info@energjia.al

Ministria e Infrastrukturës dhe Energjisë në bashkëpunim me Bankën Evropiane për Rindërtim dhe Zhvillim organizuan sot një tryezë dialogu me grupet e interesit rreth garave konkurruese për kapacitetet e reja në energjinë diellore.

Në fjalën e tij, Ministri i Infrastrukturës dhe Energjisë Damian Gjiknuri deklaroi se energjia diellore është një burim jashtëzakonisht i rëndësishëm edhe për Shqipërinë, për shkak të pozicionit gjeografik të vendit dhe ekspozimeve që ka ndaj rrezatimit diellor.

“Nxitja e këtyre investimeve bëhet domosdoshmëri edhe nisur nga fakti se jemi aktualisht 100% të varur nga energjia ujore. Ligji i ri për energjitë e rinovueshme dhe plani kombëtar i qeverisë për promovimin e këtyre burimeve po hedh hapat e para duke shtruar platformën operacionale dhe ligjore për të konkretizuar investimet e para”, u shpreh Gjiknuri.

Në bashkëpunim me BERZH-in tha ai, po punohet që 30 deri 50 mega të jepen mbi bazën e ankandeve, duke afruar investitorë seriozë por edhe të marrim tarifa të përballueshme.

Sipas ministrit Gjiknuri, sfida me të cilën ndeshemi është se si ta kthejmë këtë në një proces të qëndrueshëm.

“Që kapacitetet që jepen të jenë në një treg të konkurueshëm, por mbi të gjitha të kenë një treg likuid që bën të mundur kthimin e investimit. Kjo do të thotë që jo çdo burim diellor mund të kthehet në burim energjie për aq kohë sa në një  treg të rregulluar siç jemi ne, ato paguhen nga konsumatori final. Në hapin tonë të parë zgjodhëm të promovojmë 50 mega në energji diellore e cila mund të jetë pak në fillim por është e mjaftueshme dhe qëndrueshme në tarifat që kemi sot në fuqi”, nënvizoi Gjiknuri.

Duke u ndalur më tej tek plani i mëtejshëm i rimëkëmbjes së sektorit elektroenergjitik, Gjiknuri tha se shumë shpejt falë rimëkëmbjes do krijohet mundësia për potenciale të reja në energjinë diellore.

“Duhet një qasje e balancuar sepse gjërat që nuk kanë qasje të balancuar shpesh herë përfundojnë në inflacion që i bën të paqëndrueshme nga ana financiare. Nëse nuk ka treg likuid që do ta tërheqë këtë energji, këto mund të kthehen në një problem të madh siç ka ndodhur në vendet e tjera”, u shpreh Gjiknuri.

Ora News,  24.10.2017

Çmimet e naftës po ndryshojnë shumë pak gjatë sesionit të sotëm, por megjithatë po gjejnë një mbështetje nga tensionet në Irak dhe nga rënia e aktivitetit të shpim-kërkimit në Shtetet e Bashkuara të Amerikës, që sipas analistëve mund të jetë e përkohshme.

Numri i shpimeve në fusha të reja naftëmbajtëse ra me 7 njësi në 736, gjatë javës që u mbyll më 20 tetor, niveli më i ulët që nga qershori i këtij viti. Kështu, nafta Brent e Londrës po tregtohet pranë 57.6 dollarëve për fuçi, ndërsa nafta Bruto amerikane tregtohet në rreth 52 dollarë për fuçi.

Gjithsesi, analistët mendojnë se, tendenca e çmimeve mund të jetë në rritje për shkak të luftimeve në veri të Irakut mes forcave irakiane të sigurisë dhe rebelëve kurdë.

Në ditën e diel, eksportet nga Kurdistani drejt portit turk të Ceyhanit, ranë në rreth 200 mijë fuçi në ditë, nga 600 mijë fuçi, që është kapaciteti. Ndërkohë, gjatë një vizite historike në Irak, ministri i naftës i Arabisë Saudite, Khalid al-Falih, vlerësoi bashkëpunimin mes dy vendeve brenda Organizatës së Vendeve Eksportuese të Naftës, për të shkurtuar prodhimin.

Indeksi i luhatshmërisë së naftës bruto, i cili mat pritshmëritë e tregut për 30-ditët e ardhshme, ra në nivele të ngjashme me ato të vitit 2014.

Scan Tv,  24.10.2017

Operatori i Shpërndajres së Energjisë ka hapur procedurën për blerjen e energjisë për 6 ditët e fundit të tetorit. Sipas njoftimit të kompanisë, palët e interesuara duhet të dorëzojnë ofertat brenda ditës së sotme (23 tetor) dhe këto të fundit duhet të jenë të vlefshme deri në 24 tetor kur do të mbyllen edhe kontratat. Periudha e lëvrimit do të jetë 26-31 tetor.

Konkretisht OSHEE po kërkon oferta për dy lote ku i pari këkron furnzimin me një fuqi 100 MW dhe një sasi 14 400 Mwh. Koha e lëvrimit do të jetë nga 00:00-24:00. Kurse në lotin e dytë sasia që këkrohet është 25 200Mwh dhe në një fuqi 280 MW në një orar lëvrimi nga 08:00 deri në 22:00, total 15 orë.

OSHEE përmbylli për tetorin në fund të muajit të kaluar procedurën për një sasi 119 040 Mwh energji me një vlerë pak më shumë se 6 milionë euro por duket se  është përballur me surpriza.

Në atë kohë të paktën dy oferta janë shpallur fituese. E para në profil (BAND (00:00 – 24:00) (24 ore) me një sasi 89,280 MWh me çmim mesatar 49.1Eu/MWh dhe  në vlerë 4,383,648 Euro.

E dyta në profil (PEAK (06:00 – 22:00) (16 orë) në një sasi 29,760 MWh me çmim mesatar  57.62Eu/MWh në vlere 1,714,672.00 Euro.

Këto ditë pritet që OSHEE të bëjë edhe shpalljen e procedurës për blerjen e nëntorit në bazë edhe të dakordësisë që ka mr KESH për pjesën që do të plotësojë vetë Korporata.

Revista Monitor,  24.10.2017

Korporata Elektroenegjetike Shqiptare do të importojë energji edhe gjatë muajit nëntor në një përpjekje për të ruajtur rezervën e saj hidrike në kaskadën e Drinit. Korporata shpalli kërkesën e saj duke ftuar operatorët e interesuar për të shitur energjinë e tyre tek kompania publike për muajin nëntor.

Kjo është procedura e tretë që KESH hap në harkun e tre muajve dhe që do të paguhet nga kredia e Planit të Rimëkëmbjes me Bankën Botërore.

Sipas shpalljes KESH kërkon të blejë deri në 129 600 Mwh energji e njëjta sasi e kërkuar edhe për shtatorin por më pak se muaji aktual. Periudha e lëvrimit do të jetë nga data 1-30 nëntor me profil 00:00-24:00.

Kompanitë duhet të paraqesin interes pranë zyrave të KESH ndërkohe që ofertat e tyre duhet të jenë të vlefshme deri në datë 30 tetor 2017.

Këto ditë pritet që edhe OSHEE të hapë tenderin e saj për importet në nëntor ndërkohë që sot (23 tetor) shpërndarja hapi procedurë vetëm për plotësimin e 6 ditëve të fundit të tetor me energji.

KESH dhe OSHEE kanë shpenzuar mbi 100 milionë euro për importe. Vetëm KESH ka në dispozicion 22.4 milionë euro nga kredia me BB dhe aktualisht ka shpenzuar 12.7 milionë euro për shtator-tetor. OSHEE nga ana tjetër ka përballuar importet me fondet e veta dhe së fundmi i janë transferuar edhe 7.3 milionë euro nga buxheti.

Revista Monitor,  24.10.2017

Në mallra, metalet bazë ishin më të forta me të ardhmen e bakrit deri në 1.5 përqind.

Ari u ul 0,1 për qind, Brent i papërpunuar ra 4 cent në $ 57.33, ndërsa nafta e papërpunuar në SHBA shtoi 4 cent në 51.92 dollarë për fuçi.

Revista Monitor,  24.10.2017

Investimet në parqet diellore po shndërrohen në një nga bizneset më të preferuara në Shqipëri.

Vetëm muajin tetor Ministria e Transporteve dhe Energjisë ka pranuar 11 aplikime nga kompanitë private për ndërtimin e parqeve fotovoltaike. Gjeografia e tyre është e shpërndarë thuajse në të gjithë territorin e Shqipërisë.

Sipas dokumenteve zyrtare, shuma totale e investimeve që parashikohet për këto 11 vepra është rreth 25 milionë euro. Sipas procedurës së parashikuar nga ligji, kërkesat e kompanive private do ti nënshtrohen shqyrtimit nga ministria e transporteve. Nëse ministria vendos t’i pranojë projektet, atëherë kompanitë do të avancojnë me ndërtimin e tyre.

Energjia është një nga degët e ekonomisë që ka thithur më shumë investime private gjatë viteve të fundit. Por nëse deri më tani kapitalet private janë investuar kryesisht në ndërtimin e hidrocentraleve, nga vera e këtij viti tendenca ka ndryshuar dhe investitorët po rendin drejt parqeve diellore.

Ndërtimi i paneleve diellore diversifikon burimet e prodhimit të energjisë në Shqipëri, e cila aktualisht është e varur thuajse tërësisht nga uji.

Ekspertët në ministrinë e energjisë thonë se për shkak të klimës, në Shqipëri energjia diellore ka rendiment të lartë. Për këto investime, qeveria garanton plotësisht blerjen e energjisë me një çmim preferencial, më të lartë se ai i tregut, përkatësisht 100 euro për megavat.

Top Channel,  24.10.2017

Nafta apo ari i zi, është ndër produktet më të kërkuara dhe më fitimprurëse edhe në Kosovë. Pasi që Kosova nuk ka rafineri të vetën, operatorët ekonomikë brenda një viti importojnë rreth 650 milionë litra të këtyre derivateve. Mbi 60 milionë litra importohen nga Serbia, mbi 133 milionë nga Greqia dhe mbi 25 milionë litra në Bullgaria.

Këtë e pohojnë përfaqësuesit e Shoqatës së Naftëtarëve të Kosovës. Ramadan Maloku nga kjo shoqatë tha për Radion Evropa e Lirë se një përqindje e madhe e naftës importohet nga Serbia dhe Bullgaria, por faktikisht, sipas tij, origjina e mallit është nga Rusia.

“Importohet përmes shtetit të Bullgarisë dhe shtetit të Serbisë. Do të thotë për çdo ditë ka importe që hyjnë në pjesën veriore, pastaj përmes pikës në Medarë dhe tek Dheu i Bardhë. Dihet që disa nga vendet e Ballkanit kanë raporte me shtetin e Rusisë, pra është me origjinë ruse. Ndonëse e ndërrojnë origjinën se është nga Rusia dhe Bullgaria, por realisht është nga Rusia”, thotë Maloku.

Por, disa nga pronarët që importojnë derivate të naftës nga Serbia, thonë se nuk u intereson se nga vjen lënda e parë. Sipas tyre, çmimi i leverdishëm dhe cilësia e produktit, janë arsyet pse ata e importojnë naftën përmes këtyre vendeve.

Kujtim Bucaliu, pronar i kompanisë “Hib Petrol”, thotë se afërsia territoriale ndikon që të importohet naftë nga shtete fqinje dhe ato të rajonit.

“Ne importojmë naftë nga shumë vende të rajonit, nga rafineria e Greqisë, rafineria e Pançevës në Serbi dhe Bullgaria, për arsye se nuk na mundësohet që të kemi qasje në vende më të largëta, andaj importojmë nga vendet më të afërta. Neve nuk na intereson rafineria, por na intereson kualiteti dhe çmimi”, thotë Bucaliu.

Kurse kompania tjetër EXFIS, derivatet e naftës i importon nga Greqia. Pronari i kësaj kompanie, Remzi Muharremi thekson se në tregun e Kosovës ka sasi të mëdha të naftës nga Serbia, por që operatori “Exfis” për shkak të cilësisë, siç thotë ai, importon naftë vetëm nga Greqia, ndërkaq mazutin e siguron nga rafineria e Pançevës, në Serbi.

“Ne jemi importues ekskluziv i benzinës nga Greqia, pasi konsiderojmë se është më e mirë, më kualitative, por është shumë më e shtrenjtë se ky produkt që vjen nga Serbia”, thotë Muharremi.

Në anën tjetër Lulzim Syla, kryeinspektor i tregut në kuadër të Ministrisë se Tregtisë dhe Industrisë, thotë se kompetent për kontroll të cilësisë së naftës në kufi është Dogana e Kosovës, kurse inspektorati i Ministrisë së Tregtisë dhe Industrisë është kompetent për monitorimin e cilësisë së naftës brenda tregut të Kosovës.

Ai thotë se ky trup inspektues, vazhdimisht kontrollon tregun për parregullsi eventuale.

“Marrim mostrat në tregun e brendshëm të Kosovës. Asnjëherë nuk kemi hasur origjinë të produktit nga Rusia, por nga Serbia. Pasi sipas një vendimi, Qeveria e Kosovës i ka vendosur embargo Federatës së Rusisë”, thotë Syla.

Megjithatë, Syla thotë se për pjesën veriore të Kosovës, ku operojnë tri kompani që merren më derivate të naftës, nuk ka informacione se nga furnizohen ato.

“Unë kam bërë edhe një raport dhe e kemi dërguar në Bruksel. Ekzistojnë ato tri pika dhe nuk kemi qasje në to. I kam kontaktuar pasi kam qenë edhe vet në pjesën veriore të Kosovës, i kam pa, por nuk kemi mundur të bëjmë asgjë”, thotë Syla.

Qasja e institucioneve të Kosovës në pjesën veriore, të banuar me shumicë serbe, është e kufizuar për shkak të funksionimit gjysmë-paralel karshi Qeverisë në Prishtinë të këtyre komunave, dhe afërsisë që kanë me Serbinë e cila ushtron ndikimin dhe kontroll politik në atë pjesë.

Operimi i kompanisë ‘Nish Petrol’, në veri të Kosovës, vlerësohet se përbën shkelje të embargos së Kosovës ndaj Federatës Ruse. ‘Nish Petrol’, është në pronësi të kompanisë Ruse ‘Gazprom Neft’, e cila është në listën e kompanive të ndaluara në Kosovë.

Qeveria e Kosovës në vitin 2014, kishte vendosur sanksione ndaj Federatës Ruse. Në vendimin e Qeverisë së Kosovës ishin listuar një numër i kompanive dhe personave të cilëve në mënyrë specifike u është ndaluar biznesi në Kosovë.

Telegrafi,  23.10.2017