info@energjia.al

Erea Blakaj, nxënëse e klasës së VIII, të martën e kishte një ditë shkollore ndryshe nga mësimet e zakonshme. Ajo, bashkë me 60 nxënësit tjerë të Shkollës Fillore “Xhemajl Mustafa” të Prishtinës vizituan KEDS-in.
“Mësova shumë gjëra sot. Nuk e dija që ka kabllo të rrymës bistekë që mbështillen dhe nuk janë të rrezikshme edhe po u prekan me dorë”, thotë ajo, teksa vrojtonte vendosjen e rrjetit të tensionit të ulët në fshatin Dyz të Podujevës.
Aty KEDS po ndërton rrjetin e ri për 90 familje duke përfshirë edhe një trafo shtesë, përderisa nxënësit kanë parë në praktikë si ndërtohet rrjeti energjetik, cilat janë nivelet e tensionit, për çka shërbejnë dhe si transformohen ato në nivele më të ulëta, deri te konsumatori shtëpiak.
“E shoh ndryshe KEDS-in. Po më pëlqen shumë si funksionon në realitet distribuimi dhe furnizimi i energjisë elektrike. Kjo ma shton dëshirën që të bëhem inxhiniere”, shton Erea, e cila pos emrit të veçantë, ka edhe pasionin për të mësuar sa më tepër.
Kureshtja e nxënësve ka qenë e madhe, sidomos për faktorët e sigurisë. Atyre u është shpjeguar nga menaxheri i Departamentit të Mirëmbajtjes, Ramadan Arifi dhe stafi i tij, se si vendosen mbrojtësit në rrjet, të cilët mbrojnë rrjetin nga faktorët ekstern dhe njerëzit nga kontakti me shkarkimet elektrike.
“Këtu po ndërtojmë rrjetin e ri të tensionit 0.4 kV. Nga këto shtylla që po i vendosim dhe nga këta përçues, të cilët po i shihni tek i vendosin punëtorët e KEDS-it, furnizohen me energji elektrike direkt konsumatorët. Ky është niveli fundor i tensionit dhe lidhet direkt me shtëpitë përreth”, u tha Arifi nxënësve.
Nxënësit kanë mësuar edhe si funksionojnë KEDS-i dhe KESCO në përgjithësi, sikurse kanë bërë vizitë të veçantë në Qendrën e Kalibrimit. Aty, Menaxheri për AMR dhe Kalibrim, Shukri Aliu, u ka shpjeguar se si funksionojnë njehsorët e energjisë elektrike, që nga prodhimi i tyre, kalibrimi e deri te vendosja e tyre në shtëpitë e konsumatorëve.

energjia.al  11.10.2017

Kryeministri i Republikës së Kosovës, Ramush Haradinaj ka vizituar Ndërmarrjen “Trepça”,  ku nga menaxheri i kësaj ndërmarrjeje, Ahmet Tmava është njoftuar nga afër me situatën dhe problemet me të cilat përballet kjo ndërmarrje.

Me këtë rast, kryeministri Haradinaj, tha se Ligji e obligon Qeverinë e vendit që të ndërmarrë veprime të duhura të parapara me ligj.

“E mira e Ligjit për “Trepçën”, është se ju jep rol të gjithëve, ju jep rol minatorëve sepse janë aksionarë, iu jep rolin e vet përmes Bordit Menaxhues, menaxhmentit, por i jep rol dhe peshë edhe vendimmarrësve tjerë të nivelit nacional përmes Bordit Mbikëqyrës”, tha kryeministri.

Kryeministri Haradinaj tha se e mira e këtij ligji, është që të hyrat, 20 për qind e inkasimit të dividentave i kthehen komunitetit, andaj nëse të gjithë marrin pjesën e tyre të përgjegjësisë, sipas kryeministrit, “Trepça” do të jetë storie e suksesit, jo vetëm ekonomike, por edhe në dimensione tjera.

“Ne jemi të interesuar që kjo ndërmarrje në jetën tonë ekonomike, shoqërore dhe më gjerë, të shfrytëzohet si mundësi për një integrim më të mirë të kësaj treve të Kosovës, përfshirë edhe veriun, të gjenden formulat e duhura që të përfshihen të gjithë dhe ta gjejnë interesin e vet, jo vetëm në aktivizimin e njësive që u cekën, por edhe në aktivitetet e gjithmbarshme që pasojnë. Ne e kemi përfshirë edhe në planin qeverisës pasurimin e koncentratit, kalimi në një stazh tjetër më të avancuar”, tha kryeministri.

Kjo vizitë, siç u shpreh kryeministri, duhet të kuptohet si gatishmëri për zbatim të Ligjit për Trepçën.

“Është e patolerueshme të vonohet krijimi i Bordit Mbikëqyrës, por poashtu është e patolerueshme që të lejohet statusi i “Trepçës” si kompani e paregjistruar, që i ka vështirësitë në operim”, u shpreh kryeministri.

Me këtë rast, kryeministri premtoi për minatorët se temat që kanë të bëjnë me kategorizimin e pagave, me stazhin e minatorëve, si dhe punësimin e familjarëve të minatorëve do të trajtohen me seriozitetin e duhur.

Menaxheri i ndërmarrjes “Trepça”, Ahmet Tmava, fillimisht ka uruar kryeministrin Ramush Haradinaj, për zgjedhjen në krye të Qeverisë me bindjen se pritjet e kësaj ndërmarrje do të bëhen realitet nga kjo qeverisje.

Tmava e ka njoftuar kryeministrin me sfidat nëpër të cilat ka kaluar ndërmarrja “Trepça”, duke u kërcënuar edhe me proceduat e likuidimit.

“Falë Ligjit të aprovuar për Trepçën në nëntor të vitit të kaluar, “Trepça” ka shpëtuar nga procedura e likuidimit, mirëpo nuk është zgjedhur problemi, për shkak se ai ligj ende nuk ka filluar të zbatohet. Kjo na vë në një situatë të një vakumi ligjore veprues”, tha Tmava.

Ai e ka konsideruar si çështje me prioritet zgjedhjen e Bordit Mbikëqyrës, i cili pastaj e aprovon Strategjinë Zhvillimore dhe e bën statusin e regjistrimit të ndërmarrjes.

Pas takimit me  menaxhmentin, kryeministri ka vizituar minierën e Stantërgut, ku është pritur nga minatorët.

Qazim Jashari, drejtor i Minierës në Stanterg, i ka thënë kryeministrit Haradinaj se për t’i arritur objektivat duhet investim dhe përkrahje nga Qeveria. “Besojmë se do të filloj implementimi i ligjit, do të zgjidhet bordi dhe do të filloj zhvillimi i mbarë me projektet që janë bërë nga ekspertët vendor”, tha ai.

Shyqeri Sadiku, kryetar i Sindikatës së minatorëve, paraqiti para kryeministrit kërkesat dhe shqetësimet lidhur  me gjendjen e krijuar nga keqmenaxhimi dhe keqpërdorimi i menaxhmentit aktual.

Ai kërkoi që të bëhet ligji për pensione dhe invalidët e punës, i cili do të mundësonte që pensionet për të pensionuarit në Trepçë të jenë 70 për qind e mesatares së tri rrogave të fundit para pensionit; që punëtorëve të Trepçës t’ju njihet përvoja e punës nga vitet 90 e tutje; të arrihet një memorandum mirëkuptimi ndërmjet Ministrisë së Zhvillimit Ekonomik, Sindikatës dhe Menaxhmentit të Trepçës me qëllim që t’ju mundësohet punësimi i një fëmije, të gjithë atyre punëtorëve që kanë vdekur, vdesin, pensionohen dhe atyre që nuk kanë pasur mundësi të kthehen në punë; dhe të garantohet se nuk do të ketë privatizim të Trepçës.

Kryeministri Haradinaj në fund të vizitës bashkëbisedoi me minatorët, duke u premtuar atyre zgjidhje dhe adresim konkret për pensionet të cilat do t’i trashëgojnë familjarët e tyre, mundësinë e punësimit të familjarëve të minatorëve, si dhe bursa për fëmijët e minatorëve pas rritjes së profitit në këtë ndërmarrje.

“Sapo të kthehem në zyrë do t’i përpara detyrat e mia dhe me kabinetin tim do t’i kryej këto detyra” tha kryeministri, duke premtuar se deri më 20 tetor, sërish do të vije në “Trepça” për të raportuar për realizimin e punëve që janë bërë.

Për realizimin e këtyre premtimeve, ai mori shembull arritjen e marrëveshjes me banorët e fshatrave Shipitullë dhe Hade me rastin e shpronësimit.

Agjensia e lajmeve ekonomia,  21.09.2017

Sot, drejtori menaxhues, Arben Gjukaj me menaxhmentin e KEK-ut, kanë pritur në vizitën e saj të parë, Linda Van Gelder – drejtoreshë e Bankës Botërore për Ballkanin Perëndimor, e shoqëruar nga stafi i lartë i BB zyrës në Prishtinë.

Gjukaj gjatë vizitës ka njoftuar  Van Gelder,  për sfidat dhe objektivat e KEK-ut në përgjithësi e me theks të veçantë rreth zhvillimeve të fundit sa i përket  zhvendosjes dhe normalizimit të punës në miniera pas vendimeve përfundimtare të Qeverisë.

Banka Botërore si palë e interesit të veçantë për KEK-un, gjithashtu është njoftuar edhe për prodhimin e dy termocentraleve nëpër vite dhe rekordet e prodhimit që janë arritur vitet e fundit, duke i bërë me dije se KEK-u tani më ka dëshmuar se është faktor stabiliteti energjetik në vend.

Telegrafi,  07.09.2017

Maji, edhe pse një ditë pushimi dedikuar Ditës Ndërkombëtare të Punëtorëve, nuk është e tillë për ekipin teknik të OSHEE-së në Tiranë. 30 punonjësit e Brigadës së Tensionit të Lartë vazhdojnë edhe sot remontin e linjës Lanabregas–nënstacioni i Pallatit te Kongreseve, e ndërtuar në vitin ’84-r.

Kjo linjë prej 8.5 kilometra, ku 90% është ajrore, është një prej nyjeve të rëndësishme në sistemin e shpërndarjes së energjisë elektrike për Tiranën. Amortizimi e bën mirëmbajtjen të nevojshme për parandalimin e defekteve të mundshme.

Kryeministri Edi Rama ishte mes tyre për t’i falënderuar për punën e përkushtuar në shërbim të qytetit, i shoqëruar nga ministrja e Mirëqenies Sociale dhe Rinisë, Olta Xhaxhçka dhe Administratori i Përgjithshëm  OSHEE, Ardian Çela.

Nga mungesa ndër vite e investimeve, rrjeti elektrik i vendit në pjesën më të madhe të tij është pothuaj i njëjti që prej ndërtimit në vitin 1974. OSHEE, falë performancës pozitive të sektorit në dy vitet e fundit, ka rritur investimet në rrjet, por edhe për mirëmbajtjen e rrjetit ekzistues për të shmangur defektet dhe ndërprerjen e energjisë. Aktualisht, 830 punonjës janë duke operuar në të gjithë territorin e vendit për kryerjen e remonteve dhe vënien në punë të investimeve. Investimet në remontin janë kryer në të gjithë zonën bregdetare, nga Velipoja në Sarandë.

“Kjo është një nga linjat kryesore për qytetin e Tiranës. Është linja e ‘84-s. Po e bëjmë me fuqinë punëtore të OSHEE. Bën pjesë në programin e remonteve, që kap vlerën e 2 miliardë lekë të të ardhurave të kompanisë për të gjithë vendin. Në gjithë territorin e Shqipërisë janë 830 punonjës që po bëjnë remonte. Aktualisht jemi duke bërë remontet e zonës bregdetare, në mënyrë që me fillimin e sezonit turistik të jemi të gatshëm. Për pjesën tjetër të vendit brenda tetorit t’i kemi përfunduar këto remonte. Në sajë të këtyre remonteve, ne kemi ulur me 50% numrin e defekteve dhe me 80% është ulur numri i ndërprerjeve” – informoi mbi rezultatet e deritanishme Ardian Çela.

OSHEE, theksoi Çela, ka ndjekur edhe një strategji të re për rekrutimin, trajtimin financiar dhe kujdesin ndaj punonjësve. Në viti 2017-n për të dytin vit aplikohet sigurimi në punë i punonjësve, falë kontratave të lidhura me kompani sigurimi.

“Është vitit i dytë që të gjithë punonjësit e terrenit, mbi 3 mijë e 500 punonjës sigurohen ndaj  aksidenteve që ndodhin në punë. Kompania i mbulon të gjitha shërbimet mjekësore brenda dhe jashtë vendit, për  rastet kur punonjësit janë aksidentuar në punë. Bëmë sistemimin dhe rritjen e pagave të të gjithë punonjësve në terren, ku paga minimale nga 250 mijë lekë [të vjetra] për punonjësit e pakualifikuar kaloi në 350 mijë lekë dhe për gjithë stafin teknik të mesëm shkoi në 550 mijë lekë. Kemi trajnuar mbi 5500 punonjës. Kemi rekrutuar vetëm gjatë vitit 2016, mbi 82 inxhinierë elektrikë”.

Ministrja e Mirëqenies Sociale dhe Rinisë, Olta Xhaçka falenderoi punonjësit e OSHEE, por edhe për të gjithë ata që sot janë në krye të detyrës, duke siguruar se akoma më shumë do të bëhen në mbështetje e mbrojtje të punës së tyre, si dhe të kategorive të tjera vulnerabël.

Dua të falënderoj të gjithë këta punonjës që bëjnë një punë të jashtëzakonshme, edhe sot që është ditë pushimi për gjithë të tjerët. Edhe ne në Ministrinë e Mirëqenies Sociale dhe Rinisë kemi bërë shumë, kemi ofruar kompensimin e energjisë elektrike për 90 mijë pensionistë, Ka shumë punë për të bërë edhe për kategori të tjera në nevojë. Edhe me Inspektoratin e Punës kemi arritur që aksidentet në punë të ulen në masën 50%. Ne jemi shumë të angazhuar që në mandatin tjetër të arrijmë t’i shtrijmë këto arritje edhe shumë më tepër, edhe në kategori të tjera”.

Ndryshimi i modelit të administrimit, investimet në rrjet, qasja e re në trajtimin e burimeve njerëzore, sipas Kryeministrit Rama, po e shndërrojnë OSHEE në një kompani moderne. Po ashtu, Kryeministri garantoi vazhdimin e masave të qeverisë në mbështetje të kategorive të ndryshme sociale.

“Për familjet që janë në ndihmë ekonomike, ne bëjmë një kompensim të plotë të të gjithë diferencës pas heqjes së fashës mbrojtëse. Është 19 milionë dollarë në vit nga buxheti i shtetit që shkon për këto familje dhe për gjithë kategoritë e tjera, të cilat prezumohet të mbroheshin nga fasha 300 k/W. Sot, askush nga ata nuk ndjen rritje të çmimit të energjisë, ndërkohë për fasha të tjera, çmimi i energjisë është ulur. Janë bërë zerime kamat vonesash masivisht, duke kontribuar të gjithë sëbashku që të bëhen të gjithë investime të mëdha dhe të fillojë ripërtëritja e një rrjeti shumë të vjetër. Për ne është shumë e rëndësishme që kompania të vazhdojë të përmirësojë standardet dhe të gjitha nivelet e trajtimit të punonjësve në funksion të përmirësimit të cilësisë dhe të vazhdojë të transformohet nga një ushtri militantësh që thjesht ushqeheshin, duke mos ofruar dot kompania asnjë lloj shërbimi prej kompanie, në një kompani moderne që duhet të jetë akoma më shumë një nga krenaritë e vendit tonë”.

Shqiptarja.com  01.05.2017

Një grup studentësh të përzgjedhur nga gjenerata e tretë e KEDS Academy, së fundmi vizituan qytetin e Stambollit, për të zgjeruar më tej njohuritë e tyre teorike dhe praktike.

Gjatë kësaj vizite të organizuar nga KEDS, studentët vizituan Universitetin Boğaziçi, selitë e kompanive Limak dhe Çalik, dhe shumë vende të tjera për të parë nga afër disa nga zhvillimet më të reja të kësaj industrie.
Në laboratorët e Universitetit Boğaziçi, për studentët u mbajt një ligjëratë lidhur me aksidentet e mundshme në pajisjet elektrike dhe rëndësinë e sigurisë në vendin e punës. Në një leksion tjetër tepër atraktiv, ata u njohën me efektet e komunikimit profesional, ku u angazhuan edhe vetë ata.

Gjatë vizitës në Limak, studentët u pritën nga z. Serhat Dinç, Zëvendësdrejtor i Përgjithshëm i Limak Energy, i cili është anëtar i Bordit Ekzekutiv të KEDS dhe krijues i KEDS Academy. Z. Dinç prezantoi kompaninë, ku foli edhe për projektet e energjisë dhe investimet që ata kanë në mbarë botën.

“Komunikimi me të rinjtë është shumë më i këndshëm. Ne kemi hapur dyert për ju. Po bëjmë maksimumin për t’iu motivuar, dhe kur shohim sukseset tuaja, ne jemi shumë të lumtur që punojmë me ju”, tha z.Dinç.

Në një diskutim interaktiv, z.Dinç angazhoi nxënësit duke i kërkuar atyre mendimin e tyre në lidhje me programin e KEDS Academy, nëse ata do të ndryshonin diçka në program, për planet e tyre për të ardhmen, dhe se si ata e shohin KEDS-in nga jashtë.

Në një vizitë në kompaninë Çalik, Z. Ridvan Aktürk, Drejtori i Përgjithshëm i kompanisë YEDAŞ Energy, i informoi studentët kosovarë për bizneset dhe investimet e Çalik, pjesë e së cilës është edhe YEDAŞ.

Për më tepër, studentët dhe zyrtarët e KEDS po ashtu vizituan vende dhe monumente kulturore të qytetit të Stambollit.
Këto vizita u lanë përshtypje të shkëlqyeshme  të gjithëve.

Agjensia e lajmeve ekonomia,  08.12.2016

Grupi i punës për mbikëqyrjen e zbatimit të ligjit për miniera nga Komisioni për Zhvillim Ekonomik, i Kuvendit të Republikës së Kosovës, i udhëhequr nga Kryetarja, Sala Berisha-Shala, në  vazhdën e mbikëqyrjes së zbatimit të ligjit dhe sfidave të KEK-ut, sot ka qëndruar në Divizionin e Prodhimit të Qymyrit si dhe kanë vizituar mihjet sipërfaqësore.

Delegacioni është pritur nga Drejtori Menaxhuesi KEK-ut, Arben Gjukaj me bashkëpunëtorë. z. Gjukaj ka njoftuar Deputetët për prodhimin dhe stabilitetin energjetike në vend, i cili po bëhet  falë punës së palodhshme të punëtorëve të kësaj Korporate, mangësitë ligjore në këtë sektor, por edhe për sfidat e përditshme me të cilat  ballafaqohet KEK-u.

Në anën tjetër, Deputetët e këtij Komisioni njëzëri falënderuan Drejtorin Menaxhues dhe stafin e KEK-ut për punën e palodhshme që bëhet në këtë Korporatë, ata gjithashtu u shprehën të gatshëm për përkrahjen e KEK-ut e me theks të veçantë në fushën legjislacionit, ata kërkuan nga menaxhmenti i KEK-ut ti bëjnë të gjitha vërejtjet lidhur me ndryshimin/plotësimin e amendamenteve në ligjin për miniera dhe minerale   dhe sa më parë ti dërgohen Komisionit i cili do ti analizoj me vëmendje dhe në varësi të arsyetimit do ti procedoj në Kuvend për miratim.

Agjensia e lajmeve ekonimia,  29.08.2016

Në kuadër të rifillimit të punës në rafinerinë e naftës në Ballsh, ministri i Financave Arben Ahmetaj u takua me investitorët dhe punëtorët e saj.

“Sot është një ditë e mirë për ekonominë shqiptare dhe për punonjësit e rafinerisë. Çdokush e di se çfarë ka kaluar industria e naftës, sidomos ju që e mbani mend mirë atë privatizim të dështuar dhe korruptiv që rëndoi mbi të gjitha në kurrizin tuaj si të punësuar. Hapja e rafinerisë është një lajm i mirë, mbi të gjitha për këta 1200 punonjës dhe familjet e tyre, të cilët nga sot kanë sërish një punë”, deklaroi Ahmetaj.

“Kryeministri premtoi riaktivizimin e industrisë së naftës dhe sot ky është premtim i mbajtur dhe përgjigjja më dinjitoze për kukuvajkat e SHQUP-it që sot vajtojnë për lajmin tuaj të gëzuar”, shtoi Ahmetaj.

Top Channel,  02.09.2016

Në dritë të inaugurimit të linjës 400 kV Kosovë-Shqipëri që pritet të bëhet gjatë muajit qershor 2016 në Tiranë, pas përfundimit të punimeve në pjesën e Shqipërisë, Kryeshefi Ekzekutiv i KOSTT Mustafë Hasani priti sot në takim Ambasadorin e Republikës së Shqipërisë në Kosovë z.Qemal Minxhozi.

Në takim u bisedua rreth bashkëpunimit aktual si dhe mundësitë e thellimit të mëtutjeshëm të bashkëpunimit Kosovë-Shqipëri në fushën e transmetimit të energjisë elektrike, zhvillimet në drejtim të tregut të përbashkët të energjisë elektrike Kosovë-Shqipëri si dhe bashkëpunimit në proceset e integrimeve rajonale dhe evropiane.

Ndër të tjera, z.Hasani shprehu falënderimin e tij për gatishmërinë e përhershme të institucioneve të Republikës së Shqipërisë e në veçanti kompanisë homologe (OST Shqipëri) për bashkëpunimin e vazhdueshëm në avancimin e projekteve të përbashkëta dhe proceset e integrimeve rajonale dhe evropiane të KOSTT.

Në anën tjetër, Ambasadori i Shqipërisë në Kosovë z.Qemal Minxhozi theksoi gatishmërinë e institucioneve të Republikës së Shqipërisë për avancimin e bashkëpunimit me theks në fushën e energjisë  elektrike i cili aktualisht përbën sektorin me bashkëpunimin më të madh ndërshtetëror.

Me këtë rast Ambasadori Minxhozi vizitoi edhe Qendrën Nacionale Dispeçerike në KOSTT, e cila është një nga Qendrat më të avancuara e cila operon në përputhje me normat më të larta teknike Europiane.

Agjensia e lajmeve ekonomia,  25.06.2016

Sot një delegacion nga kontingjenti i KFOR-it, Gjerman vizitoi KEK-un.

Delegacioni prej 40 anëtarësh i udhëhequr nga koloneli, Freiherr von Keyserlingk, është pritur dhe shoqëruar nga z. Arben Gjukaj- Drejtor Menaxhues i Korporatës Energjetike të Kosovës (KEK) me bashkëpunëtor.

Ata fillimisht vizituan sallën e makinerisë dhe dhomat kontrolluese të njësive gjeneruese në TC ”Kosova A” Divizionin e qymyrit dhe “Kosova B”  ku u njoftuan për së afërmi nga z. Gjukaj lidhur me gjendjen aktuale teknike dhe operuese të pajisjeve përkatëse.

Delegacioni u interesua rreth gjenerimit të energjisë, eksploatimit të qymyrit dhe mbrojtjes së mjedisit, koloneli Freiherr von Keyserlingk, e falënderoi z. Gjukaj me bashkëpunëtor për pritjen që iu organizua delegacionit dhe theksoi; “Fillimisht, në emër të delegacionit dua ta shpreh falënderimin tim për pritjen e organizuar nga z. Gjukaj me bashkëpunëtor. Ne jemi qe 6 muaj këtu në Kosovë dhe si konsumues te energjisë deshëm që më për së afërmi të shohim ku po prodhohet energjia, nga ku po furnizohemi dhe me fjalë të tjera ku po jetojmë.

Ne jemi jashtëzakonisht të impresionuar me punën e KEK-ut, në veçanti se si po menaxhoni të harmonizoni punën me dy teknologji të ndryshme ato të vjetrat dhe këto të rejat, gjithashtu ndjehem shumë mirë kur shoh se sa I përkushtuar është menaxhmenti I KEK-ut që ti arrij standardet e BE-se, ne sektorin e energjisë.

Duke falënderuar kolonelin, Freiherr von Keyserlingk dhe oficerët e kontingjentit Gjerman të KFOR-it, për interesimin e shprehur për punën dhe sfidat e KEK-ut,  drejtori Menaxhues, Arben Gjukaj tha; “Unë sot ndihem I nderuar qe gjendem këtu me ju, sepse së pari kur e shohim uniformen e juaj ndjejmë siguri, pastaj, për punën e juaj larg familjeve tuaja, por mbi të gjitha që qeveria juaj ka investuar shumë në vendin tonë por edhe në KEK e sidomos në TC”Kosova A”.

Përkundër sfidave, që paraqiten në vazhdimësi, për shkak të vjetërsisë së njësive prodhuese, duke bartur barrën e tërë sektorit të energjisë në vend, KEK është duke vazhduar me prodhim stabil dhe të qëndrueshëm të energjisë elektrike. Përveç kësaj, siç kemi dëshmuar edhe gjatë pesë viteve të fundit, një nga objektivat kryesore të korporatës ishte dhe mbetet mbrojtja e mjedisit ku operojmë, në këtë drejtim KEK-u, ka investuar mbi 50 milion euro kryesisht nga mjetet vetanake”.

Agjensia e lajmeve ekonomia,  16.05.2016

Ministri i Energjisë dhe Industrisë Z.Damian Gjiknuri mori pjesë në punimet e takimit të dytë të Këshillit të Ministrave të Energjisë së Korridorit Jugor të Gazit, pjesë e të cilit është edhe gazsjellësi TAP.

Në takim merrnin pjesë ministrat e Azerbajxhanit, Shqipërisë, Bullgarisë, Gjeorgjisë, Greqisë, Italisë, Turqisë, Kroacisë, Malit të Zi dhe Britanisë së Madhe. Të pranishmëve ju drejtuan me përshëndetje të rastit Presidenti i Azerbajxhanit Ilham Aliyev, përfaqësuesi i lartë i Departamentit amerikan të Shtetit për Energjinë Amos J.Hochstein, zëvendës Presidenti i komisionit Evropian Matros Sevcovic dhe Përfaqësuesja e Lartë për Politikën e Jashtme në Bashkimin Evropian Federica Mogherini.

Ministrat u informuan mbi ecurinë e projektit të gazsjellësit në vendet respektive ndërsa theksuan rëndësinë primare që merr siguria energjitike dhe diversifikimi i burimeve.

“Në këtë takim u theksua edhe njëherë rëndësia e Korridorit Jugor të Gazit dhe mbi të gjitha angazhimi që kanë marrë të gjitha shtetet për të bërë të mundur realizimin e këtij projekti kaq të rëndësishëm, pra bëhet fjalë për projektin TANAP dhe TAP. Doli shumë e qartë se progresi i TAP është i dukshëm dhe u konfirmua dhe njëherë se financimet janë të mundshme, u garantua se punimet në terren në Shqipëri për tubacionin do të fillojnë në mesin e këtij viti”, u shpreh z.Gjiknuri.

Tryeza e ministrave ra dakord gjithashtu që të promovojë zgjerimin e Korridorit Jugor të Gazit me tregje të tjera, përfshirë edhe ato jashtë kufijve të Bashkimit Evropian, siç janë vendet e Komunitetit të Energjisë në rajonin e Ballkanit përmes projektit të gazsjellësit Jonian-Adratik (IAP) dhe interkonektorit Greqi-Bullgari.

“Edhe në deklaratën përfundimtare u përfshi dhe gjeti mbështetje nga vendet pjesëmarrëse ideja e zgjerimit të këtij projekti me atë që tanimë njihet si gazsjellësi Jonian-Adriatik (IAP). Aktualisht, Shqipëria bashkë me Malin e Zi kanë aplikuar në Komisionin Evropian për financimin e dizajnit përfundimtar të këtij gazsjellësi. Nga ana tjetër, u përmend edhe aplikimi që ka bërë Shqipëria dhe Kosova për studimin e fizibilitetit të degëzimit të mundshëm të gazsjellësit me segmentin Shqipëri-Kosovë. Këto janë zhvillime të rëndësishme që u theksuan edhe njëherë dhe gjetën mbështetjen e gjithë pjesëmarrësve në këtë takim, Shteteve të Bashkuara të Amerikës, Komisionit Evropian dhe të gjitha shteteve të Korridorit të Jugut”, theksoi ministri Gjiknuri.

Gjatë punimeve të konferencës ministri Gjiknuri zhvilloi bisedime me homologët e pranishëm ashtu sikurse me përfaqësuesit e lartë të Shteteve të Bashkuara të Amerikës dhe Bashkimit Evropian. Z.Gjiknuri bashkëbisedoi edhe me përfaqësuesit e kompanive prestigjioze SOCAR dhe BP.

energjia.al  01.03.2016