Karburant me çmim 100 lekë litri për fermerët
Fermerët mund të përfitojnë naftë me 80 deri në 100 lekë për litër, nëse qeveria miraton skemën e re të propozuar nga shoqatat e agrobiznesit në vend. Ministria e Bujqësisë, Zhvillimit Rural dhe Administrimit të Ujrave, po finalizon projektin që parashikon shpërndarjen e karburantit me çmim më të ulët se tregu, për sektorin e bujqësisë, serave dhe peshkimit.
Zv/ministri i Bujqësisë, Alban Zusi, në një prononcim për ATSH-në, u shpreh se, aktualisht ekspertët e fushës po punojnë intensivisht, për hartimin e bazës ligjore, mbi të cilën do të mbështetet zbatimi i kësaj skeme. Pas shqyrtimit që po i bëjnë të gjitha propozimeve që kanë ardhur nga shoqëria civile si përfituese e drejtpërdrejtë e këtij projekti. Skema e propozuar parashikon shfrytëzimin e naftës që prodhohet në vend për qëllime bujqësore. Shpërndarja do të bëhet sipas një skemë që nuk lë hapësira abuzimi.
Ndërtimi dhe zbatimi me sukses i kësaj skeme që synon të shpërndajë karburant me çmim të lirë vetëm për prodhimin bujqësor dhe peshkimin, është i mirëpritur nga fermerët dhe grupet e interesit, të cilët edhe pse skeptikë për mënyrën se si do të zbatohen ato në terren, shprehen se, zbatimi efikas i tij do të shtojë prodhimin dhe investimet rurale.
Çmimet e karburanteve janë një zë i veçantë që kanë kosto të madhe në prodhim, veçanërisht në serat me ngrohje ku shkon në 50% të së gjithë kostos prodhuese, ndërsa në sektorin e peshkimit shkon në 70% të kostos së produktit. Burime nga ministria e Bujqësisë theksojnë se, sfidë në zbatimin e kësaj skeme është gjetja e metodës alternative për furnizimin me naftë me kosto të ulët në bujqësi. Një ide ështe negociata me kompaninë ‘Albpetrol’, e cila prodhon naftë D2, që është më e përshtatshme për përdorim në bujqësi. Ky projekt i ri vjen si një premtim i mbajtur i qeverisë në fushatën zgjedhore për mbështetjen e sektorit të bujqësisë dhe fermerëve. Ndërsa përkon dhe në periudhën kur ka hyrë në fuqi paketa fiskale 2014 që parashikon rritjen e akcizës për naftën e benzinën.
ATSH, 03.03.2014