info@energjia.al

Deputeti i LSI për qarkun Dibër, Përparim Spahiu ka depozituar në Parlament një nismë të ngjashme me atë që minatorët kanë dërguar në Ministrinë e Energjisë, për përfshirjen e punonjësve të industrisë minerare në një status të veçantë.

“Normalisht nuk është propozim i imi personal, sepse një propozim i tillë ekziston prej vitesh sa i takon statusit të minatorit dhe besoj parimisht se gjithë spektri politik ka qenë dakord. Ndërhyrja ime ishte thjesht një nxitje e këtij procesi dhe aktualisht kam depozituar në Parlament pothuajse të njëjtin propozim të sindikatave që është depozituar pranë ministrive të linjës”, ka deklaruar Spahiu.

Nga ky status mund të përfitojnë trajtim të veçantë sa u përket pagave, pensioneve apo trajtimit mjekësor falas rreth 8.000 minatorë dhe ish-minatorë në pension. Por kjo mund të jetë një faturë e rëndë financiare.

“E them edhe si ekonomist që problem, nëse mund të quhet problem kryesor, është ai financiar pasi bëhet fjalë për një numër të madh personash që përfitojnë. Nëse e miratojmë brenda këtij mandati them që detyrimet financiare, pa dashur të abuzojmë në këtë aspekt, t’i kalojnë qeverisë së ardhshme duke dhënë zgjidhjet financiare. Ka mekanizma kontabël që ato kosto, që për ne janë detyrim, të mbulohen deri në ulje investimesh pasi për njëzet e ca vjet është diçka që pritet dhe nuk mund të zgjasë më shumë”, ka thënë Spahiu.

Statusi i minatorit po diskutohet aktualisht mes ministrive të Energjisë, Mirëqenies Sociale, asaj të Financave, Shëndetësisë dhe Drejtësisë.

Top Channel,  23.03.2017

Shoqëria civile i ka nisur një propozim Kuvendit të Shqipërisë për të ulur nivelin e taksimit mbi naftës, që është arsyeja kryesore se pse çmimet e karburantit në vend janë ndër më të shtrenjtat në Europë. Ky propozim synojn që të unifikojë 3 taksat e dedikuara në një taksë të vetme për naftën dhe ta uli nivelin e taksimit duke e çuar atë në nivele të krahasueshme me rajon.

Në shkresën që “Nisma Thurje”  i ka dërguar kryetarit të Kuvendit Z. Ilir Meta dhe gjithë krerëve të grupeve parlamentare, thuhet se një nga çështjet që kërkon vëmendje të menjëhershme nga ana juaj dhe e kolegëve tuaj është ajo e çmimit të karburantit për konsumatorët. Siç mund të jeni në dijeni, çmimi i karburantit në Bursat Ndërkombëtare ka pësuar një rënie të vazhdueshme, rënie e cila nuk është reflektuar fatkeqësisht në favor të konsumatorit.

Ditën e mërkurë, dt.15.03.2017 tregjet ndërkombëtare e kuotonin naftën bruto me 52 USD/Barrelë.

Ulja e çmimit në tregjet ndërkombëtare  u shoqërua edhe me uljen e çmimit të shitjes së këtij produkti për konsumatorët në të gjithë botën. Ulja e çmimit të naftës për konsum ka variuar nga 25% derinë 50%.

Ndërkohë që konsumatorët në të gjithë botën I janë gëzuar këtij oportuniteti, situata në Shqipëri qëndron pothuajse statike. Çmimi i karburantit pësoi vetëm një rënie prej 10% në fund të vitit të shkuar dhe tani është rikthyer sërisht në nivelet e mëparshme, paradoksalisht.

Kjo situate vjen si rrjedhojë e nivelit të lartë të taksimit të këtij produkti.

Situata me taksimin mbetet problematike dhe kërkon ndërhyrje urgjente në legjislacion. Duke u bazuar në situatën aktuale të furnizimit të qytetarëve me nënprodukte të naftës, ku pjesa më e madhe e tyre importohen nga jashtë vendit,  efektivisht në këtë moment që po flasim, nafta dhe benzina taksohen nëpërmjet 3 taksave indirekte të dedikuara te modelit akcizor:

  1. Akciza e naftës = 37lekë
  2. Taksa e Qarkullimit = 27lekë
  3. Taksa e Karbonit = 3 lekë

Pra në total taksimi akcizës sot efektivisht arrin në 67 Lekë për litër. Ndërkohë që përveç këtyre taksave të mësipërme aplikohet edhe Taksë Doganore në masën 10% te çmimit të blerjes  dhe 0.73 lekë shkojnë për tarifën e ngjyrosjes. Në fund shtohet edhe vlera e TVSH ne masën 20% te çmimit të shitjes.

Një nivel i tillë taksimi është më i larti në rajon dhe nuk korrespondon me të ardhurat e shqiptarëve. Më poshtë po Ju paraqesim një tabelë me të dhëna mbi nivelin aktual te taksimit akcizë që vendet e rajonit aplikojnë mbi nënproduktet e naftës për përdorim publik.

Nga ana tjetër cilësia e karburantit që tregëtohet në vendin tonë vazhdon të mbetet një problem madhor për qytetarët duke e shndërruar debatin për çmimin në një çështje akoma dhe më emergjente. Raportimet në të gjithë vendin tregojnë se nafta që tregtohet në pikat fundore përzihet me nënprodukte dhe niveli I parandalimit dhe ndëshkimit të këtij fenomeni është I ulët.

Nisma ka propozuar disa amendime të ligjit të përgatitur nga ekspertët e saj. Ky propozim synon që të unifikojë 3 taksat e dedikuara në një taksë të vetme për naftën dhe ta uli nivelin e taksimit duke e çuar atë në nivele të pranueshme për xhepat e shqiptarëve.

Më konkretisht:

Në DIREKTIVËN 2003/96/EC, Komisioni Europian ka përcaktuar kornizat e harmonizimit të strukturave te tarifimit akcizor të vendeve të Unionit. Bazuar në përcaktimet e bëra brenda kesaj directive, ne propozojmë variantin e tretë, i cili konsiston në faktin që akciza e naftës, taksa e qarkullimit dhe taksa e karbonit përmblidhen të treja në një taksë të vetme, e cila quhet Taksa e Karburantit.

Taksa e Karburantit është 46 Lekë/Litër, sa minimumi i parashikuar në direktivën 2003/96/EC të BE për taksat e nënprodukteve të naftës.

Revista Monitor,  15.03.2017

Studimi i studios franceze Sogreah e cila analizon skemat e mundshme të shfrytëzimit të potencialit ujor të lumit Vjosa, të cilin qeveria shqiptare ka si referencë parashikon ndërtimin e 25 hidrocentraleve në Lumin Vjosë.

Monitor zotëron të plotë studimin prej 140 fq. të studios “Soegrah”, me titull ” Consultants’ services for assessment of Power generation potential of selected Albanian rivers“.

Kapaciteti i instaluar i propozuar,sipas Sogreah për lumin Vjosa është 458 MW dhe prodhimi i energjisë parashikohet të 1810 GWh, duke përfshirë edhe Kalivaçin. Këto shifra janë të përafërta me studimet e deritanishme që shohin një kapacitet prodhimi prej 498 MW në Vjosë.

Ndër 25 HEC-e projektuara në Vjosë më të mëdhatë janë ai i Kaludhit, Dragotit, Kalivaçit, Pocemi dhe Karbonarit.

Lumi Vjosa rrjedh në jug të Shqipërisë. Gjatësia e saj është 272 km nga të cilat 80 km janë në Greqi.
Ujëmbledhësi i saj është rreth 6704 km2 nga të cilat 4365 km2 në territorin e Shqipërisë
Lartësia mesatare e pellgut parashikohet 855 metër. Burimi i Vjosës eshtë malet e Pindit
në Greqi.

Lumi hyn në Shqipëri në Perat. Në Shqipëri deri në Urën e Dragotit lumi rrjedh nëpër një luginë relativisht të ngushtë me përjashtim të disa pjesëve të vogla të gjera me tarraca të ulëta të vendosura në të dy anët e lumit. Midis Këlcyrës dhe Dragotit lumi rrjedh nëpër grykën Këlcyrë.
Pas Selenicës brigjet e lumit janë më të buta dhe të më të ulëta. Vjosa derdhet në detin Adriatik në afërsi të fshatit Poro në veri të lagunës së e Nartës.

Nëse projektet e HEC-ve vihen në zbatim popullsia që rrezikon evakuimin është rreth 35 000 persona.

Ndërtimi i HEC-ve në Vjosë ka hapur prej citesh një debat të madhe ndër ambjentalistë, të cilët e kanë konsideruar një dëm të madh që i bëhet biodiversitetit.

Lista e HEC-ve të projektuara në Vjosë:

Çarshova
Zhepa
Pellumbari
Kaludh
Badëlonja
Permet
Kutali
Kosina
Kosina
Grabova
Dragot
Memaliaj
Kalivaç
Pocem
Karbonari
Selenica
Palokastra
Ura Subashit
Ura Subashit
Dragot +
Drinos
SHUSHICA
Brataj
Ura e Gjormit
Kota

Revista Monitor,  12.02.2016

ISHTI në bazë të inspektimeve të kryera në subjektet SHA me Liçencë Tregtimi të produkteve hidrokarbure ka propozuar zyrtarisht Revokimin e Liçencave të cilat kanë humbur kushtin e kapacitetit depozitues si detyrim ligjor i përcaktuar nga Ligji Nr. 8450 Dt. 24/02/1999 i ndryshuar, Neni 21, si dhe nuk kanë plotësuar detyrimet ligjore të përcaktuara nga VKM 114, Dt. 27.01.2009 pika 8 dhe Urdhëri i Ministrit Nr.6 Dt. 09.01.2015.

Më poshtë do të gjeni tabelën me subjekte e propozuara.

Tabela e Licencave te propozuara per Revokim

energjia.al  29.01.2016

Ish-ministri i Zhvillimit Ekonomik, Fadil Ismajli, ka treguar për të vërtetën e ofertës që ka paraqitur kompania gjermane “Bilfinger” për ta rindërtuar termocentralin ‘Kosova A’, ofertë për të cilën ka folur në konferencë për media edhe vet kancelaria gjermane Angela Merkel, gjatë vizitës që kryeministri Isa Mustafa ka zhvilluar këtë javë në Berlin.

Ai ka thënë për “Epokën e re” se në kohën kur e ka marrë detyrën e ministrit ka gjetur një propozim nga “Belfinger”-i për rivitalizim të ‘Kosovës A’ por, sipas tij, propozimi nuk ka qenë i strukturuar dhe i kompletuar si duhet në atë kohë. Pavarësisht kësaj, Ismajli ka thënë se Kosova në atë kohë kishte edhe projektin tjetër ‘Kosova e Re’ dhe, sipas tij, vendi nuk do të mund t’u bënte ballë dy projekteve paralelisht.

“Kur kam shkuar si ministër i Zhvillimit Ekonomik kam gjetur një propozim për rivitalizim të “Kosovës A”. Është e vërtetë se kompania ‘Bilfinger’ është një kompani shumë serioze dhe e njohur dhe ka teknologji shumë të mirë, por në kohën kur unë kam qenë ministër për ato vite sa e kam menaxhuar Ministrinë e Zhvillimit Ekonomik propozimi i ‘Bilfinger’-it nuk ka qenë i strukturuar dhe i kompletuar si duhet në atë kohë. Unë kam pasur takime dhe kontakte me ambasadorin dhe zëvendësambasadorin gjerman. Ne si ministri e Zhvillimit Ekonomik kemi pasur dy prezantime prej kompanisë për rivitalizim, dy prezantime të cilat kanë dalluar prej njëra-tjetrës, por ne kemi kërkuar të merren shumë seriozisht që ata ta strukturojnë propozimin. Pra, të kemi më shumë informata për burimet financiare, mirëpo kompania nuk ka treguar për këto burime. Në këtë aspekt është treguar joserioze, sepse ne ishim edhe në projektin tjetër, që është ‘Kosova e Re’”, ka thënë Ismajli, duke shtuar se Kosova nuk do të mund t’u bënte ballë dy projekteve paralelisht.

“Do të ishte fat i madh nëse ekonomia gjermane të investonte në Kosovën A. Mirëpo, duhen bërë studime financiare, të zgjidhen mekanizmat dhe të rishikohet mundësia e buxhetit të Kosovës, nëse ajo i përballon dy projekte të mëdha njëherësh. Kosova nuk do të mund të qëndronte ose t’u bënte ballë paralelisht dy projekteve të tilla të mëdha. Këtu ishte në pyetje në rend të parë borxhi publik, obligimet ndaj Fondit Monetar Ndërkombëtar, ndërkohë në atë kohë u aprovua edhe buxheti për ndërtimin e Autostradës Prishtinë-Shkup. Ndërtimi i ekektranave ose rindërtimi i tyre do të kërkonte garanci nga shteti i Kosovës dhe Kosova vështirë se mund t’ia jap. Sidoqoftë, ekziston edhe mundësia që të bëhen aranzhmane të reja edhe me FMN-në, po ashtu ekzistojnë edhe mundësi të tjera”, ka thënë Ismajli, i cili ka lutur kompaninë gjermane që të mos heq dorë dhe ta kompletojë propozimin asht siç duhet, edhe në aspektin teknik, edhe atë financiar.

Telegrafi,  04.07.2015

Qeveria e Kosovës nuk ka alternativë tjetër përveçse ndërtimit të termocentralit “Kosova e Re”. Por, alternativë ka për mënyrën e ndërtimit dhe kompaninë që do të marrë tenderin, nëse kompania e vetme që ka dorëzuar ofertën nuk i pranon kushtet e Qeverisë së Kosovës.

Ky është mesazhi që ka marrë kompania “Contour Global”, e cila ka kërkuar që norma e brendshme e kthimit të jetë 23-27 për qind. E norma e brendshme e kthimit, që njihet në gjuhën financiare si IRR, do të jetë njëra nga pikat që do të negociohet me kompaninë amerikane, “Contour Global”, pasi Qeveria nuk e pranon një IRR kaq të lartë për një projekt të tillë, shkruan Koha Ditore.

Gazeta kishte raportuar se një nivel i tillë i IRR-së nënkupton që investitori synon t’i kthejë investimet e bëra vetëm katër vjet pas lëshimit në operim të termocentralit. Niveli i IRR-së është njëri nga faktorët që pritet të ndikojë në çmimin e energjisë elektrike së bashku me faktorë të tjerë, siç janë: teknologjia që do të instalohet, kostoja e ndërtimit dhe ajo e operimit.

Revista Monitor, 14.04.2015

Në Ministrinë e Zhvillimit Ekonomik, Komisioni për Vlerësimin e Ofertave, në prezencë të Komitetit Drejtues të Projektit (KDP), Këshilltarit të Transaksionit dhe Këshilltarit Strategjik, dhe anëtarëve vëzhgues, ka bërë hapjen e Propozimit Financiar për Fazën I për Termocentralin Kosova e Re, e dorëzuar nga ofertuesi Contour Global me seli në SHBA.

Në hapje të Propozimit Financiar të ftuar kanë qenë anëtarët vëzhgues nga Banka Botërore, BERZH, USAID, KfW, Ambasada Amerikane, Zyra e Bashkimit Evropian në Kosovë, si dhe përfaqësuesit e institucioneve tjera vendore që kanë të bëjnë me sektorin, KOSTT, KEK.

Duke u bazuar në kriteret e Kërkesës për Propozime, oferta e investitorit Contour Global përfshin Normën e Brendshme të Shlyerjes së Ekuitetit, e cila do të aplikohet për ekuitetin e kontribuar përgjatë jetëgjatësisë së Marrëveshjes së Blerjes së Energjisë, si dhe Koston Maksimale të Zhvillimit të Projektit, e cila nuk mund të tejkalohet dhe përfshin vetëm kostot specifikisht të lejuara për zhvillimin e projektit.

Nëpërmjet ofertës së tyre Contour Global ka konfirmuar se është e gatshme dhe ka kapacitet financiar që të investojë ekuitet deri në 30% të kostos totale të investimit në Projekt, si dhe ka qasje në financim nga kreditë për pjesën tjetër prej 70% të kostos së investimit në Projekt. Në bazë të analizave dhe studimeve të ndryshme të realizuara nga Këshilltari teknik i Transaksionit, kostoja totale e investimit në Projekt do të jetë rreth 1 Miliard Euro.

Komiteti Drejtues i Projektit është i përkushtuar në zhvillimin e një procesi transparent dhe në përputhje me legjislacionin e Kosovës dhe aplikimin e rregullave të Bankës Botërore. Mbi këtë bazë, Propozimi Financiar nga Contour Global do të vlerësohet nga Këshilltarët e Transaksionit, Këshilltarët Strategjik, dhe Komisioni i Vlerësimit si dhe do të konsultohet Banka Botërore për të siguruar se oferta i përmbahet kushteve dhe kritereve të Bankës Botërore.

Pas përmbylljes së kësaj faze, në Fazën 2 të Projektit do të shpallet një proces ndërkombëtar i konkurrimit për kontraktimin e EPC (Inxhiniering, Prokurim dhe Ndërtim) dhe O&M (Operim dhe Mirëmbajtje) dhe do të sigurohet financimi nga kreditorët për Projektin. Vetëm pas përfundimit të të gjitha këtyre fazave do të mund të definohet kostoja finale e investimit në Projekt dhe indikatorët e tjerë që ndërlidhen me Projekt.

MZHE do ta informojë me kohë opinionin publik për zhvillimet e ardhme në kuadër të Projektit.

energjia.al  04.03.2015

Në Ministrinë e Zhvillimit Ekonomik, Komisioni për Vlerësimin e Ofertave, në prezencë të Komitetit Drejtues të Projektit (KDP), Këshilltarit të Transaksionit dhe Këshilltarit Strategjik, dhe anëtarëve vëzhgues, ka bërë hapjen e Propozimit Financiar për Fazën I për Termocentralin Kosova e Re, e dorëzuar nga ofertuesi Contour Global me seli në SHBA.

Në hapje të Propozimit Financiar të ftuar kanë qenë anëtarët vëzhgues nga Banka Botërore, BERZH, USAID, KfW, Ambasada Amerikane, Zyra e Bashkimit Evropian në Kosovë, si dhe përfaqësuesit e institucioneve tjera vendore që kanë të bëjnë me sektorin, KOSTT, KEK.

Duke u bazuar në kriteret e Kërkesës për Propozime, oferta e investitorit Contour Global përfshin Normën e Brendshme të Shlyerjes së Ekuitetit, e cila do të aplikohet për ekuitetin e kontribuar përgjatë jetëgjatësisë së Marrëveshjes së Blerjes së Energjisë, si dhe Koston Maksimale të Zhvillimit të Projektit, e cila nuk mund të tejkalohet dhe përfshin vetëm kostot specifikisht të lejuara për zhvillimin e projektit.

Nëpërmjet ofertës së tyre Contour Global ka konfirmuar se është e gatshme dhe ka kapacitet financiar që të investojë ekuitet deri në 30% të kostos totale të investimit në Projekt, si dhe ka qasje në financim nga kreditë për pjesën tjetër prej 70% të kostos së investimit në Projekt.

Në bazë të analizave dhe studimeve të ndryshme të realizuara nga Këshilltari teknik i Transaksionit, kostoja totale e investimit në Projekt do të jetë rreth 1 Miliard Euro. Komiteti Drejtues i Projektit është i përkushtuar në zhvillimin e një procesi transparent dhe në përputhje me legjislacionin e Kosovës dhe aplikimin e rregullave të Bankës Botërore. Mbi këtë bazë, Propozimi Financiar nga Contour Global do të vlerësohet nga Këshilltarët e Transaksionit, Këshilltarët Strategjik, dhe Komisioni i Vlerësimit si dhe do të konsultohet Banka Botërore për të siguruar se oferta i përmbahet kushteve dhe kritereve të Bankës Botërore.

Pas përmbylljes së kësaj faze, në Fazën 2 të Projektit do të shpallet një proces ndërkombëtar i konkurrimit për kontraktimin e EPC (Inxhiniering, Prokurim dhe Ndërtim) dhe O&M (Operim dhe Mirëmbajtje) dhe do të sigurohet financimi nga kreditorët për Projektin. Vetëm pas përfundimit të të gjitha këtyre fazave do të mund të definohet kostoja finale e investimit në Projekt dhe indikatorët e tjerë që ndërlidhen me Projekt. MZHE do ta informojë me kohë opinionin publik për zhvillimet e ardhme në kuadër të Projektit.

Agjensia e lajmeve ekonomia,  03.02.2015

Shfrytëzuesit e minerave që fitojnë më shumë, duhet të paguajnë më shumë.

Ky është propozimi që vjen nga radhët e deputetëve të Partisë Socialistë në Komisionin parlamentar të Veprimtarive Prodhuese, në mënyrë që renta minerare të mos jetë më një përqindje fiske, por progresive në bazë të fitimeve.

Komisioni ka diskutuar ndryshimet në projektligjin për minierat, i cili vjen si nevojë për të rregulluar këtë sektor. Deputetët kanë bërë disa propozime në plotësim të ligjit kryesisht lidhur me publikimin e më shumë informacioneve për investitorët e këtij sektori shumë të rëndësishëm të vendit.

Përfaqësuesve të ministrisë u është lënë kohë për kthimin e përgjigjeve në mbledhjen tjetër të komisionit, ndërsa projektligji është miratuar në parim, për t’u shqyrtuar më tej edhe nen për nen.

Scan TV, 22.09.2014

Oda Ekonomike e Kosovës është e shqetësuar për gjendjen energjetike të kohëve të fundit, andaj kërkon të ngrisë shqetësimin për paralajmërimet për ngritjen e çmimit të energjisë elektrike.

Një vendim i tillë sipas OEK-ut do të reflektoj në format e ndryshme negative në ekonominë kosovare, dhe se në masë të madhe është goditje veçanërisht për sektorin privat dhe mund të ndikojë dhe të rëndoj aspektin social në vendin tonë edhe ashtu të rënduar.

“Duke konsideruar gjithmonë që investitorët e huaj në Kosovë përbëjnë një mundësi për zhvillim ekonomik, një vendim i tillë për ngritje të çmimit të energjisë elektrike patjetër që do të ketë efektin e vet duke krijuar kushte jo të favorshme për ta dhe duke e bërë Kosovën një vend më pak të pëlqyer dhe të përshtatshëm për absorbim të investimeve të huaja.\”

“Ne konsiderojmë që një situatë e tillë do të rëndojë akoma më shumë gjendjen e bizneseve, veçanërisht të kompanive prodhuese, ku shpenzimet dhe kostoja për realizim të aktiviteteve të tyre biznesore do të rriten në vlera enorme dhe ekzistimi i tyre do të vihej në pikëpyetje\”, theksohet në reagimin e OEK-ut.

Shqetësime sipas OEK vijnë edhe nga kompanitë eksportuese të cilat janë tejmase të shqetësuara për paralajmërimet e fundit, duke parashikuar ditë të këqija për eksportet tona, në humbjen e aftësive konkurruese dhe mundësinë që të jenë konkurrent në tregjet e huaja, në rast se një vendimi tillë bëhet i plotfuqishëm.

Një rritje e tillë e çmimit të energjisë duke ulur aftësinë konkurruese për eksporte, na shtynë drejtë një situate tjetër, ku importet do të rriten dhe bashkë me to edhe varshmëria e Kosovës nga importi.

Çdo ngritje e mundshme e çmimeve do të duhej të amortizohej përmes një mase fiskale nga qeveria e vendit, siç do të ishte ulja e TVSH-së, masë kjo që do të ulte sadopak ngarkesën e madhe në çmim të energjisë elektrike.

Vetëm një bashkërendim i një ngarkese të tillë do të mund të ulte efektet negative të parashikuara nga ngritja e çmimeve të energjisë elektrike. Andaj, ne i bëjmë apel qeverisë së vendit që në rast se një masë e tillë aplikohet, bizneset tona do të duhej të suportoheshin përmes stimujve fiskal.

Agjensia e lajmeve ekonomia, 19.08.2014