info@energjia.al

Kompania Kosovare për Distribuim dhe Furnizim me Energji Elektrike KEDS ka zbatuar projektin investiv të rradhës në bllokun “Dardania” në Pejë.

Bëhet fjalë për një investim mëse të nevojshëm. nga i cili pëfitues janë 1 mijë e 200 ekonomi familjare e biznesore.

Investimi ka bërë që një pjesë e madhe e Pejës të eliminojë problemet energjetike në furnizim kualitativ dhe stabil për çka është ndërtuar e instaluar rrjet elektrik komplet i ri.

“Është vënë një trafo me fuqi 630 kVA, janë vënë poashtu 50 shtylla të betonit të reja për tension të ulët, mbi 2 mijë metra kabllo kualitative si dhe tensionit të lartë i është bërë shtrirja nëntokësore”, thotë zëdhënësi i KEDS-it, Viktor Buzhala

Sipas tij ky investim ndikon në furnizimin me energji kualitative dhe stabile dhe se investimi është bërë sipas standardeve më të fundit ndërkombëtare.

“KEDS punon në tërë Kosovën me këto standarde”, thotë Buzhala.

Në mesin e 1 mijë e 200 ekonomive përfituese nga ky projekt është edhe familja Grapci.

Eron Grapci thotë se investimi ka qenë mëse i nevojshëm dhe shumë i qëlluar për këtë pjesë të Pejës.

“Rrjeti ka qenë total i vjetëruar me shumë probleme ndër vite. Tash investimi po shihet edhe me sy, por edhe ka ndikim pozitiv sa i përket tensionit stabil”, shprehet Grapci.

KEDS këto ditë në Pejë ka shtrirë projektet edhe në disa zona me rëndësi për këtë komunë dhe trevat përreth.

Agjensia e lajmeve ekonomia,  07.11.2017

-OSHEE, ka njoftuar nëpërmjet mediave se për shkak të punimeve që do të bëhen në nënstacionin Traktora, sot do të ketë ndërprerje nga ora 09.00-16.00.

Zonat që do të mbeten pa energji elektrike janë: Shkozë pjesërisht, Kodra e Kokonozeve pjesërisht, zona rreth Qytetit Studenti, Farkë, Porcelani pjesërisht, rruga Pasho Hysi pjesërisht, Kryegjyshata pjesërisht.

Kufizime të energjisë elektrike  do të kenë edhe zonat: Arkivi, Instrumentali, Reparti 8802, Poligrafiku, zona Uzina Traktorit, Kodra e Priftit pjesërisht, furnizim dytesor per Antenat e Televizioneve ne Dajt, Vilat Qeveritare ne Dajt, furnizim dytësor Televizioni News 24, zona prane Depos se Ujit , Garda, rruga Todi Shkurti pjesërisht, furnizim dytësor Burgu 325.

Shqiptarja.com  30.10.2017

Në periudhën janar-shtator, Operatori i Shpërndarjes së Energjisë Elektrike arkëtoi 48.1 miliard lekë, duke shënuar rritje në krahasim me të njëjtën periudhë të një viti më parë. Sipas të dhënave të OSHEE për 9-mujorin 2016 arkëtimet ishin në nivelin e 45.7 mld lekë, çka do të thotë se këtë vit janë mbledhur 2.4 miliard lekë më shumë.

Paralelisht me rritjen e arkëtimeve, humbjet në rrjet kanë pësuar rënie, duke u regjistruar në nivelin e 26.8%.  Ky nivel për 9-mujorin e 2016-ës u regjistrua në masën 27.6% apo 0.8% më shumë se këtë vit. Ndërkaq, në krahasim me 8-mujorin e këtij viti humbjet në rrjet kanë pësuar një rritje të lehtë, me 0.1%.

Një muaj më parë, rrejti i shpërndarjes raportoi edhe një ulje të borxhit, i cili deri në fund të gushtit zbriti në 49.5 miliardë lekë, nga 67.8 mld lekë që ishte për fatura të periudhës 2007-2014. Reduktimi i tij erdhi edhe si pasojë e zbatimit të skemave lehtësuese për pagesat me këste të detyrimeve të prapambetura.

Megjithatë, kompania nuk është në situatën më të mirë financiare, për shkak të thatësirës së tejzgajtur, çka ka diskutuar nevojën për blerje të energjisë, me qëllim plotësimin e  nevojave të abonentëve.

Niveli i humbjeve të energjisë në rrjet (9-mujori)

26.8%          2017

27.6%          2016

Niveli i arkëtimeve (9-mujori)

48.1 mld lekë 2017

45.7 mld lekë 2016

Scan Tv,  22.10.2017

Pas një muaji e gjysmë punë intensive nga punëtorët e KEDS-it, ka marrë formën përfundimtare projekti i rikonstruimit të rrjetit në Trafosatcionit Shajne 2 në komunën e Dragashit.

Gjatë kësaj pune është bërë ndërrimi komplet i rrjetit të vjetër me atë të ri dhe janë zëvendësuar përçuesit e paizoluar me rrjet të ri kabllor ajror.

Janë vendosur shtylla të betonit në vend të atyre të drurit që kanë qenë të dëmtuara dhe kanë paraqitur rrezik.

Me këtë është shtuar shkalla e sigurisë, si dhe janë zvogëluar humbjet teknike të tensionit të mesëm.

Janë gjithsej 106 familje të kësaj ane që do të përfitojnë dhe do të kenë tension stabil.

Ky projekt ka 3 dalje të tensionit të ulët.  Sipas koordinatorit të Mirëmbajtjes, z.Qemal Mehmeti , punëtorët e KEDS-it kanë punuar pandërprerë.

“Me këtë projekt është bërë edhe balancimi i daljeve të tensionit të mesëm, si edhe aty ku ka qenë e nevojshme është bërë edhe dislokimi shtyllave nga oborret e shtëpive. Mendoj se me këtë projekt, benefitet si për konsumatorët ashtu edhe për kompaninë janë të konsiderueshme”, ka thënë Mehmeti.

Materiali i implementuar punëtorët e KEDS-it ka qenë mjaft  voluminoz. Janë vendosur dhjetëra shtylla betoni, janë shtrirë mijëra metra kabllo,  si dhe një sasi e madhe betoni dhe gypave nga ai.

Ky nuk është i vetmi projekt i KEDS-it në këtë rajon. Në realizim e sipër janë punimet në rrjet  në fshatin Blaç të kësaj ane.

Agjensia e lajmeve ekonomia,  18.10.2017

Në listën e prioriteteve për investime nga KEDS përfshihet edhe zona e Skenderajt. Në fshatin Makermal të këtij qyteti sapo ka përfunduar projekti për përmirësimin e rrjetit energjetik nga KEDS-i.

Janë 130 familje që po gëzojnë këto përfitime nga ky investim.

Për realizimin e këtij projekti, KEDS këtu ka vendosur 154 shtylla të tensionit të ulët, 27 shtylla të tensionit të mesëm dhe gjithashtu janë shpërndarë 11.9 km rrejt të tensionit të ulët dhe 11,5 km rrjet të tensionit të mesëm.

Nuredin Xhinovci 76 –vjeçar nga ky fshat, shprehet i entuziazmuar për ndryshimet në përmirësimet energjetike në fshat dhe largimin e rrezikut që e kanë pasur brenda oborrit të shtëpisë.

“Rrezikun e kena pasur tepër të madh, trafon e kena pas në oborr që nga vitin 1971, është dashur me deviju murin për me ia bë vendin trafos.  Veç 20 cm afër shpisë i kena pas telat e tensionit të naltë. Gjithë jena tut mos po na ndodhë naj e keqe. Me ardhjen e KEDS-it na u ka largu edhe frika, na kanë largu  trafon prej oborrit. Na kanë vnu një trafo tjetër të re në rrugën jashtë. Na kanë shpëtu se jena kon në rrezik. Tash jemi shumë të kënaqur me KEDS-in dhe rrymën e kemi shumë stabile. Pa dritë s’ka jetë”,  shprehet i kënaqur, Xhinovci.

Në Makermal projekti ka përfshirë dy lagje. Në lagjen Guxhuli janë ndërruar të gjitha shtyllat e vjetra dhe janë vendosur krejtësisht të reja dhe me kabllo të izoluar, ku është evituar rreziku përgjithmonë. Kurse në lagjen Xhinovci është vendosur një trafo e re si dhe janë ndërruar të gjitha shtyllat që kanë qenë me përçues të zhveshur dhe të rrezikshëm për banorët e asaj lagje, dhe tani janë vendosur shtylla te reja me kabllo te izoluar (bistekë), ku është përmirësuar dukshëm tensioni.

KEDS po vazhdon projektin e investimeve nëpër të gjithë territorin e Kosovës në kuadër të Planit Zhvillimor, duke pasur prioritet  lokacionet me rënie të tensionit.

Agjensia e lajmeve ekonomia,  10.10.2017

Fshati Dyz i Podujevës është përfitues i projektit investiv nga KEDS. Rreth 100 familje dhe biznese të cilat ndër vite kanë pasur problem serioz me tension të ultë, si pasojë e rrjetit të vjetëruar dhe lagjeve të shpërndara, tashmë janë përfitues të këtij investimi.

“Trafo e re 250 kVA, vendosja e rreth 60 shtyllave të reja të betonit për tension të ulët dhe mesëm, 2 mijë e 200 metra kabllo janë pjesë e investimit që KEDS e shtrinë në këtë anë.”,  thuhet në njoftimin e KEDS-it.

Efektet e këtij investimi kanë ndikimin parësor në kualitetin dhe stabilitetin e furnizimit për ekonomitë familjare dhe biznesore në këtë pjesë të Podujevës, ndërsa pashmangshëm është ulur në zero ekspozimi ndaj rrezikshmërisë dhe kontaktit për banorët.

Egzon Bllaca banor i këtij vendi thotë se një projekt i tillë i ndihmon kualitetit të jetës së komunitetit këtu.

“Ka qenë koha e fundit për këtë investim. Punët janë kryer mirë sipas asaj që shihet dhe kemi informacione se ky projekt do të vazhdojë. Edhe kjo anë e meriton një jetë më kualitative”, thotë Bllaca.

Duke folur për këtë projekt zëdhënësi i KEDS-it Viktor Buzhala shton se ky investim i KEDS-it plotëson nevojat e konsumatorëve. “Ky investim është edhe një zotim i KEDS-it për të përmbushur obligimet për nevojat energjetike të konsumatorëve në këto anë”, tha Buzhala.

Investime të tilla, gjithnjë sipas planit dinamik të paraparë në komunën dhe rajonin e Podujevës sikur në tërë Kosovën po vazhdojnë nga KEDS.

Agjensia e lajmeve ekonomia,  28.09.2017

Në kuadër të planeve investuese nga Kompania Kosovare për Distribuim dhe Furnizim me Energji Elektrike-KEDS, është realizuar një projekt në komunën e Pejës, në një prej zonave më me rëndësi për qytetin, që është ‘Dardania’.

Ky investim ka ndikimin parësor në kualitetin dhe stabilitetin e furnizimit për ekonomitë familjare dhe biznesore në këtë pjesë të Pejës, ndërsa pashmangshëm është ulur në zero ekspozimi ndaj rrezikshmërisë dhe kontaktit si për banorët ashtu edhe për vizitorët në këtë pjesë të Pejës.

“Mbi 40 shtylla të vjetra për tension të ulët janë zëvendësuar me të reja, të betonit. 1 mijë e 500 metra kabllo nëntokësorë janë vënë dhe e veçanta në këtë investim mbetet se janë vendosur 15 kaseta, që bëjnë të mundshëm eliminimin e kabllove ajrore të tensionit të mesëm dhe të lartë”, zëdhënës i KEDS-it, Viktor Buzhala.

Buzhala thotë se konsumatorë të shumtë përfitojnë në kualitet, tension stabil dhe ulje të rrezikshmërisë nga ky projekt investiv.

“Janë 300 ekonomi familjare që kanë përfituar nga ky projekt i yni, por në kuadër të kësaj shifre ka edhe shumë ekonomi biznesore në këtë anë”, shton Buzhala.

Adon Dina, ndërmarrës në biznes familajr në këtë zonë të Pejës vlerëson investimin që është bërë këtu nga KEDS.

“Është investim që i’a vlenë për të gjithë këtu, mirëpo për ne që zhvillojmë biznes sidomos prodhues ose me produkte të ushqimit, kjo është shumë me rëndësi”, thotë Dina.

KEDS gjatë të kësaj periudhe ka investuar edhe në pjesë të tjera të komunës dhe rajonit të Pejës.

Agjensia e lajmeve ekonomia,  21.09.2017

Fokus i investimeve nga KEDS kësaj radhe ka qenë edhe fshati Stanoc i Drenasit. Pas përfundimit të projektit, janë plotësuar të gjitha nevojat energjetike dhe është rritur siguria për banorët.

Banorët shihen të gëzuar teksa flasin për investimet që ka bërë KEDS-i këtu.
Bajram Lika, banor i fshatit, thotë se me gjendjen e tanishme energjetike janë tejet të lumtur.
“Jo të kënaqur, po të shashtrisur jemi me gjendjen energjetike që kemi tani. Veç kush s’po don me pranu këtë realitet, se tash gjithçka është më së miri”, ka  thënë ai. Bajrami e ka edhe një këshillë për të gjithë konsumatorët.
“Është mirë edhe me u mundu me kursy nga pak, sidomos ne në katund që po nxehemi me dru”, ka thënë ai.

Për këtë projekt, në fshat është implementuar nga ana e KEDS-it një trafo e re me fuqi prej 160 kVA, dhe janë riparuar dy trafot ekzistuese. Gjithashtu janë vendosur edhe 82 shtylla të reja tensionit të ulët edhe 49 shtylla të tensionit të mesëm.  Është investuar në rrjetin e tensionit të ulët 9,7 km dhe 3,5 km të tensionit të mesëm.

Gjatë punës janë hequr të gjitha shtyllat e vjetra dhe janë zëvendësuar me të reja dhe përçuesit e vjetër janë zëvendësuar me përçues të ri, me kabllo të izoluar, ku edhe seksioni i përçuesve është vendosur më i madh dhe që i plotëson nevojat e banorëve për një kohë relativisht më të gjatë.

Edhe për Xhavit Ramën, po ashtu banor i këtij fshati, stabilizimi i energjisë elektrike është i mirëseardhur.
“Rryma është tepër e mirë tash, rreziku nuk ekziston. Kabllo të vjetra më nuk të sheh syri kërkund. Gjithçka është mirë”, ka përfunduar Rama.

KEDS po vazhdon me investime, dhe tashmë ka rregulluar tensionin dhe infrastrukturën energjetike për shumë vendbanime anekënd Kosovës.

Agjensia e lajmeve ekonomia,  19.09.2017

Operatori i Shpërndarjes së Energjisë Elektrike do të investojë 153 milionë lekë për ndërtimin e rrjeteve elektrike në Golem dhe Vlorë. Kompania ka hapur dy procedura për tenderim, përkatësisht me fondet limit 79.5 milionë lekë dhe 73.5 milionë lekë.

Projekti i rrjetit elektrik të zonës së Golemit përmban linjat e tensionit të mesëm 20kV dhe kabina transformacioni me tension 20.0.4kV. Ndërhyrja konsiderohet e domosdoshme për shkak të gjendjes së keqe teknike, të mbingarkuar dhe me humbje të larta.

Zona prej 4  km² shtrihet nga Shkëmbi i Kavajës deri në Qerret dhe përfshin rreth 12 mijë abonentë, numër që pritet të rritet ndikuar nga zhvillimi intensiv i ndërtimeve në zonën bregdetare.

Ndërkohë në Vlorë, OSHEE ka përgatitur projektin për ndërtimin e rrjetit të tensionit të mesëm, i cili përshin edhe ndërtimin e disa kabinave të transformacionit dhe rikonstruksionin e kabinave ekzistuese.

Kabinat shtesë do të vendosen në pika të caktuara, me qëllim uljen e ngarkesave.

Procedurat janë të hapura deri më datë 10 tetor, ndërsa punimet për këto projekt do të zgjasin 4 muaj nga dorëzimi i sheshit.

Scan Tv,  18.09.2017

Një prej premtimeve të kryetarit të Prishtinës, Shpend Ahmeti ishte zgjerimi i rrjetit të ngrohjes. Por, ky premtim tashmë po mbetet i parealizuar. Në tetor nis sezoni i ngrohjes. Po në tetor mbahen zgjedhjet lokale, por nuk do të ketë shtrirje të rrjetit të ngrohjes në asnjë lagje të Prishtinës.

Dy lagjeve urbane, “Mati 1” dhe Kalabrisë i ishte premtuar se do të lidhen me Termokosin. Megjithatë, ndërmarrja komunale nuk e ka në projekt një gjë të tillë.

Zëdhënësja e Termokosit, Afërdita Uka-Fejzullahu ka thënë për Insajderin se zgjerimi i rrjetit të ngrohjes është në fazën e tretë të projektit të koogjenerimit e cila është duke u zhvilluar në bashkëpunim me Komisionin Evropian.

“Aktualisht Komisioni Evropian është duke zhvilluar procedurat tenderuese për këtë çështje. Pra, realisht këtë vit nuk do të ketë zgjerim të rrjetit të ngrohjes për lagjen ‘Kalabria’ dhe ‘Mati 1’, ka thënë Uka-Fejzullahu.

Ajo ka treguar se të gjitha detajet sa i përket zgjerimit të rrjetit do të bëhen publike pas përfundimit të këtyre procedurave, në bashkëpunim të plotë me Komisionin Evropian dhe donatorët tjerë të këtij projekti.

Kryetari i komunës së Prishtinës, Shpend Ahmeti u kishte premtuar qytetarëve se gjatë mandatit të tij qeverisës të gjithë do të lidhen me ngrohje qendrore.

“Mund të them se na pret një vit pa probleme me ngrohje, mirëpo jemi të përgatitur për të gjitha skenarët. Dua të potencojë se me kyçjen e bllokut B2 në sistemin e ngrohjes ka përfunduar faza e parë e sistemit të koogjenerimit. Tash do të vazhdojmë me fazën e dytë që do të jetë riparimi i 50 nënstacioneve në Komunën e Prishtinës. Kjo na siguron ngrohje edhe më cilësore”, kishte thënë kryetari Ahmeti.

Gjatë vitit të kaluar shumë pjesë të kryeqytetit si lagjja Kodra e Diellit, një pjesë e Katedrales dhe Universiteti procesi i ngrohjes kishte filluar me një javë vonesë.

Sezoni i ngrohjes sipas ligjit për ngrohje dhe rregulloreve të ZRRE-së, varësisht nga kushtet klimatike fillon më 15 tetor, ndërsa përfundon më 15 prill të vitit vijues.

Telegrafi,  06.09.2017