info@energjia.al

Thellohet skandali me kompaninë e nxjerrjes se naftës, Bankers Petrolium. Një tjetër raport i Agjencisë Kombëtare të Burimeve Natyrore ka zbuluar se Bankers ka manipuluar dokumentacionin për të shmangur pagesën e takes se tatim-fitimit edhe për vitin 2012, duke përdorur të njëjtën skemë evazioni si në vitin 2011, vit për të cilin palët do të përballen në Arbitrazh.

AKBN thotë se nga një autidimi i saj rezulton se Bankers Petrolium ka raportuar vetëm humbje në bilancet e saj, vetëm për të mos paguar tatim fitimin në buxhetin e shtetit shqiptar.

Sipas AKBN janë afërsisht 130 milionë dollarë shpenzime të fryra për 2012-ën, e prej nga rezulton të jenë shmangur 30 milion dollarë taksa.

Këto para, në vend që të përfundonin në arkën e shtetit shqiptar, kanë përfunduar ne xhepat e Bankers Petrolium, drejtuesve e pronareve të saj.

Bashkë me vitin 2011, shuma që duhet t’i paguante Bankers shtetit shqiptar përllogaritet në 90 milionë dollarë, para me të cilat do të ishin shpërblyer edhe banoret e Zharrzës, të cilët thonë se Bankers u ka shkatërruar shtëpitë dhe të gjithë zonën, duke ua bërë jetën të pamundur.

Ekspertët e AKBN thonë se për këtë mashtrim Bankers ka kryer punime me kompani të treta pa zbatuar procedurat e tenderimit, por me prokurim të drejtpërdrejtë, duke shkelur kontratën.

Në këtë mënyrë, Bankers, sipas raportit të AKBN, i ka fryrë faturat e shpenzimeve në mënyrë fiktive.  E kontaktuar nga Televizioni Klan, Bankers i kundërshton pretendimet e palës shtetërore, dhe thotë se është në pritje të vendimit nga arbitrazhi ndërkombëtar për 2011-ën.
Por AKBN dyshon se kjo skeme është përdorur për 11 vjet me radhë dhe shumat që Bankers Petrolium do të duhej t’i kishte paguar shtetit shqiptar arrin në qindra milionë dollarë.

TV KLAN,  15.03.2017

Shkëlzen Berisha, djali i ish-kryeministrit Sali Berisha, pretendon para gjykatës se akuzat për përfshirjen e tij në skandalin e privatizimit të OSSH, kanë si qëllim të cënojnë nderin e tij, të denigrojnë figurën e babait si dhe të dëmtojnë imazhin e Partisë Demokratike para zgjedhjeve të 18 Qershorit.

Shqiptarja.com zbardh padinë e Shkëlzen Berishës kundër juristit të OSSH, Romeo Kara, i cili me dëshminë dhe dokumentet e tij ka implikuar Sali Berishën dhe Shkëlzen Berishën në privatizimin korruptiv të OSSH, privatizim i cili u ka shkaktuar rreth 500 milionë euro dëm taksapaguesve shqiptarë.

Në kërkesën e tij drejtuar Gjykatës së Rrethit Gjyqësor Tiranë, për deklarimin fajtor të Romeo Karajt për kryerjen e veprës penale të shpifjes, Shkëlzen Berisha, akuzat në adresë të tij, i kamuflon me Partinë Demokratike dhe me pozitat politike të ish-kryeministrit Sali Berisha.

Referuar përmbajtjes së padisë, Shkëlzen Berisha kërkon ‘strehim politik’ tek Partia Demokratike, strategji të cilën duket se do ta përdorë edhe në rast të një përballje tjetër me drejtësisë, tashmë jo si akuzues, por si i akuzuar për implikimin në privatizimin e OSSH.

Nuk është më sekret se, komisioni hetimor për çështjen ‘CEZ’ po përgatit një dosje voluminoze, me dëshmi, fakte, transaksione dhe dokumente, të cilën do ta referojë në prokurori, në ngarkim të Shkëlzenit. Megjithatë, ky i fundit, ka nisur strategjinë e mbrojtjes.

“Të gjitha thëniet e mësipërme janë të pavërteta, konsiderohen shpifje nga ana jonë me qëllim denigrimin e figurës së z. Berisha, duke e lidhur atë me një aferë të dyshimtë korruptive dhe në një moment kohor që përket me afrimin e zgjedhjeve parlamentare në vend.

Siç dihet botërisht, i dëmtuari akuzues është djali i ish-kryeministrit z. Sali Berisha, një figurë e rëndësishme për mbarë politikën e vendit në këto 25 vite dhe gjithashtu një zë i pazëvendësueshëm i opozitës së sotme shqiptare.

Duke shpifur botërisht ndaj djalit, natyrisht që cënohet edhe figura e ish kryeministrit Berisha, në dëm kjo dhe të opozitës së sotme parlamentare që po përgatit të shkojë në zgjedhjet e përgjithshme parlamentare”, thotë Shkëlzeni.

Nuk mohon lidhjet me Nue Kalajn  
Në padinë e tij, Shkëlzen Berisha as nuk mohon dhe as pohon para gjykatës lidhjet me sekserin e privatizimit të OSSH, Nue Kalaj, i cili ka tërhequr me çanta, në një bankë të nivelit të dytë në Tiranë, 6.8 milionë euro, duke i larguar më pas nga Shqipëria, pa paguar asnjë taksë dhe pa kryer një punë të dokumentuar. Në padinë e tij, Shkëlzeni sqaron vetëm raportin me Kastriot Ismailajn.

“Thënie e mësipërme janë ndërtuar në një mënyrë të tillë dhe në një rend kronologjik që të krijojnë bindjen tek dëgjuesi dhe mbarë opinioni publik, lidhur me përfshirjen e Shkëlzen Berishës në një aferë korruptive, e cila është edhe në hetim penal nga organet përkatëse.

Deklarimet e të akuzuarit nuk luajnë asnjë rol informues, pasi ato rezultojnë të pavërteta, por kanë si qëllim t’i përçojnë publikut mesazhin e qartë se shtetasi Shkëlzen Berisha, një herë djali i ish-kryeministrit Sali Berisha, kryeministri i vendit në kohën kur pretendohen të kenë ndodhur faktet, është një bashkëpunëtor në krim, referuar veprimtarisë së ndërmjetësimit, nëpërmjet ndikimit të paligjshëm mes Ismailajt dhe kompanisë CEZ”, pretendon Shkëlzeni.

Dëshmitë dhe provat kundër Shkëlzenit 
E-maili i plotë i Josef Hejsek drejtuar Tomas Pelskac
Dërguar: E enjte, 28 Janar 2010, 22-40 PM
Nga: Josef Hejsek
Te: Tomas Pelskac
Subjekti: Shqipëri-Përgatitja e takimit me kryeministrin
Rëndësia: E lartë
Mirdita Tomas,
Në anekse janë përgatitur dokumentet. Ne do të përmendim gjithashtu kërkesat tona ndaj qeverisë, sa është debia që duhet paguar tani, rregullimin e çmimit etj.

Do të të pres ty me Nuelin në aeroport, në sallonin VIP.

Me Nuelin sapo mbarova negociatat e tjera. I shpjegova në detaje se çfarë kërkojmë.
Takimi me të birin, sipas Nuelit, është shtyrë për nesër pas ardhjes së PM (Kryeministrit).
Çfarë duhet të presim nga kryeministri?

Sipas Nuelit rezultatet në mënyrë të sigurt do të jenë pozitive dhe në 90 % konkrete. Ai më siguroi se për kryeministrin po punon një komision ndërministror i cili në mënyrë të specializuar po trajton problematikën tonë. (Mund t’ju konfirmoj që kam folur me disa anëtarë të komisionit që po merren me këtë marrëveshje).

Rezultatet e tyre nuk janë akoma të mbaruara apo përfundimtare. Ai më siguroi se përfundojnë shpejt dhe pas kësaj do ulemi sërish.
Si përfundim, sapo detajet e negociatave do jenë gati, do të fitojmë MR në Tiranë (Martin Roman). Gjithë të mirat.

Pretendimet e dëshmitarit Romeo Karajt
“Për sa kohë shkuan te djali, kanë pasur lidhje. Djali ka shkuar me këta me leje të të atit. Dhe kryeministri e ka deleguar atë.

Fakti që është gjetur Nuel Kalaj, një person emigrant në Francë, nga Prizreni, për të marrë pjesë në këtë privatizim, tregon se ka qenë i besuar i familjes së tij. Nuel Kalaj dhe Kastriot Ismailaj kanë qenë sekserë në marrëdhëniet mes ERE dhe CEZ, pasi ka pasur luhatje të çmimit të energjisë.

Kemi pagesat e bëra në nëntor-dhjetor të vitit 2010 dhe kemi një ulje të çmimit të blerjes së energjisë nga CEZ-i te KESH-i me pasoja për buxhetin dhe favorizime për CEZ-in.

Është premtuar 10 milionë dollarë për t’u paguar në dorë, është paguar një shumë e vogël e cila nuk ka shkuar në destinacionin e duhur. Pasi janë bërë këto pagesa, mblidhet ERE dhe merr një vendim për uljen e çmimit të energjisë në favor të kompanisë çeke.

P.sh nëse KESH e blinte me 8 lekë e shiste me çmimin 1 lek e ca. Në momentin që prishet kontrata me DIA, çmimi shkon nga 1.48 lek në 2.83 lek. Kemi një letërkëmbim ku futet sërish në lojë Nuel Kalaj”.

Lëvizjet e paregjistruara në kufi 
Shkëlzen Berisha, djali i ish-kryeministrit Berisha ka udhëtuar jashtë vendit dhe pa u regjistruar në kufi. Sipas të dhënave të sistemit TIMS, figurojnë të paktën 9 lëvizje të pa kontrolluara në kufi të Berishës gjatë viteve 2009, 2010 dhe 2011.

Sipas këtyre të dhënave ai ka dalë nga Shqipëria 48 herë dhe është kthyer 54 herë. Kësaj moskonkordance shifrash i shtohen dhe lëvizje të tjera ku ai figuron të jetë kthyer në Rinas dhe mos ketë lënë gjurmë në kontrollin e TIMS për këtë punë.

16 janar 2009 sipas TIMS, Shkëlzen Berisha kthehet nga Vjena e Austrisë në Rinas por nuk figuron asnjë dalje e mëhershme jashtë shtetit. Në TIMS figuron një hyrje nga Turqia në 19 janar 2010, po pa regjistruar më herët asnjë lëvizje të tij dalëse në kufi. Drejt Vjenës udhëton sërish në datën 16 prill 2010 por nuk figuron gjëkundi Chek-imi i kthimit.

Zhvillon sërish një udhëtim në kryeqytetin austriak gjatë datave 16-18 maj. Mosfunksionimi i sistemit TIMS është përdorur shpesh si argument nga PD për të akuzuar eksponentë të maxhorancës së kanë kryer lëvizje të paregjistruara dhe për qëllime të paligjshme jashtë vendit.

Shqiptarja.com  09.03.2017

E mbani mend kur Berisha thoshte në Kuvend se do miratonte ligjin për martesat brenda së njëjtës gjini? Të gjithë thanë “WOW”. Ishte flluskë sapuni për të larguar vëmendjen nga gjithë presioni që po i ushtrohej për 21 janarin, Gërdecin, Fazlliçin e të tjera si këto të cilat i kishte konsumuar si vepra për 8 vite me radhë.

Është një strategji e njohur komunikimi kjo, që ka të bëjë me shpërqëndrimin e vëmendjes nga një temë, duke hdhur shashka mbi tema të tjera që kanë sensibilitet të lartë shoqëror, por që nuk kanë rëndësi jetike për demokracinë e një vendi dhe drejtësinë e tij.

Sot, në ditën kur në Kuvend ai duhet të përgjigjej para shqiptarëve për dëshmitarët e aferës “CEZ” që shtohen çdo ditë dhe që pranojnë rryshfetin dhe paracaktimin e privatizimit të OSSH tek CEZ duke përfituar miliona dollarë familja Berisha.

Duhet të përgjigjej për përfshirjen e të birit. Sepse kishte shumë detyrime ndaj shqiptarëve që i kanë dhënë të drejtën për të qeverisur për mbi 12 vjet.

Berisha sot dukej i trembur. Jo për veten e tij, më shumë se për të birin, Shkëlzenin, pasi vetë bën si bën. Frika e ka emrin PROVA. Kanë dalë e-maile dhe dëshmi që janë të pakundërshtueshme për aferën “CEZ”. Mirëpo mjeshtri Berisha zgjedh sërish të bëjë sikur asgjë s’ka ndodhur dhe pse qartësisht është i tmerruar nga fakti se provat kundër tij po dalin si pa të keq.

E për të zhdukur nga vëmendja e opinionit publik përshfshirjen e të birit dhe të vetes natyrisht, në skandalin 440-milionësh që i ra si barrë shtetit dhe rryshfetin që mori i biri, Berisha sot ka folur në Kuvend për Kosovën duke bërë thirrje për luftë me Serbinë. Duke u bërë qesharak, por që e dinte se do e merrte vëmendjen që i duhej. Kjo, vetëm e vetëm që të mos flitet për CEZ.

Sepse që të mos dëgjojë emra Si Nue Kalaj, Romeo Karra, Josef Hejsek, etj etj,  Berisha është gati të bëhet dhe të mbetet lolo e Kuvendit dhe i mbarë politikës shqiptare. Por të flasë për CEZ, jo, nuk guxon.

Ndokush mund të mendojë se Berisha i ka të rastësishme shpërthimet ndaj mazhorancës apo deliret populiste nacionaliste. Absolutisht jo! Berisha e ka strategji që prej qershorit të 2013-tës kur humbi zgjedhjet, që të mbajë për vete vëmendjen në pelivanllëqet e tij me qytetarë dixhital e me deklarata “alla Trump”.

Vetëm kështu, ai mendonte se do të shpëtonte nga frika e tij më e madhe, ligji. Përballë të cilit s’ka guxuar të shkojë asnjëherë.

Ai ka shpresuar dhe shpreson se duke u marrë me pelivanllëqet e tij që publikon në rrjete sociale a thotë nga salla e Kuvendit do të mund të tërheqë pas vetes edhe mazhorancën, ndërkombëtarët e dëshmitarët që të merren me të dhe jo me atë ç’ka ai ka bërë  duke përfshirë edhe familjen e tij.

Doktori ka besuar dhe ndoshta ende beson se duke u bërë ai çadra, do shpëtojë e gjithë “kopeja”. Ka menduar se të gjithë do të meren me të dhe me ato që ai thotë për të rrokur vemëndje, ndaj sot emri CEZ e tmerron. Sepse Komisioni Hetimor Parlamentar po zgjat më shumë se ç’duhet dhe po bën lajm më shumë se ai. Madje, me gjithë ndihmën e pakursyer të Blushit që i mbajti sot iso, sërish s’po ja del të dalë lajm mbi Komisionin Hetimor Parlamentar, CEZ.  Ky Komision do i marrë edhe të birin në pyetje, e këtë herë se shpëton dot më.

Këtë ai nuk e duron dot, sepse e nuhat fare mirë se diçka e madhe po vjen, e formula e tij e zhurmës në asgjë, nuk po funksionon.

Ai  ka edhe formula të tjera për dëshmirarët, e ka treguar me fakte, por për të mos ndjellë ters për askënd, nuk po e shtellojmë si temë.

Shqiptarja.com  27.01.2017

“Dieselgate” trondit FIAT Chrysler. FCA  (FIAT Chrysler Automobiles) është akuzuar nga SHBA për trukim të nxjerrjes së gazrave në 100 mijë makina. Menjëherë pas lajmit, kuotat e kompanisë në bursë kanë rënë me 16 për qind dhe ka marrë me vete edhe aksionet e kompanisë Exor (e familjes Agnelli), me 9.3 për qind.

Duket se është një skandal i ngjashëm me atë që përfshiu Volkswagen më 2015. Sipas Agjencisë Ambientale Amerikane (EPA), grupi automobilistik “ka shkelur rregullat dhe u zbulua”.

Mosnjoftimi për praninë e një software që ndikon në nxjerrjen e gazrave të makinës “përbën një shkelje serioze të ligjit”.

Sipas EPA-s, që prej muajsh ka refuzuar të certifikojë makinat me naftë të FCA që dalin në treg më 2017, FIAT Chrysler Automobiles rrezikon një gjobë prej 4.63 miliardë dollarësh për dhunimin e ligjeve mbi

Administratori i FCA ka deklaruar kompania nuk ka bërë asgjë të paligjshme dhe nuk ka asgjë të përbashkët me rastin Volkswagen. Ditët e fundit, kompania gjermane mbylli skandalin e saj, duke firmosur me autoritetet amerikane marrëveshjen e pagesës 4.3 miliardë dollarë për mashtrimin mbi emisionin e gazrave nga makinat me motor diesel.

Shqiptarja.com  13.01.2017

Katër ditë pas shpërthimit të skandalit të “Panama Papers”, ka reaguar kompania GFI Albania, e vënë në qendër të akuzave për koncesionin e markimit të karburanteve dhe transfertat off shore në ishullin Anguilla, në Amerikën Qëndrore.

Përmes një njoftimi të shpërndarë për mediat, GFI sqaron se nuk ka kryer asnjë transfertë financiare, siç pretendojnë mediat.

“Mediat kanë aluduar madje se GFI Albania ka kryer transferta të dyshimta në shifra 400 dhe 500 mijë Euro. Theksojmë me forcë se kjo është një shpifje tërësisht abuzive. Aktiviteti financiar i GFI Albania është krejtësisht transparent, i bazuar në legjislacion dhe lehtësisht i monitorueshëm si nga Autoriteti Kontraktues ashtu dhe nga të gjitha organet ligjzbatuese të shtetit shqiptar“, thuhet në deklaratën e GFI.

Sa i takon koncesionit të markimit të karburanteve, GFI thekson se GFI Technologies nuk ka lidhje me tenderin në fjalë, duke u distancuar kështu edhe nga biznesmeni shqiptar i dyshuar për transferta off shore, Ismail Mulleti.

Projekti kombëtar i markimit dhe monitorimit të karburanteve nuk ka filluar befasisht në vitin 2013 siç aludohet në mënyrë dashakeqe. Aludimi në media se shoqëria GFI Technologies ka fituar të drejtën e koncesionit të markimit të karburanteve në Shqipëri menjëherë pas themelimit në Maj 2013 është tërësisht i pavërtetë. Koncesioni i markimit në Shqipëri nuk ka asnjë lidhje me shoqërinë GFI Technologies”, thuhet në reagimin e GFI.

Shqiptarja.com  08.04.2016

Bankers Petroleum, kompania e naftës e cila është përfshirë së fundmi në një konflikt me shtetin shqiptar në lidhje me taksat, është në prag të një skandali të madh mashtrimi.

Vetë aksionerët kanë kërkuar një audit urgjent nga një kompani e pavarur, pas zërave të fshehur, se Bankers ka mashtruar në lidhje me vlerën e aseteve të deklaruara në bursë.

Skandali që ende nuk është bërë publik në Shqipëri, ka dhënë tashmë efektet e para në bursë.

Dje aksionet e Bankers janë kuotuar në hapje me vlerën 1.55 USD ndërsa në pasdite vlera e tyre ka rënë në 1.44 USD.

Po çfarë ka ndodhur?

Kompania e krijuar në ishujt Kajman, një zonë off-shore ku regjistrohen kompani të dyshimta, ka regjistruar në bursë një numër të madh asetesh.

Bëhet fjalë për jo pak, por rreth 1 miliardë dollarë amerikanë.

Këto asete Bankers Petroleum i deklaron si prona të sajat, por që në fakt janë të shtetit shqiptar.

E thënë ndryshe Bankers Petroleum ka rritur vlerën e kompanisë në bursë duke përdorur pasurinë e shtetit shqiptar.

Sipas marrëveshjes mes shtetit shqiptar dhe Bankers Petroleum, lidhur në kohën e Fatos Nanos asetet (investimet) e kryera nga koncesionari, i transferohen shtetit shqiptar pasi rikuperohen si kosto hidrokarbure.

“Titullimi ndaj aseteve në posedim të kontraktorit në lidhje me operacionet hidrokarbure do të transferohet tek AKH në kohën që kostot e këtyre aseteve të patundshme dhe të tundshme të jenë rikuperuar plotësisht si kosto hidrokarbure…”,- thuhet në marrëveshje.

Sipas saj, të ardhurat nga shitja e çdo aseti do të përdoren nga kontraktori si një rikuperim i kostove hidrokarbure. Kjo gjë tashmë ka ndodhur. Sipas raportit të Agjencisë Kombëtare të Burimeve Natyrore, entit shtetëror që auditon shpenzimet e Bankers Petroleum, kompania i ka rikuperuar të gjitha shpenzimet hidrokarbure në vitin 2011.

Kjo do të thotë që edhe asetet tashmë janë të shtetit shqiptar.

Një numër i konsiderueshëm njerëzish, përfshirë këtu edhe shumë shqiptarë, kanë blerë aksione të Bankers Petroleum në bursë.

Është e qartë që këto aksione janë kuotuar duke marrë në konsideratë që Bankers Petroleum zotëron rreth 1 miliardë dollarë asete në Shqipëri.

Situata mund të ndryshojë në rast se aksionerët mësojnë se në realitet Bankers nuk i ka këto asete.

Kjo shpjegon pse Bankers u tërhoq menjëherë nga përplasja me qeverinë në Tiranë.

Çdo amplifikim i konfliktit në kushtet e qarkullimit të zërave në bursë për asete të rreme, mund të sjellë një rënie drastike të vlerës nominale të aksioneve të kompanisë në bursën e Torontos.

Qeveria në Tiranë e akuzon ndërkohë Bankersin se ka fryrë kostot e investimeve në mënyrë fiktive për të mos paguar taksat.

Prej 2004 kur ka nisur aktivitetin, deri më sot, Bankers Petroleum nuk ka paguar asnjë taksë në Shqipëri, përveç rentës minerare dhe sigurimeve të punonjësve.

Gazeta Dita, 04.12.2015

Në skandalin e karburanteve, ku biznesmenët mashtruan shtetin, duke i marrë rreth 5 milionë dollarë nga mospagimi i taksave dhe mosdeklarimi i të ardhurave, është përfshirë edhe konsulli shqiptar i nderit në Turqi. Nga burimet policore mësohet se bëhet fjalë për shtetasin Ibrahim Aktoz, ish-drejtor i ALPET, i cili është shpallur në kërkim. Që prej disa vitesh, ai është konsulli ynë i nderit në Turqi. Më tej mësohet se prokuroria ka nxjerrë urdhër-arresti ndërkombëtar për ish-pronarin e kompanisë së karburanteve “Alpet” shtetasin turk, Ekrem Ozmetel. Kurse dje në Tiranë janë lënë në burg nga gjykata Aurel Prendi dhe Fiqiri Hoxha, dy përfaqësuesit shqiptarë të karburanteve.

Konsulli i nderit

Në skandalin e hidrokarbureve rezulton i përfshirë edhe diplomati shqiptar në Turqi, pranë vilajetit Anda, Ibrahim Aktoz, i cili deri pak kohë më parë ishte drejtor i Përgjithshëm i “Alpet”. Ibrahim Aktoz ish-drejtor i ALPET, aktualisht në kërkim, mësohet se për shumë vite dhe aktualisht është konsulli ynë i nderit në Turqi. Ndërkaq, mësohet se Aktoz e ka lënë Shqipërinë prej 3 muajsh, kohë në të cilën është larguar për në Turqi. Vetë ambasada shqiptare në Turqi konfirmon për mediat se Aktoz është konsull nderi i Shqipërisë në Turqi prej vitit 2011. Ibrahim Aktoz ka qenë drejtori i përgjithshëm i kompanisë së karburanteve “Alpet”, e cila është mbyllur. Task-Forca e Prokurorisë së Tiranës thotë se Aktoz në bashkëpunim me të tjerët krijuan disa kompani të tjera, ku përfshihen “Balkan Petroleum Albania” dhe “Balkan Petroleum International”, për të bërë shitblerje fiktive të aseteve. Të njëjtën skemë, këta persona e përdorën dhe me kompaninë e krijuar rishtazi “Fullpet”, ku si administrator rezulton Ekrem Ozmetel. Ndërkaq, në vitin 2013 Ibrahim Aktoz i ka shitur Ozmetelit 20 për qind të aksioneve.

Burgu në Tiranë

Ditën e djeshme, Gjykata e Tiranës caktoi masën e sigurisë “arrest me burg” dy biznesmenët e hidrokarbureve, pasi dyshohen se kanë kryer 3 vepra penale. Ata akuzohen për “Fshehje të të ardhurave”, “Mospagim taksash dhe tatimesh” dhe për akuzën e “pastrimit të parave” në bashkëpunim. Kështu, togat e zeza të Tiranës vendosën dje që Aurel Preni dhe Fiqiri Hoxha, i cilët u kapën para pak ditësh në kuadër të operacionit “Karburanti” do të qëndrojnë në burg deri në një vendim tjetër. Sipas akuzës, dy biznesmenët në bashkëpunim me 3 persona të tjerë, të shpallur në kërkim nga dhjetori i 2012-s deri në prill të 2014-s, nuk deklaruan faturat tatimore të shitblerjeve, kanë përpiluar fatura fiktive e shkelje të tjera ligjore që kapin shifrën e miliona lekëve.

Skandali i karburanteve

Interpol ka shtuar në listën e personave në kërkim biznesmenin turk, Ekrem Ozmetel, ortak i konsullit, si dhe ortakun tjetër shqiptar, Fabian Goçin. Ndërkaq, në Tiranë u arrestua Aurel Preni, pronari shqiptar i kompanisë së hidrokarbureve “Fullpet” dhe Fiqiri Hoxha. Prokuroria thotë se në dy vite, përfshi 2012-2014, këta shtetas nuk deklaronin shitblerjen reale të karburantit, nuk paguanin sigurimet shoqërore të punonjësve, si dhe fshihnin të ardhurat për t’iu shmangur tatim-fitimit. Në kompaninë “Fullpet”, mbi të cilën u kryen hetimet, Preni rezulton aksioner në vlerën e 100 për qind dhe Ekrem Ozmetel është administrator i kësaj firme deri në maj të vitit 2018. Nga hetimet rezulton se nuk janë deklaruar pagesat për vitin 2012 ndaj furnitorit sh.a “Genklaus” për blerje karburantesh dhe shitjen e tyre. Ka diferenca të konsiderueshme në deklarimin e të ardhurave me kasë për vitin 2013 krahasuar me deklarimin e tij në Sistemin Informatik tatimor për qarkullimin e mallrave. Nuk ka pasqyruar sakte komisionet e shitjes për shërbimin e kryer duke ulur të ardhurat e deklaruara. Janë lënë pa deklaruar fatura tatimore të shitjes dhe të blerjes duke mos deklaruar realisht sasitë e karburanteve dhe komisionet e shitjes. Prokuroria thotë se janë pasqyruar si blerje fatura tatimore që nuk i përkasin subjektit dhe janë deklaruar në blerje vlera kreditore në një kohë që mungojnë faturat apo kopje e noterizuar e tyre. Një tjetër akuzë është se kjo shoqëri nuk ka deklaruar dhe dorëzuar pranë organeve tatimore pasqyrat financiare dhe Formularin e Deklarimit dhe Pagesës për “Tatimin mbi fitimin për vitin 2013.

Gazeta Shqip, 04.11.2015

Njëzet muaj pasi që gazeta “Zëri”, përmes një hulumtimi pati publikuar fakte se si KEDS-i përmes njehsorëve elektrikë digjitalë të tipit “AEF.TF-01” të prodhuesit turk “Kohler” po vjedh konsumatorët e vet, Prokuroria Themelore në Prishtinë, respektivisht Departamenti për Krime të Rënda, ka ngritur aktakuzë kundër ish-drejtorit të Agjencisë së Metrologjisë së Kosovës, Blerim Sokoli, si dhe dy zyrtareve të kësaj Agjencie, Vjollca Ajvazi dhe Drita Hamiti.

Pjesë e aktakuzës është edhe Ari Torosoglu, menaxher i “Kohler”-it, dhe Ali Akan, zëvendësdrejtor i rrjetit të KEDS-it. Këta të fundit janë shtetas turk dhe të njëjtit janë shpallur në kërkim nga Prokuroria Themelore e Prishtinës.

Sipas Prokurorisë, të pandehurit, në cilësi të personave zyrtarë, në bashkëkryerje gjatë intervalit kohor mars 2013 deri më 05.12.2014 me veprim dhe mosveprim, në faza të ndryshme kohore, varësisht nga kompetencat ligjore të cilat i kanë ushtruar, kanë kontribuar që tipi i njehsorit të lartcekur, fillimisht të certifikohet kundërligjshëm, e pas instalimit të këtij tipi të njehsorit në terren te konsumatorët kosovarë.

Që nga fillimi i vitit që lamë pas, gazeta “Zëri”, gjithmonë duke u mbështetur në të dhëna dhe dokumente zyrtare, por edhe në prononcime të zyrtarëve të lartë të shtetit dhe të KEDS-it, ka raportuar se ekzistojnë dyshime se njehsorët e tillë po matin energji elektrike edhe atëherë kur të gjitha pajisjet elektrike shtëpiake janë të shkyçura.

Por, edhe përkundër fakteve të shumta, KEDS-i, përmes reagimeve që ua dërgonte medieve në formë të marketingut, është munduar ta mohojë të vërtetën, duke pretenduar se njehsorët elektrikë në fjalë i plotësojnë të gjitha standardet e parapara.

Mirëpo, bazuar në dokumente zyrtare shihet se skandali me njehsorë ka ndodhur, edhe pse për të kanë qenë në dijeni zyrtarë të lartë të KEDS-it, Agjencisë së Metrologjisë, zyrtarë të lartë të KEDS-it, por edhe të fabrikës që i prodhon ato.

Zëri, 09.10.2015

Derisa drejtuesja e re Ministrisë së Tregtisë dhe Industrisë, Hykmete Bajrami, të vërë në shina institucionin që ka marrë përsipër ta drejtojë, do të vijojë të mbetet dilemë fakti nëse MTI –ja ka drejtuar mafinë, apo mafia MTI-në.

Ky është opinioni i naftëtarëve dhe i ekspertëve laboratorikë. Kaq shumë janë shkeljet ligjore të ish-ministres së MTI-së, Mimoza Kusari– Lilës dhe pasardhësve të saj, sipas zyrtarëve të këtij institucioni, saqë lë të dyshohet se krimi i organizuar e ka burimin në këtë institucion.

Tashmë është fakt që cilësia e naftës nuk kontrollohet dhe kjo është bërë me bekimin e ish-ministres Kusari -Lila.

“Kontrollimi i cilësisë në Kosovë është obligim. Brenda 24 orësh në Kosovë minimum hyjnë 1.5 milion litra derivate, kurse vetëm rreth tre për qind kontrollohet cilësia. Ministria e Tregtisë dhe Industrisë nuk ka pasur interes që ta kontrollojë cilësinë”, ka thënë për mediat së fundmi kreu Shoqatës së naftëtarëve, Fadil Berjani, shkruan Kosova Sot.

Telegrafi, 27.01.2015

Kryetari i komunës së Prishtinës, Shpend Ahmeti, i ka shkruar një letër kryeprokurorit të Kosovës, Sylë Hoxhës, ku nga ky ka kërkuar informata rreth skandalit të naftës në shkollat e Prishtinës, ku kompania “Hib Petrol” i kishte shitur Komunës naftë për ngrohje, e ku prania e sulfurit ishte 80 herë më shumë sesa është e lejuar në vendin tonë.

Në letrën që e ka siguruar “Zëri” shihet se Ahmeti kërkon nga kryeprokurori informata rreth ecurisë së lëndës, ku ka bërë padi dhe ka dorëzuar kallëzim penal ndaj Kompanisë në fjalë.

Gazeta Zëri, 19.08.2014