info@energjia.al

Gazsjellësi Trans Adriatik (TAP), në një ceremoni, organizuar me 29 gusht 2017 në ambientet e Ministrisë së Brendshme, i ka dorëzuar autoriteteve shqiptare 600 fikës zjarri shpine dhe 100 uniforma zjarrduruese. Kjo është pjesë e ndihmës ofruar nga TAP për të përballuar situatën e emergjencës me zjarret në të gjithë vendin.

Në bashkëpunim dhe në koordinim me Ministrinë e Energjisë dhe Industrisë, me Ministrisë e Punëve të Brendshme dhe Emergjencat Civile, TAP ka mundur të sigurojë dhe të dorëzojë fikësit e zjarrit dhe uniformat zjarrduruese në një kohë shumë të shkurtër. Këto pajisje do t’i japin mundësi zjarrfikëseve që të jenë më efikas për të luftuar zjarret dhe njëkohësisht pa rrezikuar veten. Fikësit e shpinës dhe uniformat zjarrduruese po shpërndahen në të gjithë territorin e Shqipërisë për t’ju përgjigjur emergjencës.

Të pranishëm në ceremoni ishin përfaqësues të Ministrisë së Punëve të Brendshme, Ministrisë së Energjisë dhe Industrisë, përfaqësues nga Emergjencat Civile, Zjarrfikësit, Policia e Shtetit, Forcat e Armatosura, Shërbimi Pyjor, etj.

Drejtori i TAP për Shqipërinë, Shkëlqim Bozgo, në këtë ceremoni u shpreh se: “Të gjithë ne në TAP, ashtu si çdo qytetar tjetër i Shqipërisë, po ndjekim me shumë shqetësim përmasat që po marrin zjarret në vend duke shkatërruar sipërfaqe pa fund me pyje dhe, në disa raste, duke rrezikuar edhe jetë njerëzore. Në vijim të marrëveshjes me Qeverinë Shqiptare, ku përfshihet edhe komponenti social, nuk hezituam për as edhe një moment për të dhënë kontributin tonë. I gjithë stafi i TAP është përkushtua maksimalisht dhe brenda dy javëve u dorëzuan të gjitha fikset e zjarrit të shpinës dhe uniformat zjarrduruese.”

Zëvendës Ministri i Punëve të Brendshme, Stefan Çipa, shprehu mirënjohjen e tij për reagimin e shpejtë nga ana e TAP për emergjencën: “Ne falënderojmë TAP që iu përgjigj pozitivisht kërkesës sonë dhe që dorëzoi këto pajisje në një kohë shumë të shkurtër. Jemi besimplotë që bashkëpunimi me TAP do të vijojë edhe në të ardhmen.”

Ndërsa Sekretari i Përgjithshëm i Ministrisë së Energjisë dhe Industrisë, Koli Bele, vlerësoi lart bashkëpunimin midis TAP dhe Qeverisë Shqiptare: “Ky është një shembull i mirë i përkushtimit të TAP në investimet sociale dhe mjedisore, si pjesë e marrëveshjes me qeverinë shqiptare. Jam i bindur që në të ardhmen do të shikojmë shumë investime sociale dhe mjedisore nga ana e TAP, sidomos pranë komuniteteve përgjatë gjurmës së gazsjellësit.”

Duke marrë në konsideratë mundësinë e lartë për zjarre gjatë periudhës së verës, TAP, në koordinim me Ministrinë e Energjisë dhe Industrisë dhe atë të Punëve të Brendshme, do t’i ofrojë autoriteteve shqiptare në një moment të dytë makina zjarrfikëse dhe ambulanca me kalueshmëri të lartë që mund të arrijnë terrene të vështira malore.

TAP është një investim afatgjatë në Shqipëri dhe ndërtimi i një partneriteti të qëndrueshëm me të gjithë aktorët lokalë është shumë i rëndësishëm. Gazsjellësi Trans Adriatik ka ofruar edhe më parë ndihmë për përballimin e situatave të emergjencave në Shqipëri. Kujtojmë që gjatë dimrit të ashpër 2016 – 2017, ku shumë fshatra u izoluan, TAP u erdhi në ndihmë rreth 1’300 familjeve duke i ofruar pako me ushqim dhe batanije.

energjia.al  31.08.2017

Operatori i Shpërndarjes së Energjisë Elektrike ka stakuar linjën L30-55/1 Koplik 220 -Vukpalaj për arsye sigurie, pasi ka rënë zjarr në afërsi të Bajzës.

Nga stakimi pa energji janë n/stacioni Koplik, Bajzë, Vukpalaj dhe dogana Hani Hotit, ndërsa për zjarrin në Bajzë kërkohet zjarrfikësja për të vendosur flakët në kontroll.

Ndërsa në Tiranë është stakuar energjia për shkak të investimit për lidhjen unazore të fidrave 333 dhe 334 te N/St Selite 20 kV duke lënë pa energji zonën pranë Kopshtit Zoologjik sot nga ora 10.00 deri ne 11.00.

Shqiptarja.com  11.08.2017

Pajisja me sistem detektues dhe autobllokues të furnizimit me gaz, sipas ekspertëve është masa urgjente që duhet të marrin restorantet, baret, por dhe konsumatorët familjarë për të parandaluar rrezikun nga gazi i lëngshëm.

“Çdo biznes duhet të ketë edhe një dedektor alarmues, që në rastin e rrjedhjes së gazit në ambientet ku përdoret, të jepet alarmi dhe punonjësit të vihen menjëherë në lëvizje për marrjen e masave të sigurisë”, tha Nako Petro, inxhinier në ISHTI.

Ekspertët e Inspektoriatit Shtetëror Teknik përsërisin edhe një herë apelin se çdo pajisje duhet të jetë e certifikuar.

Për mungesë të certifikimit dhe masave të sigurisë, 50% e operatorëve ekonomikë të kontrolluar nga Inspektoriati në zonat turistike janë gjobitur. Masa e gjobës varion nga 50 mijë deri në 500 mijë lekë.

Por, pas ngjarjes tragjike të Velipojës, Inspektoriati thotë se ka intensifikuar numrin e kontrolleve në terren dhe paralajmëron masa drastike.

“Grupet në terren janë shtuar. Ne jemi të vendosur të zbatojmë masat e sigurisë deri në heqjen e licencës”, tha më tej Nako Petro.

Top Channel,  04.08.2017

Dyshohet se një bombol gazi ka shpërthyer në një banesë në Elbasan, asfiksohet një e moshuar që ndodhej brenda.

E moshuara e asfiksuar është dërguar me urgjencë në spital ndërsa nga banesa është përfshirë nga flakët.

Ende nuk dihet gjendja shëndetësore e të moshuarës dhe rrethanat e mëtejshme të ngjarjes.

Shqiptarja.com  19.04.2017

Një ‘Fast Food’ në kryeqytet është përfshirë nga flakët mesditën e sotme.

‘Fast Food’ ndodhet në rrugën e Elbasanit. Mësohet se shkak kanë qenë disa kabllo që janë përfshirë nga flakët.

Nga zjarri nuk pati të lënduar e ndërsa raportohet për dëme të vogla materiale.

Shqiptarja.com  11.04.2017

Një zjarr ka rënë në një depo veglash në lagjen 29-Nëntori në qytetin e Vlorës.

Zjarri ka rënë në banesën e shtetasit B.H ndërsa zjarrfikësja ka mbërritur në vendngjarje për të shuar flakët.

Si pasojë e zjarrit nuk ka të lënduar ndërsa dëmet e e shkaktuara nga flakët janë vetëm materiale.

Sipas burimeve nga zjarrfikësit shkak mendohet të jetë një shkëndijë elektrike.

Shqiptarja.com  17.03.2017

Rreth orës 10:00, në lagjen “Partizani” të qytetit të Vlorës, ka rënë zjarr në një banesë.

Ngjarja ka ndodhur në rrugën drejt vendit të quajtur “Kuzum Baba”, ku është përfshirë nga flakët një banesë private, në pronësi të shtetasit I.A., 58 vjeç.

Fatmirësisht, nuk ka asnjë person të lënduar, pasi nuk kishte njeri në banesë.

Banesa po digjet plotësisht dhe rrezikohen dy banesa të tjera që ndodhen pothuajse ngjitur me banesën në fjalë.

Nga hetimet paraprake dyshohet se flakët janë shkaktuar nga ndonjë shkëndijë elektrike në banesë.

Në vendngjarje ndodhen shërbime të policisë si dhe dy shërbime zjarrfikëse të cilat po punojnë për shuarjen e flakëve të zjarrit.

Top Channel,  15.02.2017

Një shpërthim është verifikuar rreth orës 10 të paraditës së të enjtes në çentralin bërthamor të lokalitetit Flamanville të Francës.

Sipas informacioneve të ofruara nga mediat lokale, nga shpërthimi mund të ketë pasur të plagosur, ndërkohë që sipas Prefekturës së qytezës, nuk ka asnjë rrezik kontaminimi bërthamor.

Shpërthimi është verifikuar në sallën e makinerive të çentralit atomik, ku nuk ka elementë radio-aktivë. Rrjedhimisht, deklarojnë autoritetet, nuk ka asnjë rrezik bërthamor për punonjësit dhe popullsinë lokale.

Grupet e shpëtimit kanë mbërritur ndërkohë në vendin e ngjarjes dhe njësitë e zjarrfikësve kanë nisur një operacion në mbarë zonën.

Edhe zjarrfikësit kanë konfirmuar fillimisht një shpërthim dhe më pas një zjarr që ka rënë në brendësi të çentralit, por jashtë zonës nukleare.

Top Channel,  09.02.2017

Një zjarr i fuqishëm ka rënë në një kompleks në qendër të Gjirokastrës.

Ngjarja ka ndodhur në lagjen ‘’18 shtatori”, në një godinë 4-katëshe. Burime për Report Tv bëjnë me dije se nuk ka lënduar nga zjarri, por vetëm dëme të konsiderueshme materiale.

Si pasojë e zjarrit, qyteti i Gjirokastrës është pa energji elektrike. Shkak i rënies së zjarrit dyshohet të jetë bërë një masë elektrike e bërë tek aparaturat.

Zjarrfikësit kanë shkuar menjëherë në vendngjarje për të bërë të mundur shuarjen e flakëve.

Shqiptarja.com  02.02.2017

Detaje të reja janë zbuluar nga policia për zjarrin në banesë ku humbi jetën një person, në fshatin Bishnicë të Pogradecit.

Mësohet se 30-vjeçari Ilirjan Elezi ka humbur jetën për shkak të asfiksisë, ndërsa si pasojë e zjarrit në banesë mbeti e plagosur edhe nëna e viktimës. Bajrame Elezi është dërguar për ndihmë të specializuar në Tiranë.

Zjarri në banesë dyshohet të jetë shkaktuar nga një shkëndijë elektrike.

Top Channel,  27.12.2016