info@energjia.al

Çmimet e naftës janë stabilizuar pranë nivelit më të lartë në 2 vitet e fundit, ndërsa një mbështetje të lehtë po e gjejnë nga vendimi i OPEC, Rusisë dhe vendeve të tjera prodhuese për të ulur prodhimin. Nafta Brent e Londrës po tregtohet pranë 63.6 dollarëve për fuçi, ndërsa nafta Bruto amerikane tregtohet pranë 56.8 dollarëve për fuçi.

Tregtarët shprehen se, rritja me rreth 40% e çmimeve që nga korriku i këtij viti mund të ketë marrë fund, për shkak të rritjes së eksporteve nga Shtetet e Bashkuara të Amerikës dhe disa shenjave për ngadalësimin e kërkesës.

Edhe fakti që çmimet vazhdojnë të mbështetet lehtë nga vendimi për uljen e prodhimit, nënkupton se nuk ka zhvillime madhore që mund të mbështesin tendencën në rritje. Në takimin e datës 30 nëntor, OPEC do të diskutojë politikën e ardhshme të naftës, ndërsa marrëveshja për uljen e prodhimit skadon në mars të 2018.

Ndërkohë, rezervat e naftës bruto në SHBA u rritën me 2.2 milionë fuçi në ditë, gjatë javës që u mbyll më 3 nëntor, në totalin e 457.14 milion fuçive, deklaroi Administrata për Informimin mbi Energjinë. Ndërsa analistët parashikonin një rënie me 2.9 milionë fuçi. Në anën tjetër, prodhimi u rrit me 67 mijë fuçi në ditë, në totalin e 9.62 milionë fuçive, që është një niveli rekord.

Scan Tv,  10.11.2017

Çmimet e naftës janë rritur në sesionin e fundit të javës, të mbështetur nga ulja e prodhimit nga vendet anëtare të OPEC dhe vendeve të  tjera që nuk janë pjesë e organizatës. Gjithashtu, edhe kërkesa e fortë po ndikon në rritjen e çmimeve.

Kontratat “futures” të naftës Brent të Londrës po tregtohen në rreth 60.8 dollarë për fuçi, ndërsa që nga niveli minimal i këtij viti, të prekur në qershor, nafta Brent është rritur me rreth 37%. Nafta Bruto amerikane po tregtohet në 54.8 dollarë për fuçi.

Optimizmi në treg është mbështetur nga Organizata e Vendeve Eksportuese të Naftës, OPEC, dhe prodhuesve të tjerë, duke përfshirë edhe Rusinë, që ranë dakord të ulin prodhimin me 1.8 milionë fuçi në ditë.

Në anën tjetër, edhe kërkesa është rritur ndjeshëm, sidomos nga Kina, që preku nivelin e 9 milionë fuçive në ditë, duke tejkaluar edhe Shtetet e Bashkuara të Amerikës, si konsumatori më i madh në botë i naftës bruto.

Gjithashtu, edhe rezervat globale të naftës po regjistrojnë rënie,  në mënyrë të veçantë në SHBA. Në anën tjetër, Administrata për Informimin mbi Energjinë deklaroi se, gjatë kësaj jave eksportet e naftës në SHBA u rritën në një rekord prej 2.1 milionë fuçi.

Scan Tv,  04.11.2017

Çmimet e naftës po shfaqen të qëndrueshme në sesionin e sotëm, ndërsa tendenca është në rënie të lehtë, pasi ulja e prodhimit nga OPEC dhe vendet e tjera, është zbehur nga rritja e prodhimit në Shtetet e Bashkuara të Amerikës.

Nafta Brent e Londrës po tregtohet në rreth 60.5 dollarë për fuçi, ndërsa në sesionin e së mërkurës u rrit deri në 60.7 dollarë për fuçi, niveli më i lartë që nga korriku i vitit 2015.

Ndërkohë, nafta Bruto amerikane po tregtohet në rreth 54.4 dollarë për fuçi, rreth 30% më lart se niveli minimal të regjistruar në mes të muajit qershor të këtij viti.

Besimi i investitorëve është përmirësuar nga përpjekjet e OPEC për të ulur prodhimin me 1.8 milionë fuçi në ditë, deri në mars të vitit 2018. Ministri i Energjisë në Arabinë Saudite deklaroi se, kërkesa dhe oferta po balancohen, ndërsa rezervat globale të naftës po shënojnë rënie.

Përsa i përket të dhënave të tjera, prodhimi i naftës nga Rusia u rrit në 10.93 milionë fuçi në ditë gjatë tetorit, nga 10.91 milionë që ishte në shtator.

Gjatë muajit tetor, çmimet u mbështetën edhe nga rënia e rezervave tregtare të naftës në SHBA. Rezervat e naftës në ekonominë më të madhe në botë ranë me 2.4 milionë fuçi, gjatë javës që u mbyll më 27 tetor, referuar të dhënave të Administratës për Informimin mbi Energjinë.

Scan Tv,  02.11.2017

Ministria e Infrastrukturës dhe Energjisë në bashkëpunim me Bankën Evropiane për Rindërtim dhe Zhvillim organizuan sot një tryezë dialogu me grupet e interesit rreth garave konkurruese për kapacitetet e reja në energjinë diellore.

Në fjalën e tij, Ministri i Infrastrukturës dhe Energjisë Damian Gjiknuri deklaroi se energjia diellore është një burim jashtëzakonisht i rëndësishëm edhe për Shqipërinë, për shkak të pozicionit gjeografik të vendit dhe ekspozimeve që ka ndaj rrezatimit diellor.

“Nxitja e këtyre investimeve bëhet domosdoshmëri edhe nisur nga fakti se jemi aktualisht 100% të varur nga energjia ujore. Ligji i ri për energjitë e rinovueshme dhe plani kombëtar i qeverisë për promovimin e këtyre burimeve po hedh hapat e para duke shtruar platformën operacionale dhe ligjore për të konkretizuar investimet e para”, u shpreh Gjiknuri.

Në bashkëpunim me BERZH-in tha ai, po punohet që 30 deri 50 mega të jepen mbi bazën e ankandeve, duke afruar investitorë seriozë por edhe të marrim tarifa të përballueshme.

Sipas ministrit Gjiknuri, sfida me të cilën ndeshemi është se si ta kthejmë këtë në një proces të qëndrueshëm.

“Që kapacitetet që jepen të jenë në një treg të konkurueshëm, por mbi të gjitha të kenë një treg likuid që bën të mundur kthimin e investimit. Kjo do të thotë që jo çdo burim diellor mund të kthehet në burim energjie për aq kohë sa në një  treg të rregulluar siç jemi ne, ato paguhen nga konsumatori final. Në hapin tonë të parë zgjodhëm të promovojmë 50 mega në energji diellore e cila mund të jetë pak në fillim por është e mjaftueshme dhe qëndrueshme në tarifat që kemi sot në fuqi”, nënvizoi Gjiknuri.

Duke u ndalur më tej tek plani i mëtejshëm i rimëkëmbjes së sektorit elektroenergjitik, Gjiknuri tha se shumë shpejt falë rimëkëmbjes do krijohet mundësia për potenciale të reja në energjinë diellore.

“Duhet një qasje e balancuar sepse gjërat që nuk kanë qasje të balancuar shpesh herë përfundojnë në inflacion që i bën të paqëndrueshme nga ana financiare. Nëse nuk ka treg likuid që do ta tërheqë këtë energji, këto mund të kthehen në një problem të madh siç ka ndodhur në vendet e tjera”, u shpreh Gjiknuri.

Ora News,  24.10.2017

Operatori i Shpërndajres së Energjisë ka hapur procedurën për blerjen e energjisë për 6 ditët e fundit të tetorit. Sipas njoftimit të kompanisë, palët e interesuara duhet të dorëzojnë ofertat brenda ditës së sotme (23 tetor) dhe këto të fundit duhet të jenë të vlefshme deri në 24 tetor kur do të mbyllen edhe kontratat. Periudha e lëvrimit do të jetë 26-31 tetor.

Konkretisht OSHEE po kërkon oferta për dy lote ku i pari këkron furnzimin me një fuqi 100 MW dhe një sasi 14 400 Mwh. Koha e lëvrimit do të jetë nga 00:00-24:00. Kurse në lotin e dytë sasia që këkrohet është 25 200Mwh dhe në një fuqi 280 MW në një orar lëvrimi nga 08:00 deri në 22:00, total 15 orë.

OSHEE përmbylli për tetorin në fund të muajit të kaluar procedurën për një sasi 119 040 Mwh energji me një vlerë pak më shumë se 6 milionë euro por duket se  është përballur me surpriza.

Në atë kohë të paktën dy oferta janë shpallur fituese. E para në profil (BAND (00:00 – 24:00) (24 ore) me një sasi 89,280 MWh me çmim mesatar 49.1Eu/MWh dhe  në vlerë 4,383,648 Euro.

E dyta në profil (PEAK (06:00 – 22:00) (16 orë) në një sasi 29,760 MWh me çmim mesatar  57.62Eu/MWh në vlere 1,714,672.00 Euro.

Këto ditë pritet që OSHEE të bëjë edhe shpalljen e procedurës për blerjen e nëntorit në bazë edhe të dakordësisë që ka mr KESH për pjesën që do të plotësojë vetë Korporata.

Revista Monitor,  24.10.2017

Kërkesat botërore për benzinë mund të arrijnë maksimumin edhe për 13 vite, kjo falë ndikimit që do të kenë makinat elektrike me motorët efikasë. Kështu parashikojnë ekspertët e energjisë, të cilët pohojnë se kërkesat pritet të ulen ndjeshëm pas vitit 2025.

Të dhënat janë bërë publike nga “Wood Mackenzie”, kompania e hulumtimit për çështjet e energjisë, me bazë në Britani të Madhe, ku më tej shkruhet:

“Kërkesa botërore për benzinë do të arrijë maksimumin në 13 vite, falë ndikimit të makinave elektrike dhe motorëve më efikasë. Futja e automjeteve elektrike do të ulë ndjeshëm kërkesën e benzinës, sidomos pas vitit 2025. Një raport i ri nga analistët sugjeron se kërkesa globale të benzinës pritet të arrijnë deri në vitin 2030”, thuhet në raport.

Britania e Madhe dhe Franca kanë thënë kohët e fundit se do të ndërpresin shitjet e makinave të reja me benzinë dhe naftë deri në vitin 2040. Kina, tregu më i madh në botë i makinave, po shqyrton një veprim të ngjashëm, i cili do të ketë një ndikim të rëndësishëm në kërkesën e naftës.

Scan Tv,  20.10.2017

Agjencia Ndërkombëtare e Energjisë raportoi se kërkesa dhe oferta globale e naftës do të arrijë në ekuilibër vitin që vjen, për shkak se rritja e konsumit do të ndihmojë në uljen e inventarëve gjigantë si dhe do të kompensojë për rritjen e prodhimit.

Në raportin mujor, agjencia me seli në Paris, bëri të ditur se e pret kërkesën botërore për naftë në rritje me 1.6 milionë fuçi në ditë gjatë 2017-ës, duke u tkurrur në 1.4 milionë në vitin që vjen.

“Gjatë 2018-ës, në pjesën më të madhe të vitit, tregu do të jetë i balancuar, duke supozuar se pakti i OPEC për uljen e prodhimit nuk ndryshon dhe duke u bazuar në kushtet normale të motit”,deklaron agjencia.

Inventarët tregtarë kanë rënë për të tretin tremujor këtë vit. Inventarët në vendet e industrializuara ranë me 14.2 milionë fuçi në një total prej 3.015 miliardë për muajin Gusht, duke lënë një suficit prej 170 milionë fuçi sipër mesatares 5-vjeçare, raporton agjencia.

Oferta nga OPEC ishte e pandryshuar në Shtator, në 32.65 milionë fuçi në ditë, që nënkupton se përputhshmëria e kartelit me paktin ka qëndruar në 88% muajin e kaluar dhe në 86% deri më tani për vitin.

“Është bërë punë drejt stabilizimit të tregut, por për të vazhduar në këtë ritëm do të kërkohet më shumë disiplinë në vitin 2018”, deklaron Agjencia Ndërkombëtare e Energjisë.

Scan Tv,  13.10.2017

Çmimet e naftës po qëndrojnë në rritje në sesionin e sotëm, pas deklaratës së OPEC, se tregu po ribalancohet.

Çmimet e naftës janë mbështetur edhe nga mos rifillimi i punës me kapacitet të plotë në rafineritë e Gjirit të Meksikës, për shkak të uraganit Nate.

Nafta Bruto amerikane po tregtohet pranë 50 dollarëve për fuçi, ndërsa nafta Brent e Londrës është ngjitur sërish përmbi 56 dollarë për fuçi. Tregtarët shprehen se, çmimet janë mbështetur nga komentet e Organizatës së Vendeve Prodhuese të Naftës, që deklaroi se, tregu po ribalancohet më shpejt se vlerësimet paraprake.

“Ka shenja të qarta se tregu po ribalancohet”, deklaroi sekretari i përgjithshëm i OPEC, Mohammad Barkindo për Reuters.

“Procesi i uljes së rezervave globale të naftës po vazhdon, ndërsa në anën tjetër, kërkesa po rritet”,shtoi ai. OPEC dhe vendet e tjera prodhuese të naftës janë angazhuar që të ulin prodhimin e naftës me 1.8 milionë fuçi në ditë, deri në mars të vitit të ardhshëm.

Por, në ditët e fundit janë shtuar spekulimet se, kjo marrëveshje mund të shtyhet përtej këtij afati. Ndërkohë, banka JP Morgan shprehet se, tensionet politike, sidomos mes Shteteve të Bashkuara të Amerikës dh Iranit, mund të mbështesin çmimet.

Në terma afatshkurtër, çmimet kanë gjetur një mbështetje edhe nga dëmtimi i prodhimit në Gjirin e Meksikës, për shkak të uraganit Nate. 85% e prodhimit në këtë zonë, ose 1.49 milionë fuçi në ditë, po i mungojë tregut, pasi rafineritë nuk kanë rifilluar punën me kapacitet të plotë.

Scan Tv,  11.10.2017

Çmimet e naftës janë stabilizuar në sesionin e sotëm, të mbështetur nga komentet se OPEC dhe prodhuesit e tjerë, do të ndërmarrin veprime të tjera për të balancuar tregun. Ndërkohë, platformat e prodhimit të naftës në Gjirin e Meksikës rifilluan aktivitetin, pasi uragani Nate, mbylli rreth 90% të aktivitetit në këtë zonë.

Për shkak të informacioneve kontradiktore, analistët shprehet se, nafta po përpiqet të gjejë drejtimin. Organizata e Vendeve Eksportuese të Naftës, OPEC, do të takohet në Vjenë më 30 nëntor, për të përcaktuar politikat e prodhimit në të ardhmen.

Sekretari i Përgjithshëm i OPEC, Mohammad Barkindo, deklaroi se, po zhvillohen diskutime për të shtyrë marrëveshjen për uljen e prodhimit përtej marsit të vitit të ardhshëm. Ai shtoi se, OPEC dhe vendet e tjera që janë pjesë e marrëveshjes, duhet të ndërmarrin disa masa të jashtëzakonshme, për tu siguruar që tregu do të balancohet në terma afatgjatë.

Nafta Brent e Londrës po tregtohet pranë 55.2 dollarëve për fuçi, ndërsa javën e kaluar ra me 3.3%, humbjet më të mëdha javore që nga qershori i vitit 2016. Ndërsa nafta Bruto amerikane po tregtohet pranë 49.2 dollarëve për fuçi. Analistët shprehen se, besimi në tregun e naftës vazhdon të jetë i fortë, dhe pritshmëritë janë për një tendencë në rritje të çmimeve.

Scan Tv,  09.10.2017

Sektori i derivateve të naftës në Kosovë konsiderohet ndër tregjet më fitimprurëse, ndonëse vazhdimisht ka pasur edhe debate të ndryshme rreth mënyrës së importit dhe efikasitetit të kontrollimit dhe cilësisë së këtij produkti në doganat e vendit.

Cilësia e dobët e derivateve të naftës, krijimi i privilegjeve për kompani të caktuara të naftës, moskontrollimi me rastin e zhdoganimit të këtij produkti, janë vetëm disa nga parregullsitë e përmendura në sektorin e derivateve të naftës.

Janë udhëheqësit e Shoqatës së Naftëtarëve të Kosovës ata që flasin për mungesën e kontrollit, duke kërkuar nga Qeveria e Kosovës që të vërë rregull në këtë sektor.

Fadil Berjani, kryetar i kësaj shoqate, thotë për Radion Evropa e Lirë se parregullsitë në këtë sektor, janë të pranishme. Por, sipas tij, me shtimin e kontrollit dhe garantimit të cilësisë do të mund të rregullohej edhe sasia e importit që hyn në Kosovë.

“Unë nuk mund të them se si dhe nga hyn nafta në Kosovë, por kontrabanda me këtë produkt në pjesën veriore, është më e vogël se vitet e kaluara”.

“Konsideroj se me një shtrëngim më të madh gjatë importit dhe verifikimit të sasisë dhe cilësisë, do të ndikohet në shmangien e evazionit fiskal. Evazioni fiskal mund të zbritet edhe më tepër nëse vendoset që në të gjitha kompanitë e derivateve të naftës të instalohen arkat speciale fiskale”, thotë Berjani.

Debatet rreth kontrollit të tregut të naftës janë hapur edhe në Kuvendin e Kosovës. Duke qenë si një prej sektorëve më fitimprurës, janë vetë partitë politike ato që akuzojnë njëra-tjetrën për kontrollin e këtij tregu dhe parregullsitë e vëna.

Një diskutim i ashpër rreth kësaj teme është zhvilluar ndërmjet deputetëve të Partisë Demokratike të Kosovës dhe atyre të Lidhjes Demokratike të Kosovës.

Xhavit Haliti, deputet i Partisë Demokratike të Kosovës, ka pyetur ish- ministren e Tregtisë dhe Industrisë,Hykmete Bajrami, deputete e Lidhjes Demokratike të Kosovës, se kush e kontrollon hyrjen e naftës në Kosovë.

“Rreth naftës që hyn në Kosovë, asnjë ministër nuk ka mundur të tregojë sa evazion fiskal ka Kosova përmes kontrabandës në Kosovë”, është shprehur Haliti.

Ai ka thënë se ministrat e deritashëm, përfshirë edhe Hykmete Bajramin, do të duhej të jepnin përgjegjësi për këto paqartësi.

Në vend të përgjigjes, Hykmete Bajrami kishte konstatuar se kontrollimin e naftësnë Kosovë e ka Partia Demokratike e Kosovës, pjesë e të cilës është Haliti.

“Njerëzit tuaj i kanë udhëhequr doganat me vite dhe ju e dini se kush ka bërë kontrabandë dhe në xhepat e kujt kanë rrjedhë paratë nga kontrabanda”, ka deklaruar Bajrami.

Ndryshe, që nga viti i kaluar, me një vendim të Ministrisë së Tregtisë dhe Industrisë, kompetencat për inspektimin e cilësisë së derivateve të naftës janë bartur te Doganat e Kosovës.

Për të rregulluar sektorin e naftës, Fadil Berjani kërkon nga Qeveria e Kosovës që të miratojë Ligjin e ri për karburantin e naftës.

“Jemi shteti i vetëm në botë që paguajmë licencë për çdo dy vjet. Ka shumë kritere të rëndësishme që mund të rregullohen me ligj. Jemi shteti më i vogël për kokë banori, por shteti më i madh me pika karburanti”, thotë Berjani.

Aktualisht, Kosova nuk posedon rafineri të derivateve të naftës, kështu që ky produkt pothuajse më i kërkuari në vend, importohet nga vendet e rajonit dhe të Evropës. Sipas të dhënave zyrtare, rreth 650 milionë litra është sasia e karburanteve të naftës që brenda një viti hyjnë në Kosovë.

Tema,  08.10.2017