info@energjia.al

Sekretariati i Komunitetit të Energjisë ka publikuar rishikimin e radhës për Ballkanin Perëndimor duke marrë në analizë ecurinë e modelit të ri të tregut të energjisë, ngritjen e bursës si dhe aspekte të tjera teknike.

Aktualisht Sekretariati është i vendosur që të marrë masa ndaj Shqipërisë për pjesën që ajo nuk ka plotësuar ndërkohë që këtë e bën me dije edhe në raport.

Të rishikohet urgjent vendimi i qeverisë

Reforma në energji është konsideruar nga ana e mazhorancës si një nga arritjet më të mëdha të mandatit të parë qeverisës. Por edhe pse sot kemi një model të ri në letër për tregun sipas Sekretariatit ka disa çështje që duhet të rishikohen me urgjencë.

“Modeli i tregut përfshin strategjinë për promovimin e likuiditetit bazuar në të ashtuquajturat zonat e import/eksportit dhe masa të tjera të përkohshme deri në zbatimin e plotë të modelit. Ky i fundit parashikon edhe pjesëmarrjen e detyrueshme të lojtarëve kryesorë në mënyrë graduale.  Në të njëjtën kohë vendimi i Këshillit të Ministrave që vendos Shërbimin e Detyrueshëm Publik pengon hapjen e tregut dhe likuiditetin e tregut shqiptar të energjisë. Duhet të rishikohet në mënyrë urgjente” thuhet në raport.

Përveç kësaj Sekretariati sjell në vëmendje se , marrëveshjet dypalëshe mes KESH dhe OSHEE si dhe procedura për prokurimin e energjisë për mbulimin e humbjeve nga operatorët e transmetimit dhe shpërndarjes shkelin ligjin e Komunitetit të Energjisë (si dhe ligjin kombëtar). Sekretariati aktualisht po përgatit masën e tij për këtë shkelje.

 Bursa e energjisë

Edhe pse pati një këmbëngulje të madhe se Bursa e Energjisë do të ishte shpëtimi në disa aspekte për sektorin e energjisë duket se edhe vetë sekretariati i Komunitetit të Energjisë ka rezervat e tij që ajo do të fillojë të funksionojë brenda afatit të parashikuar që është 1 janari 2018.  Gjasat janë që ky afat të shtyhet sepse ende ka shumë për t’u bërë ndërkohë që ka një ngërç ligjor.

“Këshilli i Ministrave adoptoi një model tregu që definon një plan veprimi mbi krijimin e një tregu energjie. Sipas këtij plani, Ministri duhet të kishte vendosur mbi këtë person juridik dhe strukturën e tij para 31 marsit 2017. Bursa e energjisë duhet të jetë plotësisht operacionale brenda 1 janarit 2018. Kjo ende nuk ka ndodhur dhe me shumë mundësi nuk do të ndodhë në kohën e paracaktuar” vlerëson Sekretariati.

Revista Monitor,  31.08.2017

Ka kaluar pak më shumë se një vit nga fillimi i ndërtimit të Trans Adriatik Pipeline, gazsjellësit (pjesë e Korridorit Jugor të Gazit me vlerë 45 miliardë dollarë) që parashikohet të plotësojë nevojat për gaz natyror në Europë nga fushat e Azisë Qendrore. Kështu e nis artikullin e fundit Pipeline&Gas Journal, një nga revistat e rëndësishme amerikane të specializuara në këtë sektor.

Ky do të jetë një ndër gazsjellësit europianë më të mëdhenj dhe strategjikë që do të lidhë konsumatorët në Itali dhe Ballkan, me gazin që do të vijë nga fushat azere përmes Detit Kaspik. Pas përfundimit, TAP do të transportojë gaz natyror nga fushat e Shah Deniz II në Azerbajxhan për në Europë, përmes 878 km tubacione që do të lidhen me Trans Anatolian Pipeline (TANAP) në kufirin turko-grek në Kipoi.

Më pas do të përshkojë Greqinë, Italinë dhe detin Adriatik, ndërsa TANAP do të përshkojë Turqinë, Gjeorgjinë dhe Azerbajxhanin, si dhe do të shërbejë si një ndërlidhje mes Greqisë dhe Bullgarisë.

Kapaciteti fillestar do të jetë 10 miliardë metër kub gaz, sasi e cila mund të dyfishohet dhe kjo do të kërkojë ngritjen e dy stacioneve të kompresorëve.

TAP do të nisë në kufirin turko-grek. Në Shqipëri, ai do të arrijë pikën më të lartë në 1,800 metra mbi nivelin e detit, ndërsa do të futet nën ujë në Adriatik, në pikën më të ulët në 820 metra, duke dalë më pas në San Foca, afër pjesës jugore të Italisë, në Brindisi.

Në Itali, TAP do të transportojë 8 miliardë metër kub gaz, kryesisht për tregun e brendshëm, por sasi do të ofrohen edhe për Austrinë, jugun e Gjermanisë, si dhe Zvicrën.

Gazsjellësi parashikohet të ketë një jetëgjatësi prej 50 vitesh. Ndërsa kapaciteti depozitues prej 8.5 mld metër kub në Shqipëri do të ndihmojë për zhvillimin e mëtejshëm të TAP, për gazifikimin e vendit, si dhe për të rritur garancinë për diversifikimin e burimeve energjetike të Europës Juglindore.

Investitorët e TAP parashikojnë që projekti të kushtojë 5.7 miliardë euro (6.3 mld dollarë). Furnizuesi, konsorciumi Shah Deniz ka nënshkruar një marrëveshje 25-vjeçare shitjeje me tetë kompani europiane për sasinë fillestare 10 mld/m³, nga të cilat 8 mld/m³ do të transportohen në Itali, ndërsa pjesa tjetër do të ndahet në mënyrë të barabartë mes Greqisë dhe Bullgarisë.

Zbatuesit e projektit janë të vetëdijshëm për sfidat që kanë të tria vendet nga ku kalon: Shqipëria, Greqia dhe Italia.

Në Shqipëri, pika më e lartë është 1,800 metra dhe kjo është një sfidë më vete, duke qenë se në këtë lartësi do të duhet të kalojnë makinat e rënda, si dhe tubat që peshojnë më shumë se 16 tonë. I tillë do të jetë edhe ndërtimi i stacionit të kompresorëve në Fier, ku kërkohet që të vendosen më shumë se 4,000 blloqe guri në thellësi 15 metra.

Gjatë ndërtimit, si në Greqi ashtu edhe në Shqipëri janë konstatuar gjetje arkeologjike që tregojnë për vendbanime e varreza të hershme. Në Itali, një nga sfidat më të mëdha është zhvendosja dhe më pas rivendosja në vendin e origjinës së 2,000 pemëve të ullirit, si dhe ndërtimi i mikrotunelit 1.5 km.

Përfitimet e Shqipërisë

Shqipëria, rreth 90% të energjisë, e siguron nga burimet hidrike. Kur Shqipëria të lidhet me TAP, qeveria parashikon që kërkesa për gaz të arrijë në rreth 1.8 mld m³/vit, shifër e cila mund të rritet me ngritjen e rrjetit të gazit në vend.

Nga ana tjetër, Shqipëria do të jetë pika lidhëse me një gazsjellës tjetër, IAP, që do të jetë 516 km, përmes të cilit do të lidhen edhe vendet e tjera të Ballkanit, si: Bosnjë dhe Hercegovina, Serbia, Kosova, Mali i Zi dhe Kroacia. Në këtë mënyrë, këto vende do të mund të reduktojnë varësinë ndaj gazit rus dhe të plotësojnë një rrjet gazi unazor rreth Adriatikut.

Përfitimet e Greqisë

Greqia është krejtësisht e varur nga importet e gazit natyror. Rreth 60% të kërkesave i plotëson nga Gazprom, ndërsa 40% vijnë me cisterna nga Algjeria, Katari dhe Nigeria, si dhe nga gazsjellësi që e lidh me Turqinë.

Me rritjen e kërkesës për gaz, importet u rritën nga 2.4 miliardë euro në vitin 2003 në 3.6 miliardë euro në vitin 2016, sipas Eurostat. TAP do të ndihmojë në plotësimin e kërkesës që po vjen në rritje dhe do të nxisë zhvillimin ekonomik. Fondacioni i Greqisë për Kërkime Ekonomike dhe Industriale (IOBE) bën të ditur se TAP do të gjenerojë 33-36 miliardë euro për ekonominë greke gjatë jetëgjatësisë së tij. Falë TAP, Greqia mund të bëhet një qendër energjetike për një ndërlidhje të mundshme me Bullgarinë dhe Rumaninë.

Përfitimet e Italisë

Sipas Eurostat, gazi natyror plotëson 34% të konsumit total të energjisë së Italisë dhe importi arrin në 61.4 mld m³/vit, duke zënë 90% të nevojave të Italisë, e cika importon rreth 43% të gazit nga Rusia nëpërmjet Ukrainës. Furnizuesi i dytë më i madh është Algjeria, e cila e dërgon gazin në Itali nëpërmjet Tunizisë.

Paqëndrueshmëria sociale dhe ekonomike shpesh kërcënon këto furnizime, gjë e cila mund të ndodhë edhe në të ardhmen. Kërkesa për gaz parashikohet të arrijë rreth 73 mld m³/vit deri në vitin 2023. Pikërisht gazi që do të transmetohet nga TAP do të rrisë edhe konkurrencën për kompaninë kryesore në treg që është Eni dhe zotëron 83% të tregut me shumicë. Rritja e konkurrencës do të ndihmojë në uljen e çmimeve të gazit.

Në vija të përgjithshme mund të thuhet se TAP do të ofrojë burime të reja dhe të diversifikuara, rritje të konkurrencës dhe reduktim të varësisë së Europës Jugore nga gazi rus.

Revista Monitor,  07.08.2017

Komiteti i Përbashkët Mbikqyrës i Ministrave të OPEC-ut dhe jo OPEC-ut vendosi zgjatjen e Deklaratës së Bashkëpunimit, e njohur dhe si “Marrëveshja e Naftës”, deklaroi ministri rus i Energjisë, Alexander Novak, pas takimit të martën të këtij Komiteti në Shën Petërburg.

Ministri saudit i Energjisë Khalid Al-Falih tha se në bazë të marrëveshjes u tërhoqën nga tregu mbi 350 milion fuçi naftë, gjë që ndikoi në qëndrueshmërinë dhe ribalancimin e tregut.

Sipas ministrit rus Novak, nëse do të jetë e nevojshme marrëveshja do të shtyhet deri pas tremujorit të parë të vitit 2018.

Në fund të vitit 2016, vendet e OPEC-ut dhe jashtë kësaj organizate ranë dakord për tërheqjen nga tregu të 1.8 milion fuçive të naftës, për një periudhë 6 mujore, me synim rritjen kërkesës dhe të çmimit. Më pas u vendos zgjatja me 9 muaj e marrëveshjes, deri në fund të marsit të vitit 2018.

Agjensia e lajmeve ekonomia,  25.07.2017

Sektori i derivateve të naftës, i njohur dhe si tregu më fitimprurës në Kosovë, karakterizohet me parregullsi të shumta, që nga importi e deri të shitja më pakicë e këtij produkti.

Kosova nuk posedon rafineri të derivateve të naftës, kështu që ky produkt pothuajse më i kërkuari në Kosovë, importohet nga vendet e rajonit dhe të Evropës. Kurse, janë evidentuar edhe raste të kontrabandës me naftë dhe derivate të saj në pjesën veriore të Kosovës, në kufirin me Serbinë.

Shoqata e Naftëtarëve të Kosovës, shumë herë ka shfaqur shqetësimin se 97 për qind e naftës që hyn në Kosovë nuk kontrollohet, po vetëm bëhet përshkrimi i analizave.

Fadil Berjani, kryetar i kësaj shoqate tha për Radion Evropa e Lirë se vazhdimisht është kërkuar që kontrolli i cilësisë së derivateve të naftës të realizohet qysh në pikat kufitare.

“Karburantet e lëngëta të naftës janë duke hyrë në Kosovë me cilësi të dobët, dhe është duke u manipuluar me këtë produkt nëpër pikat e karburanteve brenda territorit të Kosovës. Për këtë problem duhet të merren masa sa më shpejtë që është e mundur”, tha Berjani.

Në përpjekje për të përmirësuar dhe vendosur rend në sektorin e naftës, Ministria e Tregtisë dhe Industrisë në muajin shkurt të këtij viti, ka miratuar një Udhëzim Administrativ për Cilësinë e Karburanteve të Lëngëta të Naftës, në bazë të të cilit monitorimi i cilësisë së karburanteve bëhet në pikat doganore dhe jo nga trupat inspektues, pasi që nafta të ketë hyrë në tregun e Kosovës.

Për shkak të dyshimit të cilësisë së naftës, ka disa ditë që mbi 40 maune me këtë produkt janë bllokuar në terminalin doganor në Morinë. Në një përgjigjeje për Radion Evropa e Lirë, zëdhënësi i kësaj agjencie, Adriatik Stavileci tha se që nga marrja e përgjegjësisë, sipas udhëzimit administrativ, Dogana ka aplikuar sistemin e kontrolleve të bazuara në analizat e riskut.

Rasti i fundit, thotë ai, është ndërlidhur më tejkalimin e parametrave të lejuar për disa dërgesa të naftës.

“Sipas analizave, tejkalimi i parametrave është shumë i lartë, prandaj mostrat janë dërguar edhe një herë për super analizë në një laborator jashtë shtetit të Kosovës”, tha Stavileci.

Maunet e bllokuara në kufi, u përkasin tri kompanive që në Kosovë konsiderohen më të mëdhatë në këtë sektor.

Ky rast është shqetësues, thotë Fadil Berjani, duke mos i siguruar klientët për cilësi të naftës në tregun e Kosovës, e cila importohet nga vende te ndryshme të Evropës.

“Kjo tregon për mallin e dyshimtë. Do të thotë, bllokohen mbi 30 autobote, të gjitha kanë dalë jo konform ligjeve. Kjo është shqetësuese. Pikat karburanteve në brendi të territorit të Kosovës nuk janë duke e përzierë derivatin, por derivati po hynë me cilësi të dobët”, tha Berjani.

Në anën tjetër Lulzim Syla, kryeinspektor i Tregut në kuadër të Ministrisë se Tregtisë dhe Industrisë, thotë se kompetent për kontroll të cilësisë së naftës në kufi është Dogana e Kosovës, kurse inspektorati i MTI-së është kompetent për monitorimin e cilësisë së naftës brenda tregut të Kosovës.

Ai tregon se ky trup inspektues, vazhdimisht kontrollon tregun për parregullsi eventuale. “Ne si inspektorë të Ministrisë së Tregtisë dhe Industrisë, vitin e kaluar kemi marrë rreth 580 mostra, nga ky numër 34 kanë dalë jo konform udhëzimit administrativ. Problemi më i madh, ka qenë jo me sulfurin, por më pikën e ndezjes. Mirëpo, sido që të jetë, një parametër sa do i vogël që devijon, ne si Inspektorat jemi të detyruar ta procedojmë lëndën në gjykatat kompetente”, thotë Syla.

Cilësia e dobët e derivateve të naftës, mungesa e territoreve të lira për të vepruar, krijimi i privilegjeve për kompani të caktuara të naftës, moskontrollimi gjithnjë me rastin e zhdoganimit të këtij produkti, mosfiskalizimi i këtyre operatorëve ekonomikë, që llogariten me qarkullim milionësh, janë vetëm disa nga parregullsitë që përmenden vazhdimisht në këtë sektor.

Telegrafi,  24.07.2017

Projekti i gazsjellësit Trans Adriatic Pipeline (TAP) do të kontribuojë në rritjen e burimeve të energjisë në rajonin e Europës Juglindore, bëjnë të ditur për agjencinë e lajmeve ‘Trend’ burime pranë Komisionit Europian.

“Në mbështetje të furnizimit të qëndrueshëm me energji, TAP në mënyrë të veçantë do të kontribuojë në integrimin e tregut të gazit në Europën Juglindore dhe të sigurojë konkurrencë në ato zona ku çmimet e gazit janë më të larta sesa në pjesën tjetër të Bashkimit Europian. Kjo do të ndihmojë në kalimin nga teknologjitë më ndotëse (qymyri) tek ato më të pastra (gazi) në rajon”, tha zyrtari i KE-së.

Përfaqësuesi i Komisionit Europian tha se TAP ka realizuar në mënyrë rigoroze atë që njihet si Vlerësimi i Ndikimit Mjedisor dhe Social (Environmental and Social Impact Assessment).

Ky është një standard ligjor europian, por edhe një parakusht për përfshirjen në projekt të Bankës Europiane për Investime (BEI), por edhe për bankat e tjera zhvilluese që mund të financojnë projektin.

Projekti TAP ka investuar kohë dhe burime për te garantuar komunikimin efikas me këdo që mund të ndihet potencialisht i shqetësuar nga ndërtimi. Përmes studimeve dhe analizave janë përcaktuar rrugët për të minimizuar ndikimet e mundshme që projekti mund të ketë përgjatë rrugës. Komisioni mbështet TAP në këto përpjekje. Për shembull, një pjesë e aktiviteteve të zhvillimit të vazhdueshëm të projektit që kontribuojnë në mbrojtjen e trashëgimisë kulturore përgjatë rrugës së këtij tubacioni në Greqi është bashkëfinancuar nga Komisioni përmes një granti në kuadër të programit Connecting Europe Facility”, – tha zyrtari europian për agjencinë e lajmeve Trend.

Gazsjellësi TAP është pjesë Korridorit Jugor të Gazit, një projekt prioritar energjetik për Bashkimin Europian.

Revista Monitor,  20.07.2017

Prodhuesit globalë të makinave i kanë bërë thirrje Kinës që të vonojë dhe zbusë kuotat për shitjet e makinave elektrike atje, duke thënë se propozimet e vendit do të jenë të pamundura për tu arritur dhe do të ndërpresin ashpër bizneset e tyre.

Në përpjekje për të luftuar ndotjen e mjedisit, Kina po planifikon të caktojë objektiva për makinat elektrike, në mënyrë që të zënë rreth 20% të shitjeve deri në vitin 2025, me një sistem të ashpër të kuotave që nis që në 2018-ën.

Pekini e sheh këtë politikë si një mjet për të ndihmuar industrinë vendase të automjeteve që të konkurrojë me rivalët e huaj, që kanë eksperiencë më të madhe në motorët me djegie. Rregullat e reja strikte, shtuar planet e ashpra për gjoba ndaj moszbatimit të tyre, si anulimi i licencave për të shitur makina jo-elektrike në Kinë, ka mundësi të shkaktojë një goditje të fortë ndaj prodhuesve në këtë treg.

Pavarësisht se Kryeministri Li Keqiang dhe kancelarja gjermane Angela Merkel ranë dakord muajin e kaluar se do të ketë lehtësime, Ministria e Industrisë dhe Teknologjisë së informacionit në Kinë, publikoi më vonë regulloret që mbështesin kuotat e ashpra të shitjeve.

Revista Monitor,  17.07.2017

Prodhuesit globalë të makinave i kanë bërë thirrje Kinës që të vonojë dhe zbusë kuotat për shitjet e makinave elektrike atje, duke thënë se propozimet e vendit do të jenë të pamundura për tu arritur dhe do të ndërpresin ashpër bizneset e tyre.

Në përpjekje për të luftuar ndotjen e mjedisit, Kina po planifikon të caktojë objektiva për makinat elektrike, në mënyrë që të zënë rreth 20% të shitjeve deri në vitin 2025, me një sistem të ashpër të kuotave që nis që në 2018-ën.

Pekini e sheh këtë politikë si një mjet për të ndihmuar industrinë vendase të automjeteve që të konkurrojë me rivalët e huaj, që kanë eksperiencë më të madhe në motorët me djegie. Rregullat e reja strikte, shtuar planet e ashpra për gjoba ndaj moszbatimit të tyre, si anulimi i licencave për të shitur makina jo-elektrike në Kinë, ka mundësi të shkaktojë një goditje të fortë ndaj prodhuesve në këtë treg.

Pavarësisht se Kryeministri Li Keqiang dhe kancelarja gjermane Angela Merkel ranë dakord muajin e kaluar se do të ketë lehtësime, Ministria e Industrisë dhe Teknologjisë së informacionit në Kinë, publikoi më vonë regulloret që mbështesin kuotat e ashpra të shitjeve.

Scan TV,  18.07.2017

Çmimet e naftës e kanë nisur sesionin e sotëm në marshim, duke u ngjitur mbi 1.5%.

Trajektorja e re e çmimeve merr shtysë nga të dhënat e fundit që tregojnë një rënie të prodhimit global.

Qeveria amerikane ka ulur ndjeshëm projeksionet e prodhimit për vitin e ardhshëm. Të njëjtën gjë, ka bërë edhe agjencia ndërkombëtare  e energjisë.

Në çelje të sesionit të sotëm, nafta Brent e Londrës kuotohej pranë nivelit të 48.12 dollarëve për fuçi, ndërsa ajo bruto amerikane pranë 45.72 dollarëve për fuçi.

Të dy benchmarkët u rritën me 1.4% gjatë sesionit të djeshëm. Tashmë situata në tregun fizik është përmbysur e me shumë gjasa, çmimet do të testojnë sërish nivelin e 50 dollarëve për fuçi.

Scan Tv,  13.07.2017

Rivënia e në punë e rafinerisë së ARMO-S, ka sjellë një ekspansion në konsumin e naftës së prodhuar në vend. Sipas të dhënave konfidenciale nga doganat përgjatë pesë mujorit, konsumi i naftës në treg arriti 207 mijë tonë me një rritje 6.2 % më shumë se një vit më parë.

Në këtë sasi mbi 72 mijë tonë naftë e prodhuar nga rafineritë vendase, kryesisht ARMO dhe mbi 135 mijë tonë janë importi. Zhdoganimet e karburanteve shihet të kenë rënë me rreth 30 për qind për 5 mujorin si pasojë e furnizimit të tregut me naftë e vendit.

Në shtator të vitit të kaluar, Jonian Refining dhe Trading Co. –IRTC SH.A ka marrë në shfrytëzim rafinerinë problematike të naftës, ARMO. Kompania rezulton e regjistruar off-shore në ishujt britanikë Virgin.

Në të njëjtën periudhë, prodhuesi më i madh i naftës në vend Bankers Petroleum njoftoi se nënshkroi një marrëveshje me Jonian Refining dhe Trading për t’i shitur asaj deri në 65% të prodhimit të naftës bruto tek IRTC.

Ndryshimi ishte i dukshëm në muajt e parë të këtij viti, ku nafta vendase plotëson një të tretën e nevojave të tregut, duke zëvendësuar importet.

Por përdorimi kaq masiv i naftës vendase ka krijuar shqetësim tek konsumatorët nëse cilësia është në nivele të pranueshme për t’u përdorur nga automjetet. Numri i lartë i makinave që nxjerrin tym të zi është dukshëm i verifikueshëm me sy të lirë kudo në rrugë.

Ministria e Energjetikës, e cila mbikëqyr dhe rregullon ligjërisht të gjithë zinxhirin, thotë se cilësia duhet të përmbushet, por nuk e pohon faktin se a zotërohet realisht cilësia.

Sipas ligjit, tregtimi i nënprodukteve të naftës bruto nga rafineritë kryhet vetëm pas certifikimit që bën inspektorati Qendror Teknik (tanimë quhet inspektorati Shtetëror Tekniko-Industrial). Në çdo rast, tregtimi i diezelit 10 ppm në Shqipëri, duke filluar nga 1 janari 2009 (në bazë të V.K.M nr. 147, datë 21.03.2007) duhet të realizohet vetëm në bazë të standardit në fuqi të BE-së, i cili është EN 590. Pra, pavarësisht origjinës së diezelit 10 ppm (importi ose prodhimi vendas), ai duhet të plotësojë të gjithë kërkesat e standardit në fuqi, ka sqaruar më herët për Monitor Ministria e Energjitikës.

Norma e lejuar e squfurit është 10%, por kontrollet e IQT kanë konstatuar se kjo normë, në disa raste në pikat e pakicës, është edhe 200%, ndërsa pika e flakërimit, në rastin më të mirë ka rezultuar 44 nga 55 që është norma. Ekspertët e fushës shpjegojnë se kjo ndodh me abuzimin që krijohet nga tregtimi i naftës vendase. Për të ulur nivelin e squfurit, rafineritë përdorin shumë hollues, i cili më tej dëmton pikën e flakërimit.

Por puna është se edhe shumë pika të tjera të pakicës e shesin naftën e vendit, por e deklarojnë për naftë importi. Kjo tashmë është vërtetuar nga inspektorati Qendror Teknik, i cili ka penalizuar më shumë se qindra subjekte dy vitet e fundit.

Revista Monitor,  20.06.2017

Panasonic do të fillojë të shesë në Mbretërinë e Bashkuar dhe Austri sistemet e tij rezidenciale për ngrohjen me hidrogjen.

Shitjet do të nisin në Gusht përmes partnerit gjerman Viessman Group në përpjekje për të forcuar rolin e liderit në produktet e kësaj kategorie, të cilët disa i shohin një gur themeli për përdorimin e hidrogjenit si karburanti i së ardhmes.

Qelizat e karburantit me hidrogjen, të njohura në Japoni si ene-farm, premtojnë një revolucion në mënyrën se si energjia shpërndahet në shtëpitë tona. Ato përdorin gazin natyror në një qelizë karburanti që përdor një procesor për të nxjerrë hidrogjenin.

Hidrogjeni më pas përzihet me oksigjenin në ajër dhe prodhon elektricitet, ndërsa nxehtësia e tepërt përdoret për të furnizuar shtëpinë me ujë të ngrohtë.

Në vitin 2014, Gjermani u bë tregu i parë i huaj për Panasonic në shitjen e qelizave të karburantit përmes partneritetit me Viessmann, një prodhues gjerman i pajisjeve të ngrohjes. Vetëm vitin e kaluar u shitën 1 mijë njësi të tilla dhe ato Panasonic përbëjnë pjesën më të madhe.

Kompania japoneze e bazuar në Osaka synon të shesë dhjetëra mijëra njësi në Europë deri në vitin 2020.

Në Japoni, Panasonic përbën gjysmën e 200 mijë njësive të shitura, por vështirësitë financiare të Toshibas pritet ta fuqizojnë edhe më shumë.

Scan Tv,  19.06.2017