realizimin e projekteve mbi bazën e studimeve,  angazhimet për  anëtarësim në mekanizmat rajonal e ndërkombëtar.

Në këtë takim pyetje dhe komente bënë edhe deputetët e pranishëm Sala Berisha-Shala dhe Blerim Grainca.

Në fund të takimit deputetët i dhanë përkrahje përfaqësuesve të KOSTT-it në angazhimet e tyre për zhvillimin e ndërmarrjes, për pavarësinë e KOSTT-it dhe për anëtarësimin në mekanizma rajonal dhe ndërkombëtar.”

Agjensia e lajmeve ekonomia,  21.09.2016

Administratorit i OSHEE-së, Adrian Çela, ka reaguar lidhur me letrën e një dite më parë të deputetit Vladimir Kosta.

Në një reagim për mediat, Çela thotë se nuk është aspak i keqardhur që nuk i ka plotësuar kërkesat e tij absurde për të fituar në rrugë të paligjshme tenderë të shpallur nga OSHEE.

“Shpreh keqardhje të thellë për prononcimin e deputetit Vladimir Kosta, por nuk jam i keqardhur që nuk i’a kam plotësuar kërkesat e tij absurde për të fituar në rrugë të paligjshme tenderë të shpallur nga OSHEE.Fatkeqësisht nuk më vjen e papritur kjo shfaqje vulgariteti vetediskreditues që flet vetë për nivelin e Vladimir Kostës. Sulmin e tij në vigjilje të finalizimit të Reformës në Drejtësi e marr si kompliment për kompaninë dhe për drejtimin tim me ligjshmëri dhe transparencë”.

Sipas Çelës, reforma në drejtësi ende pa u miratuar po tregon se çfarë vlere të madhe ka për të ndarë njerëzit që duan shtet, drejtësi, rregulla nga ata që duan të vazhdojnë në rrugën e vjetër të përfitimeve të paligjshme.

Ora News,  12.07.2016

Pas denoncimit të bërë në 13 shkurt nga gazeta “Shqiptarja.com”, se deputeti Eduart Ndocaj kishte plot 19 milionë lekë të vjetra energji elektrike pa paguar, ligjvënësi “Kaubojs” ka filluar shlyerjen e borxhit. Gazeta ka mësuar se menjëherë pas kthimit nga Italia, Ndocaj ka shkuar pranë Operatorit të Shpërndarjes së Energjisë Elektrike në Lezhë, ku ka pranuar të nënshkruajë disa kontrata për shlyerjen me këste të detyrimit.

Bëhet fjalë për 3 kontrata të shtëpive të banimit, ku vlera e borxhit ishte rreth 1 milionë lekë të vjetra. Në këto banesa ku është nënshkruar kontrata, energjia është rilidhur, ndërsa për apartamentet e tjera, nuk është nënshkruar kontrata, dhe si rrjedhim nuk po furnizohen me energji. Deputeti Ndocaj konfirmoi në një prononcim për “Shqiptarja.com” se kishte nënshkruar disa kontrata, ndërsa të tjerat, nuk i pranonin si borxhe.

Duke i quajtur pjesën më të madhe të faturave si abuzive, deputeti “Kaubojs”, thotë se do t’i kundërshtojë ato në gjykatë. “Po, kam nënshkruar disa kontrata. Ato që ishin për tu nënshkruar. Të tjerat do t’i ballafaqoj në gjykatë”-tha Ndocaj. Deputeti i Lezhës u shpreh se nuk ka pasur dijeni për borxhin ndër vite. “Faturat janë të gabuara dhe po përgatitem për një proces gjyqësor ndaj OSHEE-së. Janë apartamente që nuk funksionojnë dhe nuk janë me qira. Në shtëpinë time kam 3 muaj që jetoj tani dhe gjatë 3 viteve kam jetuar 30 ditë gjithsej, sepse është bosh që kur është ndërtuar. Kjo e bën procesin politik dhe sulm mediatik.

Nuk kam marrë asnjë faturë të vjetër apo paralajmërim se jam në borxh”-tha ai. Për plot një javë deputeti i parlamentit shqiptar, Eduart Ndocaj nuk pati drita në shtëpinë e tij në Lezhë. OSHEE në këtë qytet, i preu energjinë elektrike deputetit kaubojs, në datën 8 shkurt. Gjithçka erdhi pas një borxhi të madh të akumuluar nga familja Ndocaj, dhe mospagesës edhe në kohën kur ai u kthye në Shqipëri për të ushtruar mandatin e deputetit.

“Shqiptarja.com” publikoi dokumentin e plotë të të dhënave në sistemin e Operatorit të Shpërndarjes së Energjisë Elektrike, ku rezultonte, se deputeti ka 14 kontrata për furnizim energjie me OSHEE-në, dhe në 13 prej tyre, ai kishte konsumuar energji, të cilën nuk e kishte paguar, duke shtuar kështu në faturën e tij personale edhe kamatëvonesat. Fatura e tij totale ndaj OSHEE-së, për 14 objektet në pronësi të tij, arrinte në vlerëson e 19 milionë lekëve të vjetra.

Në terma fikse, fatura ishte 1 915 846.04 lekë të rinj. Veç shtëpisë së tij të banimit, Ndocaj zotëron dhe më shumë se 10 objekte të tjera, apartamente dhe dyqane në zonën e Shëngjinit, të cilat i jep me qira për pushuesit. Prej faturave të papaguara, edhe këtyre objekteve, energjia ju është ndërprerë që në fund të verës dhe ende nuk ju është rilidhur. Edhe vlera e kamatëvonesave është e madhe, çka tregon se koha e fillimit të “borxhit” ndaj OSHEE-së është e gjatë, dhe borxhi i deputetit, shtohet përditë.

Marrja e mandatit të deputetit nga Ndocaj, nuk e ka penguar OSHEE-në të ndërpresë energjinë në objektet e tij. Edhe në reagimin e tij të parë pas publikimit të lajmit, Ndocaj nuk kundërshtoi borxhin, por tha se faturat ishin abuzive, madje shprehu gatishmëri për të dhuruar një apartament shtetit.

Shqiptarja.com  29.02.2016

Deputeti i “Nismës” në Kuvendin e Kosovës, Zafir Berisha, akuzohet se ka kryer lidhje të paligjshme të rrymës, çka cilësohet si vepër penale.

Ai është akuzuar nga Departamenti i Përgjithshëm i Prokurorisë Themelore të Prizrenit nën dyshimin se ka kryer veprën penale “Lidhja e paautorizuar në shërbime”, për të cilën dënimi është me gjobë dhe burg deri në tri vjet.

Sipas aktakuzës së Prokurorisë së Shtetit, Zafir Berisha, si pronar i restorantit “Kështjella” akuzohet për rikyçje ilegale në shtyllën e rrymës. Po i njëjti kishte deklaruar në muajin shkurt 2015, në Kuvendin e Kosovës, se qytetarët po manipuloheshin me njehsorët elektrikë.

“Prej datës së pavërtetuar e deri më 31 janar 2014, në fshatin Vlashnjë, komuna e Prizrenit, pikërisht në lokalin e tij afarist, restorant “Kështjella”, i pandehuri lidhet apo rilidhet në përçuesin e rrymës elektrike apo në rrjetin për përçim apo shpërndarje të çfarëdo shërbimi komunal, në çfarëdo mënyre, drejtpërdrejt apo tërthorazi, pa autorizim të furnizuesit të autorizuar, në atë mënyrë që edhe pse është shkyçur nga njehsori për shkak të borxhit, ka bërë rikyçje ilegale në shtyllë pa autorizimin e organit kompetent, respektivisht KEDS-i, Distrikti në Prizren”, thuhet në aktakuzën e Prokurorisë së Shtetit. Sipas aktakuzës, ai ngarkohet me veprën penale “Lidhja e paautorizuar në shërbime”.

Sipas informatave zyrtare të marra nga “kallxo.com”, arsyeja e shkyçjes nga rrjeti elektrik ishte për shkak të borxhit në lokalin afarist, që ishte mbi 7.000 euro.

Seanca e shqyrtimit fillestar ishte planifikuar që të mbahet për ditën e martë, mirëpo deputeti Berisha nuk u paraqit në Gjykatë. Gjyqtari i rastit, Refki Piraj, tha se i akuzuari nuk e ka arsyetuar mosardhjen në gjykim.

“Fletëthirrja e Gjykatës është kthyer e nënshkruar që është pranuar ftesa. Nuk e di a e ka nënshkruar ai apo dikush tjetër. Mosardhjen e sotme i akuzuari nuk e ka arsyetuar. Unë do ta përsëris edhe njëherë fletëthirrjen, mirëpo kësaj radhe me vërejtje. Nëse nuk vjen në seancën e radhës do ta sjellim me dhunë, me anë të policisë”, tha gjykatësi Piraj.

Ndërsa i kontaktuar nga “kallxo.com”, deputeti Zafir Berisha tha se nuk ka pranuar fare ftesë nga Gjykata. “Prej teje po dëgjoj që paskam pasur sot gjykim. Është e vërtetë që para dy muajve kam pasur ftesë dhe i jam përgjigjur Gjykatës, mirëpo në atë kohë Gjykata ka qenë në grevë dhe është shtyrë gjykimi, por asnjëherë nuk kam pranuar ftesë nga Gjykata”, tha Berisha.

Ai, madje, tha se është akuzuar gabimisht ngase personalisht ka kohë që nuk e menaxhon më lokalin “Kështjella”. “Unë që nga gushti i vitit 2007 nuk e menaxhoj lokalin. Tjetërkush është menaxher i atij lokali dhe nuk e di se si KEDS-i ka ardhur në konstatimin që unë paskam bërë rikyçje të rrymës. Ata as që kanë mundur të më shohin mua personalisht ndonjëherë, pos në televizor” u shpreh Berisha. Për më tepër Berisha tha se nuk ka pasur arsye të mos i përgjigjet ftesës së Gjykatës.

Gazeta Zëri, 27.05.2015

Propozimi për ngritjen e një inspektorati tjetër për kontrollin e tregut të hidrokarbureve ka ndeshur në kundërshtimin e deputetëve të Komisionit të Veprimtarive Prodhuese.

Kërkesa për heqjen e disa kompetencave Inspektoriatit Qendror Teknik dhe kalimi i tyre tek Inspektoriati i Mbikqyrjes së Tregut i cili do të krijohet nga Ministria e Zhvillimit Ekonomik nuk është mirëpritur nga deputetët.

Kreu i komisionit, Eduard Shalsi kërkoi që të realizohet një kompozim më i mirë i kontrollit të strukturës së tregut.

“Ky projektligj synon garantimin e mbrojtjes së të drejtave të konsumatorëve fundorë, nëpërmjet strukturës së posaçme që do të krijohet pranë ministrisë përgjegjëse për ekonominë, dhe do të ketë kompetenca vetëm sa i përket shërbimeve që u ofrohen konsumatorëve. Kompozoni mirë strukturën e mbikëqyrjes së tregut. Mbrojtjen e konsumatorëve, dhe pastaj jemi të predispozuar maksimalisht që do të ndryshojmë dhe do të bëjmë mendimet ligjore përkatëse për të gjitha produktet. Por paketa do të duhej të vinte e plotë”, – tha Shalsi.

Nga ana tjetër, deputeti demokrat, Genc Ruli theksoi se në Shqipëri ka probleme më të mëdha në tregun e medikamenteve dhe të ushqimeve. “Në vend që të sjellë atë që synojmë, për qëndrimin e inspektorateve, sjell fragmentimin e kompetencave dhe mbivendosjen e kompetencave ndërmjet inspektoriateve të ndryshme. Pse u nis pikërisht me karburantet? A nuk është më shqetësuese siguria, përsa u përket medikamenteve? A nuk është më shqetësuese për ne siguria ushqimore?”, ishte replika e Rulit.

Përfaqësuesi i Ministrisë së Zhvillimit Ekonomik, Koli Bele, sqaroi se këtij inspektoriati do t’i kalohet e drejta e kontrollit në pikën fundore. “Është menduar që inspektorati i ri që po krijohet pranë ministrit të ekonomisë për mbikëqyrjen e tregut të ketë gjithashtu edhe rol kontrollues në pikat e karburantit me pakicë për të garantuar mbrojtjen e konsumatorit fundor. Ky ndryshim është bërë për shkak të ndjeshmërisë që ka ky lloj produkti, për shkak të sensivitetit që ka për popullatën”,- tha Bele.

Gazeta Shekulli,  24.03.2015

“Bëni si them unë, por mos bëni si bëj unë”,- është kjo shprehje që i përshtatet më së miri grupit parlamentar demokrat.

Në një kohë që deputetët e djathtë akuzojnë nga foltorja e selisë së PD-së zyrtarë apo deputetë të majtë se nuk kanë paguar faturat e energjisë, ata vetë refuzojnë që të paraqesin faturat duke e cilësuar sulm politik.

Deputetët e djathtë e shohin kërkesën e Operatorit të Shpërndarjes së Energjisë Elektrike për verifikimin e pagesave të energjisë elektrike nga deputetët si presion të qeverisë ndaj opozitës.

Deputeti demokrat dhe anëtari i Komisionit të Ekonomisë, Sherefedin Shehu, në një intervistë për Vizion Plus tha se një kompani private nuk mund të kontrollojë dot Kuvendin, as të zgjedhurit e popullit, pasi nuk e ka këtë kompetencë.

Për Shehun kjo nuk është një nismë që kërkon të shtojë arkëtimet e kompanisë, por një kat politik i urdhëruar nga Kryeministri. Sipas tij, nëse ka deputetë të cilët nuk kanë paguar detyrimet, kjo mund të zgjidhet në mënyrë ligjore.

OSHEE i dërgoi një letër Kuvendit më 29 dhjetor 2014, ku kërkohej që 140 deputetët duhet t’i dorëzojnë kompanisë kontratat dhe librezat e energjisë për familjet dhe bizneset e tyre.

Gazeta Dita, 19.01.2015

Partia Demokratike dhe deputeti i Lëvizjes Socialiste për Integrim, Pirro Kapurani kanë replikuar sot, në lidhje me akuzat e bëra nga selia blu sipas së cilës në një fabrikë tullash e tjegullash qytetin e Korçës e cila është në pronësi të vëllezërve të deputetit të LSI, nuk është marrë asnjë masë edhe pse ajo rezulton debitore në shumën e 205 milion lekë.

Sipas deputetes së PD, Albana Vokshi në aksionin e OSHEE-së po veprohet me standarde të dyfishta pasi kjo fabrikë nuk preket nga askush për shkak se pronar janë dy vëllezërit e deputetit të Lëvizjes Socialiste për Integrim, Pirro Kapurani.

Por ky i fundit i kontaktuar me telefon nga A1 Report i ka cilësuar akuzat e PD-së si sulm politik. Kjo pasi siç shpjegon ai, firma e vëllezërve të tij ka bërë një kontratë me OSHEE për të likuiduar detyrimet.

Nga ana e saj Operatori i Shpërndarjes, në një komunikatë për shtyp, ka sqaruar se kjo fabrikë është në listën e debitorëve, dhe se i është ndërprerë energjia elektrike që më 29 dhjetor 2014, dhe që prej asaj kohe, energjia elektrike vijon të jetë e shkëputur.

Por në një reagim tjetër zyrtar, Partia Demokratike e ka cilësuar kriminal deklaratën e OSHEE-së, pasi sipas saj, për 35 mijë lekë debitor, i burgosuri në burgun e Rrogozhinës, u vetëvar, ndërsa për 205 milionë lekë debitor, nuk merret asnjë masë.

Kapurani për A1 Report: Akuzat e PD, sulm politik

Deputeti i Lëvizjes Socialiste për Integrim, Pirro Kapurani i kontaktuar telefonikisht për A1 Report tha se firma në fjalë është në pronësi të Vëllezërve të tij Vasil dhe Mihallaq Kapurani dhe se akuzat e PD bëhet për të sulmuar politikisht deputetin.

Kapurani sqaroi se firma e vëllezërve të tij ka bërë tashmë një kontratë me OSHEE për të likuiduar detyrimet.

OSHEE: Fabrikës i është ndërprerë energjia elektrike që më 29 dhjetor 2014

Operatori i Shpërndarjes së Energjisë Elektrike ka reaguar ndaj akuzave të Partisë Demokratike, ku kjo e fundit shprehej se nuk ka trajtim të barabartë në aksionin e OSHEE, pasi një fabrikë tullash e tjegullash në Korçë ka 205 mln lekë fatura të pashlyera, por ajo nuk preket pasi është në pronësi të dy vëllezërve të deputetit të LSI, Pirro Kapurani.

Përmes një komunikate për shtyp, OSHEE hedh poshtë akuzat e PD-së ndërsa sqaron se biznesi së cilës i referohet opozita në akuzën e saj, i është ndërprerë energjia elektrike që më 29 dhjetor 2014, për shkak se është debitore.

Po ashtu sipas OSHEE-së edhe gjatë rikontrollit në këtë zonë, në këtë fabrikë vijon të jetë me energji elektrike të ndërprerë.

“Operatori i Shpërndarjes së Energjisë Elektrike hedh poshtë akuzat e ngritura sot publikisht nga Partia Demokratike përmes deputetes Albana Vokshi. Sa i takon kontratës së një biznesi që i referohet në deklaratë Partia Demokratike, OSHEE deklaron se kjo kontratë ka qenë pjesë e listës së debitorëve kryesore që është dërguar për ndërprerjen e energjisë elektrike. Rajoni i Korçës në bashkëpunim me Drejtorinë e Tensionit të Lartë ka bërë ndërprerjen e klientit nga nënstacioni që në datën 29 dhjetor 2014. Në datën 9 janar, klienti është verifikuar sërish dhe energjia në këtë subjekt vazhdon të jetë e ndërprerë deri në likujdimin e plotë të detyrimeve. Operatori i Shpërndarjes së Energjisë Elektrike i bën thirrje Partisë Demokratike që ta lërë të rimëkëmbet kompaninë që ajo vet rrënoi për tetë vitet e qeverisjes së saj.” shprehet në komunikatën e saj OSHEE.

Por në një reagim tjetër, Operatori i Shpërndarjes së Eenergjisë Elektrike, nënvizon se energjia elektrike në fabrikën e tullave dhe tjegullave nuk do të rikthehet pa lidhur kontratën për shlyerjen e debisë, ashtu siç veprohet me të gjithë klientët e tjerë. Ndërsa sa i përket deputetit të LSi-së Kapurani, OSHEE sqaron se ai nuk është debitor dhe as ka qenë ndonjëherë,

“Operatori i Shpërndarjes së Energjisë Elektrike (OSHEE) sqaron sërish opinionin publik dhe përsërit faktin se fabrikës së tullave që përmendi sot PD në akuzën e saj i janë prerë dritat qysh në dhjetor dhe nuk do t’i lidhen deri në nënshkrimin e marrëveshjes me OSHEE – praktikë kjo e rregullt ligjore e kompanisë për të gjithë debitorët. Ndërsa deputeti Piro Kapurani nuk rezulton debitor i OSHEE dhe as rezulton të ketë qenë i tillë më parë. Nëse fabrika në fjalë është e vëllezërve të zotit Kapurani, ndërprerja e dritave njësoj si për gjithë të tjerët tregon se OSHEE ka filluar të shpëtojë nga influenca politike e së shkuarës dhe përpara ligjit janë të gjithë të barabartë!” shprehet OSHEE.

Shqiptarja.com 18.01.2015