info@energjia.al

“Virusi” që ka pushtuar këtë vit biznesin për ndërtimin e parqeve fotovoltaikë këtë herë ka në objekt zonën e Kaninës. Në një njofitm të bërë nga Ministria e Infrastrukturës dhe Energjisë jepen edhe detajet e projektit të propozuar.

Ajo që ministria ka shpjeguar herë pas herë është fakti që të gjitha këto janë kërkesa që bëhen nga biznesi por që procesi i tyre deri në një miratim final, vetëm nëse plotësohen të gjitha kushtet është shumë i gjatë. Vetëm propozimi nuk është automatikisht miratim. Gjithsesi në kushtet e dhënies prioritet të energjive nga burime të rinovueshme projektet fotovoltaikë duket se kanë disi avantazh në raport me pjesën tradicionale.

Pë rata që duan të shfaqin rezervat apo kundërshtimet e tyre është lënë një afat 15 ditor për t’i shfaqur pranë ministrisë.

Projekti në Kaninë

“Ministria bëri me dije se projekti parashikon të shtrihet  në një hapësirë mbi 22 mijë metra/katror.  Shoqëria “GEGA & MASKA”Sh.P.K. ka aplikuar për pajisjen me autorizim paraprak në bazë të Vendimit të Këshillit të Ministrave nr. 822, datë 7.10.2015 “Për miratimin e rregullave dhe procedurave të ndërtimit të kapaciteteve të reja prodhuese të energjisë elektrike, që nuk janë objekt koncesioni” i ndryshuar, për ndërtimin e një parku fotovoltaik në Zonën “Kaninë”, Vlorë me një sipërfaqe totale të projektit rreth 22,055.20 m2 ku kapaciteti i instaluar do të jetë 2 MË me një vlerë investimi rreth 1,680,588.80 Euro”

Vetëm në tetor pranë MIE kanë mbërritur mbi 11 kërkesa për parqe fotovoltaikë dhe sëbashku me këtë të Kaninës shkojnë në 12.

Revista Monitor,  26.10.2017

Operatori i Shpërndarjes së Energjisë Elektrike do të investojë 153 milionë lekë për ndërtimin e rrjeteve elektrike në Golem dhe Vlorë. Kompania ka hapur dy procedura për tenderim, përkatësisht me fondet limit 79.5 milionë lekë dhe 73.5 milionë lekë.

Projekti i rrjetit elektrik të zonës së Golemit përmban linjat e tensionit të mesëm 20kV dhe kabina transformacioni me tension 20.0.4kV. Ndërhyrja konsiderohet e domosdoshme për shkak të gjendjes së keqe teknike, të mbingarkuar dhe me humbje të larta.

Zona prej 4  km² shtrihet nga Shkëmbi i Kavajës deri në Qerret dhe përfshin rreth 12 mijë abonentë, numër që pritet të rritet ndikuar nga zhvillimi intensiv i ndërtimeve në zonën bregdetare.

Ndërkohë në Vlorë, OSHEE ka përgatitur projektin për ndërtimin e rrjetit të tensionit të mesëm, i cili përshin edhe ndërtimin e disa kabinave të transformacionit dhe rikonstruksionin e kabinave ekzistuese.

Kabinat shtesë do të vendosen në pika të caktuara, me qëllim uljen e ngarkesave.

Procedurat janë të hapura deri më datë 10 tetor, ndërsa punimet për këto projekt do të zgjasin 4 muaj nga dorëzimi i sheshit.

Scan Tv,  18.09.2017

Rreth 1000 abonentë kanë mbetur pa energji elektrike në Vlorë pasi është shkëputur linja e tensionit 35 kilovat.

Energjia elektrike mungon që prej mëngjesit të sotëm duke lënë pa drita fshatrat, Novoselë, Fitore, Aliban e Akerni.

Veç mungesës së energjisë elektrike duket se banorët vuajnë edhe mungesën e ujit, pasi nuk punojnë as pompat e ujësjellësit, ndërkohë po punohet për zgjidhjen e problemit.

Shqiptarja.com  07.09.2017

Një karburant është grabitur në orët e para të mëngjesit të së shtunës në aksin rrugor Vlorë-Babicë.

Sipas informacioneve paraprake ngjarja ka ndodhur rreth orës 02.30 ku tre persona të paidentifikuar kanë hyrë të maskuar dhe me armë zjarri në pikën e karburantit, ku kanë kërcënuar punonjësin, M.M., 60 vjeç. Ata i kanë marrë atij një sasi prej 12 mijë lekësh të reja dhe një celular.

Ndërkaq, policia ka ngritur pika kontrolli, teksa janë sekuestruar pamjet filmike në disa pika të ndryshme nga ku mund të kenë lëvizur autorët dhe vazhdon puna për identfikimin dhe kapjen e tyre.

Top Channel,  02.09.2017

Pas më shumë se një dekade mosvënieje në funksion, Termocentrali i Vlorës është rikthyer në fokusin e qeverisë.

Korporata Elektroenergjitike Shqiptare, e cila ka marrë nën administrim këtë objekt, ka vendosur të sigurojë asetet e këtij TEC-i për një periudhë 1-vjeçare.

KESH ka shpallur të hapur garën për tenderin me fond maksimal 32 milionë lekë për sigurimin e godinës dhe pajisjeve nga zjarri, rrufetë, eksplozionet, tërmetet, përmbytja dhe aksidente të tjera.

Sipas të dhënave të disponuara nga KESH, vlera totale e këtyre aseteve arrin në 8 miliardë lekë, ku pjesa më e madhe e tyre kanë nevojë për paketën e plotë të sigurimit, ndërsa një pjesë me vlerë 839 milionë lekë kanë nevojë të sigurohen vetëm nga tërmetet.

Makineritë më të kushtueshme në pronësi të TEC-it të Vlorës përfshijnë turbinën e gazit dhe gjeneratorin e fuqisë, me vlerë 2.6 miliardë lekë; gjeneratorin e avullit dhe pompat e ushqimit, me vlerë 1.2 miliardë lekë; si edhe turbinën e avullit, kondeserin dhe rigjeneruesin e nxehtësisë, me vlerë 1.1 miliardë lekë.

Gara për këtë shërbim do të mbyllet më 31 Gusht 2017 dhe fituese do të shpallet kompania e kualifikuar që ka bërë ofertën më të ulët. Fondi për pagesën e këtij shërbimi është vënë në dispozicion nga të ardhurat e vetë KESH.

Pas realizimit të gazsjellësit TAP, Shqipëria do të ketë akses në sasi të konsiderueshme gazi natyror me çmim të ulët. Synimi është që TEC-i ekzistues, përmes një investimi të konvertohet për të punuar me gaz, e kështu të prodhojë energji elektrike për nevojat e vendit.

Sakaq, investimi fillestar për këtë termocentral ka qenë 95 milionë euro.

Scan Tv,  08.08.2017

Pas arrestimit të dy personave në Tiranë e Shkodër, për lidhje të paligjshme të energjisë elektrike, OSHEE vazhdon me kontrollet në të gjithë vendin.

Në Vlorë OSHEE ka denoncuar në polici 13 raste të rilidhjes së energjisë elektrike nga debitorë të cilëve u ishte ndërprerë energjia elektrike pasi  nuk kishin kryer pagesat në kohën e duhur.

OSHEE u bën me dije abonentëve se rilidhja e energjisë mbasi është prerë nga OSHEE përbën vepër penale dhe dënohet me ligj.

Shqiptarja.com  20.07.2017

Një 38 vjeçar ka ndërruar jetë në Vlorë si pasojë e kontakt më rrymën elektrike.

Sipas policisë ngjarja ka ndodhur rreth orës 01:00, ku në lagjen “Ujë i Ftohtë”, në shtëpinë e tij shtetasi me inicialet shtetasi F.L., 38 vjeç, ka rënë në kontakt me rrymën elektrike dhe për pasojë ka ndërruar jetë.

Nga hetimet e kryera, dyshohet se ngjarja ka ndodhur nga pakujdesia pasi personi ka qenë duke ndërhyrë në një kabull elektrik.

Policia po kryen  veprimet e mëtejshme në lidhje me sqarimin e rrethanave të ngjarjes.

Shqiptarja.com  17.07.2017

Aksioni i OSHEE Vlorë në 12 orët e fundit ka regjistruar tre raste të vjedhjes së energjisë.  Dy raste janë rilidhje e paligjshme, ndërsa rasti i tretë u kap gjatë natës, pronari i një restoranti të njohur në Dhërmi duke vjedhur energji me linjë të dytë.

Referuar njoftimit të OSHEE, në 24 orët e fundit, OSHEE Vlorë ka proceduar penalisht 5 raste, ku tre janë biznese ndërtimi dhe restoranti. Aksioni është i përqendruar natën, ku konstatohet tendenca e furnizimit abuziv e i dëmtimit të linjave.

Scan Tv,  10.07.2017

Agjencia Kombëtare e Mjedisit ka dhënë muajt e fundit tre leje mjedisore ndaj tre operatorëve të ndryshëm për të ngritur në Nartë të Vlorës impiantet e depozitimit të karburanteve.

AKM i ka dhënë lejen mjedisore kompanisë Tosk Energji për shpërndarje dhe magazinimin e naftës dhe nënprodukteve të saj. Leja është dhënë për magazinimin e naftës dhe nënprodukteve të saj në një cisternë të palëvizshme në Nartë.

Gjithashtu leja është dhënë edhe ndaj kompanisë A&T për të njëjtat qëllime po në Nartë. A&T ka marrë lejen për magazinimin e naftës dhe nënprodukteve të saj në cisterna të palëvizshme.

Leja mjedisore lejon shkarkimin e naftës nga deti dhe toka, nëpërmjet anijeve ose hekurudhës.

Vis Petrol gjithashtu ka marrë leje mjedisore për magazinimin e naftës dhe nënprodukteve të saj në Nartë. Kompania ka leje edhe për shkarkimin e naftës në cisterna nga anijet dhe nga toka.

Narta është në hyrje të qytetit të Vlorës dhe përveç plazheve mahnitëse, qyteza njihet për trashëgiminë kulturore.

Laguna e Nartës përfaqëson një nga lagunat më të mëdha e më të rëndësishme të Shqipërisë. Laguna e Nartës dhe Zvërneci gjenden pak kilometra larg qytetit të Vlorës.

Prej vitesh, Narta është në duel për t’u zhvilluar si zonë industriale apo për turizëm, pasi të dyja nuk mund të rrinë bashkë. Vite më parë është zhvilluar një betejë e ashpër ndërmjet shoqatave mjedisore dhe institucioneve të qeverisë për të mos lejuar ndërtimin e Termocentralit të Vlorës, i cili është në pyllin e Sodës shumë afër me Nartën.

Por duket se laguna tashmë është e detyruar të mbajë edhe depozitat e naftës, pavarësisht se ato nuk mund të jenë miqësore me mjedisin dhe zhvillimin e turizmit.

Revista Monitor,  03.07.2016

Një tjetar lajm i rëndë është mësuar me kalimin e minutave nga atentati i përgjakshëm që mori dy jetë njerëzish pasditen e sotme në Vlorë pranë Sheshit të Flamurit.

Raportohet se me shumë mundësi drejtori i OSHEE-së ne Vlorë, Roland Saliu, është vrarë gabimisht dhe se shënjestra e krimit ka qenë pronari i televizionit “Vlora Channel”, Erven Hyseni.

Mësohet se të dy viktimat ishin të njohur dhe ishin ulur bashkë në të njëjtën tavolinë.

energjia.al  25.05.2017