KEK nuk kërkon pagesë për riparime të prishjeve, por pagesë të faturave të energjisë
KEK sh.a. ka vërejtur se kohën e fundit po keqkuptohet politika e korporatës në lidhje me sanimin e prishjeve që ndodhin në asetet e Rrjetit të Shpërndarjes, sikurse ka akuza se punëtorët në ndonjë rast nuk kanë sjellje adekuate siç e parasheh Kodi i Sjelljes dhe Kodi i Etikës së KEK-ut.
KEK sqaron se nuk kërkon nga asnjë konsumator për të paguar riparimet në rast të ndonjë prishjeje eventuale. Kjo politikë e KEK-ut kushtëzon riparimin e prishjeve për konsumatorët në kategorinë C në bazë të nivelit të pagesës së energjisë elektrike dhe nuk intervenohet në rastet kur niveli i pagesës është i përafërt apo e tejkalon koston e riparimit. Por, këto pagesa nuk shkojnë për koston e riparimit, por për shlyerje të borxheve të konsumatorëve të krijuara nga shpenzimi i tyre. Pra, KEK kërkon vetëm pagesën e faturave nga konsumatorët dhe asnjë pagesë shtesë për riparime. Kur të arrihet niveli i pagesës atëherë KEK menjëherë riparon prishjen specifike. Kjo bëhet për të rritur nivelin e pagesës në daljet ku pagesa është shumë e ulët.
KEK i përkujton konsumatorët që të raportojnë menjëherë ndonjë sjellje të keqe nga ana e punëtorëve të korporatës ku përfshihet ndonjë kërkesë eventuale nga ana e punëtorëve për mito, nëse nuk u lexohet njehsori në baza mujore, nuk u dërgohet fatura apo bëjnë veprime tjera të ngjashme. KEK nuk i toleron aspak sjelljet e tilla eventuale nga ana e punëtorëve të cilët mund të abuzojnë me pozitën e vet apo edhe më keq të përfshihen në ndonjë aktivitet korruptues.
KEK është i përkushtuar që t’i luftojë aktivitetet korruptuese dhe për këtë ka krijuar një Zyrë mjaft efektive të Auditit të Brendshëm dhe Departamentin për Veprim në terren. Por, KEK-ut i duhet ndihma edhe e konsumatorëve dhe qytetarëve që të raportojnë sjelljet eventuale ilegale apo joetike të punëtorëve të KEK-ut. Raportimi mund të bëhet në mënyrë shumë të thjeshtë përmes numrit të telefonit 038 55 66 22 apo përmes emailave auditimimbrendshekek-energy.com dhe auditimimbrendshemyahoo.com. KEK i siguron të gjithë se thirrjet telefonike apo emailat do të mbesin konfidencial dhe do të hetojë çdo rast me seriozitetin më të madh.
energjia.al, 08.03.2012