info@energjia.al

Ministri i Infrastrukturës dhe Energjisë Damian Gjiknuri shoqëruar nga drejtuesit e Autoritetit Rrugor Shqiptar dhe Inspektoratit Qendror Teknik e Industrial zhvilluan një takim me përfaqësuesit kryesorë të operatorëve të tregtimit të karburanteve.

Ministri Gjiknuri u bëri të ditur operatorëve masat që po ndërmerr qeveria në kuadër të rritjes së sigurisë rrugore në vend. “Kemi filluar me punën për heqjen e çdo objekti të paligjshëm që është në kundërshtim me Kodin Rrugor. Janë kryesisht tabela, struktura apo reklama që pengojnë shikueshmërinë gjatë lëvizjes së mjeteve dhe bëhen shpesh burim aksidentesh. Kuptohet, një ndër pikat më problematike të trashëguara kanë qenë dhe karburantet, pavarësisht masave që u ndërmorën gjatë 4 vjeçarit të parë, ndonjëherë edhe pa sukses nga ministria e shkuar dhe këtë duhet ta them. Një problem që duhet zgjidhur sa më shpejt është ajo e tabelave shumë të mëdha ku reklamohen markat dhe listohen cmimet e karburanteve. Shpesh këto tabela konfuzojnë shoferët e makinave dhe bëhen burim aksidentesh”, u shpreh Gjiknuri.

Ministria e Infrastrukturës dhe Energjisë u dakordësua me operatorët për krijimin e një grupi të përbashkët pune që do të përcaktojë një standard të ri të reklamimit të karburanteve dhe ndriçimit gjatë natës, në përputhje me Kodin Rrugor.

“Ministria me Autoritetin Rrugor do të ngrejnë një grup pune bashkë me përfaqësuesit e operatorëve për të përcaktuar një standard. Kjo duhet të jetë uniforme për të gjithë dhe patjetër nuk duhet të ndikojë në konkurencë të pandershme. Ju jeni operatorët kryesorë ndaj ju kërkova tu thërras për bashkëpunim dhe kërkoj nga ana juaj që të gjejmë një zgjidhje të shpejt për këtë problem. Tu lihen disa ditë afat pasi dhe ju kërkoni masat tuaja, në bashkëpunim me Autoritetin Rrugor. Përndryshe, jemi të detyruar që të ndërhyjmë ligjërisht. Preferoj më përpara dialogun dhe zgjidhjen me mirëkuptim, të punojmë sëbashku për ti dhënë një zgjidhje permanente sipas standardeve ligjore këtij problem”, nënvizoi Gjiknuri.

energjia.al  10.10.2017

Pavarësisht kërcënimit të Shoqatës së Hidrokarbureve për pezullim të shitjes së naftës dhe benzinës nëse vendosen të tarifa të shtrenjta riliçensimi për pikat e karburanteve, Ministria e Energjisë shprehet e palëkundur se tarifat e reja do të vihen.

Dritan Spahiu, thotë në një intervistë për Televizionin Klan, se për këtë çështje qeveria dhe bashkitë janë të hapura të gjejnë një konsensus me shoqëritë e karburanteve, por për të nuk ka kuptim që në fuqi të jetë tarifa e vitit 2002.

Rritja e kostove për tregtarët e karburanteve dhe transferimi i i tyre në rritjen e çmimit për konsumatorin fundor, pranohet edhe nga ministria, por ata thonë se nuk ka kuptim që një pikë karburanti të paguajë një shumë prej 100 mijë lekësh, kur aktiviteti ekonomik i tij është shumëfish më i madh.

Gjykata Kushtetuese rrëzoi një vit më parë tarifën që vendosi Këshilli i Ministrave prej 5 milion lekësh të rinj për karburantet në Tiranë dhe 3 për ato në rrethe.

Tashmë ministria e Energjisë kërkon që tarifa të ulet në 3 milion për kryeqytetin dhe 1 milion për karburantet jashtë tij. Këtë proces çdo pikë e bën njëherë në 5 vite. Sot në Shqipëri ka 1400 pika karburantesh, nga 300 që ka nevojë tregu.

Tv Klan,  06.03.2017

Tregtarët shqiptarë nuk pasqyrojnë rënien drastike të çmimeve të naftës në tregjet ndërkombëtare, shkak për të cilin Autoriteti i Konkurrencës ka vënë nën hetim subjektet e shumicës po edhe të pakicës të tregut të karburanteve.

Kreu i këtij Institucioni Lindita Milo, thotë se ka dyshime që kompanitë bashkërendojnë sjelljet për të mbajtur artificialisht çmime më të larta në dëm të konsumatorëve.

“Në mënyrë sistematike në tregun shqiptarë ekziston kjo pyetje se përse në tregun tonë nuk ndryshon çmimi i karburantit që mund të reflektohet nga tregu i jashtëm. Kemi një treg jo të qartë midis hallkave të veta ku kemi shitje të nivelit me shumicë brenda lojëtarëve, që do të thotë se një firmë importi me shumicë nuk e adreson produktin e tij vetëm tek pakica por edhe tek shumica” ka thënë Lati.

Lati thotë se struktura e tregut shqiptar po përqëndrohet në duart e importuesve, duke shfaqur shenja të qarta oligopolistike.

“Në fakt vetë ngrutësia e çmimit të operatorëve nga njëra anë dhe struktura e tregut është strukturë oligopolistike në tërësinë e vet. Ne vunë re se po shkonte drejt përqëndimit në import e hidrokarbureve. Dhe një strukturë e tillë gjithmonë ka një prirje për bashkërendimin mes operatorëve. Prandaj, nëse vërtetohet gjobat janë të mëdhaja, deri në 10% të xhiros së plotë” përfundoi ai.

Autoriteti po inspekton nga afër sjelljen e aktorëve të tregur dhe në rast se gjenden prova për bashkërendim të çmimemeve, operatorët mund të përballen me penalitetete shumë të larta, që shkojnë në milionë dollarë.

Shqiptarja.com  20.03.2016

Ministri i transportit Edmond Haxhinasto ka lajmëruar se me datën 15 tetor do të përzgjidhet fituesi për koncesionin e rrugës së Kombit, ku pagesa për çdo automjet do të jetë 5 euro pa TVSH. Teksa afati për pagesën po afron, grosistët e karburanteve kanë kujtuar se qeveria me dhënien e rrugës së Kombit me koncesion duhet të çlirojë naftën nga taksa e qarkullimit.

Rreth 6 vite me parë qeveria zhvendosi vjeljen e taksës së qarkullimit, e cila ka për qëllim mirëmbajtjen e rrugëve, nga koaldimi tek nafta. Marrja tek nafta e këtij tatimi shihet më e logjikshme, pasi ai që qarkullon më shumë, harxhon më shumë naftë e për pasojë paguan më shumë taksa. Por Luigj Aliaj, i Shoqatës së Shoqërive të Hidrokarbureve pohon se, nëse një pjesë e rrugëve jepen me koncesion, për të cilat aktualisht qeveria shpenzon vlera të mëdha monetare, duhet të lehtësojë natën nga taksimi.

Aktualisht taksa e qarkullimit mbi naftën është 27 lekë për litër. Në janar të vitit 2011, qeveria Berisha e zhvendosi taksën e qarkullimit nga makinat tek nafta. Fillimisht ajo u përcaktua 5 lekë për litër. Por më vonë kjo taksë u rrit dy herë nga qeveria Rama duke e çuar atë në 27 lekë për një litër naftë. Kjo ngarkesë fiskale është bërë shkaku kryesor se pse Shqipëria mban nivelet më të larta të karburanteve në rajon.

“Nëse Qeveria në tetor jep me koncesion rrugën e Kombit, kundrejt tarifës 5 euro pa TVSH, detyrimisht duhet që nga 1 janari 2016 të ulet taksa e qarkullimit tek nafta” tha Aliaj.

Faza e parë e tenderit për koncesionin e rrugës së Kombit ka përfunduar. Janë katër kompani në garë dhe me 15 tetor do të shpallët fituesi i menaxhimit dhe ndërtimit të përfundimit të Rrugës së Kombit, ka pohuar Haxhinasto. Llogaritja është bërë 5 euro për të kaluar rrugën, përfshirë edhe TVSH, që është më e ulët sesa mesatarja rajonale për tarifa të ngjashme. Elementi dallues në këtë garë do jetë kompania që do të ofrojë kërkesën për subvencion më të ulët nga ana e shtetit, pra që angazhimi i shtetit të jetë më i vogël. Katër kompanitë që marrin pjesë janë të huaja por që janë të lidhura edhe me nënkontraktorë shqiptarë. Kompania fituese parashikohet të investojë 38-43 milion dollarë për përfundimin e plotë të rrugës.

Nëpërmjet investimit do të bëhet ura e re e Kukësit, të rregullohet një pjesë e rëndësishme skarpatesh gjatë gjithë gjatësisë së rrugës, po kështu tuneli në dalje të urës së Kukësit dhe disa elementë të rrugës.

Revista Monitor,  14.09.2015

Pronar të pikave të shitjes me pakicë të derivateve, nuk po ia paguajnë Ministrisë së Infrastrukturës (MI) taksën për hyrje-dalje në rrugët magjistrale në gjithë territorin e Kosovës.

Në bazë të dokumenteve të siguruar nga gazeta “Zëri” shihet se vlera totale e borxheve që këto biznese i kanë borxh shtetit janë rreth 2.7 milionë euro.

Në listën e borxhlinjve hyjnë edhe kompanitë e mëdha në vend, siç është “Al Petrol”, “Hib Petrol”, “Patroni”, “Petrol Company”, “Nic Holding”, “Tullari”, por edhe “Dilloni Benz”, pronë e Fadil Berjanit, kryetar aktual i Shoqatës së Naftëtarëve të Kosovës.

Në listën e borxheve prej rreth 75 mijë euro është edhe kompania “Petrol Oti Slovenia”, pronë e Nazmi Bytyqit, ish-kryetar i Shoqatës së Naftëtarëve në vend.

Gazeta Zëri,  19.08.2015

Zgjedhja e Azerbajxhanit për dy projektet e tubacioneve për të transportuar gazin e saj në Evropë do të përqëndrohet në marrjen e kushteve të forta tregëtare thotë ministri i Industrisë dhe Energjisë në Azerbajxhan Natik Aliyev.
West Nabucco dhe Trans Adriatic Pipeline janë dy projekte që ofrojmë rrugë të ndryshme në Evropë për të sjellë gazin nga fushat e Shah Deniz në Detin Kaspik.
“Ka shumë faktorë që ne do të vlerësojnë këto dy projekte, por kryesore tani është ai tregëtar,” tha Alijev , pas takimit homologune tij në Oslo.
“Kompanitë e energjis duhet mbulojnë kostot kapitale … Kjo është shumë e rëndësishme për partnerët e huaj të dhe do të jetë më efektive” thekoi ai.
Gjithçka do të vendoset në pranverën e vitit të ardhshëm në Azerbajxhan. Do të jetë ky vend super i pasur me burime të gazit që do të zgjedhë se me cilin gazsjellës do të sjellë pasurinë e tij natyrore në Evropë: TAP apo Nabuccow
I pari kalon nga fushat e gazit të Azerbaxhanit, në Gjeorgji, Turqi, Greqi, Shqipëri nga ku përmes tubacioneve nënujore në detin Adriatik mbërin në Jug të Italisë dhe që andej në Evropën Perëndimore.
I dyti, Nabucco kalon nga Azerbazhani në Turqi, Bullgari, Rumani, Hungari dhe përfundon në Austri. Projekti TAP ka mbështetjen e SHBA kurse Nabucco atë të BE, me argumentin se përveç Turqisë gazsjellësi do të kalojë në vendet anëtare të BE, gjë që garanton siguri.
TAP ka avantazhin e kostos: ndërtimi i tij e ka koston 13 herë më të ulët se Nabuco. Kohët e fundit ky projekt shënoi edhe një avantazh tjetër: Shqipëria, Greqia dhe Italia, tre vendet nga ku do të kalojë gazsjellësi nënshkruan ne Neë York një memorandum mirëkuptimi, që shënon hapin e parë në nivel politik për të vijuar më pas me analiza teknike për krijimin e kornizës së infrastrukturës së re.
Konsorciumi i investitorëve të projektit TAP përbëhet nga tri kompani të njohura në Evropë: EGL e Zvicrës, Statoil e Norvegjisë dhe EON Ruhrgaz e Gjermanisë.

TV Ora News, 01.05.2013

Do të ishte shumë mirë për të dyja anët nëse Turqia trajton Kosovën si vend për aktivitete të kontraktimit të jashtëm, theksoi dje Ministri Kosovar për Zhvillim Ekonomik, Besim Beqaj, duke shqyrtuar mundësitë e zhvillimit të lidhjeve tregtare me Turqinë.
Kompanitë turke në Kosovë kanë luajtur një rol të rëndësishëm në rindërtimin e vendit, por duhen më shumë investime dhe marrëdhënie më të thella ekonomike, theksoi Ministri Kosovar për Zhvillim Ekonomik, Besim Beqaj.
“Investitori më i madh i huaj në Kosovë është Gjermania. Austria dhe Zvicra janë shumë aktive, po ne dëshirojmë që Turqia të jetë në maje të listës. Ne mendojmë që nëse Turqia trajton Kosovën si vend për aktivitete të kontraktimit të jashtëm, kjo do ishte mirë për të dyja palët,” tha Beqaj për Ditoren Hürriyet në një intervistë në Stamboll.
Beqaj vizitoi kryeqytetin turk, Ankaranë, si dhe Stambollin dhe Bursën javën e kaluar, duke u takuar me zyrtarë të ndryshëm turq.
Kosova dhe Turqia janë duke e negociuar një “marrëveshje asimetrike tregtare” për të përmirësuar partneritetin e tyre ekonomik, për të hapur tregun e Turqisë për produktet e Kosovës, siç janë produktet e industrisë së verërave, e cila është në rritje gjithnjë më të madhe, tha Beqaj.
Turqia ishte një nga shtetet e para që zyrtarisht kanë njohur Kosovën si shtet i pavarur më 2008; Kosova më vonë u bë anëtare në Bankën Botërore dhe FMN më 2009. Sot, ajo njhet nga më se 90 shtete, por nuk është anëtar i OKB-së.
Përderisa ekonomia e saj është në rritje, vendi i 1.7 milionë banorëve është duke bërë përpjekje për të zënë hapin e vendeve tjera të ish Jugosllavisë dhe fqinjit, Shqipërisë, në kuptim të zhvillimit dhe integrimit në Bashkimin Evropian.
Ndihma për infrastrukturën
Beqaj tha se firmat turke kanë ndihmuar ndërtimin e infrastrukturës në Kosovë, duke përfshirë ndërtimin e autostradës 117 kilometërshe që lidhë Kosovën me Shqipërinë, si dhe aeroportin e vetëm të Kosovës, të dyja të ndërtuara nga kompani turke.
“E kemi një konsorcium, Bechtel-Enka – Bechtel nga SHBA-ja dhe Enka nga Turqia – të cilat janë duke e ndërtuar autostradën nga Kosova për në Shqipëri,” theksoi ai.
Një konsorcium francez – turk, Limak& Airports de Lyon, ka fituar tenderin për Aeroportin Ndërkombëtar të Prishtinës. Një tjetër investim i rëndësishëm është bërë nga konsorciumi Limak-Çalık për menaxhimin e kompanisë së shpërndarjes së energjisë në Kosovë për 15 vitet e ardhshme.
“Kompanitë turke duhet të vijnë dhe të prodhojnë në Kosovë. Ne mendojmë se marrëdhëniet po shkojnë mirë, por ne i inkurajojmë kompanitë turke që të themelojnë fabrika prodhimi në Kosovë,” tha ai, dhe shtoi se sektori i tekstilit në veçanti ka pasur të ardhme të ndritshme në vend.

energjia.al, 22.11.2012

Kryeministri Berisha priti sot, një delegacion të Bankës Botërore, të kryesuar  nga zoti Tomasz Telma, Drejtor për Europën dhe Azinë Qendrore.
Zoti Telma e përgëzoi Kryeministrin në emër të Korporatës Financiare Ndërkombëtare (IFC), për rezultatet shumë të mira të arritura në drejtim të mbajtjes së shëndetit të ekonomisë, tërheqjes dhe menaxhimit të investimeve të huaja në Shqipëri. Ai e falënderoi Kryeministrin për bashkëpunimin e suksesshëm që IFC ka pasur vitet e fundit me qeverinë shqiptare dhe sektorin privat, ndërsa shprehu kënaqësinë që IFC është bërë pjesë e këtyre sukseseve. Për këtë, tha zoti Telma, ne do të vazhdojmë përkushtimin për të rritur dhe tërhequr sa më shumë investimet e huaja.
Në këtë kuadër, zoti Telma i prezantoi Kryeministrit progresin e IFC-së në projekte të ndryshme, si në atë të krijimit të partneritetit publik privat për mirëmbajtjen e rrugës së kombit, projekt, i cili në fund të këtij muaji prezantohet në konferencën e investitorëve të mëdhenj të interesuar për këtë garë dhe parashikohet që në fund të vitit kompania fituese të fillojë punën. Gjithashtu, në përfundim e sipër është edhe procesi i privatizimit të katër hidrocentraleve, Bistrica 1, Bistrica 2, Ulzë e Shkopet dhe sipas parashikimit, në tetor do të mbyllen negociatat dhe do të shpallet fituesi i garës. Po ashtu, progres pozitiv ka vlerësimi dhe fizibiliteti përfundimtar për ndërtimin e hidrocentralit të Skavicës. Një projekt tjetër, ku IFC po punon me përkushtim, është ai i mbetjeve urbane, koncesioni i landfillit të Sharrës dhe i një landfilli të ri, projekt që do të ndihmojë në zgjidhjen e problemeve të mbetjeve urbane për Tiranën dhe me perspektivë që të kthehet në projekt rajonal.
Kryeministri Berisha, pasi falenderoi IFC për mbështetjen dhe bashkëpunimin e suksesshëm me qeverinë dhe sektorit privat shqiptar, në rrugëtimin e ndërtimit të një ekonomie të shëndetshme tregu, e ftoi IFC-në të shtonte mbështetjen dhe të përqendrohej në financimin e projekteve të sektorit privat. Shqipëria, tha Kryeministri, është një vend që ofron projekte reale dhe fitimprurëse, të cilat ndihmojnë në vitalizimin e iniciativës private, rritjen e konkurrueshmërisë, garantojnë punësim dhe mbajnë rritjen e qëndrueshme ekonomike. Shqipëria, theksoi Kryeministri, ndryshe nga vendet e eurozonës ka çfarë të ofrojë për të përdorur paratë e bankave. Shqipëria ka projekte në sektorin e energjisë, një sektor vital, me të ardhme e treg të padiskutueshëm. Numri i projekteve për energjinë e rinovueshme, veçanërisht atë ujore është i madh dhe 46 HEC-ve të përfunduara pritet t’u shtohen edhe qindra projekte të tjera, që me ndihmën e financuesve si IFC, kthehen në histori suksesi të padiskutueshme.
Zoti Telma e siguroi Kryeministrin se IFC do të përqendrohet në këtë drejtim dhe tashmë ka filluar bashkëpunimin me një sërë bankash tregtare të Shqipërisë, për t’u dhënë hua për financimin e projekteve energjetike.

energjia.al, 19.06.2012