info@energjia.al

Projekti madhor me një kosto rreth 200 mijë euro, është investimi i radhës nga Kompania Kosovare për Distribuim dhe Furnizim me Energji Elektrike (KEDS) në lagjen Arbëria, në komunën e Gjilanit.

Realizimi I këtij projekti ka qenë jashtëzakonisht i nevojshëm për banorët e kësaj ane, ku kanë përfituar  mbi 500 familje.

Tash lagjja ka hequr të gjitha problemet enrgjetike. Është përmirësuar furnizimi me energji elektrike dhe tensioni është stabilizuar, përderisa shtyllat e drurit dhe rrjeti i vjetër elektrik nuk shihen më këtu.

Për të gjitha këto KEDS ka vendosur një trafostacion të ri 10/0.4 kV me fuqi 1000 kVA, gjithashtu janë vendosur 7000 m kabllo ajrore për tension të ulët, 3500 m kabllo nëntokësore për tension të ulët, 6800 m kabllo nëntokësore për tension të mesëm, 184 shtylla betoni për tension të ulët, katër shtylla betoni për tension të mesëm, gjithashtu janë hapur 1900 m kanal për shtrirjen e kabllove dhe 32 puseta.

Me këto investime dhe me infrastrukturën moderne, tash Arbëria ka marrë një pamje moderne.

Sipas Azem Shkodrës, banor i kësaj lagje, me profesion profesor i matematikës, KEDS ka bërë një punë shumë të mirë.

“Tash rrymën e kemi mjaft të fortë dhe stabile. Është larguar komplet rrjeti i vjetër dhe me vendosjen e kabllove bistekë është larguar edhe rreziku për kalimtarët. Investimet e KEDS-it dhe ndriçimi publik nga ana e komunës, na kanë ndriçuar lagjen”, ka thënë Shkodra.

I kënaqur me këto investime shprehet edhe pronari i minimarketit “Eltoni”në këtë lagje, Gëzim Fazliu, i cili tash më i ka hequr nga përdorimi stabilizatorët që i përdorte deri vonë për përforcimin e rrymës.

“Shpesh kemi pasur probleme me rrymë, tash është shumë më mirë. Ushqimet në friza tash i kemi të sigurt. Nuk ka më kabllo nëpër tokë. Me këtë rrjet të rri tash po më duket si me qenë në Zvicër. Qind për qind është më mirë se ka qenë”, ka thënë Fazliu.

KEDS do të vazhdojë angazhimin për përmirësimin e rrjetit energjetik sipas planit zhvillimor, që parasheh deri në vitin 2025 vendosjen e 3500 trafostacioneve të reja dhe mbi 200 kilometra rrjet të ri në tërë territorin e Kosovës, që kapin shumën deri në 300 milionë euro.

Agjensia e lajmeve ekonomia,  19.05.2017

Banorët e  lagjes “Arbana” në Prizren  kanë përfituar rrjet të ri energjetik. KEDS ka investuar në këtë lagje duke vendosur një trafo të re si dhe 44 shtylla.

Zëdhënësi i KEDS-it, Viktor Buzhala  tha se synim kryesor i këtij investimi ka qenë përmirësimi i infrastrukturës dhe furnizimi më i mirë i energjisë elektrike.

“Është vendos një trafo e re me fuqi 400 kVA, si dhe janë vendosur 44  shtylla betoni për tension të ulët”, tha Buzhala.
Sipas tij, përveç  trafos  dhe shtyllave,  në këtë lagje është bërë edhe ndërrimi i kabllove.

“Janë vendosur 3000 metra  kabllo nëntokësore për tension të mesëm dhe 2000 metra kabllo ajrore për tension të ulët”,tregon Buzhala. Ai shtori se  nga ky projekt kanë përfituar  50 konsumatorë.

Ndërkaq, banorët e lagjes “Arbana”,  thonë se ky investim ka qenë i nevojshëm.
Adem Krasniqi  tha se me këtë investim të KEDS-it, është përmirësuar furnizimi me energji elektrike në këtë lagje . “Rrjeti elektrik ka qenë shumë i vjetër”, tregon Krasniqi.

Ai falënderon KEDS-in për investimet që ka bërë në këtë lagje.“Vendosja e trafos së re ka përmirësuar furnizimin me energji elektrike,prandaj falënderojmë KEDS-in për këtë investim”, tha Krasniqi.

Zëdhënësi i KEDS-it, Viktor Buzhala ,tha se ky investim është bërë pikërisht për të përmirësuar furnizimin me energji elektrike.
Ai premton se KEDS, gjatë këtij viti, do të investojë edhe në lagjet e tjera të Prizrenit.

“Sigurisht, do të vazhdojmë me investime në mënyrë që rrjeti të jetë në standardet e kërkuara për të gjithë konsumatorët”, tha Buzhala.

Agjensia e lajmeve ekonomia,  20.04.2017

Ministri i Energjisë dhe Industrisë Damian Gjiknuri shoqëruar nga ambasadorja e Gjermanisë në Tiranë Susanne Schütz dhe ajo e Kroacisë Sanja Bujas Juraga morën pjesë në ceremoninë e nisjes së ndërtimit të nënstacionit të ri elektrik 110/35/20 kV në Orikum.

Projekti bëhet i mundur përmes bashkëfinancimit të Republikës Federale Gjermane përmes KfW. Vlera e investimit është 6,253,424 Euro ndërsa punimet do të përfundojnë brenda 14 muajsh.

Pas prezantimit teknik të investimit nga administratori i Operatorit të Sistemit të Transmetimit Engjëll Zeqo, ishte ministri Gjiknuri ai që u ndal tek rëndësia e projektit për zonën e bregdetit.

Sipas tij, ky është një nga investimet e rëndësishme në Qarkun e Vlorës përsa i përket energjisë. “Është pjesë e projektit për ndërtimin e dy nënstacioneve, një në Orikum dhe tjetri në Himarë. Këto investime do të mundësojnë lidhjen e Unazës së re të Jugut 110 kV me gjithë pjesën e bregdetit e më tej me rrjetin 20 Kv. Sapo kemi përfunduar tenderimet edhe me Operatorin e Shpërndarjes dhe bëhet fjalë për investime rreth 8 milion euro të tjera. Do të mund të rinovohet paralelisht me këto dy nënstacione t ëreja edhe rrjeti elektrik nga Vlora në Borsh duke i bërë 20 kV. Këto janë investime jashtëzakonisht të rëndësishme dhe unë e kam thënë se Qarku i Vlorës do të ketë furnizimin ndër më të mirët me energji në të gjithë vendin”, nënvizoi Gjiknuri.

Ambasadorja gjermane tha se investimet do të ndikojnë në përmirësimin e ndjeshëm të cilësisë së furnizimit me energji të gjithë rajonit të Vlorës. “Ky furnizim do të jetë më i qëndrueshëm, ndërprerjet e energjisë elektrike do të jenë më të pakta dhe do të reduktohen në mënyrë të ndjeshme. Në këtë formë, ky projekt do të çojë në përmirësimin e kushteve të jetesës për të gjithë banorët por edhe për aktivitetin e gjithë sipërmarrjeve të ndryshme dhe turistëve. Me lejoni të ju rikujtoj se bashkëpunimi në këtë sektor me Shqipërinë është mjaft i rëndësishëm. Gjermania është donatori më i rëndësishëm bilateral i Shqipërisë në këtë drejtim. Prej vitit 1988, qeveria federale ka lëvruar 360 milion euro në këtë kontekst përmes ndërtimit të linjave të interkonjeksionit me Maqedoninë, Malit të Zi dhe Kosovës”, theksoi Schutz.

energjia.al  06.04.2017

“Përmes stallës së lopëve më kalonte një kabllo dhe kur frynte era e kaplonte flaka stallën. Tani ndjehem i sigurt dhe rri pa frikë. Për punën që ka bërë KEDS-i në fshat e vlerësoj me notën 10 dhe e falënderoj shumë,”  thotë Zymer Merovci, banor i Dobërllukut.

Një punë e dukshme është bërë në  fshatin Dobërlluk të Vushtrrisë nga Kompania për Distribuim dhe Furnizim me Energji Elektrike- KEDS.

Nga këto investime të kompanisë, 201 familje të kësaj ane kanë zgjidhur problemet e mëdha energjetike që kishin me vite të tëra dhe kanë rritur sigurinë për kalimtarët.

Fshati ka marrë një pamje krejt të re dhe banorët shprehen tepër të entuziazmuar dhe falënderojnë KEDS-in që me këto investime u ndihmojnë shumë edhe në punët bujqësore.

“Veç  siguri që ka boll është, sepse kur frynte era telat binin në tokë dhe rreziku ishte tepër madh, e lene ma që na u ka përmisu tensioni dukshëm”, thotë Muharrem Kutllovci, banor i fshatit Dobërlluk të Vushtrrisë.

Gjatë realizimit të punimeve në këtë projekt është bërë implementimi i 124 shtyllave të tensionit të ulët, 30 shtylla të tensionit të mesëm, 6224m rrjet i tensionit të ulët dhe 945 m  rrjet i tensionit të mesëm. Gjithashtu është vendosur edhe një trafoblind, ku fuqia e transformatorit është 630 kVA.

Me vendosjen e kabllove bistekë për tensionin e ulët është rritur siguria energjetike për konsumatorët.

Në këto lokalitetet si edhe në të tjerat është bërë demontimi i rrjetit të vjetër që ka kaluar përmes  pronave private dhe është dislokuar  përreth rrugëve të lagjeve.

Ky është pjesë e investimeve që po bën KEDS-i për përmirësimin e shërbimeve të konsumatorëve anekënd Kosovës.

Agjensia e lajmeve ekonomia,  20.03.2017

Kryetari i Dragashit Salim Jenuzi është ndarë i kënaqur me investimet që KEDS-i ka realizuar gjatë vitit të kaluar në Komunën e Dragashit.

Ai  tha se me investime të ndryshme, KEDS-i ka përmirësuar  infrastrukturën e energjisë elektrike në këtë qytet.

“Jam i kënaqur me investimet që KEDS-i ka bërë në Dragash. Nuk kam asnjë vërejtje, përkundrazi kam vetëm falënderime”, tha Jenuzi.

Ai tregon se përveç trafove të reja, KEDS ka bërë edhe ndërrimin e rrjetit të vjetër me atë të ri. “Edhe sivjet janë duke punuar në projektet që i kanë filluar vitin e kaluar”, tregon Jonuzi.

Kompania Kosovare për Distribuim dhe Furnizim me Energji Elektrike, KEDS, gjatë vitit të kaluar ka realizuar investime të shumta në Dragash.

Përveç brenda në qytet, KEDS ka investuar edhe nëpër fshatra të kësaj komune. Në mesin e fshatrave që ka përfituar  është  fshati Pllanjak. Shtatëdhjetë konsumatorë të këtij fshati, kanë përfituar rrjet të ri energjetik nga KEDS-i.

Naim Arapi, menaxher për projekte në KEDS tha se në këtë fshat janë ndërruar 38 shtylla të tensionit të ulet, si dhe është vendosur një trafo e re 400 kvA.

Banori i fshatit, Abaz Çengaj tha se me këtë investim, jo vetëm që është stabilizuar rryma elektrike, por është eliminuar edhe rreziku nga kabllot e vjetra. “Tash janë kabllot e izoluara dhe fshatarët nuk kanë frikë nga djegia”, shprehet ai.

Çengaj shprehet i kënaqur me kualitetin e punës, që është bërë nga KEDS-i.

Ai shpreson se pas këtij projekti, KEDS do të investojë edhe më shumë në këtë fshat. “Falënderojmë KEDS-in për këtë investim, sepse me vite askush nuk ka investuar në rrjetin elektrik në këtë fshat. Shpresojmë se ky nuk do të jetë investimi i fundit, pasi që ky fshat ka nevojë ende për të investuar”, tha ai.

Edhe kryetari i Dragashit, Salim Jenuzi tha se komuna që ai drejton ka  nevojë edhe për më shumë investime, në përmirësimin e energjisë elektrike. “Nevojat janë shumë të mëdha. Jemi të informuar se KEDS, do të vazhdojë edhe gjatë këtij viti të investojë në komunën tonë”, tha Jonuzi. Ai premton se me korrektësi do t’i përgjigjet të gjitha kërkesave të KEDS-it.

Zëdhënësi i KEDS-it, Viktor Buzhala tha se në Dragash  janë kryer disa projekte. “KEDS deri tash ka kryer disa projekte në Komunën e Dragashit , prej nga kanë përfituar direkt mijëra qytetarë të këtij qyteti”, tha Buzhala. Ai premton se investimet nuk do të ndalen as sivjet në këtë qytet.  “Sigurisht, do të vazhdojmë me investime në mënyrë që rrjeti të jetë në standardet e kërkuara për të gjithë konsumatorët”, tha Buzhala.

Agjensia e lajmeve ekonomia,  16.03.2017

Në dy fshatra të Komunës së Ferizaj Lloshkobare dhe Bibaj janë vendosur shtylla e trafo që kanë përmirësuar rrjetin elektrik në këto vendbanime. Projekte këto investuese që janë kryer nga KEDS.

Në fshatin Lloshkobare është energjizuar trafostacioni me fuqi 160 kilovatësh. Gjithashtu është ndërruar largpërçuesi 10 kilovatësh me gjatësi prej 270 metrash.

Ky fshat ka përfituar gjithashtu edhe 6 shtylla betoni dhe 12 shtylla të tensionit të mesëm.

Në Lloshkobare është bërë edhe ndërrimi i shtyllave të drurit me 20 shtylla të reja të betonit, dhe shtrirja e kabllos bystek me gjatësi prej 1000 metrash.

Sipas inxhinierëve të KEDS-it nga ky investim në fshatin Lloshkobare kanë përfituar 50 familje.

Projekt i ngjashëm është implementuar edhe në fshatin Bibaj. Aty është energjizuar trafostacioni me fuqi 160 kilovatësh dhe është ndërtuar largpërçuesi 10 kilovatësh me gjatësi 970 metra.

Ekipet e distriktit të Ferizajt në KEDS në kuadër të këtij projekti gjithashtu kanë vendosur edhe 19 shtylla të betonit dhe 12 shtylla të tensionit të mesëm.

Ky projekt ka paraparë edhe largimin e shtyllave të vjetra, ku janë larguar shtyllat e drurit dhe janë zëvendësuar me 22 shtylla të betonit.

Inxhinierët që kanë punuar në këtë projekt kanë thënë gjithashtu se janë shtrirë edhe kabllo bystek me gjatësi prej 2000 metrash dhe kanë përfituar 35 familje.

Ata kanë shtuar gjithashtu se pritet të përfitojnë edhe 30 shtëpi të tjera nga ky projekt.

Agjensia e lajmeve ekonomia,  11.03.2017

Investimi i radhës që i vie Istogut nga Kompania Kosovare për Distribuim dhe Furnizim me Energji Elektrike është ai në fshatin Uçë.

Uça, fshat ky që shtrihet në skajet e rajonit të Dukagjinit, aty ku takohet me Drenicën, është nën administrimin e komunës së Istogut.

Jeta Balaj – zëdhënëse e kësaj komune ka folur për rëndësinë që kanë këto investime në fshatrat siç është edhe Uça.

“Në Uçë në bazë të informacioneve dhe bashkëpunimit tonë me KEDS, investimet shkojnë në disa faza, porse vërehet që është bërë një punë e mirë dhe mëse e nevojshme. Banorët e Uçës meritojnë projekte të tilla. Shtrirja e projekteve të KEDS-it në Uçë me siguri se ndikon në përmirësimin në rradhë të parë të kualitetit jetësor e më pas edhe të furnizmit me energji”, tha Balaj.

Efeket e këtij investimi tashmë janë vërejtur edhe nga banorët e fshatit. Edon Loshaj, vlerëson se Uça e meriton një investim të tillë.

“Shihet se janë bërë investime. Shihen edhe me sy të lirë por edhe kualiteti i tensionit është më stabil. Megjithatë efektet edhe më pozitive priten në të ardhmen”, shprehet Loshaj.

Numri i familjeve që kanë përfituar nga investimi i KEDS-it në fshatin Uçë të Istogut është 75, ndërsa KEDS ka bërë të ditur se në kuadër të këtij projekti investiv, janë vënë 58 shtylla betoni për tension të ulët, 65 shtylla betoni për tension të mesëm, 3 mijë e 800 metra kabllo për tension të ulët si dhe 3 transformatorë të rinjë.

Agjensia e lajmeve ekonomia,  06.03.2017

Fshati Shtaricë i komunës së Klinës tani ka një rrjet energjetik krejtësisht të ri. E gjithë kjo, falë punës së KEDS-it që në fshat ka ndërruar komplet rrjetin energjetik.

Një pjesë e madhe e fshatit kanë pasur rrymën njëfazore, që për banorët ishte mjerim, ata kurrë nuk mundën t’i përdorin as pajisjet më të thjeshta shtëpiake. Tani i gjithë fshati ka rrjetin kabllor trefazor.

Gjatë këtyre punimeve në këtë projekt KEDS ka bërë implementimin e 49 shtyllave të tensionit të ulët, 48 shtylla të tensionit të mesëm, 4308m rrjet i tensionit të ulët, dhe duhet cekur që janë edhe dy trafostacionet ekzistues.

Familjet që kanë përfituar prej këtij projekti janë rreth 100. Edhe për bizneset e vogla ky investim është i shumëpritur.

“Rrymën e kemi pasur të dobët si xixë. Shpesh kemi shku në komunën e Pejës me u anku për tensionin e dobët që kishim, por zgjidhjen na e bëri KEDS-i duke ndërru komplet rrjetin dhe tash po përdori salduesin që deri tani e kam pasur problem me shty në punë”, thotë  Osman Raci, pronar i autoservisit “ Xili” në këtë fshat.

Edhe konsumatorët e amvisërisë kanë qenë në hall me rrymën e dobët.
“Ma para s’ka pas shansë me punu bojleri, na është dashur me dhezë shporetin e druve në pikë të gushtit, e tash kemi shpëtu dhe jemi tepër të kënaqur me rrymën që na është përmirësu”, ka thënë Fiza Mazreku, banore e këtij fshati.

Gjatë realizimit të këtij projekti është bërë edhe demontimi i rrjetit të vjetër që ka kaluar përmes pronave private, duke i zhvendosur ato përreth rrugëve të lagjeve.

Projekte të këtilla janë duke u implementuar gjithandej Kosovës dhe sipas Planit Zhvillimor të Shpërndarjes së Energjisë, parashihet që deri në vitin 2025 vendi ynë të ketë një rrjet modern energjetik.

Agjensia e lajmeve ekonomia,  02.03.2017

Kompania Kosovare për Distribuim të Energjisë Elektrike (KEDS) ka njoftuar se ekipet e KEDS-it në distriktin e Gjakovës kanë nisur punimet në realizmin e projektit të dytë me radhë atë në TS- Llozica5.

Për shkak të rrjetit të vjetruar është parë e nevojshme që të intervenohet në këtë pjesë të komunës së Gjakovës.

Deri tash është ngritur dhe betonuar trafoshtylla. Janë ngritur gjithashtu edhe 4 shtylla të betonit 12 metra. Ekipet e KEDS kanë punuar edhe në rrjet të tensionit të ulet ku janë vendosur 8 shtylla të betonit 9 metwrsh.

Sipas inxhinierit të KEDS-it që po mbikëqyr projektin punimet po vazhdojnë ku planifikohet të vendosen edhe transformatorë, shtylla tjera, orman dhe përçues.

Punimet do të përfundojnë së shpejti, ku do të përfitojnë banorët që janë të kyçur në këtë rrjet elektrik.

Agjensia e lajmee ekonomia,  27.02.2017

Kryeministri Edi Rama, i shoqëruar nga Ministri i Energjisë dhe Industrisë Damian Gjiknuri dhe Administratori i Përgjithshëm i OSHEE Adrian Cela ishin në nënstacionin e Radhimës dhe Orikumit, të rikonstruktuara me fondet e OSHEE. Duke vizituar nënstacionin e vjetër, Çela tha se investimet nuk do të ndalen edhe në fshatra të tjera të zonës, duke mundësuar zëvendësimin e infrastrukturave energjitike të rënduara, me standarde të reja.

Ai gjithashtu u shpreh se linja e re e vënë në përdorim gjatë sezonit turistik të kaluar, bëri që për herë të parë të mos përjetohej një situatë problematike në furnizimin me energji elektrike.

“Është investim i vitit 1971, duket në çfarë situate është. Kemi investuar 60 milionë lekë të reja, me të ardhura të kompanisë, ku kemi fuqizuar transformatorin dhe kemi fuqizuar 5 çela të reja automatike. Këto investime janë me fondet e kompanisë, për linjën 35 kW dhe kjo është faza e parë.”

Për transformatorin e ri të vënë në përdorim, Çela shpjegoi se garanton cilësinë e furnizimit dhe ul numrin e defekteve. “Ky është investim i ri dhe transformatori i ri i fuqizuar që kemi vënë jashtë ,në të cilin kem i dhe një çelës rezervë që kur ka defekt njëri nga këta që furnizohet, kalohet te çela rezervë, pra, garanton cilësinë e furnizimit dhe ulet numri i defekteve.”

Për Kryeministrin Rama kapërcimet epokale në teknologji janë rezultat i reformës në energji. Kryeministri u shpreh se kontributet e konsumatorëve, po kthehen në investime për ta.” Të gjitha këto kapërcime epokale në teknologji janë rezultat i reformës në energji. Të gjitha këto janë kontribute të konsumatorëve që po kthehen në investime. Të gjitha këto investime do të garantojnë shërbimin cilësor me energji elektrike në të gjithë territorin e Republikës së Shqipërisë dhe ripërtëritjen e një rrjeti që në 85 % të tij është i moshës së elektrifikimit”, u shpreh administratori i OSHEE.

Nënstacioni i Radhimës, prodhim i vjetër i vitit 1971 dhe në gjendje tepër të rënduar, ishte ndër më problematikët në cilësinë e furnizimit me energji elektrike, në zonat turistike të Orikumit, Radhimës dhe fshatrat përreth saj si dhe Llogoranë, Bazën e Pashalimanit.

Sot, ky nënstacion, nyjë kritike në sistemin e shpërndarjes është tërësisht i rikonstruktuar, falë një investimi prej 60 milion lekësh të reja. Investimi ka bërë të mundur vendosjen e një transformatori të ri 35/10 KV me fuqi 10MVA me nivele tensioni të rregullueshme, me një rritje dyfish kapacitet si pasojë e rritjes së kërkesave për konsum me energji elektrike sidomos në sezonin veror.

Janë vendosur 5 çela të reja, prodhim i 2016-s, të cilat jo vetëm që garantojnë sigurinë maksimale të punonjësve gjatë kryerjes së operacioneve në punë, por rrisin njëkohësisht cilësinë e furnizimit me energji elektrike.

Paralelisht me Nënstacionin u rikonstrutuan linjat 35 kV të implementuara në vitet ’70.

Investimi për linjat Vlorë – Skelë – Ujë i Ftohtë – Rradhimë – Orikum arriti në një vlerë prej 65 milionë lekësh të reja.

Nënstacioni i ri i Dhërmiut

Për herë të parë në Dhërmi, në zonën më të frekuentuar turistike, është instaluar nënstacioni i ri energjetik 35/20/10kV, i cili i jep zgjidhje problemeve të shumta të furnizimit me energji për këtë zonë. Investimi me vlerë prej 140 milion lekësh u bë mbi një infrastrukturë (shtylla e përcjellës) të paprekur që prej vitit 1967. Nënstacioni garanton furnizimin me energji elektrike zonën e Palasës dhe të Dhërmiut.

“Investimin që kemi bërë në nënstacionin e ri në Dhërmi, për të garantuar furnizimin për zonën e Palasës dhe të Dhërmiut duke parë dhe në fokusin e investimeve të reja turistike që nisin në gjithë këtë zonë dhe rritet ngarkesa. Flasim për një linjë që ka qenë, kur kemi bërë investimin, kemi parë shtylla dhe përcjellës të vitit 1967. Pra, ishin të paprekura që nga viti 1967. Kemi bërë këtë investim që është 140 milion lekë të reja nga të ardhurat e kompanisë”, u shpreh Administratori i Përgjithshëm i OSHEE Çela.

Himara, nënstacioni i lëvizshëm

Për herë të parë, pas 25 vitesh Himara garantoi një sezon të suksesshëm turistik (2016) në furnizimin me energji elektrike. Kjo falë nënstacionit të ri dhe modern, të lëvizshëm, i montuar aktualisht në Himarë, investim me vlerë 200 milion lekë. Nënstacioni furnizon qytetin e Himarës, Qeparoin dhe zonën Dhërmi-Palasë.

Njëkohësisht me nënstacionin ka përfunduar edhe ndërtimi i linjës me nivele 35 dhe 20 kV nga Himara në Dhërmi (13 km me 45 shtylla), me vlerë investimi prej 247 milionë lekë.

Kryeministri Rama ishte për të parë nënstacionin së bashku me ministrin Gjiknuri dhe Administratorin e Përgjithshëm të OSHEE Adrian Cela.

Çela shpjegoi se nënstacioni i lëvizshëm, (portabël) është implementuar për herë të parë në Shqipëri dhe përbën një teknologji moderne.

“Këtu jemi për të inspektuar nënstacionin mobile që është implementuar për herë të parë në Shqipëri, është një teknologji e avancuar. Do ta vazhdojmë këtë lloj investimi që në zonat problematike mund të vendosim nënstacione të tilla, sepse kemi prokuruar 3 nënstacione të tilla dhe në zonën e Fushë-Krujës dhe në zona të tjera të Shqipërisë. Nënstacioni i ri që fillon investimi 10-20 kilovolt do të jetë më i madh dhe do ta spostojmë këtë nënstacion në një zonë tjetër problematike.”

energjia.al  27.02.2017