info@energjia.al

Këshilli i Ministrave ka miratuar ligjin e ri për zonat e mbrojtura që sjell një serë risish në aspektin e përcaktimeve ligjore por edhe detajon penalitetet për rastet e dëmtimit të tyre. Por çfarë do të ndodhë me ata që ushtrojnë veprimtari në këto zona?

Ligji i ri përcakton se “personat fizikë e juridikë, që kanë fituar të drejta të ushtrojnë veprimtari të caktuara në zonat e mbrojtura, duke lidhur marrëveshje, kontrata apo janë pajisur me leje mjedisi për to, do të vazhdojnë t’i kryejnë normalisht veprimtaritë, për derisa ato nuk ndalohen shprehimisht nga ky ligj apo nuk vijnë haptas në kundërshtim me të”. Por ligji i ri përcakton gjithashtu edhe raste të “modifikimit” të marrëveshjeve, pavarësisht se subjektet mund të jenë të pajisur me leje mjedisore.

“Kur ky ligj e ndalon shprehimisht një veprimtari të pajisur me leje mjedisi apo kur ajo vjen haptas në kundërshtim me kërkesat e këtij ligji, brenda tre muajsh nga hyrja e tij në fuqi, AKZM-ja njofton zyrtarisht subjektin të mbyllë veprimtarinë për arsye ligjore dhe të rehabilitojë mjedisin ku është ushtruar veprimtaria” shkruhet në projektligj.

Kur vërtetohen raste të tilla, fillimisht subjekti mund t’i paraqesë Agjencisë Kombëtare të Zonave të Mbrojtura, brenda tre muajsh nga njoftimi, “propozimet e tij për mundësinë e ndryshimit të vendit ku mund të ushtrohet veprimtaria, për përmirësime të domosdoshme teknologjike, për zvogëlim kapacitetesh, për ndryshim të lëndëve të para apo të energjisë, me qëllim që veprimtaria të bëhet e pranueshme dhe mund të vazhdojë të ushtrohet”.

Kur propozimet e subjektit nuk mund të pranohen, atij i lihet gjashtë muaj deri në një vit kohë për ta hequr veprimtarinë dhe për të bërë rahabilitimet e kërkuara me shkrim nga AKZM-ja. Nëse subjekti nuk kryen ato që i kërkohen dhe nuk respekton afatet, ai kualifikohet dëmtues i zonës së mbrojtur dhe përgjigjet sipas legjislacionit në fuqi, raporton SCAN.

Sa i përket penaliteteve, në rastet kur nuk përbëjnë vepër penale, ligji i ri parashikon se:

-Për ndotjen dhe dëmtimin e zonës së mbrojtur nga shkarkimet mbi normë të veprimtarive që zhvillohen jashtë zonës, por në afërsi të saj, subjekti dënohet me gjobë nga 100 000 deri në 300 000 lekë.

-Për zhvillimin në zonë të veprimtarive që nuk janë pajisur me leje mjedisi, subjekti dënohet me gjobë nga 1 000 000 deri në 2 000 000 lekë;

-Për mospërmbushje dhe mosrespektim të kërkesave, parimeve dhe kushteve të lejes përkatëse të mjedisit sipas parashikimeve të këtij ligji, subjekti dënohet me gjobë nga 500 000 deri në 1 000 000 lekë.

-Për dëmtim të zonave të mbrojtura nga pronarët e pasurive private që ndodhen brenda zonës, subjekti dënohet me gjobë nga 50 000 deri në 80 000 lekë.

-Për dëmtim të zonave të mbrojtura nga përdoruesit e zonës, me gjobë nga 50 000 deri në 80 000 lekë.

Krahas dënimit me gjobë Inspektorati i Policisë Pyjore dhe administrata e zonave të mbrojtura mund t’i propozojnë ministrit heqjen e lejes së mjedisit dhe mbylljen e të gjithë veprimtarisë apo të pjesëve të saj përgjithmonë ose për një kohë të caktuar, referuar ligjislacionit në fuqi për lejet e mjedisit.

Scan Tv,  20.04.2017

Për shkak të punimeve që po kryhen në disa nënstacione, OSHEE ka njoftuar se do të ketë ndërprerje të energjisë elektrike në Tiranë.

Përmes një njoftimi Operatori i Shpërndarjes së Energjisë Elektrike, OSHEE, njofton se për shkak të punimeve të planifikuara më datën 24 mars, në nënstacionin “Traktora”, do të ketë ndërprerje të energjisë elektrike nga ora 00:00 deri në orën 05:00. Për pasojë do të mbeten pa energji elektrike këto zona:

“Rruga “Ali Demi”, rruga “Hasan Sufa”, zona pranë ish Ndërtim Miniera, rruga “Gani Domi” , pallatet pranë Maternitetit të Ri, zona pranë spitalit Iranian, rruga “Qemal Stafa”, rruga “Sadik Petrela”, rruga “Telendini”, rruga “Ali Baushi”, rruga “Ramiz Treni”, rruga “Alibal Basha”, rruga “Ali Demi”, rruga “Shemsi Haka”, rruga “Mihal Grameno”, rruga “Petro Nini Luarasi”, rruga “Mustafa Lleshi”, rruga “Qamil Guranjaku”, zona pranë ish Artistikes, zona pranë Xhamisë Xhura, rruga “Aleksandër Moisiu”, rruga “Bajram Curri”, rruga “Vangjel Capo”, Fresku, zona e Teleferikut, rruga “Idriz Dollaku”, rruga “Sali Nivica”, rruga “Zonja Curre”, rruga “Shyqyri Ishmi”, rruga “Fatmir Haxhiu”, rruga “Mustafa Matohiti”, rruga “Lek Dukagjini”, rruga “Ismail Qemali”, pallatet përballe Fushës së Sportit “Ali Demi”, rruga “Hodo Beg”, zona pranë ATSH, rruga “Xhorxh Bush”, rruga “Xhorxh Martin”, rruga “Murat Toptani”, Privat/ Albace Shoes, Privat / Chatolinza.”,thuhet në njoftim

Ndërkohë po sot për shkak të punimeve që po kryhen në linjën 35kv L30-32 Shkozet – Durrës, janë pa energji elektrike disa zona në Durrës si: Fshatit Rinia, Bishti i Pallës, zona e Spitallës, zona e ish-Kënetës, zona e Nish Kimikes (Durrës), zona e Burgut, Peshkimi, Pastrimi Detar, Reparti 30-20, Fabrika e Kartonit, Hidrovoret.

Scan Tv,  21.03.2017

Korporata Energjetike e Kosovës (KEK) ka theksuar se me vendimin e qeverisë së Republikës së Kosovës për shpalljen e asaj zone “Zonë e Interesit të Veçantë Ekonomik” janë obliguar MMPH-ja dhe Kuvendi Komunal i Obiliqit të zbatojnë këto vendime, respektivisht, ndalimin e ndërtimeve apo mbindërtimeve të reja.

Në këtë drejtim KEK-u është njoftuar nga inspektorati i MMPH-së se sot do të ndërmerret një aksion për ta zbatuar ligjshmërinë konforme vendimeve të qeverisë, me çast ne fushën nga e cila duhet te furnizohen Termocentralet ekzistuese me qymyr , janë demoluar disa themele të sapo ndërtuara.

Në bazë të Ligjit për shpronësim dhe Kornizës së Politikave të Zhvendosjes, për këtë fushe të përfshirë në zonën e interesit të veçantë, me datë: 24 Tetor, 2016 është shpallur e ashtuquajtura data e prerjes (“cutt off date”), pas së cilës  datë çdo veprim i ndërmarr rreth ndërtimeve te reja konsiderohet veprim ilegal.

Për më tepër ndërtimi i objekteve ilegale në këtë zonë sipas KEK edhe vite më parë ka dëmtuar buxhetin e vendit dhe të KEK-ut, por edhe të qytetarëve duke ndikuar ne  mënyrë te drejtpërdrejtë në tarifat e energjisë elektrike. Prandaj, KEK-u përkrahë çdo nismë të institucioneve vendore në zbatimin e ligjshmërisë.

Për më shumë, ne zonën e zgjerimit te mihjes sipas licencës,  KEK-u së bashku me palët tjera të interesit është duke zbatuar standardet më të mira që janë të ndërlidhura me zhvendosje dhe asnjë qytetar i vetëm legjitim nuk do te dëmtohet nga ky proces përkundrazi do të ketë përfitime më të larta të cilat janë të parapara me standardet e cekura me lartë.

Në këtë vazhdë, KEK-u fton të gjithë banorët që të mos  shpenzojnë mjete sepse do të ndeshen me zbatimin  e ligjit,  gjithashtu mos të lejojnë as të ndërtohet në pronat e tyre.

Njeherit KEK-u falenderon inspektoriatin e MMPH –se dhe inspektoriatin  e Komunës se Obiliqit  per aksionin e sotem lidhur me zbatimin e ligjshmërisë ne kete zone.

Telegrafi,  08.03.2017

Investimet në rrjetin e shpërndarjes së energjisë elektrike kanë bërë që zonat e thella të mos kenë më probleme të furnizimit me energji edhe gjatë dimrit, kur për shkak të motit të keq problematikat janë të shtuara.

“Janë ndërtuar 8 kabina të reja me vlerë 34 mln lekë të reja, janë vendosur 240 shtylla dhe 90 km kabëll”, ka deklaruar Ardian Çela, administrator i OSHEE-së.

Vetëm dy vite më parë fshatra të thella të Librazhdit, si Kostenja, Orenja, Qafë Dardha, Gurakuqi e Sopoti vuajtën për një kohë të gjatë mungesën e energjisë elektike për shkak të defekteve të shkaktuara nga moti i keq, por edhe rrjeti i amortizuar.

“Është rasi më i mirë për t’u vlerësuar Bashkia Librazhd dhe Bashkia Prrenjas, si dy bashki ku abonentët shlyejnë detyrimet ndaj kompanisë dhe ajo ua kthen pagesën me investime në rrjet”, deklaroi deputeti Taulant Balla.

“Për shkak të shtrirjes gjeografike që Librazhdi ka, ne e kemi shumë të nevojshme që këto investime të vazhdojnë”, tha më tej Kastriot Gura, kryetar i Bashkisë Librazhd.

Nga këto investime kanë përfituar rreth 10 mijë abonëntë të Bashkisë së Librazhdit, kryesisht të fshatrave të thella. Bëhet fjalë për investimet e para në këto zona pas 40 vitesh.

Top Channel,  15.12.2016

Shtabi Qëndror vazhdon me planin e gadishmerise, per të garantuar furnizim të pa ndërprerë me energji elektrike të konsumatorëve. Në gjithë territorin sipas Drejtorive Rajonale, funksionojne grupet e gadishmërisë të OSHEE sh.a për ndjekjen e regjimit të punës së rrjetit shpërndarës, lokalizimin e difekteve dhe marrjen e masave per likuidimin e avarive ne rrjetin shperndares TL/TM/TU që furnizojnë: Spitalet, Hidrovoret, Objektet e rëndësisë së veçantë administrative, etj, të gjithë konsumatorët, deri tek konsumatori më i fundit.

Në sajë të ndërhyrjeve në terren është bërë e mundur që të ulet në 76 numri i fiderave të stakuar. Janë provokuar stakime dhe difekte në rrjetin shpërndarës ajror të zonave Vlorë, Durrës, Fier për shkak të erës me shpejtësi tej normave teknike.

Grupet e OSHEE-së Tiranë vazhdojnë punën për riparimin e difektit të shkaktuar në fiderat 27 dhe 28 të Nënstacionit Kashar të cilët janë jashtë punës pas dëmtimit të Urës së Logut pranë Institutit Bujqësor Kamëz.

Për sa i takon linjave të tensionit të lartë ekziston një situatë problematike në nënstacionin e Kuçit pasi linja 35 kV Smokthinë-Kuç është stakuar për shkak defekti. Zona e prekur Kuçi dhe Kallarati. Ndërkaq, problem ka dhe në nënstacionin Vojnik ku kanë dalë jashtë punës fidrat 10 kV të këtij nënstacioni. Në nënstacionin e Shijakut ka një situatë problematike çka ka lënë pa energji disa fidera.

Rajonet më të prekura nga difektet janë:

Rajoni Tirane: Zall Bastar, Shënmeri, Vorë pjesërisht, Kamëz pjesërisht, Shupal, Mullet, Paskuqan, Valias, Shkoze, pjesërisht Kombinat, Rinas, Ibë, Vorë, Kashar.
Rajoni Durres: Halil, Fushë Krujë, Borizanë, Gose, Spitallë, Ferme Xhafzotaj, Manskuri, Karpen.
Rajoni Elbasan: Pjesërisht Stravaj, Orenjë, Bradashesh, Funar, Tregan, Shalës, Kajan, Shushicë, pjesërisht Lunik, Shezë/Peqin
Rajoni Berat: Potom, Çepan, Backë, Kreshovë, Lepan, Leshnje, Gjorgovë, Tomorrice/Skrapar, Fshatrat: Krorëz, Stacioni Pompave, Dobrushe, Poshnjë/Kuçovë, Ardenicë, Komuna Kolonjë.
Rajoni Korce: Pojan, Liqenas
Rajoni Fier: Levan, Sheq i madh, Daullas, Fier, Mbrostar, Roskovec, Kallm, Fermë, Pjesërisht Ballsh, Drizë, Cakran, Lagja Apolonia, Komuna Qendër , Lagja 11,
Rajoni Gjirokaster: Kalivaç, Suke, Petran, Kosinë, Dragot, Krahës, Maricaj, Zagori
Rajoni Kukes: Shenmri, Tobel, Lusen. Shishtavec, Orgjioste,
Rajoni Shkodër: Berdicë, Kallmet, Velipoje.
Rajoni Burrel: Komsi, Skuraj Kurdari, Rrëshen.
Rajoni Vlorë: Xhuherinë, Trebklove, Gorisht, Brataj Amonic, Kallarat.
Rajoni Dibër/ Fshatrat: Dovolan, Erebar, Greve, Gradec, Kovashic Kom.Maqellare; Melan, Porinar, Trepçe, Treve, Kom. Melan, Bllade Eperme dhe Poshteme, Burrim, Çernene, Hodol,
Kerçisht, Kllopçisht, Maqellare, Pesjak, Vojnik.

Grupet e gadishmerise po punojnë për riparimin sa më shpejt të difekteve. Në disa rajone fidrat janë stakuar për masë sigurie që kryesisht janë fidra rurale dhe rurale të thellë.

enetgjia.al  10.11.2016

Përmirësohet situata e furnizimit me energji elektrike
Moti i keq, avari në zonat rurale, shpejtësia e erës 48 km/h

Operatori i Shpërndarjes së Energjisë Elektrike, OSHEE, po ndjek me vëmendje situatën e krijuar në rrjetin e shpërndarjes për shkak të motit të keq me reshje intensive të shiut që ka përfshirë mëngjesin e sotëm.

Nga informacioni i Shtabit Qendror të Divizionit të Shpërndarjes, deri në orën 20.30, (datë 8/11/2016), kemi një përmirësim të situatës të furnizimit me energji elektrike, pasi defektet janë reduktuar me 85% (nga raportimi i mesditës 12.00).

Pasdite, zona më e prekur është ajo e Vlorës, për shkak të përkeqësimit të motit, i cili është shoqëruar me rritje të konsiderueshme të erës. Përmirësim të ndjeshëm ka patur me furnizimin me energji në zonën Korçë.

Sakaq, fiderat 27 dhe 28 të N/stacionit Kashar janë jashtë pune për shkak të dëmtimit te urës së Logut në zonën pranë Institutit Bujqësor Kamëz (foto atach). Kjo gjë ka ardhur për shkak të rritjes së nivelit të ujit lumit në këtë zonë dhe dëmtimit të urës. Aktualisht, brigadat e OSHEE janë në terren, duke vendosur shtylla të reja, dhe parashikohet të punohet gjatë gjithë natën! (foto atach)

Në Shkodër, punonjësit e OSHEE kanë përdorur varkat për transportimin e bazës materiale dhe forcës punëtore për rregullimin e defektit në fidrin 4. (foto atach)

Defektet janë kryesisht ne zonat rurale, ku koha e keqe dhe terreni i thyer e ka rritur shkallën e vështirësisë së riparimit të defekteve. Era në këto zona ka fryrë me shpejtësi mbi normat e lejuara 24 – 48km/h. Me përmirësimin e motit dhe uljen e shpejtësisë së erës do të rikthehet energjia në zonat që furnizohen nga fidrat e stakuar për masë sigurie.

Rreth 1500 punonjës të organizuar në brigada ndodhen në terren për riparimin e defekteve.
OSHEE njofton se fidrat që furnizojnë spitalet, hidrovorët, objektet e pushtetit qendror, vendor dhe konsumatorë të rëndësisë së veçantë janë të gjithë në punë.

Zyra e Shtypit në OSHEE ka publikuar sot pasdite hartën me kontaktet e dispeçerëve për secilën rajon si dhe numrin call center.

energjia.al  10.11.2016

Industria e hidrokarbureve ka shkaktuar ndotje të rënda në gjithë zonat naftëmbajtëse të vendit. Por një studim i Agjencisë kombëtare të Mjedisit zbardh gjashtë zona ku kjo ndotje ka shkaktuar tashmë toksikimin e tokës në nivele të rrezikshme deri 10 fish më të larta se normat e lejuara. Raporti i Agjencisë për vitin 2015 konkludon se “përmbajtja hidrokarbureve në tokë në zonat Zharrës, Kuman, Patos, Portës, Rruzhdie dhe Frakull janë mbi normat e lejuara nga BE dhe tokat e tyre jane toksike”. Përmbajtja e hidrokarbureve në të gjithë zonën e Zharrës paraqitet e lartë. Duke krahasuar vlerat e matura për këtë tregues, të cilat variojnë nga 200-1000 mg/100 gr tokë të thatë, me limit e lejuar në tokë (i cili është 100 mg/100 gr tokë të thatë), konkludohet se përmbajtja e tyre në tokat e kesaj zone vlerësohet toksike. Niveli i hidrokarbureve në zonën e Patosit luhaten në kufijtë 150-750 mg/100 g tokë të thatë duke bërë që edhe në këto toka nivelet e hidrokarbureve të konsiderohen toksike. Rezultatet e analizave në zonën e Portës tregojnë për vlera të larta të përmbajtjes së hidrokarbureve që shkojnë nga 110-700 mg/100 g tokë të thatë. Këto nivele flasin për toksicitet më të ulët se tokat e Zharrës dhe Patosit, por edhe në këtë rast ndotja nga hidrokarburet paraqitet problematike. Vlerat e matura për hidrokarburet në zonën e Rruzhdies përfshihen në intervalin 90-450 mg/100 g tokë të thatë, i cili konsiderohet toksike dhe mbi kufirin kritik të BE.

Shqiptarja.com  05.09.2016

OSHEE ka përfunduar instalimin e 71.000 matësave të energjisë elektrike për konsumatorët që deri më tani paguanin përmes faturimit aforfe.

“Kjo do të thotë që nga leximet e konsumeve për korrikun, për të gjithë abonentët nuk do të aplikohet më koncepti i aforfesë”, deklaron Albana Ferraj, drejtoreshë e Divizionit Tregtar pranë OSHEE.

Por nga ky numër, rreth 2.500 matësa në Shkodër, Lezhë, Fushë Krujë dhe Librazhd nuk janë ende funksionalë për shkak të problematikës që sipas OSHEE paraqet rrjeti i energjisë në këto zona.

Operatori thotë se deri në përfundimin e investimit në rrjet për këta konsumatorë do të aplikohet tarifa sipas një vlere referuese që do të përcaktohet nga ERE.

“Në zonën e Niklës do të kryhet investimi në nënstacion dhe do të futet në normalitet, meqë kjo është zonë e karakterit rural. Ndërsa për zonat rurale të thella OSHEE ka nisur porosinë speciale për prodhimin e matësave që do të plotësojnë parametrat e nivelit të tensionit që është aktualisht”, deklaron Petraq Lika, drejtor i Divizionit të Shpërndarjes.

Operatori sqaron dhe si do të kryhet faturimi për rastet kur një pjesë e konsumit mujor është kryer pa matës dhe pjesa tjetër me matës.

“Është e vështirë ta shprehim në një faturë të vetme ndaj e kemi ndarë në dy pjesë dhe abonentëve do t’u shkojnë dy fatura në shtëpi, një për ditët pa matës dhe një për ditët me matës, që është dhe më e thjeshtë për ta kuptuar”, sqaron Ferraj.

Top Channel,  09.07.2016

Kontrolli i Lartë i Shtetit në një audit të këtij viti ka zbuluar se Agjencia Kombëtare e Zonave të Mbrojtura (AKZM) përveç rasteve të parashikuara në ligj si për qëllime pushimi, argëtimi, për mbarështimin e florës dhe faunës së egër, për gjueti, turistike etj., ka lidhur kontrata në zonat e mbrojtura me subjekte private për gurore, për prodhim materialesh inerte në karrierë, për impiante uji të pijshëm, për ndërtime HEC-esh, për nxjerrje mineralesh, vendosje antenash, të cilat janë lidhur nga DSHP në kundërshtim me ligjin Ligjit nr. 8906, datë 06.06.2002 “Për zonat e mbrojtura” i ndryshuar.

KLSH referon se, vetëm në Qarkun e Gjirokastrës janë lidhur tre kontrata 10 vjeçare dhe një kontratë 1 vjeçare me subjektin “Hidro Energia Pulita” shpk dhe dy kontrata 10 vjeçare me subjektin “Langarica & Energy” shpk, të cilat i shërbejnë ndërtimit të HEC -ve “Gostivisht”, “Langarica 3”, “Ura e Dashit” dhe ndërtimit të linjës elektrike që lidh HEC me rrjetin kryesor të Përmetit.

Këto kontrata janë dhënë në zonë të mbrojtur “Zonë e përdorimit të qëndrueshëm”, të “Parkut kombëtar” të ekosistemit natyror bredhi i Hotovës-Dangëlli me sipërfaqe të zgjeruar”. Në këtë zonë përfshihen habitate, pyjore e kullosore, pothuajse përreth zonës qendrore, për të cilën ajo shërben si zonë buferike

KLSH kërkon nga AKZM te merren të gjitha dosjet e HEC-ve dhe të ndiqet në mënyrë të vazhdueshme monitorimi i aktiviteteve të HEC-eve në Zonat e Mbrojtura, në drejtim të zbatimit rigoroz të detyrimit të mbjelljes së numrit të pemëve të përcaktuara në kontratë. Nga AdZM-të dhe AKZM të studiohet potenciali mbajtës për aktivitete të biznesit në zonat e kategorisë së V-të dhe VI-të, si dhe të monitorohet në mënyrë rigoroze sasia e marrjes së ujit për devijim për
prodhim energjie dhe lënies së prurjes ekologjike prej 33 % në dobi të vetë sistemit ekologjik.

Ndërtimi i veprave të reja pavarësisht projekteve në miratim në zonat e kategorisë iI-të-III dhe iV-të, si dhe në shkallën e i-rë dhe të iI-të (rasti Valbonë, Bencë, Osum dhe Korab), të jepen VNM sipas përcaktimit të akteve ligjore dhe nënligjore në fuqi.

Nga AKZM në kuadrin e përmirësimeve ligjore, të shprehet specifikisht në ligjin për zonat e mbrojtura, që në kategoritë iI,III për të gjitha shkallët e mbrojtura, për kategorinë iV për shkallën e parë dhe të dytë të mbrojtjes dhe për kategorinë V për shkallën e parë të mbrojtjes, të jetë e ndaluar ndërtimi i veprave si HEC-e, miniera, gurore dhe të tjera, që referuar veprimtarive të tyre të vërtetuara nga praktikat e deritanishme, sjellin dëme të mëdha në sistemin shëndetësor, natyror dhe human të zonës përkatëse.

Përmirësimet ligjore dhe zbatimi i sanksioneve duhet të sigurojnë një mbrojtje efikase për zonat e mbrojtura, duke mos lejuar veprimtaritë që shkaktojnë ndryshimin e gjendjes natyrore të ekosistemit në to. AKZM, në mënyrë të menjëhershme duhet të bashkëpunojë me AKMnë dhe MM, për të qartësuar sa më shpejt, nëse zhvillimi i këtyre aktiviteteve është i pajisur me leje mjedisore apo jo. Gjithashtu ajo duhet të themelojë një sistem ligjor të rreptë për mbrojtjen e ZM në projektligjin e ri që është duke hartuar.

Revista Monitor,  22.06.2016

Zv.ministri i Energjisë dhe Industrisë z.Gëzim Musabelli zhvilloi sot një takim në Bulqizë me përfaqësues të bizneseve që ushtrojnë aktivitet në këtë zonë minerare dhe drejtues të autoriteteve vendore.

Në qendër të diskutimit të zv.ministrit ishin masat e marra për zbatimin e urdhrit të Ministrit të MEI-t për çështjen e zonave të rrezikshme minerare.

Z.Musabelli tha se tanimë është pezulluar dhënia e lejeve minerare në zona të përcaktuara si zonë e rrezikshme minerare. Ndërkaq, janë përcaktuar në planin horizontal në terren kufijtë e zonave të rrezikshme.

Gjatë këtij takimi u diskutua marrja e masave që zona e rrezikshme e rikompozuar e kësaj miniere të rrethohet në mënyrë të tillë që të mos kemi aksidente dhe probleme duke vënë edhe shenjat sinjaluese të zonës së rezikshme.Z.Musabelli kërkoi gjithashtu që të gjitha objektet sipërfaqësore që ndodhen në zonën e rrezikshme të abandonohen. Subjekteve minerare që operojnë në këtë zonë me aktivitetin e tyre  ju la detyrë që për zhvillimin normal të aktivitetit minerar të hapen rrugë hyrje të reja dhe krijimet e sheshit të depozitimit të mineralit të jenë jashtë kontureve të zonave të rrezikshme.

energjia.al  17.06.2016