info@energjia.al

Një prej premtimeve të kryetarit të Prishtinës, Shpend Ahmeti ishte zgjerimi i rrjetit të ngrohjes. Por, ky premtim tashmë po mbetet i parealizuar. Në tetor nis sezoni i ngrohjes. Po në tetor mbahen zgjedhjet lokale, por nuk do të ketë shtrirje të rrjetit të ngrohjes në asnjë lagje të Prishtinës.

Dy lagjeve urbane, “Mati 1” dhe Kalabrisë i ishte premtuar se do të lidhen me Termokosin. Megjithatë, ndërmarrja komunale nuk e ka në projekt një gjë të tillë.

Zëdhënësja e Termokosit, Afërdita Uka-Fejzullahu ka thënë për Insajderin se zgjerimi i rrjetit të ngrohjes është në fazën e tretë të projektit të koogjenerimit e cila është duke u zhvilluar në bashkëpunim me Komisionin Evropian.

“Aktualisht Komisioni Evropian është duke zhvilluar procedurat tenderuese për këtë çështje. Pra, realisht këtë vit nuk do të ketë zgjerim të rrjetit të ngrohjes për lagjen ‘Kalabria’ dhe ‘Mati 1’, ka thënë Uka-Fejzullahu.

Ajo ka treguar se të gjitha detajet sa i përket zgjerimit të rrjetit do të bëhen publike pas përfundimit të këtyre procedurave, në bashkëpunim të plotë me Komisionin Evropian dhe donatorët tjerë të këtij projekti.

Kryetari i komunës së Prishtinës, Shpend Ahmeti u kishte premtuar qytetarëve se gjatë mandatit të tij qeverisës të gjithë do të lidhen me ngrohje qendrore.

“Mund të them se na pret një vit pa probleme me ngrohje, mirëpo jemi të përgatitur për të gjitha skenarët. Dua të potencojë se me kyçjen e bllokut B2 në sistemin e ngrohjes ka përfunduar faza e parë e sistemit të koogjenerimit. Tash do të vazhdojmë me fazën e dytë që do të jetë riparimi i 50 nënstacioneve në Komunën e Prishtinës. Kjo na siguron ngrohje edhe më cilësore”, kishte thënë kryetari Ahmeti.

Gjatë vitit të kaluar shumë pjesë të kryeqytetit si lagjja Kodra e Diellit, një pjesë e Katedrales dhe Universiteti procesi i ngrohjes kishte filluar me një javë vonesë.

Sezoni i ngrohjes sipas ligjit për ngrohje dhe rregulloreve të ZRRE-së, varësisht nga kushtet klimatike fillon më 15 tetor, ndërsa përfundon më 15 prill të vitit vijues.

Telegrafi,  06.09.2017

Në pritje të hapjes së tregut të energjisë dhe veçanërisht shtimit të investimeve në sektorin privat të energjisë, numri i kompanive që licencohen për prodhimin dhe tregtimin e energjisë ka ardhur në rritje.

Sipas të dhënave të  Entit Rregullator gjatë vitit të kaluar, kanë aplikuar 40 subjekte në aktivitetet e ndryshme të sektorit të energjisë elektrike dhe gazit natyror, në zbatim të kuadrit ligjor e nënligjor në fuqi.

Për 32 nga këto aplikime, Bordi i ERE-s ka vendosur licencimin e tyre, ndërsa 8 aplikime janë në proces dhe licencimi i tyre do të finalizohet gjatë vitit 2017.

ERE sqaron se për çdo aplikim janë zbatuar me korrektësi afatet e publikimit në median e shkruar të Vendimeve të Bordit të ERE-s për njohjen e të gjitha palëve të interesuara me këto Vendime. Gjithashtu çdo aplikim për licencim i është nënshtruar një analize të kujdesshme të rregullshmërisë dhe plotësimit me korrektësi të dokumentacionit ligjor, administrativ, financiar, teknik dhe marrjes së lejeve përkatëse të përdorimit të ujërave apo leje mjedisore, të dhëna nga institucionet e tjera në përputhje me aktivitetin që subjektet kanë kërkuar të licencohen.

Vitin e kaluar, ERE licencoi 11 kompani të reja në sektorin e tregtimit të energjisë. Disa prej këtyre kompanive operojnë edhe në sektorin e prodhimit, por për të maksimizuar fitimet janë licencuar edhe si tregtarë të energjisë së tyre.

ERE licencoi gjithashtu edhe 11 subjekte në sektorin e prodhimit të energjisë. Lejet e tregtimit dhe prodhimit i mori edhe “Dragobia Energy”, kompania që po ndërton HEC-et në lumin Valbonë dhe që vitin e kaluar përfshiu në një debat të nxehtë mbarë opinionin publik për dëmin që i krijon investimi një nga parqeve më të lakmuara të vendit në fushën e turizmit.

Tregut të energjisë ju shtuan edhe 7 subjekte të tjera në sektorin e furnizimit të energjisë, ndërsa dy leje të tjera u dhanë në sektorin e tregtimit dhe furnizimit me gaz natyror.

Liberalizimi i tregut

Sipas ligjit të për Sektorin e Energjisë, viti 2018 duhet t’i gjejë të gjitha bizneset në tregun privat të energjisë. Ligji detyron klientët e tensionit të mesëm të furnizohen nga privatët dhe jo nga OSHEE, që nga ky vit. Vitin e ardhshëm sipas ligjit, 40% e tregut synohet të liberalizohet në këtë mënyrë. Por procesi i liberalizimit nuk i ka ndjekur afatet ligjore pasi rregulloret dhe udhëzimet për hapjen e tregut nuk janë formuluar në kohë. Me krizën politike dhe zgjedhjet elektorale në sfond, liberalizimi nuk pritet të nisë as këtë vit, teksa afatet ligjore janë shkelur për të gjitha etapat.

Revista Monitor,  20.04.2017

Drejtoria Norvegjeze për Naftën (DNN) ka dhënë leje për të përdorur objektin në fushën e naftën Tambar në Detin e Veriut deri më 1 janar të vitit 2022.

Nga DNN theksojnë se sipas planit afati ishte caktuar në 15 vite, që skadon më 15 korrik të vitit 2016. Fusha e naftës Tambar është e vendosur në pjesën jugore të sektorit norvegjez të Detit të Veriut, rreth 16 kilometra në juglindje të fushës Ula.

Fusha ka rezervuarë edhe të naftës dhe gazit. BP Norge është operatori në fushë me 55 për qind, ndërsa Danish Dong Energy mban pjesën tjetër. Fusha Tambar është vënë në prodhim në vitin 2011 dhe është e vendosur në afërsi të linjës britanike dhe norvegjeze të demarkacionit, por të gjitha rezervat janë të vendosura në sektorin norvegjez.

Tambar mban 78 milionë fuçi të rezervave ekuivalente të naftës dhe ka 3 puse të prodhimit në këtë fushë. Prodhimi i llogaritur në vitin 2016 është 4.100 fuçi naftë në ditë dhe 111 milionë metra kub gaz.

Agjensia e lajmeve ekonomia,  11.07.2016

Në ambientet e shkollës “7 Marsi”, Drejtori i Investimeve Kapitale në Komunën e Prishtinës, Hysen Durmishi mbajti një takim me banorët e lagjes Emshir Kalabria, për ta diskutuar investimin e KEDS-it në këtë lagje.

Ditë më parë Kompania për Distribuimin e Energjisë Elektrike, KEDS, ka kërkuar leje nga Komuna që të shtrijë rrjetin nëntokësor e shpërndarjes së energjisë elektrike në tërë këtë lagje.

Komuna e Prishtinës, gjegjësisht, Drejtoria e Investimeve Kapitale ka vendosur që këtë gjë ta diskutojë me banorë, sepse janë ata të cilët do të përballen me punime në rrugë deri sa këto investime të kryhen.

Banorët njëzëri pranuan që KEDS-it ti jipet leja, porse kërkuan nga Drejtori Durmishi që të garantojë që gropat e hapura në rrugë do të mbyllen dhe rrugët do të kthehen në gjendjen e mëparshme, gjë që ai e bëri.

Vlen të theksohet se i tërë investimi kap vlerën prej 600 mijë eurosh dhe si i tillë do të garantojë furnizim shumë më cilësor me energji elektrike.

Agjensia e lajmeve ekonomia,  14.04.2016

Qiproja po zgjeron përpjekjet e saj për të krijuar një korridor të energjisë nga Mesdheu Lindor drejt Evropës, referoi Ministri i Energjisë Yiorgos Lakkotrypis.

Lakkotrypis, në Sofje, Bullgari, ku ai shoqëroi Presidentin Anastasiades në një vizitë zyrtare në vend, zhvilloi takime të veçanta të hënën me ministrin e Energjisë së Bullgarisë Temenushka Petkova dhe Ministrin e Turizmit Nikolina Angelkova.

‘Bullgaria ka një rol të veçantë në përpjekjet tona për të krijuar një korridor të ri të gazit natyror nga Mesdheu Lindor në Evropë, që lidhet ose me infrastrukturat ekzistuese ose me ato që janë planifikuar të ndërtohen’ vuri në dukje ai, sipas një njoftimi zyrtar për shtyp.

Ai tha se edhe ai edhe Presidenti diskutuan në takimet e tyre në Sofje, mënyra për të përfshirë Bullgarinë në planet e transferimit të gazit natyror nga Mesdheu Lindor në Evropë.

Ministri tha se Memorandumi i Mirëkuptimit për Energjinë nënshkruar midis Qipros dhe Bullgarisë të hënën parashikon krijimin e një grupi të përbashkët pune për të ekzaminuar infrastrukturën ekzistuese ose të planifikuar, qofshin ato tuba apo terminale LNG.

‘Qëllimi ynë është të zgjerojmë këtë grup pune për të tërhequr vendet e tjerë të përfshirë në të gjithë planifikimin’, ka thënë ai.

Revista Monitor,  24.02.2016

Në disa zona të thella të Librazhdit, moti i keq i një viti më parë shkaktoi probleme të mëdha për furnizimin me energji elektrike. Si pasojë, disa fshatra mbetën pa energji elektrike për më tepër se një muaj.

Për këtë arsye, amortizimi i rrjetit të shpërndarjes ka shtruar nevojën për investime për përmirësimin e tij. Ndërkohë, OSHEE-ja ka nisur shpërndarjen e shtyllave dhe të materialeve të tjera të domosdoshme, në mënyrë që situata e një viti më parë të mos përsëritet.

Pushteti vendor kërkoi më tepër angazhim që këto zona të thella të mos vuajnë mungesën e energjisë elektrike. Administratori i Njësisë Administrative Stravaj, Bedri Rrushi, kërkoi nga OSHEE-ja edhe elektriçistë për fshatrat e largët, pasi në raste të motit të keq kur këto zona izolohen, defektet në rrjet nuk mungojnë.

Në të njëjtën kohë, edhe deputeti i PS-së për zonën e Librazhdit, Taulant Balla, i kërkoi administratorit të përgjithshëm të OSHEE-së të marrë masa të mëtejshme, pasi Librazhdi ka zona të thella malore dhe një rrjet thuajse të shkatërruar.

Gazeta Shekulli, 24.12.2015

Grupi hungarez i energjisë MOL po vazhdon zgjerimin e tij në Slloveni duke blerë 17 stacione të benzenës Agip operuar nga filiali slloven i grupit italian Eni, raporton Slovenian Times.

Marrëveshja është subjekt i miratimit rregullator, tha MOL në një deklaratë të mërkurën.

Në përputhje me marrëveshjen, MOL do të blejë të gjitha stancionet e benzinës operuar nga Eni dhe partnerët e saj nën markën Agip në Slloveni, me të cilën ajo do të rrisë numrin e stacioneve të shërbimeve që operon në vend në 57.

MOL nuk ka zbuluar vlerën e transaksionit, por tha se u përmbyll me qëllim për të siguruar një prani në Lubjanë, ku nuk operon aktualisht stacionet e shërbimit. Agip drejton dy stacione shërbimi në kryeqytet.

Kontrolli i një pjese tregu prej vetëm nën 10% përpara blerjes, MOL do të konsolidojë vpozitën e tij esi shitësi i tretë më i madh i karburantit në vend.

Revista Monitor,  13.11.2015

Pas përfundimit​ të punëve pranverore në zgjerimin e rrjetit të ndriçimit, kanë filluar edhe punët vjeshtore e punëve të fazës së parë të zgjerimit të rrjetit të ndriçues në Komunën e Prishtinës, fazë kjo e cila përfundon në fund të vitit.

Në këtë periudhë do të zgjerohet rrjeti në 47 rrugë të Komunës së Prishtinës me një gjatësi totale prej 35545 metrash, apo mbi 35 kilometra, me ç\’rast do të vendosen 664 shtylla dhe numri i plotë i trupave ndriçues do të arrijë në 1165.

Vlen të theksohet se përveç vënies së shtyllave të reja po bëhet edhe mirëmbajtja e atyre ekzistuese si dhe po zëvendësohen poçat në poça ekonomikë, për të kursyer shpenzimet e energjisë.

Agjensia e lajmeve ekonomia,  03.11.2015

Banorët e kryeqytetit të cilët jetojnë nëpër lagjet e reja ku janë ndërtuar objekte të larta, edhe ketë vit sezonin dimrit do ta kalojnë pa ngrohje nga Termokosi.

Kjo pasi që ndërmarrja që ngrohë banoret e Prishtinës me ngrohje si duket është në gjumë sa i përket zgjerimit të rrjetit ngrohës.

Zyrtarët e Termokosit kanë thënë se kanë kërkesa për zgjerimin e rrjetit ngrohës por që në terren ende nuk kanë filluar të punojnë kur dihet se sezoni i ngrohjes fillon më 15 nëntor.

Zëdhënësja e Termokosit, Afërdita Uka, ka thënë për Telegrafin se aktualisht Termokos furnizon me ngrohje 12700 konsumatorë.

Sipas saj, planet e kompanisë janë që të shkohet me shtimin e numrit të konsumatorëve dhe me zgjerimin e rrjetit.

“Zgjerimi i rrjetit në lagje të reja parashihet të bëhet në fazën e tretë të Projektit të kogjenerimit, që do të zhvillohet nga viti 2016 e tutje. Rrjeti i ngrohjes nga Termokos është i shtrirë në një pjesë të lagjes ‘Mati1’, në të cilën lagje përkatësisht nën rrugën B, janë vendosur gypat mbrojtës të cilët do të mundësojnë depërtimin e gypave të ngrohjes në kohën kur do të paraqitet nevoja për zgjerimin e rrjetit të ngrohjes edhe për atë pjesë të qytetit. Në planet që ka ‘Termokos’ për zgjerim të rrjetit të ngrohjes është edhe lagjja ‘Kalabria’, ku tashmë ka ndërtesa që janë të kyçura në rrjetin e ngrohjes, ndërkohë që ka kërkesa edhe për kyçjen e objekteve të reja kolektive”, ka treguar zëdhënësja Uka.

Kurse për lagjen “Arbëria”, paraprakisht duhet të bëhen studime fizibiliteti për të parë sipas saj, se banorët nga kjo lagje mund të konsiderohen konsumatorë potencial.

“Planet për zgjerim të rrjetit ‘Termokos’, koordinohen me të gjitha institucionet relevante dhe donatorët”, ka thënë zëdhënësja Aferdita Uka.

Sipas saj, në krahasim me ngrohjen me mazut ngrohja me kogjenerim ka dal të jetë me kosto më të ulët.

“Përveç realizimit të Projektit të kogjenerimit, si rezultat i të cilit në sezonin e fundit ngrohës 2014-2015 janë furnizuar me ngrohje të pandërprerë dhe shumë cilësore gjithë konsumatorët tanë, në këtë sezon ngrohëse ‘Termokos’ hyn më i përgatitur se çdo sezon tjetër më parë. Kjo, për shkak se, pas përmbylljes së sezonit së fundit ngrohës, jemi kyçur edhe me bllokun 2 të TC Kosova B, gjë që rritë sigurinë e operimit nëpërmes kogjenerimit”, tha Uka.

Kurse sa i përket tarifave të ngrohjes ato caktohen nga Zyra e Rregullatorit për Energji (ZERRE).

“Gjatë vitit 2015 janë inkasuar afër 3 milionë euro apo mbi 80 për qind e faturimit prej 3.55 milionë euro”, ka bërë të ditur ajo.

Ndërkaq në Komunën e Prishtinës kanë thënë se janë duke punuar që rrjeti të shtrihet vitin tjetër edhe në lagje të reja.

Zgjerimi i rrjetit sipas tyre, pritet të bëhet me buxhet komunal dhe donacione.

“Pas kryerjes së fazës së parë, lidhjes me Termocentralet ‘Kosova A’ dhe ‘Kosova B’, në proces është riparimi i nënstacioneve, i cili po financohet nga KFW gjerman, ndërkaq për vitin tjetër jemi duke planifikuar që edhe me ndihmë nga donatorët e pjesërisht me buxhet komunal të bëhet zgjerimi i rrjetit të ngrohjes nga Termokosi, në 130 mijë MW energji termike, që do të jetë e mjaftueshme për 60 mijë banorë . Zonat që do të përfitojnë, përveç banesave ku ekzistojnë gypat, por ka nevojë vetëm për kyçje individuale janë edhe Mati dhe Kalabria”, është thënë në përgjigjet nga Zyra për Marrëdhënie me Media në Komunën e Prishtinës.

Telegrafi,  24.08.2015

Në kuadër të strategjisë së shtrirjes në tërë territorin e Kosovës të rrjetit të pikave të karburantit Italian Petrol, më datë 11.06.2015 do të hap edhe një pikë të re të karburantit në rrugën “Tirana” (në transit) në Gjakovë.

Kjo pikë e re shitëse , njëhërit do të jetë edhe pika e 17-të e rrjetit tregtar të shitjes me pakicë të Italian Petrol.

Promovimi i kësaj pike do te përcillet gjithashtu drejtpërdrejtë nga Radio Dukagjini me ç’rast 5 veta do të kenë mundësi që të fitojnë nga 10 euro mbushje karburant për veturat e tyre.

IP-KOS.shpk përfaqësuese e kompanisë italiane të derivateve IP Gruppo Api e cila nga viti 2014 ka filluar të operoj edhe në tregun kosovarë, furnizon tregun me karburante të standardit EURO5 dhe vajra motorike të kualitetit Evropian, të importuara drejtpërdrejt nga rafineritë italiane.

Telegrafi,  11.06.2015