info@energjia.al

Vjedhja e energjisë elektrike vijon edhe pse penalitetet ligjore janë forcuar së tepërmi tre vitet e fundit, pas aksionit masiv për ta çrrënjosur këtë fenomen.

Një abonente nga Fieri kishte hequr metesin duke e fshehur atë, veprim i cili është konstatuar nga grupet e OSHEE, të cilët e kallëzuan atë në Polici, ndërsa në Librazhd janë evidentuar gjashtë raste të vjedhjes së energjisë elektrike.

Konkretisht në Fier, abonentja Bajame G.,  zhduku matësin e energjisë dhe për këtë arsye u denoncua.

Të tjera raste si: Qemal K., nuk kishte kontrate dhe u gjet i lidhur me energji, duke mos patur as matës; Çobo B., procedim për rilidhje të paligjshme; si dhe Lulzim T., u kap në flagrancë duke vjedhur energjinë elektrike.

Po nga Fieri regjistrohet nje incident i shëmtuar, ku për shkak të detyrës goditet elektricisti Indrit M. Punonjësi ka asistuar në kontrollet e natës per vjedhjen e energjisë nga abonentët, në fshatin Radostinë.

Në Librazhd, zonë nën administrim nga Drejtoria Rajonale OSHEE Elbasan, janë zbuluar raste të vjedhjes së energjisë elektrike, ku konkretisht:

Ilmi B., Altin S., Gentian S., dhe Alil A., u kapën me rilidhje të paligjshme të energjisë. Policia, në vendngjarje, kreu veprimet, kurse materialet i kaluan prokurorisë.

Shqiptarja.com  18.09.2017

Tre persona janë vënë në pranga nga Policia e Tiranës me akuzen e vjedhjes.

Fatos Hasa, Roland Puleci dhe Sul Lami u kapën nga efektivët e Komisariatit nr. 1 në Tiranë teksa po vidhnin karburant në një mjet tip eskavator në fshatin Mullet.

Policia sekuestroi dy automjete, një pompë elektrike, 8 bidona dhe 120 litra naftë.

Po verifikohet ndërkohë nëse këta persona janë edhe autorët e vjedhjes së ndodhur më 10 shtator në një kantier ndërtimi gjatë rrugës Tiranë-Elbasan.

Top Channel,  13.09.2017

Zbardhen detaje të reja për grabitësin e karburanteve që u arrestua dje dhe emrin e tij të vërtetë.

Sipas policisë Aleks Prifti 41 vjeç, lindur në Urën Vajgurore, Berat dhe banues në Tiranë ka grabitur me armë dhe dhunë, gjashtë pika në disa qytete të vendit, ndërsa ka tentuar edhe vjedhjen e një argjendarie.

I dënuar në Greqi, vjedhje e vrasje në Belgjikë
Por sipas burime të Report Tv, emri i vërtetë i tij është Agron Hoxha. Në qershor të 2017 ai ka dalë nga burgu në Greqi.

Është hetuar në Belgjikë për 100 vepra penale të këtij lloji. Është hetuar edhe si i dyshuar për një vjedhje me armë me pasojë vdekjen e një shtetaseje belge.

Në 2005 deri 2007 një grup prokurorësh belgë kanë hetuar së bashku me Policinë e Shtetit dhe drejtorinë e policisë Berat.

Në atë periudhë është i ushtruar kontroll në Ura Vajgurore nga prokurorë belg e policia e shtetit. I janë sekuestruar ora dore, bizhu, etj.

7 vjedhje me armë në 4 ditë në gusht
Gjatë datës 01, 02, 03 dhe 04 Gusht 2017, ai ka kryer 7 vjedhje me armë dhe dhunë në disa pika karburantesh në qytete të ndryshme të Shqipërisë si edhe ka tentuar të vjedhë me armë një argjendari në qytetin e Lushnjes.

Shqiptarja.com  07.08.2017

OSHEE bën apel për denoncimin e abuzimeve me vjedhjen e energjisë elektrike. Më poshtë gjeni deklaratën e plotë të Operatorit të Shpërndarjes:

Denonco vjedhjen e Energjise Elektrike dhe Korrupsionin

Janë mbi 100 abonentë të proceduar në polici dhe prokurori, ku më shumë se gjysma janë biznese.

Dy janë format e abuzimit:
Rilidhje e paligjshme e energjise;
Ndërhyrje në matës duke manipuluar të dhënat e konsumit;

Veç kësaj, në pranga kanë rënë edhe punonjës të OSHEE, bashkëpunëtorë në skemat e vjedhjes së energjisë.

Behuni pjesë e këtij aksioni duke përdorur nr e telefonit 04 227 4141, ku nje staf i kualifikuar do ju sherbeje (nga ora 7 e mengjesit deri ne 11 të natës per 7 ditë të javës) për shqetesimet sipas rastit, por sidomos mirëpresim denoncimet për vjedhje të energjise dhe korrupsionit ne radhet e OSHEE!

energjia.al  02.08.2017

Vijojnë kontrollet për lidhjet e paligjshme të energjisë elektrike në të gjitha qytetet e vendit.  Konkretisht, nga kontrollet e OSHEE Burrel janë konstatuar abonentë që vidhnin energjinë elektrike, përmes ndërhyrjes në matës dhe lidhjes së paligjshme direkt nga linja.

Kështu, janë kallëzuar në prokurori dhe shoqëruar në polici shtetasit: F. K. dhe S. K.  njësia Kastriot, Dibër; Gj. D., Mirditë; A. J. dhe Gj. D. nga Dibra; T. B. dhe M. Rr. nga fshati Lenjë, njësia Krastë; Xh.M. dhe P. M. nga Ostreni i Madh; A. T. nga Dohoshisti.

Gjithashtu, policia e Burrelit ka arrestuar një grup prej 4 personash, dy nga Tirana dhe dy nga Tropoja, me akuzën e vjedhjes së transformatorëve në periudha të ndryshme.

Scan Tv,  24.07.2017

Task Force e OSHEE në Fier ka evidentuar një sërë rastesh të vjedhjes së energjisë, teksa në Prokurori janë kallëzuar 13 abonentë.

Nga hetimet dhe procesverbalet pas kontrollit, disa abonentë kanë përfunduar në polici nga kallëzimi i bërë nga OSHEE me motivacionin e nderhyrjes në sistemin matës dhe vjedhjes së energjisë permes lidhjes direkt te linja (me krraba ose me grepa).

Ata tashmë janë në hetim për veprën penale vjedhja e energjisë elektrike.

Top Channel,  21.07.2017

Dy persona janë arrestuar sot në flagrancë pasi u konstatuan se kishin bërë lidhje të paligjshme të energjisë elektrike.

Shërbimet policore të Komisariatit Nr.3, në bashkëpunim me Task Forcën e OSHEE-së, kanë ushtruar kontrolle në subjekte të ndryshme me qëllim goditjen e paligjshmërisë.

Si rezultat i këtyre kontrolleve, u arrestuan në flagrancë:
- Ndoc Prrroni, 53 vjeç, banues në Tiranë, pasi në shtëpinë e tij, u gjetën  lidhje të paligjshme të energjisë elektrike.
- Xhemail Toci, 60 vjeç, banues në Tiranë, pasi biznesin privat në pronësi të tij, u gjet lidhje e paligjshme e energjisë elektrike që e furnizonte.

Materialet proceduriale në ngarkim të shtetasve të lartpërmendur, i kaluan Prokurorisë së Rrethit Gjyqësor Tiranë, për veprën penale “Vjedhja e energjisë elektrike”.

Ndërkohë si rezultat i këtij aksioni u arrestuan edhe dy persona të tjerë në Shkodër po për të njëjtën akuzë.
- Melazim K., 22 vjeç, banues në Shirokë, Shkodër, u arrestua pasi në Bar – Restorantin në pronësi të tij, u konstatua lidhje e paligjshme e energjisë elektrike që e furnizonte .

Gjithashtu, u shpall në kërkim dhe punohet për kapjen e38 vjeçarit me inicialet  V.M. , 38 vjeç, banues në Kosovë (provizor në Velipojë)

Në plazh Velipojë, në dyqanin Piceri të tij , u konstatua lidhje e paligjshme e energjisë elektrike që e furnizonte.

Materialet proceduriale në ngarkim të shtetasve të proceduar të lartpërmendur, i kaluan Prokurorisë së Rrethit Gjyqësor Shkodër për veprën penale “Vjedhja e energjisë elektrike”.

Shqiptarja.com  20.07.2017

Task Force e OSHEE ka vijuar me kontrollet edhe në qytetin e Vlorës, ku një biznesmen është shpallur në kërkim për vjedhje të energjisë elektrike.

Burime zyrtare të OSHEE bëjnë të ditur se vetëm në 24 orët e fundit në qytetin e Vlorës janë denoncuar në polici 10 raste të ndërhyrjes në sistemin matës të vetë abonentëve. Ndërkohë që pronari i një lloto-sporti është shpallur në kërkim për lidhje të paligjshme të energjisë elektrike.

Kontrollet dhe verifikimet vijojnë në të gjithë vendin.

Top Channel,  18.07.2017

Një grup prej 4 personash janë arrestuar nga policia në Mat ditën e sotme pasi vidhnin transformatorët e kabinave elektrike në fshatin Bashkim.

Të arrestuarit janë Ylli Haklaj, Adriatik Haklaj, Armando Murati dhe Blerim Tabaku, të katërt nga Tropoja.

Mësohet se të rinjtë vinin nga Tropoja dhe vidhnin transformatorët në Mat.

Rreth orës 21: oo të mbrëmjes së djeshme katër djemtë janë parë nga banorët e zonës, të cilët kanë njoftuar menjëherë Policinë e Matit.

Personat kanë mundur të largohen nga vendngjarja, ndërsa policia i ka arrestuar në vendin e quajtur “Qafa e Ulzës”.

Ky grup mendohet se ka vjedhur dhe herë të tjera dhe policia po punon për identifikimin e plotë dhe zbardhjen e rasteve të vjedhjes.

Shqiptarja.com  17.07.2017

Forcimi i masave ndaj debitorëve dhe procedimet në polici të vjedhësve të energjisë elektrike në Rajonin e Shkodrës, ku përfshihet Lezha, Shëngjini, Puka, etj., po thyejnë mitin e të “fortëve” ndaj shtetit.

Vetëm në 5 ditë aksione, duke nisur nga Shëngjini, Lezha dhe fshatrat përreth, pastaj në Velipojë dhe brenda në Shkodër, janë proceduar në polici të paktën 10 raste abonentësh privatë, të cilët kishin ndërhyrë në matës, duke paguar deri në 65% më pak energji elektrike nga sa konsumonin.

Kështu, tre subjekte private në fushën e hotelerisë në zonën e Velipojës kanë përfunduar në polici, për shkak të “manovrave” që kishin bërë me matësin, ata janë: P.C, A.F dhe PG (foto bashkëlidhur).

Të tjerë abonentë privatë nuk u kanë shpëtuar kontrolleve të Task Forcës Shkodër, si A.M pronar kompleks kalçeto në Shëngjin, D.J pronar supermaketi në zonën e plazhit Pulaj Velipojë, Gj.N dhe A.P në fushën e supermarketeve (nuk kishin kontratë me OSHEE) (foto bashkëlidhur), subjekti A.N.K sh.p.k në fushën e përpunimit të gurit/zhavorr (lavatriçe), B.P – 2010, kompleks shërbimesh në Zadrimë, si dhe F.L pronar i katër subjekteve në Shkodër (foto bashkëlidhur).

Edhe pse në fokus të kontrolleve kanë qenë subjektet private, gjatë aksioneve, probleme me ligjin kanë pasur edhe abonentët familjarë, për cenim të matësit, apo lidhje të paligjshme. Abonentët nga Shkodra me inicialet L.L, N.K, P.P, kishin ndërhyrë në matës duke paguar 43% më pak energji se sa konsumonin, si dhe kishin kryer lidhje të paligjshme.

Aksioni po vijon ende ku priten të tjera shoqërime në polici.

Revista Monitor,  14.07.2017