info@energjia.al

Komisioni Qendror i Zgjedhjeve dhe Kompania Kosovare për Distribuim dhe Furnizim me Energji Elektrike (KEDS) nënshkruan Memorandum Bashkëpunimi.

Përmes këtij dokumenti, përcaktohen kushtet dhe mënyra e bashkëpunimit lidhur me furnizim me energji elektrike për nevoja të KQZ-së, gjatë procesit të Zgjedhjeve Lokale të 22 tetorit 2017.

Në emër të KQZ-së, Memorandumin e nënshkroi kryetarja e KQZ-së, Valdete Daka kurse në emër të KEDS-it firmosi Drejtori i Përgjithshëm, George Karagutoff.

Pas nënshkrimit, kryetarja Daka tha se ky memorandum u nënshkrua që më 22 tetor të ketë energji elektrike në çdo Qendër Votimi dhe në objekte tjera të nevojshme për KQZ-në.

Ndërkaq, Drejtori i Përgjithshëm i KEDS SH. A, George Karagutoff u shpreh se përmes ekipeve do të monitorojnë gjendjen në Ditën e Zgjedhjeve për të pasur furnizim të rregullt me energji elektrike.

Sipas këtij memorandumi, KQZ-ja do t’i sigurojë KEDS-it listën e specifikuar të të gjitha objekteve, përfshirë adresat e sakta të Qendrave të Votimit me qëllim të furnizimit pandërprerë me energji elektrike.

Agjensia e lajmeve ekonomia,  16.102017

Sot në Komisionin Qendror të Zgjedhjeve (KQZ) nënshkruhet Memorandumi i Bashkëpunimit me Kompaninë Kosovare për Distribuim dhe Furnizim me Energji Elektrike (KEDS).

Qëllimi i këtij Memorandumi është përcaktimi i kushteve dhe mënyrës së bashkëpunimit lidhur me furnizim me energji elektrike për nevoja të KQZ-së, gjatë procesit të Zgjedhjeve Lokale të 22 tetorit 2017.

Nënshkrimi i Memorandumit do të bëhet nga Kryetarja e KQZ-së, Valdete Daka dhe Drejtori i Përgjithshëm i KEDS SH. A, George Karagutoff.

Agjensia e lajmeve ekonomia,  10.10.2017

Kompania Kosovare për Distribuim dhe Furnizim me Energji elektrike ka bërë të ditur se është mobilizuar komplet që të ofrojë siguri maksimale të furnizimit me energji elektrike për ditën e votimit, pra të dielën.

“Gjendja e gatishmërisë së plotë nisë qysh në ora 7:00 të mëngjesit të së dielës, kur edhe nis votimi. Mobilizimi përfshinë angazhim tri herë më të madh në numër të punëtorëve se sa në ditët e zakonshme\”, thuhet në një njoftim të KEDS-it.

Paralelisht, KEDS ka bërë edhe planifikimin dhe organizimin e punëve në terren si dhe të logjistikës. Në kuadër të mobilizimit parashihet ofrimi i sigurisë maksimale të furnizimit me energji elektrike për të gjitha qendrat e votimit dhe zonat me caktim të drejtpërdrejtë të përgjegjësive për vendet e caktuara, si dhe reagimi/intervenimi në kohën më të shkurtër të mundshme në rast të ndonjë problemi.

Ekipet e KEDS-it janë të koordinuara dhe kanë përgjegjësitë e ndara të reagimit duke përfshirë secilën qendër votimi. Në secilën qendër të votimit do të bëhet edhe monitorimi i situatës në vazhdimësi nga ekipet mobile.

“Përveç kësaj ne kemi krijuar edhe Protokollin e Komunikimit. Në secilën qendër do të jenë të dhënat kontaktuese për ekipin përgjegjës për atë qendër. Secili qytetar inkurajohet që të shkruajë në faqen zyrtare të KEDS-it në facebook, KEDS Energy, ku përsonat përgjegjës do t’ju përgjigjen në kohë reale dhe do ta transmetojnë ndonjë informatë tek zyrtarët përgjegjës”, thuhet në njoftim.

Secili qytetar mund të kontaktojë edhe në Qendër të Thirrjeve. Në qendrat e votimit gjithashtu do të jenë kontaktet e ekipit që është i caktuar për qendrën përkatëse.

KEDS e ka marrë me seriozitetin më të lartë sigurinë e furnizimit me energji elektrike, e në këtë rast edhe bashkëpunimi i qytetarëve është shumë i rëndësishëm.

Agjensia e lajmeve ekonomia,  10.06.2017

Presidenti i zgjedhur Donald Trump hodhi poshtë premtimin e fushatës për të burgosur Hillary Clinton, refuzoi çdo ide për konflikt interesi për shkak të perandorisë së tij të biznesit, kritikoi lëvizjen neonaziste që festoi fitoren e tij dhe gjithashtu shfaqi një qëndrim më të butë ndaj ndryshimeve klimaterike.

Që prej fitores, Trump nuk ka zhvilluar asnjë konferencë për shtyp, por këto komente të fundit u bënë gjatë një takimi me reporterë dhe redaktorë të “New York Times”. Miliaderi tha se arrestimi i Clinton do të ndante vendin, diçka që ai nuk e dëshuiron, ndërsa theksoi se liderët republikanë, që para katër javësh nuk e donin, tani e dashuronin.

Përsa i takon bizneseve të tij, Trump tha se ligji është në krahun e Presidentit dhe shprehet mjaft qartë se kreu i Shtëpisë së Bardhë nuk mund të ketë konflikte interesi. Trump tha se nuk i intereson më biznesi dhe se perandoria e tij do t’i kalojë fëmijëve të tij. Ai gjithashtu u tregua mjaft energjik në dënimin e grupit të supremacistëve të bardhë të njohur si “alt-right”, që bënë nderimin nazist për fitoren e Trump.

Presidenti i zgjedhur tha se grupe të tilla jo vetëm që nuk duhen nxitur, por nëse janë të entuziazmuar duhet kuptuar pse.

Sidoqoftë, ndryshimi më i madh i Trump u shfaq në çështjen e ngrohjes globale. Më herët, biznesmeni njujorkez kishte refuzuar pikwpamjet e shkencëtarëve se njerëzit kanë ndikuar tek ngrohja globale, ndërsa para reporterëve të “New York Times” tha se mund të ketë një lidhje dhe se ai po e shqyrton nga afër dhe me mendje të hapur këtë çështje.

Në kuadër të politikës së jashtme, Trump tha se SHBA nuk duhet të jetë më vendi që ndërton kombe, megjithëse shprehu dëshirën të ishte njeriu që do të sjellë paqe mes palestinezëve dhe izraelitëve, ndërsa theksoi se çmenduria që po ndodh në Siri duhet ndalur, po si zakonisht në stilin e tij, pa dhënë detaje apo specifika se si.

Top Channel,  22.11.2016

Fitorja e Donald Trump duket se ka filluar të shkaktojë lëkundjet e para të ekonomisë, pasi rezultatet për triumf përballë Clinton kanë bërë që të tronditet bursa, pasi “Dow Jones” ra me 750 pikë.

Aksionet e Tokios kanë rënë gati 5%, ndërsa indekset e Hong Kong dhe Seul respektivisht 3.3% dhe 2.8%, Wall Street ka rënë me 3%.

Dollari amerikan ka rënë kundrejt yen-it dhe euros, ndërsa çmimet e naftës kanë rënë më shumë se 4%.

Shqiptarja.com  09.11.2016

Kryetari i Kuvendit të Republikës së Kosovës, Kadri Veseli, sot ka zhvilluar një vizitë në ndërmarrjen “Trepça”, gjatë të cilës ka takuar menaxhmentin dhe punëtorët e saj.

Kryetari Veseli gjatë takimit me drejtorin e “Trepçës”, Ahmet Tmavën dhe drejtuesit tjerë të lartë, u interesua për gjendjen aktuale të këtij gjiganti industrial, kushtet e punës si dhe kapacitetet prodhuese të saj.

Në takim u fol rreth strategjisë së re për “Trepçën” e cila do të mundësoj rivitalizimin e kombinatit. Këtu u tha se duhet përshpejtuar dinamika e hartimit të kësaj strategjie, që të dilet nga situata aktuale e gjigantit metalurgjik.

Siç bëhet e ditur në një njoftim, kryetari Veseli theksoi se menaxhmenti dhe përfaqësuesit e punëtorëve duhet të jenë pjesë e hartimit të strategjisë. Duhet krijuar kushtet që deri në krijimin e statusit final për “Trepçën”, puna të vijojë pa ndërprerë, theksoi Kryetari Veseli, duke vënë pah pasurinë e madhe të cilën e disponojmë këtu si shtet, por duhet gjetur sa më shpejt mënyra për konkretizimin në vlerë për qytetarët tanë.

“Trepça ishte në të kaluarën pjesë e krenarisë tonë por sot duhet bërë më shumë të gjithë ne së bashku, në mënyrë që Kosova të përfitojë nga këto resurse të jashtëzakonshme”, ka thënë kryetari i Kuvendit, Kadri Veseli.

Më tej, ai ka theksuar se Trepça do të jetë forcë shtytëse e zhvillimit të Kosovës dhe përmirësimit të bilancit të saj tregtar.

“Veseli theksoi po ashtu se Kuvendi i Kosovës do të bashkëpunojë ngushtë me Qeverinë dhe faktorët tjerë relevant për përmirësimin e gjendjes aktuale në Kombinat”.

Në takim u diskutua nevoja e përzgjedhjes së bordit të AKP-së i cili i hap rrugë zhvillimit, sidomos komercializimit të mbetjeve industriale.

Në takim u fol për nevojën që sa më shpejtë të bëhet definimi i statusit të Kombinatit, modalitetet më të mira për rivitalizimin eventual të “Trepçës”, duke marrë parasysh partneritetin publik-privat por edhe privatizimin e njësive të cilat nuk janë aktivizuar deri më tash.

Drejtori Tmava e quajti vizitën e kryekuvendarit Veseli si shumë inkurajuese dhe kthesë pozitive për “Trepçë” duke potencuar se Trepça po hyn në fazën e sqarimit të statusit të saj.

Pas takimit, kryetari Veseli së bashku me menaxhmentin ka vizituar edhe Elektrolizën e zinkut dhe u njoh nga drejtuesit e saj me kapacitetet prodhuese dhe synimet e tyre për të ardhmen.

Telegrafi,  03.10.2015

Pothuaj në gjithë konferencat mbi energjinë e pastër në SHBA do të ketë një folës që krahason ndryshimet në industrinë e energjisë elektrike me revolucionin në telefoni. Në samitin për energjinë të organizuar nga Bloomberg, ish-zëvendës presidenti amerikan, Al Gore, solli një risi në krahasimet që përdori. Ai përmendi Afrikën nën-sahariane, ku konsumatorët pa përdorur ende telefoninë fikse, filluan direkte të përdornin telefoninë ceulare. Diçka e ngjashme, sipas tij, mund të ndodhë dhe me panelet diellore PV në zonat pa rrjet elektrik. Por atje ku ka rrjet elektrik, panelet PV janë një opsion më shumë për konsumatorët. Panelet konkurrojnë energjinë e rrjetit, siç televizioni satelitor konkurron atë kabllor, sipas Gorit. Është pikërisht dëshira për të pasur mundësi të zgjedhësh mes burimeve të energjisë që i ka nxitur shumë republikanë në SHBA të mbështesin energjinë diellore. “Nuk është e largët dita kur do të pyes sallën “Sa prej jush nuk janë të lidhur në rrjet?””-tha Al Gore. “Numri i tyre do të rritet vit pas viti.” Sipas Badar Khan, drejtor i një kompanie panelesh, opsionet e konsumatorit për të zgjedhur duhet të shkojnë përtej burimeve të energjisë. Konsumatori duhet të ketë të drejtë të zgjedhë mes disa ofertash çmimesh, mes mjeteve e mundësive për të pakësuar konsumin e energjisë, për të grumbulluar energjinë. Ka shumë kompani në tregun amerikan që i ofrojnë këto shërbime. Ka konkurrencë në rritje në këtë fushë, gjithsesi dalja plotësisht nga rrjeti synohet nga pak konsumatorë.

Ekolëvizja, 17.04.2015

Ministri i Zhvillimit Ekonomik, Fadil Ismajli dhe kryetarja e Komisionit Qendror të Zgjedhjeve, Valdete Daka kanë nënshkruar sot memorandum bashkëpunimi në bazë të cilit MZHE merr përgjegjësinë të sigurojë furnizim të rregullt me energji gjatë procesit zgjedhor të datës 8 qershor. Më këtë rast ministri Ismajli, ka pohuar se memorandumi siguron furnizimin me energji elektrike për nevoja të KQZ-së dhe të gjitha qendrat e numërimit me qëllim të krijimit të kushteve të nevojshme për këtë proces.

“Furnizimi stabil me energji elektrike gjatë procesit zgjedhor është i një rëndësie të posaçme, pasi sigurohet mbarëvajtja e mirë e tërë procesit zgjedhor si test demokratik i vendit“, është shprehur Ismajli.

Na ana tjetër Kryetarja e KQZ-së Valdete Daka pas nënshkrimit të memorandumit është shprehur se furnizimi me energji elektrike është njeri nga kushtet që KQZ të mund të kryej të gjitha detyrat konform mandatit që ka.

Ndryshe, sipas memorandumit KQZ obligohet që t’i sigurojë MZHE-së skicën e specifikuar të QNR-së, adresat e zyrave të KQZ-së, KKZ-ve dhe listën e të gjitha QV-ve dhe VV me adresa të sakta.

energjia.al 20.05.2014

Nëse jo për të ndërruar pushtetin, qytetarët e zonave më të thella të Kosovës do të dëshironin që të kishin më shpesh zgjedhje. Ditën kur ata votuan, për 24 orë nuk u aplikuan reduktime të energjisë. Veç një ditë para votimeve, fshatra të tëra ishin në terr.
Zyrtarët e kompanisë përgjegjëse për furnizim me energji elektrike në Kosovë, KEDS-it, këtë radhë dëshmuan se ka alternativa dhe mund të ofrojë rrymë pa ndërpre kur i kërkohet nga dikush më i fortë se ta. Edhe pse prodhimi ishte në shpërpjesëtim me konsumin, rryma e kërkuar nga Ministria e Zhvillimit Ekonomik dhe Komisioni Qendror i Zgjedhjeve, për 3 nëntor u importua, shkruan Tribuna.

“Energjia elektrike është importuar nga operatorët ekonomik, partnerë të KEDS, me të cilët KEDS ka kontrata për tregti të energjisë elektrike. Importi me 3 nëntor ka qenë rreth 100 – 370 MW në orë dhe varësisht nga gjindshmëria e energjisë elektrike në treg, KEDS ka importuar nga operatorë të ndryshëm…”, ka bërë të ditur Guri Shkodra, zyrtarë për informim në KEDS.

Sipas tij, prodhimi i energjisë elektrike në KEK gjatë ditës diel ishte rreth 9.5 GWh derisa për të hënën është planifikuar të jetë 11.69 GWh.

Portali Telegrafi, 05.11.2013

Me qëllim të mbarëvajtjes së procesit zgjedhor edhe KEDS i ka shtuar të gjitha masat për furnizim të rregullt dhe cilësor me energji elektrike në të gjitha rajonet e Kosovës.

KEDS do të jetë në gjendje të shtuar gatishmërie, sidomos të dielën, më 3 Nëntor (në ditën e zgjedhjeve) që nga ora 6:00 e mëngjesit deri në orën 6:00 të ditës së nesërme (24 orë). KEDS ka shtuar numrin e punëtorëve në Qendrën e Thirrjes në gjithsej 24 punëtorë që do të punojnë 24 orë pandërprerë.

Kapacitetet punuese do të mobilizohen plotësisht në terren përmes ekipeve të mirëmbajtjes, me qëllim që furnizimi me energji elektrike të mbulojë kërkesat e të gjithë qytetarëve të Republikës së Kosovës, në veçanti kërkesat e qendrave të votimit.

Ekipe të KEDS do të kenë në vëzhgim të gjitha qendrat e votimit për të qenë të gatshëm për parandalimin dhe eliminimin e menjëhershëm të ndonjë prishjeje teknike që mund të shkaktojë ndërprerjen e furnizimit me energji elektrike në këto qendra. Për më shumë, ekipet vëzhguese të institucioneve të rendit dhe qetësisë do të angazhohen për të raportuar për probleme eventuale gjatë furnizimit me energji elektrike. Një linjë e veçantë e komunikimit do të jetë në dispozicion për institucionet e ruajtjes së rendit dhe qetësisë dhe për palët e tjera, të përfshira në procesin zgjedhor në Kosovë. E gjithë kjo bëhet me qëllim që procesi i raportimit të problemeve të mundshme në rrjetin e furnizimit me energji elektrike të jetë më i shpejtë dhe efikas.

Në rast të ndonjë avarie eventuale, KEDS ka siguruar rritje të importit me qëllim të mbulimit të kërkesës maksimale të qytetarëve të Republikës së Kosovës për energji elektrike. Për më shumë, KEDS paraprakisht ka siguruar energji të bollshme përmes importimit në ditën e zgjedhjeve me qëllim që edhe KEDS të jetë pjesë e mbarëvajtjes së procesit zgjedhor.

Luten të gjithë qytetarët e Republikës së Kosovës që të raportojnë problemet e ndryshme në rrjetin elektrik në numrat në vijim: 038 501 701 1000 dhe / ose 038 79 1000. Ju sigurojmë që të gjitha problemet tuaja t’i sanojmë në afatin sa më të shkurtër kohor, pasi që ekipet tona janë prezente me numër maksimal gjithandej Kosovës.

Besojmë që procesi zgjedhor do t’i përmbushë të gjitha vlerat demokratike të Republikës së Kosovës dhe përfundimisht, urojmë proces të mbarshëm zgjedhor!

energjia.al, 01.11.2013