info@energjia.al

Shtetet e Bashkuara rikonfirmuan vendimin për t’u tërhequr nga Marrëveshja e Parisit mbi ndryshimet e klimës.

Departamenti i Shtetit deklaroi se ShBA-ja ka ndërmend të tërhiqet nga Marrëveshja e Parisit menjëherë sapo të jetë e përshtatshme. Një vendim i tillë mund të ndryshojë nëse kushtet e marrëveshjes “do të favorizonin” popullin amerikan.

Komentet u bënë gjatë bisedimeve mbi çështjet klimatike të cilat nisën javën e shkuar në Bon të Gjermanisë.

Siria ndërkohë, ka njoftuar se do të nënshkruajë Marrëveshjen e Parisit. Kështu që Shtetet e Bashkuara mbeten i vetmi vend në botë që hedh poshtë paktin global mbi klimën.

Agjensia e lajmeve ekonomia,  14.11.2017

Komiteti i Përbashkët Mbikqyrës i Ministrave të OPEC-ut dhe jo OPEC-ut vendosi zgjatjen e Deklaratës së Bashkëpunimit, e njohur dhe si “Marrëveshja e Naftës”, deklaroi ministri rus i Energjisë, Alexander Novak, pas takimit të martën të këtij Komiteti në Shën Petërburg.

Ministri saudit i Energjisë Khalid Al-Falih tha se në bazë të marrëveshjes u tërhoqën nga tregu mbi 350 milion fuçi naftë, gjë që ndikoi në qëndrueshmërinë dhe ribalancimin e tregut.

Sipas ministrit rus Novak, nëse do të jetë e nevojshme marrëveshja do të shtyhet deri pas tremujorit të parë të vitit 2018.

Në fund të vitit 2016, vendet e OPEC-ut dhe jashtë kësaj organizate ranë dakord për tërheqjen nga tregu të 1.8 milion fuçive të naftës, për një periudhë 6 mujore, me synim rritjen kërkesës dhe të çmimit. Më pas u vendos zgjatja me 9 muaj e marrëveshjes, deri në fund të marsit të vitit 2018.

Agjensia e lajmeve ekonomia,  25.07.2017

Prodhuesi gjerman i makinave “Daimler”, i dyshuar për fshehjen e nivelit të ndotjes, njoftoi të martën tërheqjen e mbi tre milionë makinave me naftë të markës “Mercedes-Benz” në Europë.

“Për të përmirësuar me efikasitet nivelin e shkarkimeve të gazit të shumë modeleve, ‘Daimler’ ka vendosur të tërheqë vullnetarisht mbi tre milionë automjete ‘Mercedes-Benz”, theksoi në një komunikatë “Daimler”.

Sipas medias gjermane prodhuesi i makinave “Daimler” kishte manipuluar dy modele motorësh për t’i bërë të dukeshin më pak ndotës gjatë kontrolleve, një nismë e ngjashme me kompaninë tjetër gjermane “Volkswagen”.

“Kompania që prej një dekade, nga viti 2008 në 2016, kishte shitur në Europë dhe ShBA automjete me një nivel të lartë shkarkimesh ndotjeje dhe të paautorizuar”, shkruante në editorialin e saj e përditshmja “Suddeutsche Zeitung”, që ka bashkëpunuar me stacionet rajonale NDR dhe WDR për hetimin e rastit.

Agjensia e lajmeve ekonomia,  19.07.2017

Së fundmi, Maqedonia është tërhequr nga planet e saj të mëparshme për të shitur kompaninë shtetërore të prodhimit të energjisë, ELEM, duke këmbëngulur se tani për tani ajo është më mirë në duart e shtetit.

Ky ndryshim i politikave vjen pas pothuajse dy vjetësh, pasi qeveria tha se kishte planifikuar t’ia shiste kompaninë një investitori të huaj – por nuk arriti të zgjedhë një firmë konsulence që do të kishte zgjedhur modelin më të mirë të privatizimit.

“Vlerësimi i tanishëm është, se është në interesin afatgjatë të Maqedonisë nëse ELEM qëndron në pronësi të plotë të shtetit”, thuhet në raportin për punën e qeverisë gjatë tre viteve të fundit, të publikuar së fundmi.

ELEM është një nga kompanitë e fundit më të mëdha shtetërore që nuk është privatizuar në 20 vjet që kur filloi tranzicioni nga ekonomia socialiste në tregun e lirë.

Pas ndarjes në dy të operatorit shtetëror të energjisë ESM, Maqedonia ia shiti në 2006-n rrjetin e shpërndarjes së energjisë, EVN-së austriake. Megjithatë, kompania e prodhimit të energjisë, ELEM, mbeti nën kontrollin e shtetit.

Në maj të 2012-s, përfaqësues të disa kompanive të Katarit erdhën në Maqedoni për të shqyrtuar kushtet financiare dhe potencialin teknik të ELEM.

Qeveria shpresonte për një fitim të konsiderueshëm nga shitja e 49 për qind të aksioneve të kompanisë prodhuese të energjisë, por një marrëveshje e tillë nuk u arrit.

Marrëveshja me Katarin pritej të “sillte të ardhura deri në 1.2 miliardë euro, që do të përdoreshin për ndërtimin e objekteve të reja energjetike dhe që do të përmbushnin, si interesat maqedonase ashtu edhe ato investitore, u shpreh Viktor Mizo, kreu i Drejtorisë për Zonat e Zhvillimit Industrial Teknologjik.

Qeveria tha më pas se do të kërkojë një shërbim konsulence për të gjetur mënyrën më të mirë për të shitur kompaninë – por kurrë nuk e bëri këtë.

Revista Monitor, 07.04.2014