info@energjia.al

Kompania italiane e gazit, “Snam”, do të investojë 270 milionë euro për gazsjellësin  Trans-Adriatik. Këto investime përfshihen në planin 2017-2021 të kompanisë.

“Snam” është një ndër kompanitë më të mëdha aksionere të gazsjellësit Trans-Adriatik, në masën 20%, së bashku me “Socar” dhe “British Petroleum”.

Në total, kompania do të investojnë 5 miliardë euro në harkun e 5 viteve të ardhshme, dhe 4.7 miliardë do të shkojnë për të zhvilluar më tej rrjetin e gazit në Itali. 270 milionë euro ndërkohë do të shkojnë për gazsjellësin.

Diçka të tillë e bën të ditur vetë kompania nëpërmjet një njoftimi për shtyp, ku detajohen edhe investimet. “Tap”, do të jetë në fokus të investimeve të kompanisë jashtë Italisë.

Kompania njofton gjithashtu se, së fundmi është arritur një marrëveshje me “Tap”, në vlerën e 50 milionë eurove. “Snam”, në bazë të kësaj kontrate do të asistojë gazsjellësin me infrastrukturë në rrjetin detar dhe tokësor në Itali. Kjo kontratë përfshin edhe infrastrukturën gazsjellësit që do të bëjë lidhjen e Shqipërisë me Italinë.

Në Itali, gazsjellësi shtrihet në vetëm 8 kilometra, ndërkohë që në detin Adriatik ka një shtrirje prej 107 kilometrash. Kështu që pjesa dërrmuese e investimit do të shkojë për të ndërtuar gasjellësin në detin Adriatik.

Scan Tv  07.03.2017

Komisioni Evropian ka miratuar gjatë ditës së djeshme një investim të Hungarisë, i cili mbështetet nga Rusia, për ndërtimin e dy reaktorëve bërthamorë pranë Brukselit.

“Ky investim prej 12,5 miliardë euro, i financuar deri në 80 për qind nga një kredi ruse, konsiderohet si një ndihmë shtetërore, por qeveria hungareze mori angazhime të rëndësishme për të kufizuar devijimet e mundshme të konkurrencës”, sqaroi Komisioni Evropian në një deklaratë.

Komisioni Evropian ka hapur një hetim gjatë vitit 2015 në lidhje me këtë projekt i cili është kontestuar nga opozita në vendi pasi është dhënë pa tender. Hetimi ka patur si objektiv të zbulonte nëse ishte i vlefshëm në planin ekonomik dhe në përputhje me rregullat ekzistuese evropiane në fushën e konkurrencës.

Nga ana tjetër Kremlini ka reaguar duke e quajtur këtë hetim si një “burokraci administrative”.

Shqiptarja.com  07.03.2017

Projekti i gazsjellësit Trans Adriatic Pipeline duket se gjithnjë e më shumë po tërheq vëmendjen e institucioneve financiare ndërkombëtare. Pas Bankës Europiane për Rindërtim dhe Zhvillim duket se është radha e BEI-t (Bankës Europiane të Investimeve) që të shfaqë interes për të kredituar ndërtimin e projektit. Është drejtoresha për Europën Juglindore në BEI Flavia Palanza e cila ka konfirmuar lajmin pas takimit që u zhvillua me drejtorin e përgjithshëm të projektit të Korridorit Jugor të gazit.

Sipas drejtuesve, BEI ka në plan të financojë projektin TANAP dhe TAP.  “Ne jemi të vetëdijshëm për rëndësinë e këtyre projekteve dhe kjo do të mbahet në konsideratë kur do të merret vendimi final për operacionin financiar’, tha Palanza.

Sipas saj, Banka Europiane e Investimeve ende nuk e ka vendosur shifrën finale, por mendohet se ajo do të jetë në rreth 2 miliardë euro.

Në mesin e vitit 2016 ishte drejtori për Energjinë në BERZH, Riçardo Puliti, i cili deklaroi se banka po shihte mundësinë për të grumbulluar një hua prej 1.5 miliardë eurosh për këtë projekt, nga të cilat 1 miliard do të duhen të merren nga institucionet e tjera dhe pjesa tjetër (500 mln euro) do të sigurohet nga vetë BERZH.

Kjo do të ishte huaja më e madhe që BERZH do të mund të siguronte.

Gazsjellësi TAP, që do të shtrihet në një gjatësi 870 kilometër, do të lidhet me gazsjellësin Trans Anatolian Pipeline (TANAP) në kufirin turko-grek. Kapaciteti fillestar do të jetë 10 miliardë metër kub gaz natyror në vit, për të arritur në 20 miliardë metër kub.

Revista Monitor,  07.03.2017

Fairphone është një kompani që ndërton dhe projekton smartphone ekologjikë, ose më mirë me një ndikim të vogël në mjedis gjatë realizimit të pajisjes. Gjatë Mobile World Congress 2017 në Barcelonë, shoqëria deklaroi se dëshiron të realizojë edhe ora apo kompjuterë tërësisht “të gjelbër”.

Fairphone 2 është një smartphone që përdor materiale që nuk ndotin mjedisin. Dizajni është projektuar në mënyrë të tillë që t’i bëjë më të lehta riparimet dhe zëvendësimet duke shmangur shpërdorimet. Bas van Abel, CEO i kompanisë, konfirmoi se Fairphone dëshiron të vijojë rritjen për të prodhuar edhe Fairlaptop dhe Fairëatch. Natyrisht të dyja të realizuara me një impakt të vogël në mjedis dhe me materiale të riciklueshme.

Po sipas Van Abel, suksesi i kompanisë në të ardhmen do të vijë pikërisht nga vlera e saj e shtuar: qëndrueshmëria. Krijimi i pajisjeve që jetojnë më gjatë apo që mund të riparohen lehtësisht, të realizuar me materiale të ndryshme dhe me konsum të ulët do të jetë shumë shpejt një prerogativë. Kjo sepse, sipas Fairphone, konsumatorët do të jenë gjithnjë e më shumë të vëmendshëm ndaj pasojave të pajisjeve elektronike në mjedis.
Faiphone nuk do t’i mjaftojnë kompjuterët dhe orët inteligjente për të konkurruar Apple apo Samsung, por një gjë është e sigurt, sa më shumë të përhapen këto lloj pajisjesh, do të rritet edhe numri i përdoruesve që do të blejnë vetëm smartphone, tablet dhe kompjuter miqësorë ndaj mjedisit.

Revista Monitor,  07.03.2017

Çmimet e naftës së papërpunuar shënuan rënie ditën e sotme.

Treguesit referencë për naftën e papërpunuar europiane, Brent, ranë me 11 cent ose 0.2 për qind dhe u tregtuan me 55.90 dollarë për fuçi.

Treguesit referencë për naftën e papërpunuar amerikane, WTI, ranë me 5 cent ose me 0.1 për qind dhe u tregtuan me 53.15 dollarë për fuçi.

Kërkesa për naftë do të rritet gjatë pesë viteve të ardhshme, duke kalaur shifrën prej 100 milionë fuçish në 2019 dhe duke iu afruar 104 milionë fuçish gjatë 2022, e kryesuar nga ekonomitë e vendeve në zhvillim.

Revista Monitor,  07.03.2017

Pavarësisht kërcënimit të Shoqatës së Hidrokarbureve për pezullim të shitjes së naftës dhe benzinës nëse vendosen të tarifa të shtrenjta riliçensimi për pikat e karburanteve, Ministria e Energjisë shprehet e palëkundur se tarifat e reja do të vihen.

Dritan Spahiu, thotë në një intervistë për Televizionin Klan, se për këtë çështje qeveria dhe bashkitë janë të hapura të gjejnë një konsensus me shoqëritë e karburanteve, por për të nuk ka kuptim që në fuqi të jetë tarifa e vitit 2002.

Rritja e kostove për tregtarët e karburanteve dhe transferimi i i tyre në rritjen e çmimit për konsumatorin fundor, pranohet edhe nga ministria, por ata thonë se nuk ka kuptim që një pikë karburanti të paguajë një shumë prej 100 mijë lekësh, kur aktiviteti ekonomik i tij është shumëfish më i madh.

Gjykata Kushtetuese rrëzoi një vit më parë tarifën që vendosi Këshilli i Ministrave prej 5 milion lekësh të rinj për karburantet në Tiranë dhe 3 për ato në rrethe.

Tashmë ministria e Energjisë kërkon që tarifa të ulet në 3 milion për kryeqytetin dhe 1 milion për karburantet jashtë tij. Këtë proces çdo pikë e bën njëherë në 5 vite. Sot në Shqipëri ka 1400 pika karburantesh, nga 300 që ka nevojë tregu.

Tv Klan,  06.03.2017