Paaftësia e drejtueses së re të Albpetrol
PD reagoi dje përmes ish deputetit Luan Baçi, lidhnur me situatën në kompaninë Albpetrol. “Rreth 1 vit më parë, Partia Demokratike denoncoi keqmenaxhimin e kompanisë shtetërore të naftës, Albpetrol dhe të reformës politike në këtë kompani, ku u hoqën profesionistët dhe u mbajtën militantët. Qeveria, siç e ka zakon, u përpoq ta mbysë realitetin me propagandë dhe mashtrime, duke mohuar të vërtetën.
Një vit më pas, Albpetroli ka ndërruar 3 drejtorë me motivationin “rezultate negative”, gjë që konfirmon shqetësimet e ngritura prej nesh. Por, megjithëse ka ndërruar 3 drejtorë në 12 muaj, Albpetrol nuk ka përmirësime.
Albpetrol ka detyrimin të bëjë publik prodhimin mujor dhe vjetor të naftës. Të bëjë transparencë për sasinë e naftës që eksporton dhe asaj që përpunohet në vend, duke mos vënë të parin interesin e koncesionarëve, por të naftëtarëve dhe të shqiptarëve.
Përfitoj nga rasti që, në emër të Partisë Demokratike, të mbështes protestën e përsëritur të punonjësve të rafinerisë së Ballshit, që nuk marrin dot rrogat. Ata janë mashtruar për të disatën herë nga kjo qeveri, por roblemi i tyre nuk ka për t’u zgjidhur përsa kohë vendi drejtohet nga ata që u shërbejnë okigarkëve, pasurimit të paligjshëm të tyre dhe jo qytetarëve.
E vërteta e Albpetrolit është se kompania shtetërore vidhet pa pushim për të pasuruar një grusht pushtetarësh dhe klientësh të tyre. E vërteta është se kompania, që duhet të sillte zhvillim për zonën trajtohet si celulë partiake, ku ka rëndësi punësimi i militantëve dhe largimi i profesionistëve të ndershëm.
Çlirimi i Albpetrolit nga interesat mafiozë, që punojnë për pushtetarët dhe oligarkët përbën një nga prioritetet kryesore të Partisë Demokratike.” tha Baci.
BalkanWeb, 30.01.2020